Karikani B'aai 14
14
Kamaiuakin Roota iroun Aberam
1Ao a m'ananga ni buaka uea ake aman ake Amrabera are uean B'aburon, Arioka are uean Erata, Ketoreraomera are uean Eram, ao Titara are uean Koiim. 2A nako ni buakaniia uea ake niman ake Bera are uean Tootom, Biretia are uean Komora, Tinaba are uean Atema, Temebera are uean Teboiim, ao uean Bera (ke Tooa). 3A kabooi nanoia uea ake niiman, ao a booti aia taanga n te m'arua are Tirim, are aranaki b'a Taari ae Mate n taai aikai. 4A tia ni mena ngkoa i aan ana tautaeka Ketoreraomera i nanon tebwi ma uoua te ririki, ma a rawa ni mena i aana n te katebwi ma tenua n ririki. 5Ao n te katebwi ma aua n ririki, ao e roko Ketoreraomera ma raona ake buokana ma aia taanga ni buaka, ao a kataenikaia Rebaim are i Atiterota-Karenaim, Tutim i Aam, ma kaain Emim ake i aban Kiriataim are aoraoi, 6ma kaain Oraite ake ni maungan Etom, ao a kakioia ni karokoa Erabaran are i mataniwin te rereua. 7Ao a manga rairaki n oki, ao a okira Kateti.#14.7: Kateti E ataaki naba n arana ae Enmitibata. A taua abaia kaain Amareka ni kabane, ao a kataenikaia kaain Amora ake a maeka i Ataton Tam'aa.
8Ao a kawaerakeia aia taanga ni buakana uean Tootom, Komora, Atema, Teboiim, ao Bera nakon te m'arua are Tirim, ni buakaniia 9uean Aram, Koiim, B'aburon, ao Erata. Ai aron ae niiman te uea ni kaaitaraia aman. 10Ao e onrake te m'arua arei n taian nib'anib'a n taa, ma ngaia are, ngke a kataia ni birinako uean Tootom ma Komora man te bo ni buaka, ao a b'aka i nanon taian nib'anib'a akekei; ao uea ake teniman, a reke birinakoia nakoni maunga. 11Ao a anai b'aai ni kabane uea ake aman mai Tootom ma Komora, n ikotaki ma taian am'arake, ao i mwina a nako. 12Ao e maeka ai natin Aberam are Roota i Tootom, ma ngaia are, a anaia naba ma ana b'ai ni kabane.
13Ma e birinako temanna, ao e taekin rongorongo aikai ni kabane nakon Aberam are I-Ebera are maeka i rarikin te Oke are atoatongaki, are ana Oke Mamre are kaain Amora. Ana itoman Aberam boni Mamre ma tarina ake, Etikora, ao Anera. 14Ao ngke e ongo Aberam b'a e uotakinako b'a te taenikai ai natina are Rota, ao e bootia ana mm'aane ake taani buaka aika 318 bootaia, ao a taorimwiia uea ake aman nako Taan. 15Ao e tib'atib'aia ana taanga ni buaka nakon aia kurubu nako, ao a buakaniia aia kairiribai ngke e a bong, ao a kataenikaia. Ao a kakioia ni karokoa Ob'a are i meangin Tamateko, 16ao Aberam, e anai taiani b'ai mairouia naake a konaaki, ake a uotinako ngkoa b'aai. Ao e kaoka naba ai natina are Roota ma ana b'ai ni kabane, n ikotaki naba ma aine, ao taenikai naba ake tabeman.
Kakab'aiakin Aberam iroun Merekitereka
17Ngke e oki Aberam i mwiin tokanikaina n te buaka i aon Ketoreraomera ma uea ake tabeman, ao e otinako uean Tootom ni butim'aia n te M'arua are Tiawe (e ataaki b'a Ana M'arua te Uea). 18Ao e uota te kariki ma te wain Merekitereka are uean Tarem nakon Aberam. Bon Ana ibonga naba te Atua ae Moan te Rietaata Merekitereka. 19E kakab'aiaa Aberam Merekitereka ao e taku, “Ke e kakab'aiaa Aberam te Atua ae Moan te Rietaata are karaoa karawa ma aonnaba! 20E na neboaki te Atua ae Moan te Rietaata are E anganiko te tokanikai i aoia am kairiribai.” Ao Aberam e angan Merekitereka teuana te katebwina man b'aai ake e uoti rikaaki man te buaka.
21Ao e taku uean Tootom nakon Aberam, “Kawakin b'aai akanne, ma ko na ti kaokiia au aomata nako iu.”
22Ao e taku Aberam. “I a tia n tuea nakon te UEA, ae Moan te Rietaata, ae karaoa karawa ma aonnaba, 23b'a N na bon aki taua te b'ai teuana man am b'ai nako, e ngae naba ngkana tao ti teaina te karai ke ti teuana kabaean te kauniwae. B'a ko kaawa ni manga kaangai, ‘A reke kaub'ain Aberam mairou.’ 24Akea te b'ai ae N na anaia b'a I a tau naba n ake a tia ni kanna au aomata. Ma ko a ti karekei tib'angaia raou ni buaka aika Anera, Etikora, ao Mamre.”
Поточний вибір:
Karikani B'aai 14: KNVB
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть