मत्तायोस 12
12
येसुस गे ख़न्न ऎख़ना उल्ला ही मइय्याँ अदिया र'ई
(मर 2:23-28; लूक 6:1-5)
1आ बेड़ा नू येसुस ख़न्न ऎख़ना उल्ला नू ख़ल्ल गुट्ठी नू मन्नुम काला लगियस। अरा तंग्है चेलर गे कीड़ा लग्गिया, ख़ने आर बालन तोंखा तोंखा मॊख़ा हेलरर।#व्य 23:25 2फरिसीर इदिन ईरियर ती ब'आ हेलरर, “ऎरा, निंग्है चेलर एन्ने नलख ननालनर एकदा ख़न्न ऎख़ना उल्ला ही नॆग ही बिड़दो र'ई।” 3येसुस आरिन बाचस,#1सामु 21:1-6 “नीम नेम्हा पुथी नू एन्देर पढ़चकर अदिन सुरता मल नन्दर का? इकला दाऊद बॆलस अरा तंग्है संगेर कीड़ा रहचर, ख़ने आस एन्देर नंजस? 4आस धर्मेसी एड़पा नू कालरकी नैगस धर्मेस गे दाँड़े नंजका असमन मोक्खस, अरा तंग्है संगेर गे हूँ चिच्चस, एकदन मॊख़ना मूसासी पॆसका नू नैगारिन अम्बरकी नॆका हूँ नॆग मल्ला।#लौव्य 24:9 5अरा एन्देर नीम मूसासी नॆग नू मल्ला पढ़चका का नैगर ख़न्न ऎख़ना उल्ला धर्मेसी मन्दिर नू तंग्है नलखन नन्ना ती ख़न्न ऎख़ना उल्ला ही नॆगन चाड़ना ती हूँ आर गे बदी मल लग्गी?#गन 28:9,10 6लिकिन ऎन निमन ब'अदन, एकास इसन र'अदस आस धर्मेसी मन्दिर ती हूँ कोहाँ र'अदस। 7नेम्हा पुथी एन्ने ब'ई, ‘ऎन सोग्गे ऎरनन पत्तारदन दाँड़े गुट्ठी अरगनन मला।’ इदही मनेन नीम अक्का होले बदी मलका आलारिन बदी मल टिड़'ओर दने।#मत्ता 9:13; हो 6:6 8मनवा ख़द्दन एंगा हूँ ख़न्न ऎख़ना उल्ला नू एन्देर एन्देर नन्ना र'ई, अदही फैसला नना गे अदिया र'ई।”
ख़ैका ख़ेक्खा आलासिन उजग'अना
(मर 3:1-6; लूक 6:6-11)
9फिन येसुस असलेक ती उरखस ती आर ही गोड़हा एड़पा नू कोरचस। 10अइय्या ओन्टा आलस रहचस, आसी ख़ेक्खा ख़ैकी रहचा। जोक्को फरिसीर येसुस मइय्याँ बदी टिड़'आ गे आसिन मेंजर, “ख़न्न ऎख़ना उल्ला नू कोड़े नन्ना दौ र'ई का?” 11ख़ने आस आरिन बाचस, “निम्हैन्ती नॆ एन्ने र'ई? नॆखअय ओन्टे लेका भेंडो र'ई अरा आद ख़न्न ऎख़ना उल्ला गड्डी नू खत्र'ओ क'ओ होले, आस आदिन धर'ओस ती मल ओथ्र'ओस।#लूक 14:5 12लिकिन ओन्टा भेंडो ती आलासी मईन बग्गे र'ई। औंगे ख़न्न ऎख़ना उल्ला नू दौ नलख नना गे मूसासी नॆग चि'ई।” 13ख़ने आस आ आलस ती बाचस, “निंग्है ख़ेक्खन लमाब'आ।” आस लमाबाचस ख़ने नन्ना ख़ेक्खा लेक्खा कोड़े मंजा केरा। 14ख़ने फरिसीर बहरी उरखर ती आसी बिड़दो नू चिताबुता नंजर येसुसिन एकासे पिटोत।
येसुस धर्मेसी चज्जिका जॊंख़स
15इदिन अक्खस ती येसुस असले किर्रिम बिच्चियस, अरा कोड़हे आलर आसी ख़ॊख़ा गुड़ियारर अरा आस आर नू ती बेमरहा ओर्मारिन कोड़े नंजस। 16अरा आरिन चेताबाचस का तान नॆ हिकदस अदिन अम्बोर तेंगा। 17आस इबड़न इदगे नंजस का एका कत्थन धर्मेसी कत्था तिंगुस यसायास बाचकाचस आद मनो:
18“ऎरा, इसन एंग्है जॊंख़स, ईसिन ऎन चज्जिका र'अदन।
ईस एंग्है चोन्हास एकासी ती एंग्है जिया रिझ्र'ई।
एंग्है बॊलतन आसी नू सज'ओन,
अरा आस उर्मी जातियर नू एंग्है नेंवई ही हला तेंगोस।
