Саалтыр 34
34
1Давид псалома.
Киирис, Айыы Тойон, миигин кытта киирсээччилэрдиин,
сэриилэс миигин утары сэриилэһээччилэрдиин;
2харыҥ куйаҕын, халҕан куйаххын ылаҥҥын,
миэхэ көмөҕө кэлэрдии Эн турун.
3Үҥүүгүн таһааран, сүгэҕин тутаҥҥын,
туора тур миигин сойуолааччылар суолларыгар;
итиэннэ, эйигин быыһаан ылыам диэҥҥин,
эрэннэр мин дууһабар.
4Саакка-суукка киирэн сурахтара суйданнын
мин дууһабар турунааччылар.
Атахха биллэрэн ааттара алдьаннын
миигин утары куһаҕаҥҥа куомуннаһааччылар.
5Тыал ыһар-тоҕор мэкиинэтэ буоллуннар,
Айыы Тойон Аанньала кинилэри кыйдаатын.
6Айанныыр суоллара хараҥа, халтараан буолуохтун,
Айыы Тойон Аанньала кинилэри сойуолуохтун.
7Буруйа суоҕум үрдүнэн, кистээн, миэхэ угаайы оҥорбуттар,
буруйа суоҕум үрдүнэн миэхэ иин хаспыттар.
8Эстэр-быстар күннэрэ кинилэргэ эмискэ үтүрүйэн кэллин,
кистээн оҥорбут угаайыларыгар бэйэлэрэ түбэстиннэр;
илимҥэ сөрүөстэн кинилэр өллүннэр.
9Оттон мин дууһам Айыы Тойонтон үөрүөҕэ,
Киниэхэ өрүһүйтэрэн, өрөгөйүм үрдүөҕэ.
10Оччоҕо хас биирдии уҥуоҕум этиэҕэ:
«Оо, Айыы Тойон, ким Эйиэхэ тэҥнэһиэҕэй?
Эн өрүһүйэн ылаҕын мөлтөҕү күүстээхтэн,
кыраны-кыһалҕалааҕы – кинини халааччыттан».
11Кырыктаах туоһулар миигин утары турдулар,
тугу билбэппин, ону ыйытан ыҕарыйдылар.
12Үтүөбүн куһаҕанынан төлөөннөр,
дууһабын тулаайахсыттылар.
13Оттон мин, кинилэр ыарыйдахтарына,
ытабыл таҥаһын таҥнарым,
астан аккаастанан, дууһабын сыһытарым;
мин үҥэрим бэйэбэр төннөн кэлэрэ.
14Кинилэри, доҕорум, быраатым курдук, аһынарым;
ийэтин аһыйар киһилии, бүк түһэн, курутуйан сылдьарым.
15Оттон мин бүдүрүйдэхпинэ, үөрэн, түмсэ түһэллэр,
миигин утары түмсэллэр;
өстөөхтөр, мин урут кинилэри билбэт этим,
күннэри-түүннэри үөҕэллэр.
16Нэгэйдэри кытта бииргэ өһүөннээхтик күлсэллэр,
миигин көрө-көрө тиистэрин хабырыналлар.
17Хаһааҥҥа диэри, Айыы Тойон, Эн итини көрүөҥүй?
Хара дьайыыларыттан миигин өрүһүй,
хахайдартан олохпун, баарбын-суохпун, быыһаан ыл.
18Мин, улуу түмсүүгэ киирэммин, Эйиэхэ махтаныам,
үтүмэн киһи ортотугар тураммын, Эйигин айхаллыам.
19Туох да төрүөтэ суох миэхэ өстүйээччилэр
миигин сэтэрээбэтиннэр;
буруйа суоҕум үрдүнэн абааһы көрөөччүлэр
бэйэ-бэйэлэригэр имнэммэтиннэр;
20эйэ туһунан кинилэр кэпсэтэр буолбатахтар –
сиргэ эйэ-дэмнээхтик олорооччулары утары
уодаһыннаахтык куомуннаһаллар.
21Миигин утаран, айахтара кытарар:
«Кэһэй, кэһэй! – дэһэллэр. –
Тугу оҥорбуккун биһиги көрбүппүт!»
22Эн көрбүтүҥ, Айыы Тойон, итини саҥата суох хаалларыма;
Айыы Тойон, миигиттэн ыраатыма!
23Оо, уһугун, турун мин көмүскэлбэр,
киирис мин дьыалабар, Таҥарам, Айыы Тойонум!
24Бэйэҥ кырдьыккынан миигин дьүүллээ;
Айыы Тойон Таҥарам, өстөөхпүн өрөгөйдөтүмэ.
25«Кэһэй, баҕарбыппыт дьэ туолла!» – диэбэтиннэр,
«Дьэ хата, мэҥиэһиннэхпит!» – дэспэтиннэр.
26Сир сирэйдэнэн, саакка киирдиннэр
мин эрэйдэнэрбиттэн үөрээччилэр;
ааттара алдьанан, чиэстэрэ киртийдин
миигин үөһэттэн сэнии көрөөччүлэр.
27Оттон мин кырдьыгым кыайарыгар баҕарааччылар
өрөгөйдөрө үрдээтин, үөрдүннэр-көттүннэр;
«Оо, улуу даҕаны, – диир буоллуннар өрүүтүн, –
кулутугар эйэни баҕарар Айыы Тойон!»
28Оччоҕо мин Эн кырдьыктааххын иһитиннэриэм,
хас күн аайы Эйиэхэ уруй-айхал этиэм.
Поточний вибір:
Саалтыр 34: СБК
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© Институт перевода Библии, 2008-2022