Matthew 10

Jesus pik out ihn twelve apasl

(Mark 3.13-19; Luke 6.12-16)

1So Jesus kaal'op ihn twelve disaipl ahn ihn gi dem di atarity uova di bad spirit dem, so dehn kuda ron dem outa pipl, ahn fi kyuor aal kain a siknis ahn diziiz tu. 2Demya dah di niem dem fi di twelve apasl dem: Fos yo wehn gat Simon —huu dehn yuuztu kaal Peter— ahn ihn breda Andrew, ahn James ahn ihn breda John —Zebedee son dem. 3Den yo wehn gat: Philip, Bartholomew, Thomas ahn Matthew —di taks kalekta, ahn James —dat dah Alphaeus son. Den Thaddaeus, 4ahn Simon, di zealot,#10.4 Nuotis seh: Di zealot dem dah wehn lan difenda iina demde diez weh neva waahn di Roman atarity iina dehn lan. ahn di laas wan, Judas Iscariot, di wan weh wehn gwain sel out Jesus.

Jesus sen out ihn twelve apasl fi priich ahn kyuor

(Mark 6.7-13; Luke 9.1-6)

5Demya dah wehn di twelve a dem weh Jesus wehn sen out, deh tel dem demya wod: “Unu no fi go mongs di Gentile pipl dem, ahn niida go iina di Samaritan dehn sity. 6Bot unu fi go mongs fi wi Israel pipl dem —dem weh dah laik shiip weh laas. 7Ahn wen unu deh shier God Wod wid dem, unu fi seh, ‘Dah taim now; God deh kom fi ruul!’#10.7 Or: “…di Kingdom a Hevn deh nier!” 8Den unu fi kyuor di sik dem, mek di ded dehn liv agen, mek dem weh gat leprosy get beta, ahn ron out di bad spirit dem tu. Ah no chaaj unu fi di powa weh unu gat fi du demya tingz; so unu no fi chaaj fi wat unu deh du fi dem niida. 9Unu no fi ker non guol, silva, nar kapa chienj iina unu mony bag, 10nar ker non travln bag niida fi unu trip, nar wan ekstra shot, nar ekstra sandal, nar waakin stik, bikaaz wan workin man shuda get ihn pie.

11“Enywie weh unu go iina wan sity or toun, fain out huu dedeh weh dehn rispek, ahn stie iina ihn hous til unu lef outa dah toun. 12So, az unu go iina di hous, hiel di famaly. 13If di huom wot yo blesin deh triit unu gud, unu fi bles ih. Bot if di famaly dehn no wot unu blesin deh triit unu bad, den mek unu blesin stie wid unu. 14Ahn if nonbady no aksep unu, nar pie main tu weh unu deh seh, wen unu lef outa dah hous or toun, kliin aaf di dos aafa unu fut, fi shuo di pipl dem seh dehn iina dienja. 15Ah deh tel unu di chruut: di pipl dem fahn Sodom ahn Gomorrah sity gwain gat'ih muo iiziya an fi di pipl dem fahn daty toun, di die fi jojment!

Jesus waan bout di sofarin weh deh kom

(Mark 13.9-13; Luke 21.12-17)

16“Luk, Ah deh sen unu out jos laik som shiip mongs di wolf dem. So unu fi bii swif laik wan sniek ahn kuul laik wan dov.#10.16 Or: “…so unu fi bii waiz az di serpant dem ahn inosent az di dov dem.” 17Luk out fi di pipl dem, bikaaz dehn gwain grab unu ahn ker unu dah di Kongsl dem, ahn dehn gwain biit unu op wid wan wip iina dehn sinigag tu. 18Jos sieka unu dah mi falowa, dehn gwain dreg unu tu di govana ahn di king dem fi gi akount ah weh unu biliiv fronta dem ahn di Gentile pipl tu. 19Bot wen dehn han unu uova, unu no fi fret how unu gwain difen unuself, or weh unu gwain seh, bikaaz di Laad gwain put iina unu main weh fi seh wen di taim kom. 20Bikaaz di wod dem weh unu gwain seh dah no fi unu wod, bot fi di Holy Spirit.

21“Wan breda gwain gi uova ihn uon breda fi dehn kil im, ahn di pupa dem gwain gi uova dehn pikniny fi dehn kil dem, ahn di pikniny dem gwain get gens dehn pierans fi dehn kil dem tu. 22Ahn evrybady gwain hiet unu sieka unu chros ahn fala mii. Bot enywan a unu weh kiip ihn fiet tu di en, gwain get siev. 23Wen dehn deh trai fi grab unu iina wan toun, ron go iina di nada wan. Bikaaz Ah deh tel unu di chruut: unu no gwain don ron go tu aal di toun dem iina Israel lan bifuor di Son a Man kom bak.

24“Wan disaipl neva beta an ihn tiicha, ahn wan sorvant neva beta an ihn maasta niida. 25So wan disaipl shuda laan fi bii az waiz az ihn tiicha, ahn wan sorvant az waiz az ihn maasta. If dehn kaal di maasta a wan hous ‘Beelzebul,’ ho moch wosa dehn gwain taak bad bout di res a ihn famaly!

No fried fi nonbady eksep God

(Luke 12.2-7)

26“So no fried fi pipl ataal. Bikaaz enyting weh haid, gwain kom out weh pipl kyan si'it, ahn enyting weh kova op, aftawod evrybady gwain get fi nuo bout'ih. 27Ahn enyting weh Ah tel unu iina di daak, sehso iina di lait, ahn enyting weh Ah tel unu iina siikrit weh nonbady els kuda hier'ih, get'op pahn di hous-tap ahn baal'ih out haad. 28No fried a huu kyan kil unu bady, bot kyaahn kil di suol. Beta yo fried fi God huu kyan distrai di bady ahn di suol iina hel. 29Unu no nuo seh two likl bord no kaas nat iivn wan kapa chienj? Bot stil yet non a dem kyaahn drap fahn iina di skai bitout yo Faada iina hevn waahn ih fi drap. 30Dongtu di amount a hier pan unu hed ihn kount! 31So unu no fried fi nonbady, bikaaz evry wan a unu wot muo tu him an wan huol flak a bord.

Yo no fi shiem fi Jesus

(Luke 12.8-9)

32“So den, enybady weh uon mi fronta ada pipl ahn seh ihn chros iina mi, Ah gwain seh Ah uon dem fronta mi Faada iina hevn tu. 33Bot di wan weh seh ihn no nuo mi fronta ada pipl, Ai gwain seh Ah no nuo im niida fronta mi Faada iina hevn.

Trobl iina di famaly

(Luke 12.51-53; 14.26, 27)

34“Unu no tink seh Ai kom pan ort fi bring piis. No, sah; Ai kom fi mek pipl disaid wish said dehn gwain deh pan.#10.34 Or di vors kuda seh: “Ah no kom fi bring piis, bot wan suod.” 35-36Bikaaz Ah kom fi separiet di son fahn ihn pupa, di daata fahn ihn muma, ahn di daatanlaa fahn ihn madanlaa, ahn jos laik so. Unu enimy gwain bii wan a unu siem famaly.

37“Enywan weh lov ihn pupa or ihn muma muo an weh ihn lov mii, no fit fi bii mi disaipl, ahn di wan weh lov ihn son or ihn daata muo an weh ihn lov mii, no fit fi bii mi disaipl niida. 38Ahn di wan weh no wilin fi bak ihn uon kraas —pripier fi sofa— ahn fala mi, no fit fi bii mi disaipl niida. 39Bikaaz enybady weh waahn siev ihn uon laif, gwain end'op deh luuz ih, bot enybady weh wi risk ihn uon laif jos fi mii, gwain siev ih.”

Wat di biliiva dem gwain get fi fala Christ

(Mark 9.41)

40Den ihn tel di disaipl dem, “Enybady weh welkom unu, welkom mii tu; ahn enybady weh welkom mi, welkom di wan weh sen mi. 41Bikaaz di wan weh welkom wan a God prafit bikaaz ihn priich God Wod gwain get bles laik di prafit ihnself, ahn di wan weh welkom wan raichos man, bikaaz ihn dah wehn wan uova gud man, gwain get di blesin weh kom tu di raichos tu. 42Ahn enybady weh gi, if dah iivn wan kop a kuol waata tu di wan weh dah di liis mongs unu bikaaz him dah fi mii, ih shuor seh ihn no gwain luuz ihn blesin niida.”

Поточний вибір:

Matthew 10: NTIC

Позначайте

Поділитись

Копіювати