19आस नग्गा मल नख्र'ओस महले रिरयार'ओस मला
महले बजार गुट्ठी नू नॆ हूँ आसी कत्थन पोल्लोर मेना।
20आस लट'ई मंजका जिन्तो लट्टिन मल एस'ओस
महले कुहड़ारना बिल्लिन मल तेभ'ओस।
अरा आस नेंवई आबोन जितना गूटी कड़हाब'ओस।
21अरा उर्मी जातियर आसी नामे नू असरा उइय्योर।”#यसा 42:1-4
येसुस दरा बॆलजेबूल
(मर 3:20-30; लूक 11:14-23; 12:10)
22तहाँ आलर ओन्टा अन्धहा अरा कोंदासिन, नॆ नाद ती धरताचका रहचस, आसिन आसी हेद्दे ओन्द्रर, अरा येसुस आसिन कोड़े नंजस, अरा आस ऎरा आरा कछनख्र'आ हेलरस। 23इन्नु ओर्मर धन्धरर केरर ती ब'आ हेलरर, “एन्देर ईस दाऊदसी ख़द्दस मसीस मना ओंग्दस दने।”
24लिकिन फरिसीर इदिन मेंजर ती बाचर, “ई आलस गा नाद गुट्ठी ही मुद्धस बॆलजेबूल ती नाद गुट्ठिन ओथ्रदस।”#मत्ता 9:34; 10:25 25आस आर ही सोचनन अक्खस ती आरिन बाचस, “एकअम राजी तंग्है नू लड़ाई ननी होले आ राजी नठार'ई क'ई। अरा एकअम नगरे महले एड़पा ता आलर तम्है नू लड़ाई नन्नर होले आ नगरे महले एड़पा ता आलर खत्तरनर कानर। 26अरा सैतान दिम सैतान आबोन ओथ्र'ओ होले आद तंग्हा दिम बिड़दो लड़ाई ननी, होले अदही राजी एकासे कम्रकी र'ओ? 27अरा ऎन बॆलजेबूल ही सवंग ती नाद गुट्ठिन ओथ्रदन होले, निम्है आलर अबड़न नॆखा सवंग ती ओथ्रनर? औंगे आर निम्है नेंवई ननुर र'अनर। 28लिकिन ऎन धर्मेसी बॊलता ती नाद गुट्ठिन ओथ्रदन होले ईद ईद'ई का धर्मेस आलर ही जिया नू राजी नन्ना निम्है मझी नू अंड़स ख़च्चिया। 29एकासे ओर्तस ओन्टा बहंगर आलासी एड़पा नू कोर'अरकी आसी जिनिसन बच्चा ओंग्दस? एका गूटी आस आ बहंगर आलासिन मल हें'ओस हो'ओस, होलेम आस आ बहंगरसी एड़पन बच्चा ओंगोस।#12:29 इसन येसुस इदही पत्त नू ब'अदस का आस सैतानन हॆंचका र'अदस। 30नॆ एंग्है गने मलकी आर एंग्है बिड़दो र'अनर अरा नॆ एंग्है गने नलख मल नन्नर आर एंग्है बिड़दो नू नलख नन्नर।#मर 9:40 31औंगे ऎन निमन ब'अदन आलर ही उर्मी रकम ही पाप अरा हींड़ना आर गे अम्बतार'आ उंगी, लिकिन नेम्हा बॊलतासी बिड़दो ही हींड़ना आर गे मल अम्बतार'ओ। 32नीकईम मनवा ख़द्दन एंगा बिड़दो नू इन्द्रिइम कत्था ब'ओस, आद आस गे अम्बतार'आ उंगी, लिकिन नीकईम नेम्हा बॊलतासी बिड़दो इन्द्रिइम ब'ओस, आद आस गे ई सौंसे नू महले बरना सौंसे नू कहियों मल अम्बतार'ओ।#लूक 12:10
आलर निमन निम्है कत्था ती अख़'ओर
(लूक 6:43-45)
33मन्न अदही ख़ंजपा तिम चिन्हर'ई। मन्न बॆस र'ई होले अदही ख़ंजपा हूँ बॆस र'ओ। महले मन्न पयहा र'ई होले अदही ख़ंजपा हूँ पयहा र'ओ।#मत्ता 7:20; लूक 6:44 34अना नेर्र लेक्खा बिक्ख उइय्यु आलारो! नीम मलदौ मनरकी एकासे दौ कत्था ब'आ ओंग्दर? एन्देरगेका एन्द्रा जिया नू निन्दकी र'ई आदिम बई ती उरखी।#मत्ता 3:7; 15:18; 23:33; लूक 3:7; 6:45 35दौ आलस तंग्है दौ जिया ही दौ कुट्ठी ती दौ नलखन नन्दस, अरा मलदौ आलस तंग्है जिया ही मलदौ कुट्ठी ती मलदौ नलखन नन्दस। 36अरा ऎन निमन ब'अदन, एका एका अनभनियाँ कत्था आलर कछनख्र'ओर रायबड़ी उल्ला नू आर गे अबड़ा उर्मी कत्था ही लेखा चि'अना दिम मनी। 37एन्देरगेका नीम निम्है कत्था ही चड्डे बदी मल खत्र'ओर, अरा निम्है कत्था ही चड्डे बदी खत्र'ओर।”
