Lukka 19
19
Yeesu ea Sakkayo
1Ghwahitta mujiineeda Yerikko, ghang'atta nea ghwalach bugusta. 2Abeeda gwanda jeedeaba mujiineeni siisi suguura Sakkayo, siisi ea haweewa fuga ang'ng'oonyi gwaadi ak ea meanang'ochcheanda. 3Siisi abeeda goolla gagaseaday deakta Yeesu gideaba siida urjiini, ak ghwaraay ghwadaa aba seang'ayda emeeda, aba gideaba ninyi anuwaas. 4Ak iiduw Ghafwach gawa mwadi, ak gwading'da uhuuda meagheayeanda ghwadaah, aba gideaba gaygwasku naweetta. 5Hitta Yeesu deascheeda mida gong'weersa uhuuda geetta ak gwayeeshsha, “Sakkayo lamwaja rarang'aana, aba gideaba gammiisean deabiida gheang'u askweareani.” 6Ghwalamwach ghwararang'aan ak ghwadeapta nea gahoosan. 7Iiduw nea ghwadaa ng'asheanji ghoaniikg sean nea gwayi, “Nuwa ghoaw rabascheanda aba gheeda siida ring'eeda.” 8Ghang'eat Sakkayo ghamiinaada ak gwayeesha, “Ng'ulla, Ng'uttamiida, gaydalach bugusta haleanjeedeanyu ak ghaadawji fuga barbari, ak iimida siida nareachchi gida aba fughareeda, gaydeadeelsa niba ang'waan.” 9Ghwayeeshsha Yeesu niny, “Askweareani lealeanooda nihidu gheawi aba gideaba eara niny balleanda Abrahaamu. 10Aba gideaba Balleanda siida ghwahidu gagasa nea gwalealu diitta roadiin.”
Gissigala shiliingajeanda sisna lagheanga meng'meeng'i
(Mat 25:14-30)
11Iiduw nea ghwayiiy ng'asheesu, hean gwarukuta aba galleega, aba gideaba nineekkiissa Yerusaleemu, aba gideaba saawa ghaghay gil sugoochcheandumeeda Aseetta gaygabean ghwadaajiit. 12Gwayeesha, “Ghayi gwanda siisi haw siiwal gheang'da, wea bareannyeekka ng'eanyiida sheagi eattaw uurda sugoochcheandumeeda, ak gabiigu. 13Hean gaguursa fii damanamughuush aba jeeda soomjoogaaschi, gaba nii adaw lappiyaji bughala ak gwayeesha, ‘Agadiyeatta ea dabiigu.’ 14Ak siisi ghwasit fuga ng'eang'da nyaawa ak gechcheaksa buuneeda eyeeshsha, ‘Aseasa meegassi siisi ghoahaaghwaneassa.’ 15Iiduw nea gabiigu siidida nea ninyas uurda sugoochcheandumeadaannyi ghwanung' eguursa soomjookka ghayi adaw lappiyean ghwanaal niba siisi nyas gea deannaan aba gadiyeedaannyi. 16Ghwahidu dea madeeda headaannyi ak gwayeesha, ‘Ng'uttamiida, lappiyeadaang'u appughala niji suuk bughala.’ 17Ghwayeesha niny, ‘Ghwahiit guwosi soomjeanda miy! Aba gideaba guwosi doabiiwaat aba ng'asheanda mwanang' gajambala mujiinaji damanamughuush.’ 18Ghwahidu Soomjeandeaba iyyeenya ak gwayeeshsha, ‘Ng'uttamiida, lappiyeadaang'u aharadam ea damanamughuush niji suuk haradam ea damanamughuush.’ 19Gwayeeshsha nii, ‘Ang'iing'i ambala mujiinaji muut.’ 20Ng'atta ghwahidu nuut ak gwayeeshsha, ‘Ng'uttamiida, sukkwaanji lappiyeadaang'u attamanamughuush ghayi igooni, geadiiwsi jeeda weasta; 21ghaawalleay, aba gideaba guwosi siida ng'waan iissa gigeandi gida miidaang'u ak gilaji gea mihistani.’ 22Gwayeeshsha niny, ‘Gaydeargweaksinaneey ng'asheanda ghuuttaang'u, soomjeanda muy! Ginali gideaba geawoschi hang'waay geageandi gidamiideanyu, ak ghaalaji gea meahistani? 23Ak ghwasaan anda migadiyeatta lappiyeedeanyu gwaji suuk, ama ahidu geageandi sean ea gea ahaada?’ 24Hean gwayeeshsha fukkeanji minaada aba hooweanjiin, ‘Oarreada lappiyeeni mideawean ak ghoattawji siitta mideawa bughalaan.’ 25Geeyeeshsha niny, ‘Ng'uttamiida, gwandeawa lappiyaji bughala!’ 26‘Geayeeshshineegwa, Aba gideaba siisi agar gil gajeehheasa, nea siitta meagara giliin, eara gidida mwanang' mideawean gajearreat. 27Ak fukka was weajoodigeasu magassa gideaba gaydaahaaghwa saawaan, ayeani hiji ak gonuuseadi aba madeedeanyu.’”
