Саалтыр 30
30
1Хуор салайааччытыгар. Давид псалома.
2Эйиэхэ эрэнэбин, Айыы Тойон;
хаһан да мин кыбыстыыга кииримиим;
кырдьыктаах Бэйэҥ миигин өрүһүй.
3Болҕойон иһит Эйигиттэн көрдөһөрбүн,
тиэтэй миигин өрүһүйэн ыларга.
Туруук таас хайам буолан миигин хаххалаа,
бөҕө кириэппэһим буолан быыһаа.
4Эн бааргын мин таас хайам, мин кириэппэһим;
Бэйэҥ аатыҥ туһугар, миигин сирдээ, салай,
5кистээн миэхэ оҥорбут угаайыларыттан миигин таһаар;
Эйигин мин дурда-хахха туттабын эбээт.
6Эн илиигэр мин тыыммын туттарабын;
Эн миигин өрүһүйэриҥ, Айыы Тойон, кырдьык Таҥарата.
7Туһата суох эмэгэттэргэ эрэнээччилэри абааһы көрөбүн.
Айыы Тойоҥҥо эрэнэбин.
8Мин кыһалҕабын көрбүтүҥ,
дууһам кутурҕанын билбитиҥ иһин,
Эн тапталгыттан көтөҕүллэн, мин үөрүөм-көтүөм;
9Эн миигин өстөөх илиитигэр туран биэрбэтэҕиҥ –
киэҥ дуолга таһаарбытыҥ.
10Абыраа миигин, Айыы Тойон,
мин ыар кыһалҕаҕа ыллардым;
кутурҕаммыттан хараҕым уута уолла,
дууһам саймаарда, этим-хааным амньырайда.
11Олоҕум санаарҕабылга баранна,
күммүн-дьылбын энэлгэн эҥээрдэстэ;
аньыым-харам миигин алларытан,
уҥуохтарым куура хаттылар.
12Бары өстөөхпүттэн сылтаан
бэл ыалларым миигин үөҕэллэр;
билэр дьонум миигиттэн дьулайар буоллулар,
уулуссаҕа көрбүттэр киэр куоталлар.
13Өлбүт киһилии мин умнулуннум,
алдьаммыт иһиттии быраҕылынным.
14Үгүстэр хобугунаһалларын истэбин;
тула өттүбүттэн куттал суоһуур! –
миигин утары куомуннаһаллар,
тыыммар тураары киксэллэр.
15Оттон мин Эйиэхэ эрэнэбин, Айыы Тойон;
Эйиэхэ этэбин: «Эн буолаҕын мин Таҥарам».
16Эн илиигэр баар мин олоҕум күнэ-дьыла барыта;
миигин өстөөхтөрбүттэн, күөмчүһүттэрбиттэн өрүһүй.
17Эн сирэйиҥ сырдыга кулуккар сыдьаайдын;
үтүө санааҕыттан миигин быыһаан ыл.
18 Айыы Тойон, Эйигин ыҥырбыт киһи
мин кыбыстыыга кииримиим;
кыбыстыыга хара дьайдаахтар киирдиннэр,
хам бараннар, үтүгэн түгэҕэр түстүннэр.
19Киэмсийэннэр, сэнии санааннар,
көнө киһини үөҕэр сымыйаччылар
тыла суох бардыннар.
20Оо, хайдах курдук Эйиэхэ элбэҕий –
Эн ким барыта көрөрүгэр –
Эйигиттэн толлооччуларга уурбут,
Эйиэхэ эрэнээччилэргэ бэлэмнээбит үтүмэн үтүөҥ!
21Халыҥ хахха буолан Эн кинилэри харыстыыгын
дьон уодаһыннаах куомунуттан;
суон дурда буолан араҥаччылыыгын
өстөөх өһүөннээх тылыттан.
22Алгыс буоллун Айыы Тойоҥҥо!
Өстөөх төгүрүйбүт куоратыгар сырыттахпына,
Кини дьиктитик да миэхэ бигэ тапталын көрдөрбүтэ!
23Аймаһыйбыт санаабар Эйигин
миигиттэн киэр хайыспыт диэбитим;
онтум, көмө көрдөөн ыҥырбыппар,
мин ааттаһар саҥабын иһиттиҥ.
24Таптааҥ Айыы Тойону, Кини бары сибэтиэйдэрэ.
Айыы Тойон бэриниилээх дьону көмүскүүр,
оттон бэрдимсиктэргэ иэстэрин толору төлүүр.
25Эрдийиҥ, эр сүрэхтэниҥ,
Айыы Тойоҥҥо эрэнээччилэр бука бары.
Поточний вибір:
Саалтыр 30: СБК
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© Институт перевода Библии, 2008-2022