यॊनासी अकबक नलख
(मर 8:11,12; लूक 11:29-32)
38अक्कु जोक्को यहूदी नॆग सिखाब'उर अरा फरिसीर येसुसिन बाचर, “अना गुरु, निंग्है ती ओन्टा अकबक नलख ही चिन्हा ऎरा बेद्ददम।”#मत्ता 16:1; मर 8:11; लूक 11:16 39ख़ने येसुस आरिन आनाकिर्ताचस, “मलदौ अरा नन्ना आली गुसन कालू आलर ही परिया ता आलर अकबक नलख ही चिन्हा बेद्दनर, लिकिन धर्मेसी कत्था तिंगू यॊनासी उज्जना नू मंजका अकबक नलखन अम्बरकी आर गे नन्ना एन्देर चिन्हा हूँ मल चितार'ओ।#मत्ता 16:4; मर 8:12 40यॊनास एकासे तीन उल्ला माख़ा कोहाँ इंजो ही कूल नू रहचस, अन्नेम मनवा ख़द्दन ऎन तीन उल्ला माख़ा ख़ॆख़ेल भितरी र'ओन।#यॊना 1:17 41निनवे नगरे ता आलर यॊनासी कत्थन मेंजर ती जियन किर्ताचर। अरा ऎरा, इसन ओर्तस यॊनास ती हूँ कोहँस र'अदस। ख़ने रायबड़ी उल्ला नू निनवे ता आलर ई बेड़ा ता आलर गने चो'ओर ती आरिन दोस'ओर।#यॊना 3:5 42दखिन देस ता रानी ख़ॆख़ेल ही ओन्टा कोड़ा ती सालोमॊनसी लूर ही कत्थन मेना गे बरचा। अरा ऎरा, इसन सालोमॊनस ती हूँ कोहँस ओर्तस र'अदस। ख़ने रायबड़ी उल्ला नू आद ई बेड़ा ता आलर गने चो'ओ ती ईरिन दुस'ओ।#1बॆल 10:1-10; 2इति 9:1-12
मलदौ बॊलता ही किर्रना
(लूक 11:24-26)
43एकाबारी मलदौ बॊलता आलस ती उरखी ख़ने ख़ैका अड्डा नू ख़न्न ऎख़ा गे अड्डा बेद्दा कुद्दी अरा मल ख़क्खी। 44ख़ने ब'ई, ‘ऎन एसले उरखकी रहच'अन आ आलस नुम किर्रोन।’ अरा बर'ई ती अदिन छछिन्द अरा ईगका ओथ्रका अरा चेमचेम नू ख़क्खी। 45ख़ने आद क'ई तहाँ तंगन ती बग्गे मलदौ सात गोटंग नादन उन्दर'ई। अरा अबड़ा अइय्या रस'ई ती मड़'ई, अरा आ आलासी दसा ख़ॊख़ा ता दसा ती बग्गे मलदौ मनी। ई परिया ता मलदौ आलर ही दसा हूँ एन्नेम मनो।”
येसुसी तंग्यो अरा भई
(मर 3:31-35; लूक 8:19-21)
46एकाबारी आस गोंहड़ा गने कत्था कछनख्र'अम लगियस ख़ने, येसुसी तंग्यो अरा भइय्योर बरचर ती बहरी इज्जर अरा आसी गने कछनख्र'आ बेद्दा लगियर। [47एकअम ओर्तोस येसुसिन बाचस, “ऎरा, निंग्यो अरा निंग्है भइय्योर बहरी इज्जका र'अनर अरा निंग्है गने कछनख्र'आ बेद्दनर।”] 48लिकिन येसुस आ आलासिन बाचस, “नॆ एंग्है अयंग अरा नॆ एंग्है भइय्योर र'अनर?” 49अरा तंग्है चेलर तरा ख़ेक्खा टोंहा बाचस ती बाचस, “ऎरा, ईर एंग्है अयंग अरा भइय्योर हिकनर। 50एन्देरगेका एका ओर्तर एंग्है मेर्ख़ा बंगासी मने लेक्खा ऎकनर, आरिम एंग्है भई अरा एंग्है बहिन अरा एंग्है अयंग हिकनर।”
Поточний вибір:
मत्तायोस 12: KURUXBSI
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
