Piiligu 30
30
1Rachel nye maa o bi dogi bii zaa ti Yakubu, o beeri yela gbaag u pubeerim. A zu, o yeli Yakubu, “Ti ma biisi, ka pa lala, ni kpi.” 2Yakubu suuri nyisigi, o boosi u, “Mani n niŋi Naawunni, a gbaag e dogim mari?”
3Rachel yeli u, “M bipoga Biliha n na la, mari u do, o ni dogi biisi ti ma. O niŋi n na mani dolli n loobi biisi ma.” 4A zu, o naag o bipoga Biliha ti u, a maa o poga. Yakubu mari u do. 5O mari puwa, a dogi biduu ti Yakubu. 6Rachel yeli, “Naawunni zabi n pa m zu. O wumi m suusigu, ka ti ma biduwa.” Ka digili o yuuri Dan.
7Biliha lee n mari puwa, a dogi biduwa paasi n ti Yakubu. 8Rachel yeli, “M zabi m beeri kpeeŋtiri, ka mi nyaŋŋi.” A zu, o digili bii maa yuuri Nafitali.
9Liya n ti nye maa o bi lee dogira, o naa o bipoga Zilipa ti Yakubu maa o poga. 10Zilipa dogi biduu ti Yakubu. 11Liya yeli, “M mari zusuŋŋu.” Ka digili o yuuri Gadi. 12Zilipa maali n dogi biduu ti Yakubu. 13Liya yeli, “Wula sufupeelim ma bi mari? Pogiba ni boona ma sufupeelim.” Ka digili o yuuri Asa.
14Chi cheebu jemani, Rubin nye dogim tiim vaari yi moo puu ti ti o ma Liya. Rachel yeli Liya, “Jaande, ti ma e biyaa dogim tiim vaari ŋa seesi.” 15Liya boosi u, “E n fa m sira ka che ma la, a na bi paali e nufu, e lee n ya n ti dee m bii dogim tiim vaari?” Rachel yeli u, “Ka e yi ti ma e biyaa dogim tiim vaari ŋa, e ni Yakubu ni tee n do yiiŋaa.” 16Zaanoori jemani, Yakubu n yi moo puu chena, Liya tuusi u soori, ka yeli u, “M nini n ya n do yiiŋaa, a kpali bo, m naani m bii dogim tiim vaari yo o lala samini.” O mari u do dindaari yiiŋu maa.
17Naawun wumi Liya suusigu, o mari puwa, a dogi biduusi banu daana ti Yakubu. 18Liya yeli, “Naawunni yo ma samini, a kpali ni naa m bipoga ti m sira zu.” Ka digili bii maa yuuri Isaka.
19Liya lee n mari puu dogi biisi bayoobu daana ti Yakubu. 20Ka yeli, “Naawunni pi ma ni piinisuŋŋu, pimparaŋa m sira ni tira ma jilima, a kpali biduusi bayoobu n na ma dogi n ti u.” Ka digili o yuuri Zebulun. 21A nyaaŋa, o dogi bipuŋŋu, ka digili o yuuri Dayina.
22Naawunni teesi Rachel yela, a wumi o suusigu, ka yoog o dogim, 23o mari puwa, a dogi biduwa. Ka yeli, “Naawunni nyisi ma yi vi niŋi, o ti ma dogi biduwa.” 24O digili o yuuri Yisifu, ka yeli, “Naawunni o na kpari n paasi ma biduwa.”
25Rachel n dogi Yisifu nyaaŋa, Yakubu yeli Leban, “Basi ma soori m pori n gaa m yiri. 26Naa m pogiba ni biisi seesi zu ni kpali m tumi i la ti ma, m gaari. E baŋŋi seema ni tumi i nene.”
27Leban yeli u, “Ka e nye m nimbaa, e zi kpe. M bogini nye maa, Duuma nafa ma ni, a ti ma bindaalim, a kpali e zu. 28Wusi ma m samini, m yo i.”
29Yakubu yeli u, “E baŋŋi seema ni tumi n ti i, a ni seema e buŋkobiri n wasi m nuu niŋi. 30Beela seesi e n daa n mari poin, ka ma ta, a paasiya ga. Seela zaa ni matira, Naawunni nafara i ni. Jemani paaya maa, m gbagba m nye m toori.”
31O boosi u, “Bo n na e kpabira?” Yakubu yeli u, “Da ti ma sen. Ama, ka e ni sagi n niŋi yaso ni ya n yeli i ŋa, m na n kpari n nyaasira e buŋkobiri maa. 32Ti m kpe buŋkobiri maa puu gamisi a binchericherisi buusi ni peeri maa zaa, a ni pebiraasi, a loobi n toori. M sanyoori zaa n na la. 33O soosa zu, e ni nye maa m mari birikoŋsi koo m ka birikoŋsi. Jemanso e n ta a puwa, ka nye bimpeeli yi a niŋi, buu koo pee, a ni pe so n bi niŋi bimbiraa, ka wune, m zuuni n na la.”
34Leban yeli u, “M sagi seema e n yeli maa.” 35Dindaari maa zaa Leban gamisi budaasi ni bunyaana seesi n ba chericheri, a ni pebiraasi ni a binchericherisi zaa nyem ti o biisi, ba nyaasira a. 36O naa dabaa ata mari buŋkobiri maa chaŋŋi n gaa wogila, ka Yakubu nyaasira a seesi n che la.
37Yakubu wa ti kpabi tibalisi ata, a ŋma a wulimaasa foli n foli a pegiri, boomabooma, a peligi n peligi. 38Niŋi n na, o naa daari digili n digili buŋkobiri maa koom ŋuubu ziya, a kpali, buŋkobiri maa yi duurini taaba koom ŋuubu maa ziya. 39Buŋkobiri maa si n za daari maa see duura, a dogirini binchericherisi. 40Yakubu barigi pesaasi maa yi Leban buŋkobiri maa niŋi. Ka penyaana maa ya n ti du, o yi tini a nyaasira Leban buŋkobseesi n ba chericheri maa. N ŋa n na Yakubu niŋi n barigi o buŋkobiri yi Leban toori niŋi.
41Buŋkobnyaana seesi n mari kpeena si n ti duura, Yakubu yi naa ni daari maa digili a koom ŋuubu zii maa, a duura nisaaniŋi. 42Ama, a bimpugiri la wune si n ti duura, o bi diŋina daari maa niŋi. A zu, bimpugiri maa loobirini Leban toori, ka bi n kpeena la mi loobira Yakubu toori.
43N ŋa sooraa n na Yakubu naa n loobi bindaana, a mari buŋkobdamta, a ni guruŋbipogiba, guruŋnachiinsi, nyogimasi, a ni buŋsi.
Поточний вибір:
Piiligu 30: hag
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2015, Ghana Institute of Linguistics, Literacy and Bible Translation (GILBTT)