Matiyu 3

DABBARDA KIDA ISAYE

Nawi Yahayaye Isaro jawal dabbarduwu

(Mar 1.1-8; Luk 3.1-20; Yah 1.19-28)

1Jaman adǝn Nawi Yahaya Kasalama fǝlediye karaa cidi Yahudiyayen jamaro kawuɍi cǝdde: 2«Tǝmmowo, *nodo bargaa Mai Samemaye del karǝnjǝna!» cǝni kǝrga. 3Tima kam duwon Kǝmande kuren ci Nawi Ishayayen kǝlanjun mana cǝdǝnadǝ wo. Tiye:

«Karaan kam laa kowo sapce:

“Kǝmandero jawal dabbargǝnowo,

koduramnju cǝkko dewo!”

cǝne wormaji.»#Ish 40.3

4Yahayaye kajǝmunjudǝ kanduɍi kaɍimoyen caaada, canjanju ye ngirin tikkerǝna. Kǝmbonju ye kawi-a kǝmagǝn-a. 5Daji am bǝrni Jerujalembe-a lardu Yahudiyaye sammaye-a cidi bǝrǝm Jordaniye ngaye-a nanjuro isane 6biwunja wuljane curo bǝrǝm Jordaniyen tayiro kasala tuwaye kiddo.

7Yahaya Farisawa-a Sadusiya-a kada tayiro kasala tuwaye cǝddoro nanjuro isairo kirunniya, tayiro: «Nayi kaduwu fusiyayeso! Wundu nayia ajawu isidǝro kasoworo galanja? 8Awo tuwa jireye fǝlejiyisoa dewo! 9Bare karwundon: “Andi kaduwu Nawi Ibrahimbe,” wulluwwi. Nayiro wulnjagakki, Alaye kǝnduwonju dongur kauye anilan Nawi Ibrahimbo kaduwu alaktuwuye mbeji. 10Akko kǝrmamaro bewodǝ fǝrdu kǝskayen gǝnaada. Kǝska fi duwon tada ngǝla cakkiwawodǝa caljane kannuro fijagai.

11«Wudǝ tǝmmuwwa nangaro ingilan nayiro kasala ngeddǝkko, amma kam laa wua kǝnduwon kosǝna sunonju tuluwoma tikkǝni ngawonin isi. Tidǝ Ruhu Alaye-a kannu-alan nayiro kasala#3.11 kasala kannuye - Ajawu gǝnaduwu-a bone nja-a tayirro kalaktu-a. njaddi. 12Mukkonjun kǝmo laladuramba na wasturamnjuyero ise algama-a kalaɍi-a firji. Algamanjudǝa culore bǝralan gǝnaji, amma kalaɍidǝa kannu tǝmmaro nuiwawolan warji,» yeno.

______________________________________________________________________

Kalmaram: Nodo bargaa Mai Samemaye

Ala Mai Kura same-a cidi-a cunodi yaye, am duniaye samma gǝni kasaccane tiro daraja cadi. Sa Ala Ruhunjua cakke Bargaande Isaro jǝpciye tia Almasiwunjuro galajǝnadǝn, Isa jiɍi bǝɍinnin nodo bargaa Mai Samemaye duniaro tarduwu badiyeno. Isaye am samma kasacca tuwa cado Alaro dau koljaa yeno. Kam kasacce mananju ngoje daunju koljiya, Ala ye tia ardije biwunju cinje jamanjuro kǝljiye barga dǝpciyi. Ngaiman nodonju bargaa duniaro dunoaro tardiyi. Yim Isa Almasiwu walde duniaro isiya duwon, Alaye nodonju bargaa tǝgǝmbo napci. Daji Isa Almasiwudǝ adamgǝna sammaro shara cǝddi. Adǝgaima am duwon mana Alayedǝa kasaccannidǝro wowom kannuye gǝnajiyi, amma jama Alayedǝa jannaro cakke na Alayen sawisoro dasayi.

______________________________________________________________________

Ruhu Alaye Isaro jǝptuwu

(Mar 1.9-11; Luk 3.21-22)

13Daji Isa cidi Galileyen cije bǝrǝm Jordaniyero Nawi Yahaya tiro kasala cǝddoro kadio. 14Yahaya tiro daptuwuro maje: «A! Awiro gǝle naniro isǝmidǝ? Ngǝlanjudǝ, nima diye wuro kasala sǝddǝmi,» yeno. 15Amma Isaye tiro: «Kǝrmadǝ kasadde, dalilnjudǝ awo jire sammaa diodǝ andiro jussǝna nangaro,» yenniya, Yahaya kasatkeno.

16Tiro kasala cǝdde Isa ingidǝlan kiluwunniyama, same farakko fǝrǝmde Ruhu Alaye alama bullam gai tiro jǝpciyi kiro. 17Koro samelan kowo nukce: «Adǝma Tadani wo, tia raakkǝna. Tiramnin jauro karwuni kǝjijǝna!» yeno.

Поточний вибір:

Matiyu 3: kby

Позначайте

Поділитись

Копіювати