Yohana 1

Yesu Si Ira Unju Rimam u Si Uwog ti Saen Kyag

1Ti kucangtsi ti Rimam mam utense, Ira Unju-wu ta pu wu atang. Ira Unju-wu ne, awu ti Rimam ta te atso. Ira Unju-wu wune te Rimam si iken kinjo. 2Bag ti kucang, Ira Unju Rimam te Rimam ta te atso.

3Ira Unju Rimam wune ti si fengo ti Rimam kyae meme iken uwae utense ike. Rimam kyae-wu iken iki be, se yi fengo Ira Unju-wu awune. 4Meme iken ti site unyang tu unyang-yi uwog Ira Unju Rimam wune. Unyang wune nda ande ti utense sae uwog paenine. 5Uwog ti saen kyag wune ku cwe uwog ti kufub, ama kufub jim fob-wu awu be.

6Rimam tom unde iki ru ba, rinyi unde wu si Yohana. 7Awu ru ba ti wu ri te ande ira risu uwog ti saen kyag. 8Awu ti risu-wu si-wu Uwog ti Saen Kyag be, awu ru ba ti wu ri ira risu unde wu ti si Uwog ti Saen Kyag. 9Kiye wu, Uwog ti Saen Kyag ti kubenti sang ku ba yi uwae utense. Awu ti ku ci ku jaen wurwur risu ande meme.

10Ti kucang, awu ta pu wu uwae utense. A kyae utense ruye uwog-wu, ande ti utense nungye-ba wu be. 11Ayi si uten-wu ti awu ru ba sang atang, amaa ande ti uten-wu kyangte-ba wu be. 12Ko ti ayi si ahan, meme ande ti paembe wu u ru uwae kinjo uwog-wu, awu nda ba kuko ti a na kafe anyisu Rimam. 13I si-yi unda iki ti kyaen rishwu u mbae ba be, ira unde fa-yi atang be. Rimam ti risu-wu ti si Itse-ba.

14Ira Unju Rimam wu sa ijwe rimenn-ti ande u ru ba som kutampwa-ti uwae kiye kpang. Ati ama nungye pu ti riyinn-wu. Ayi si riyinn ti si ana Umbae kinjo ti ruye uwog Itse-wu ba. Awu munn ti ayibrisi ti kubenti.

15Yohana ri ira risu-wu u ya iskin baa, “Awune si Unde wu ti ame ri te ni baa, awu na ku ba isim-m, amaa awu si undufu-m, ikyaen ti, ti ti a mbae-ba ame khika be, awu ta pu wu atang.”

16Awu ku nda ti rinyangwae risu rinyangwae, ruye uwae itinyang-wu ti ititsikunn-yi ta-yi be. 17Uwog Musa ati tu Icwe Rimam, amaa uwog Yesu Kristi ati tu rinyangwae ti ira ti kubenti. 18Unde iki ta-wu ti nung ji pu wu Rimam be. Umbae-wu kinjo-wu amam, awu ti risu-wu ti si Rimam, ku som rinwan Itse-wu. Awu ti nda ande nungye Rimam.

Yohana Unde ti ku Nde na Ande Batisma

(Matiyu 3:1-12; Markus 1:1-8; Luka 3:1-18)

19Kiye iki ande ndufu Mbayawuda ti ta Urushelima tom ande ti imbyi-ba ti ande ti ku nde wande kusog Rimam ru yi uwog Yohana ti a na ka rang wu ira baa, “Afu si aye?” 20Awu tam-wu aba ira iki be, awu ri te ba farang baa, “Ame si-m Unde wu ti Rimam Tsab Tsi be.” Awu ri ira yine uwe ande meme. 21Ama aba rang kyi wu ira cwucwo baa, “Ayi a si ahan, afu si Eliya#1:21 Eliya Mbayawuda sa tsi baa, Eliya na u kafe ba ti unyang itawe Unde ti u nwangru utense u ba. a?” Awu ri baa, “Ame si-m Eliya be.” Aba rang wu cwucwo baa, “Afu si unde wu ti ku ya iskin ira Rimam nee ati som ku ji wu a?” Awu ri baa, “Iyee.” 22Ama aba rang kyi wu baa, “Afu si-fu aye ama? Ati ku sha ti ti na u tu amsa ti ti u sa ru ka ri te ande ti tom ti ru ba. Afu ri baa imi risu-fu?” 23Ama Yohana sa ira Ishaya atom Rimam u sa ri te ba baa, “Ame si unde ti tsi uwae kutur u ku ya iskin baa, Itsekuru na ku ba, ni ndab nyang fengo ikyaen-wu.”

24Ande ti tom ande bane ru ba si ande ti kumbub Farisi. 25Aba rang wu baa, “Asiti afu a si-fu Unde wu ti Rimam Tsab Tsi be u si-fu Eliya be u si-fu unde wu ti u ru ba ya iskin ira Rimam be ama, imi ti nde ne afu ku nde na ande batisma?” 26Yohana ri te ba baa, “Ame ku nde batisma-m ti ambyi, amaa unde iki ta kutampwa-ni ti ani nung-ni awu be. 27Awu ti si unde ti u ru ba isim-m. Ame ko-m ti m u tunn apwafxen-wu be.”

28Iken yine nde kiye ti Yohana ta Betani u tsi ukunn unyim ti Yordan u ku nde na ande batisma atang.

Yesu Kristi Umbae Mbawen na Rimam

29Ucwefam kiskinn Yohana nung Yesu ru ku ba yi uwog-wu. Awu ri baa, “Ni sae unde ti ru ku ba ne. Awu ti si umbae iwentam Rimam ti u su ikentitibi na ande ti utense ru. 30Awune si unde wu ti ame ri ira risu-wu baa, unde iki na ru ku ba isim-m ti rurob-wu skeb pu wu ana-m, ikyaen ti, ti ti a mbae-ba ame khika be, awu ta pu wu atang. 31Ti kucang ame ti risu-m nung-m awu be. Iken ti sa m ba si ikyaen ti ande ti Isirela na nungye wu.”

