Luka 15

Mbawentam ti Yag byibyinn

(Matiyu 18:12-14)

1Usir iki ande ti ku mbe aser akwe, ti ande ti ku putsa-ba icwe be ru ba uwog Yesu ti a u fxen ira-wu. 2Ande ti kumbub Farisi ti ande ti ku kwen na ande Icwe nwunn u ku pwen unju tetso risu-wu baa, “Unde wune ku kyang te ande titibi u ku ci wuci te ba!”

3Ikyaen yine Yesu sunn na ba ira u ri te ba baa, 4“Asiti unde iki uwae-ni a site iwentam mae itsong, ama kinjo uwae-yi a yag byinn, awu u ya ayi ti tsitsi ne ta u ka sha awu kinjo ti yag byibyinn ne uwae kutur, se iken ti awu a tu pu wu awu. 5Kiye ti awu a sha tu pu wu mbawen kinjo wu ti yag ta ne, awu u ye wu nae tsa ukwae ti utob ti tsen 6u su wu ru ka yi kununn u ru ka kunn byir arwan-wu ti ande ice-wu u ri te ba baa, ‘Ni tsen yae m utob ikyaen na mbawen-m ti yag bibyinn né ame tu pu me awu.’ ” 7Yesu ri baa, “Ame ku ri te ni, ayi u si ahan ama, asiti unde kinjo ti ku nde ikentitibi a ya ikentitibi-wu ta, apupwen akwen a u tsen utob risu-wu skeb pu ba ande mae inje ka mbe rijwe asu itsongnje ti ku sae risu-ba baa, aba na ku nde-ba ikentitibi be.

Kiser ti Yag bibyinn

8“A baa, unda iki site acwur aser azurfa rijwe, kinjo uwae-yi ama yag byinn, awu u nde rimang? Awu u teya wu ta-wu be. Awu u bae urwa u fen kusog-wu u sha wu sku se ti awu a tu pu wu awu. 9Kiye ti awu ru ka kyá wu, awu u kunn arwan-wu ti ande ice-wu ba funn u ri te ba baa, ‘Ni tsen yae m utob ikyaen riyaen aser-m ti yag byinn ne ame kya pu m awu.’ ” 10Yesu ri baa, “Ayi si ahan ama atom Rimam ti apupwen ku tsen utob risu unde kinjo rikaen ti ku nde ikentitibi ti kafe isim ta ikentitibi-wu u kafe ba uwog Rimam!”

Umbae ti Yag byibyinn

11Yesu ri kyi cwucwo baa, “Unde iki ta atang u site anyisu ti arom ifaen. 12Uyin-wu ti kitinying ri te itse-wu baa, ‘Itse, kata na m kutunn-m uwae rifunn-fu.’ Itse-wu cwe u pu rifunn-wu ka na anyisu-wu aba. 13Isim usir iki, uyin-wu ti kitinying byir tag isu-wu meme, u ru yi uten ti fengo ti rwen. Ti awu ka sang atang, awu pu aser-wu wen kuskwab kuskwab risu iken ti utense. 14Isim ti awu wen tag pu wu iken-wu ti awu site, rimenn pu uten atang si-yi ti ti ri be. Rikaen ye wu, awu shanum ti iken ti awu u ci. Awu nwùnn tag ti rimenn.

15“Ikyaen yine, awu nwunn ru ka sha wande uwog unde iki ti uten atang. Unde wu tom wu ru ti wu na ru ka shi ingog-wu ti ta ufang. 16Rimenn ku wen wu, ka kwar ti awu ku sha ti wu u kub acwu ikyir ti rogo ti ingog ku ci, amaa ande iki sha na-ba awu iken iki ti awu u ci be. 17Ricwunnkyi-yi awu ru ba tang ira ti tinyang riyaen utob-wu baa, ‘Meme ande ti ku nde wande na itse-m uwae kununn ku ci ku kyaen, ama ame ku cwu rimenn ike! 18Ame u nwunn ru ka tu itse-m u ri te wu baa, “Itse, ame nde pu me ikentitibi uwe Rimam ti kutxuwe-fu. 19Ame ko-m ti fu u kunn m baa umbae-fu cwucwo be. Ame mbyae ajwo, nda m wande pangma unde ti ku nde na fu wande kiser.” ’ 20Ikyaen yine awu nwunn u kafe ku ru yi kununn.

“Ti ite-wu nungye wu ku ba ti fengo ti rwen, risi ye wu. Awu ter ru, u ka wangshi wu, u ye wu bur utob. 21Umbae wu ri baa, ‘Itse, ame nde pu m ikentitibi uwog Rimam ti uwog-fu. Ame ko-m ti fu u kunn m baa, uyin-fu cwucwo be.’ 22Ama itse-wu kunn apyi-wu u ri te ba baa, ‘Ni ter ru ka pu arun-m ti nyang skeb tag ba si umbae-m wune. Ni sha kunyang ba fwa-wu kujwo, ti ni pu apwa ba tso wu afxen. 23Isim ayine, ni ye umbae indag wen, ti ti nde ukwab u kam ashwu! 24Umbae-m wune ti cwu mam cwu mam ru ba shwur pu wu. Awu yag byibyinn, ama tine a tu pu ba wu.’ A nwunn ku nde ukwab.

25“Uyin-wu ti ndufu ta uwae risaen kiye ti inja-wu ru ba. Ti awu kafe ku ba yi kununn, awu sa sa sa ba ku fer kununn u fxen a ku byinn itang u ku se ise. 26Awu kunn kinjo uwae apyi itse-wu u rang wu baa, ‘Iken yi si imi ti ande ku nde uwae kununn?’ 27Upyi wu ri te wu baa, ‘Inja-fu ti ru ba. Ayine si iken ti nde né itse-fu wen umbae indag ti rikem ikyaen ti, inja-fu kafe ba sang pu wu kununn ti kujimshwur.’

28“Ama rinae ye umbae ti ndufu wune. Awu shaen baa, awu u sang ka-wu uwae kununn cwucwo be. Ama itse-wu ru ba jwam wu ti wu na ru yi kununn. 29Awu ri te ite-wu baa, ‘Afu nung yi ama meme asang ti ame nde wande na fu pangma upyi u bom-m risu te fu ko tikiyib be. Meme iken yine ti ame nde, imi ti afu nde na m? Ko umbae mbawen ahan, afu nda-fu ame ti ame ti arwa-m ā tsen utob te atso be! 30Ama umbae-fu awune ti pu rifunn-fu ru ka yaen mbub risu iyaen u ka kafe ba, afu ye umbae indag ti rikem wen na wu!’ 31Itse-wu ri te wu baa, ‘Uyin-m, afu ta te m uwae kununn ike ko kiye titini, meme iken ti ame site si ana-fu. 32Ama ati u nde kang ukwab u kam ashwu, ikyaen ti, inja-fu wune cwu mam, ama tine awu site unyang. Awu yag bibyinn, ama tine a tu pu ba wu.’ ”

Поточний вибір:

Luka 15: kubNT

Позначайте

Поділитись

Копіювати