Shītwa sha Batūng'wa 3
3
Kūpījiwa kwa nemehazu
1Lūshikū lūmò makanza ga sa kenda, Petelo na Yohana bajaga mu Hekalu kūjūlomba. 2Walīho ngosha nemehazu kūfuma mu nda ya ng'wa nina, wabūūchiagwa būlī lūshikū, wiza watūūlwa ha nyago gwa hekalu, gwalīho gwitanagwa “Nsoga.” Hūna a banhū ūlū balingīla ū mu hekalu, wayūlomba bang'winhe shose shose. 3Aho wababona a ba Petelo nū Yohana begeela kwingīla ū mu hekalu, ūbalomba bang'winhe shikolo. 4Nabo a ba Petelo nū Yohana būnkalalīla; hūna būng'wīla gīkī, “Bebe alitūlolage!” 5Ng'hana ūbalola, kūnū alisagīlwa kwanukūla shikolo kūfuma kūbo. 6Alīyo ū Petelo ūng'wīla gīkī, “Ū nene natī na sabo nūūlū hela, gwike nakūkwinha īsho nalī nasho. Mu lina lya ng'wa Yesu Kilisito wa Nazaleti, būūkaga ūshimīze.” 7Hūna ūndima ū nkono gwa būlyo, ūngūngūmūla; ī likanza lyenīlo ūguzuhiwa ū mu mhambala, nū mu maguha ga mu shing'ongwa shakwe. 8Ūbūūka, wikīndīka; wandya kūshimīza. Wingīla nabo ū mu hekalu akūshimīzaga kūnū ūsata sata na kūnkumīlīja Mulungu! 9Pye a banhū būmona alīshimīza, kūnū akūnkumīlījaga Mulungu. 10Būng'witegeleja gīkī, hū ng'wene ūyo wikalaga igashije akwilombelejaga ha mita gwa hekalu ūyo gūkitanagwa Nsoga. Bakakumya no, gūbajinjimaja ū mhayo ūyo gūkang'wilongela gwenūyo.
Būlomeeji bo ng'wa Petelo
11Ūyo akapījiwa kūfuma mu būlemehazu ng'wenūyo, akikala abadimile a ba Petelo nū Yohana, nose būshika ng'wibīndo litanagwa lya ng'wa Solomoni. A banhū bakakumya no, pye a bose būyūpeela bajile mo. 12Ū Petelo aho wababona a banhū ūbawīla gīkī, “Bing'we bababa Baisilaeli, nibūlī mulīgūkumya ū mhayo gwenūyū, nūūlū nibūlī mulītūkalalīla a bise gītī twagwītaga na būdūla wise, nūūlū gīkī ū munhū ng'wenūyū twang'winhaga būdūla bo kūshimīza kūlwa wela wise? 13Ū Mulungu wa ng'wa Abulahamu na Isaka na Yakobo; ū Mulungu wa bakūlūgenji bise, wangūngūhije ū Ntūmami wakwe ū Yesu, ūyo mukanodeela, na kūnema kū būtongi bo ng'wa Pilato, nūūlū īkī ū Pilato ng'wenekīlī walī wamala kūlamula gīkī antaligūle. 14Alīyo a bing'we ng'ūnema ū Ng'wela na Ntūngīlīja, ng'ūlomba kwinhwa munhū mūlagi. 15Lelo ū Ng'winhi wa būpanga ng'ūmūlaga, alīyo ū Mulungu wanjūūkije kūfuma mu bafu, hama a bise hū tūlī bakaanīji bakwe. 16Hūna lūūlū, kūlwa kūlīzunya ī lina lya ng'wa Yesu, ū munhū ūyū muumanile na kale ng'wenūyū mulīmona waguzuhiagwa mu lina lyenīlo. Ū mhayo gwa kūlīzunya ī lina lyenīlo hū gwene ūyo gwang'winhaga mhola nshikanu gīkī kū būtongi wing'we! 17Gwike badūgū bane, namanile gīkī a bing'we na a batongeeji bing'we ng'wīyīta ī yenīyo mu būtūmana. 18Alīyo ū mu gīko gūkashikīīla ū mhayo go ng'wa Mulungu, ū gwa kūluhiwa kwa ng'wa Kilisito wakwe, gīt'ūmo walī wahayīla kūfuma kale, mu nzīla ya bahangi bose. 19Ali lūūlū, galūkagi ng'wīnge ū mu shibi shing'we, shijimangūchiwe; makanza ga kwifuujiwa gize kūfuma kūlī Seeba. 20Antūme ū Yesu Kilisito, ūyo ahelilwe kūlwa nguno ying'we kūfuma kale na kale, 21ūyo shing'wigeleelilwe kwikala ng'wigūlū kūshisha gashike a makanza ga shikolo shose kūgalūchiwa shibize hangī gīt'ūmo shaalī na kale; ūmo Mulungu ahayīlile kūfuma kale, mu nzīla ya bahangi bakwe beela. 22Nguno ū Musa akahaya gīkī, ‘Ū Seeba Mulungu wing'we akūmubūūkīja kūfuma mu badūgū bing'we ng'hangi wa kūbiza gītī nene; ū ng'wenūyo shiigelile mung'wigwe mu yose īyo alamuwīle. 23Munhū ose ose ūyo atūng'wigwa ū ng'hangi ng'wenūyo, akūkenaagūlwa īnjiwe gete ū mu banhū.’ 24Pye a bahangi, kūfuma kūlī Sang'weli, na a babo bakalondeela ha numa yakwe, bajihayaga na kūjikumūcha ī shikū jenīji. 25A bing'we mulī baana ba bahangi, na ba būlagane ūbo Mulungu akabeeja na bakūlūgenji bise; gīt'ūmo akang'wīlīla Abulahamu gīkī, ‘Pyī ī ng'anda ja mu sī jikwīlūkīlwa lubango mu nzīla ya būbyīle wako.’ 26Ū Mulungu aho wanjūūcha ū Ntūmami wakwe akantūma kū bing'we tame, gīkī anekeje na kūmfuha būlī ng'wene ūyo alagalūke kwīnga mu shibi shakwe.”
Поточний вибір:
Shītwa sha Batūng'wa 3: SUKBI15
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Sukuma Bible © Bible Society of Tanzania, 2019.
