Mattayo 5
5
Girgweageeda uhuuda giijeeda
1Idaah emeetuw, gwading'da giijeeda, hean nea gopteada gaweay headaannyi giinealangaschi. 2Ghoang'eat ghuutta giinealshoodaannyi nea gwayi:
Hoseaneega huumwa
(Luk 6:20-23)
3“Ghang'wana fuga barbari guroruunat,
aba gideaba sugoochcheandumeeda humng'eeda daanyaawa.
4Ghang'wana fuga guttu heareega,
aba gideaba gayghwanyas hawdeayda.
5Ghang'wana fuga ng'eeni,
aba gideaba gaygoombal ng'eanyiida.
6Ghang'wana fuga bearji jalooda ea muwooshta gassooda doobiiwnatta,
aba gideaba gajeellang'u.
7Ghang'wana fuga mideawa baydeayda,
aba gideaba eara saawa gajeabwayda.
8Ghang'wana fuga mideawa guroruunatka miyaas,
aba gideaba gayghwahitta Aseetta.
9Ghang'wana fuga aduptooschi suurja,
aba gideaba fiisu gajeeguura diibiga Aseetta
10Ghang'wana fuga sisawana aba doobiiwnatta,
aba gideaba sugoochcheandumeeda humng'eeda daanyaawa.
11“Ghoang'wani agooga iyang'eawweegwa buuneeda nea geesawaneegwa nea geerukuna badahuukkeagwa ng'asheega munyas sean aba ng'uyyeega appadaydeanyu. 12Ahoosana nea goong'weelayi, aba gideaba gimeardeeng'wa ahaw aba humng'eeda, nii gidaghayi bay gwasawanda buuneeda sibanga ashooynaneegwa.”
Balang'da ea gheabong'nyeanda
(Mark 9:50; Luk 14:34-35)
13“Agooga goowoschi balang'da ng'eanyiida; ama balang'da iimudugwasamu gil, gajeahindaan iijeagwasamu gil? Mudugwarachchi gil geaghus eahiisa jarooda ak ghoallaplaap buuneeda. 14Agooga goowoschi weeshinda ng'eanyiida. Mujiineeda sideeksa uhuuda heayeeda mwoammu afunyaat. 15Eara buuneeda meayeetta gheabong'nyeanda ak geedukuteawa dahuuda iissa ghwayiin uhuuda ghamarda ak ghoabwaay buuneessean mida jeeda gheeda. 16Asi eara weeshindeang'wa gagasa ghoabwaay buuneessean, amaduw nea ghwadaa gadiyoojigeagwa miyaas ghoaghambiit Ghweandeang'wa mida humng'eeda.”
Ginealshooda iitta deaweeda
17“Adoaghannyi gili awunnyi dayam deaweeda ghana sibanga; mwawuni dayam ghawunyi danung' gwasa. 18Aba huumwa geayeeshshineegwa; eara ghang'atta humng'eeda ea ng'eanyiida, ghanyeamanda eara hiji mwanang', ghana roobadeanagi mwanang', muuchchi bea deaweeda majeegeanda ea gwasa ng'asheega sean. 19Asi siida wasean jea ghwalach diigheanjagi mwanang'eawa sean, aba jeedeaba diigheannyeeksu ak ghoannaaldunu buuneeda, gajeeguura dea mwanang' muuchchi aba jeeda sugoochcheandumeeda humng'eeda; amaduw siitta jea gwasin nea ghoanaal suurjeeniin, nii gajeeguura dea haw aba jeeda sugoochcheandumeeda humng'eeda. 20Aba gideaba geayeeshshiineegwa, doobiiwnatteang'wa iimaburdeawana dea ng'oorshoodiga ea dea Farisayajeega, majaghannyi aweayeena jeeda sugoochcheandumeeda humng'eeda.”
Ginealshooda iitta nyarasta
(Luk 12:57-59)
21“Ghayi noayiinyi nea geerukusa fugeaba garayi gideaba, ‘Adinuusi siida; siida nuus siida gammiisa girgweaksiinda.’ 22Ak aniini geayeeshshineegwa, siida wassean jea gwanyareeksa oorjeeda ghaamwat gamiisa giirgweaksiinda; ama dea ang'eawi oorjeeda ghaamwaat gamiisa eatta madeeda gweargwa, ama dea eeshsha oorjeeda ghaamwat, ‘Guwosi leekghteanda!’ Gammiisa beasta maloonghajeega. 23Asi iyeadu haleanjeeda isabi geadi bea ghadoweeda badayda heeda wagiida ama deagheatta giipkaadi gideaba gwanda gidinndeayeesi oorjeeda geamadu, 24nung'usiina haleanjeedaang'u isabi geadi bea ghadoweeda badayda altaari ak guwi ghannyi aduupcheena sea oorjeeda geamadu, ama ng'atta gibiigu ak giidaydi haleanjeedaang'u isabi geadi bea ghadoweeda. 25Bay adupcheewana geaw siida ahaaktaneey, damanda duuandeawana naweeda nea goondaageat heeda ogaleewi gheeda girgweageeda, ammasa gayghwaannyi siida ahaaktaneey heeda siida laja girgweaguutka, ak ghwayiinnyi ada geattinga furiischoochcheanda ak gwajakseey ghealooniga; 26Aba huumwa geayeeshshineey, mayrinnana jeeni ea eaghus aniidayda heelajeanda huydean.”