Hitteayda Yerusaleemu ak geadeaptaawa hooseaneega
(Mat 21:1-11; Mark 11:1-11; Yoh 12:12-19)
28Iiduw nea ghoahiit ng'asheesu, goosheedeawa saawa, ak ghwascheang'da gawa Yerusaleemu. 29Hean neekkiisa Betfagi ea Bettaniya, nea neekki gijeeda suguura Masaytuuni, goojeakta fii iyyeenya aba jeeda ginealangaaschi, 30nea gwayeeshsha, “Aweayeena gharang'dida mida mwadiin iyoahitti gajanyasana hoowa gureenda digeeda nea radaat nea eara ginealda ea miyeannaal, goottinnyi ak goyeadu hiji. 31Iideeppa ghoanyasheegwa sii gideaba, ‘Ghwasaan anda gottinnyi?’ Goyeeshshi, ‘Gagasa Ng'uttamida.’” 32Gaweay Fugiga siichcheaktean, amahitta hoowa ghwadaakta gidagwachchi rukusiinda saawa. 33Damandida siittina gureendean, gwayeeshsha fiibwa, “Ghwasaan anda gootiinnyi gureenda?” 34Geeyeeshsha, “Gagasa Ng'uttamiida.” 35Gearjaanda ea ghwahitta heeda Yeesu, gegeanu hang'wekka eayiin badayda gureenda amahit geanung' gwading'da Yeesu badayda ak goopteadawa. 36Damandida beawaan, gageanu buuneeda ak ghwoabwarghaan hang'weakka nyaawa aba naweeda. 37Iiduw nea gwaneekkiissa rarang'eadayda giijeeda Masaytuuni, gang'weela fuga saang'a was ginealangaaschi nea gwaduumsheesa Aseetta aba ghuutta haw aba gadiyoojiga hees sean sidaa, 38nea geeyi, “Ning'ushsha Aseetta sugoochcheanda wuna gheawunga Ng'uttamida! Niiw hooyoo aba humng'eeda ea gigheambiitta aba hoowa bea humng'eedean.” 39Gwayeeshsha Farisayajeesu ng'ay mida jeedeaba emeetta, “Ginealshoochcheanda, rekusiina ginealangaagu.” 40Ghwasha nea gwayeeshsha, “Geayeeshshineegwa, inyas ghwasiinda saawa, gaygoojuur lagheanga.”
Yeeesu gaguuttu heareega appadayda Yerusaleemu
41Iiduw nea gwaneekkiit mujiini ak ghwadaa goyyeawussa, 42nea gwayi, “Gideaballi gwachchi eara ang'iing'i ginali eaweechcheanji miisa hooyyoohiin! Ak ghamneawa ea siwwiimwa gheanyangaagu. 43Aba gideaba gayghwahidu eaweeda jea goneaweeseey weajoodigaagu, gajeeneaweeseey ak geebeasheesinaneey meatkwajeega sean, 44ak gaygwajakseeyi ang'iing'i ea diibigaagu ng'eanyi nea ea mwajeanung'usa laghaana uhuumba nuut aba jeedeang'wa aba gideaba mii jeeng'ni damanda jea eebareassiinaneegwa.”
Yeesu gawa jeeda gheeda sibatta Aseetta
(Mat 21:12-17; Mark 11:15-19; Yoh 2:13-22)
45Hean gawa jeeda gheeda sibatta Aseetta ak goruutta fukka shaayda haleanjeedean, 46ak gwayeeshsha saawa, “Geang'waar gideaba, ‘Gheawi itteanyuun gayghoaw heechchea gamoora buuneeda Aseetta ghawooda,’ ak ghoanung' ghoaw gwaleeda jea gafunnya geat mareanghooga.” 47Inyeessa goonealshi galagasean aba jeeda gheeda sibatta Aseetta. Nea ashoohoodiga hees ea ng'oorshoodiga ea fuga hees was ashoohoodiga buuneeda ghamwaal gichchea gwanuusta niny; 48ak ea meanyaasa gichchea eesin aba gideaba gelleeysiit buuneessean.
Поточний вибір:
Lukka 19: DTGANT09
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Datooga New Testament © Bible Society of Tanzania, 2009.