32Yohana ri ira risu-wu uwe ande baa, “Ame nung Kusung Rimam si apupwen ba pangma kikwae u ba som tsa risu-wu. 33Ti kucang-yi, ame ti risu-m nungye-m awu be. Rimam tom me ba ti m nde na ande batisma, ama awu ri te m baa, unde ti afu a nung Kusung Rimam si ba som tsa risu-wu, awu ti si unde wu ti u nde na ande batisima ti Kusung-m. Ama awu ri baa, ‘Unde ti afu nung Kusung-m si ba som tsa risu-wu, si unde wu ti u nde na ande batisma ti Kusung-m.’ 34Ame nung pu m iken yine ti ayib-m. Ame ku ri te ni kubenti baa, unde wune si Umbae Rimam.”

Yesu Kunn Ande ti Tawe ti Putsa-wu

35Ucwefam-yi Yohana tsi te ande ifaen ti awu ku kwen na ba iken atang. 36Ti awu nung Yesu kyang ikyin ku ru awu ri baa, “Ni sae umbae iwen na Rimam ta akwen ne.”

37Ti ande ifaen abane fxen ira yine aba nwunn u ru ka putsa Yesu. 38Yesu kafe uwe u sae ti aba putsa wu, ama rang baa, “Imi ti ani ku sha?” Aba rang wu baa, “Rabbi, afu ku nae-fu aka?” (Imbyi “Rabbi” baa, unde ti ku kwen na ande.) 39Awu ri te ba baa, “Ni ru ba nung.” I si aser inje ti ureb ti aba ku ri ira yine. Aba ru ba nung uwog ti awu ku nae atang u som te wu atang pu usir te.

40Unde kinjo uwae ande ifaen aba ti fxen ira ti Yohana ri risu Yesu titawe u ru ba putsa-wu, rinyi-wu si Andarawu. Awu si inja Siman Bitrus. 41Ti awu fxen ira Yohana ne, awu nwunn ti ritsen u ru ka tu inja-wu Siman u ri te wu baa, “Ati tu pu ti Mesiya wu.” (Imbyi “Mesiya” si Awu ti Rimam Tsab Tsi#1:41 Awu ti Rimam Tsab Tsi Uwae unju Mbahelene, ira yi si “Kristos” ti si rinyi ti Mbayawuda fwa ukwe tiyang ti aba sa uwae tsi baa, awu na u ba nwangru ba kujwo Mbaroma.). 42Ama awu pu wu ru ba tu Yesu. Yesu sae Siman sae sae u ri baa, “Rinyi-fu si Siman, umbae Yohana. Tine a u kunn fu baa, Kefas.” Kefas si si Bitrus ti imbyi-yi si kutxú.

Yesu Kunn Filip ti Nataniyel

43Ucwefam-yi Yesu sa uwae tsi baa, awu na u nwunn ru yi uten ti Galili. Ti awu ku ruru, awu tu unde iki ti rinyi-wu si Filip u ri te wu baa, “Putsa m!” 44Filip wune si unde ti uten ti Betisaida, uten na Andarawu ti inja-wu Bitrus. 45Filip ama ru ka tu Nataniyel u ri te wu baa, “Ati tu pu ti unde ti Musa ti ande ti ku ya iskin ira Rimam bae ira risu-wu ti kute. Awu si Yesu unde ti Nazareti. Ite-wu si Yusufu.” 46Nataniyel rang wu baa, “Kikin ti tinyang u ruye uwae uten ti Nazareti njaa?” Filip ri te wu baa, “Ru ba nung.”

47Ti Yesu nung Nataniyel ru ku ba yi uwog-wu, awu ri ira risu-wu baa, “Ni sae umbae Isirela ti kubenti.#1:47 umbae Isirela ti kubenti. Yesu ku myae Nataniyel ti itse-ba Yakubu ti kute. Yakubu si unde ti ku nde kob ira tikong. Sae nasi 51, uwog ti a bae ira risu kurwa ti Yakubu sunn. Ira ti kong ta-yi uwog-wu be.” 48Nataniyel rang wu baa, “Afu kyang rimang u nungye m?” Yesu ri te wu baa, “Ame nung fu kiye ti afu som umbyi kututung ti ti Filip kunn-wu afu ira khika be.” 49Nataniyel ri te wu baa, “Unde ti uwe, afu ti si Umbae Rimam. Afu ti si Ukwe na Isirela!” 50Yesu rang wu baa, “Afu ru uwae kinjo uwog-m ikyaen ti ame ri baa, ame na nung fu imbyi kututung a? Afu u nung iken ti ku fur ayib yang-yi ti skeb ayine.” 51Yesu ri te wu ama baa, “Ame ku ri te fu ira ti kubenti. Afu u nung apupwen u mbubta, afu u nung atom Rimam ku tsutso ku sisi risu Umbae Unde.#1:51 Umbae Unde. Uwae Atsingken Daniyel ti Ezekiyel a bae baa Ukwe iki na ku ba ti a fwa rinyi-wu baa, “Umbae Unde.” Ukwe wune u nwangru ande ti Isirela. Uwog ne Yesu ku myae ijwe-wu ti Ukwe wune, ama ku tangsom na ba ti kiye ti Yakubu sunn kurwa u nung atom Rimam ku tsutso ku sisi risu ufwá ti tso ka sang apupwen.”

Поточний вибір:

Yohana 1: kubNT

Позначайте

Поділитись

Копіювати