Ginealshooda iitta mealuleega
27“Ghayi noayiinyi nea geeyi, ‘Adiiduw goomealuulli!’ 28Ak ghamneawa geayeeshshineegwa siida jea gang'ulla gatmooda seechmeeda nigeawiit gamealuul aba jeadaannyi. 29Asi iissa iinung' ghaang'daang'u bea geattinda dugwa adiinya, giloatti ak gijakti gwasheagiit; aba gideaba aamiy ghwashoadeeweey dameallanjagi ak ea meejaksiina saseadaang'u sean jeeda maloonghajeega. 30Ama nung' geattindaang'u bea dugwa adiinya, gilaji ak gijakti asheagiidana geaw; aba gideaba ghang'wana ghwashoadeweey dameallanjagi ak ea mejaksiina saseadang'u sean jeeda maloonghajeega.”
Ginealshooda iitta nung'wiischooda
(Mat 19:9; Mark 10:11-12; Luk 16:18)
31“Ghayi surgu gichcha gideaba, ‘Siida iinung'usa heeda gatmoadaannyi ea dadawa barawajeanda nung'ooda.’ 32Ak aniini geayeeshshineegwa siida wassean nung' gatmoadaannyi, nea mwanung'wa aba gideaba gamealuuli, gayghwanung' gamealuul; ak siida jea ghaghi gatmooda sinung' earada gamealuuli.”
Ginealshooda iitta agitta habeawooda
33“Gichcha ea noayiinyi nea geeyeeshsha fugeaba garayi, ‘Adiiduw giyaagi habeawooda ng'uyyeega, ak giihiidi habeawajeegaagu aba heeda Ng'uttamiida.’ 34Ak aniini geayeeshshineegwa, adiiduw ghoayaaji habeawooda eara gili mwanang', earaba humng'eeda aba gideaba horgeeda sugoochcheandumeeda Aseetta gil, 35ghana earaba ng'eanyiida, aba gideaba horgeeda iina geashangaaschi, ghana earaba Yerusaleemu, aba gideaba mujiineeda sugoochcheanda hawi. 36Adiiduw giyeaksi habeawooda eara uhuudaang'u, aba gideaba mimmusi yamwa budeanjagi nung' gaweeshiit ghana gwattuudu. 37Nea ng'asheegeagwa ghoanung' ghoaw ‘Eah’ ghana ‘Manda.’ Gili wassean nyoah ghwanaawda gwaleabu heedeaba diitta muyiin.”
Ginealshooda iitta waldeayda mureandooda
(Luk 6:29-30)
38“Ghayi noayiinyi nea geergu gideaba, ‘Gheang'da ea gheang'da, ea geeshadeeda ea geeshadeeda.’ 39Ak aniini geayeeshshineegwa, adigali geaw siida muy. Siida iilas madang'daang'u bea geattinda dugwa, giidawi eara meatkweeda niirja. 40Nea siida jea ghoahaaktaneey ak gageanda shatteadang'u, ginung'usi eara hang'daang'u; 41siida idiing'seey beatta neekki adeayeewana niba iyyeenya. 42Adawa dea musnyi, dea gasa ghoalaajaneey gida ea adifuursi muwuutta.”
Barinyeega weajoodiga
(Luk 6:27-28, 32-36)
43“Ghayi noayiinyi nea geeyi, ‘Bwariinya gischeewoochchaandaang'u ak gisti weajoochchaandaang'u.’ 44Ak geayeeshshineegwa, abwariinya weajoodigeagwa amoasha ghawooda appadahuukka fuga sawaneegwa. 45Abeeda gajahuuwa balloojiga Ghweandeang'wa mida humng'eeda; aba gideaba niny iissa daknoadaannyi gooboong'sa fuga munyas ea gea miyaas, ak gooroobassa roopta fuga doobiiweadi ea gea mii doobiiweadi. 46Aba gideaba iyoabwariinyi gea bwariinyeagwa agooga, gajanyasa anagiimwaar? Neada eara fuga ang'ng'oonyi gwaadi saawa ea masinniidunu? 47Ghana iyokkeattoscheewi oorjooga giyeang'wa akghwahit goosinnyi naaha meaji ghwanaawda? Neada eara fuga Emoojiga ea masinniidunu? 48Awosa hidaat awuurjeewana gidahidaatta Ghweandeang'wa mida humng'eeda.”
Поточний вибір:
Mattayo 5: DTGANT09
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Datooga New Testament © Bible Society of Tanzania, 2009.
