SHURAI 8
8
Dzüdu Thetayu
1Ramai nou Noha ae puhye koa sakhao hi buyu rekhaona ae kikhaorü taoye ngaipei moe, puhnou dei pei hi teikhai panou hüloua alia dzü sü panou khaiho tare. 2Deikhe nou dzüla payu ae teipei dzübomü taosü khuwure, teipei nou rükouyu teirüsü khaire, 3alia dzü sü shosho nou khaitare, teithe 150 thaisü dzü sü koutare. 4Khouh anai vei khoukha kianai zhou sakhao nasü Ararat deichidu pei hi kouh sholoure. 5Dzü sü khailailai kouh khouh kirou vei khoungao ali zhou deichi adutao pei zhingaore.
6Teithe raidai akhai hisü Noha nou sakhao vei vabomü sü houpa loua, 7puhnou lüche ali phapeie, ana sünanou dzü themodzü koute holo hailo zhaohoua bure. 8Süthaisü dzü hai theloure mosa touyu zhure donou puhnou khao ali seitae; 9ana khao nanou taoloure buh phouha-a sakhao hisü dakhai ve-e, daiolouzü dei pei hisü chua dzü buhie. Südonou puhnou puh bah thaikou khao nasü sakhao hi pothou loue. 10Puhnou teithe anaili kholoua khao nasü sakhao hinou seitapue. 11Süzhou koukhe sü khao nanou oliv süünghou ali daopoa sakhao hisü khaivere. Sühi sünou dzü hai theloure touyu Noha nou süloue. 12Süthaisü Noha nou teithe anaili buloua khao nasü seitae, anou khao nasü puh hi dakhai vepu more.
13Noha po 601 payu phaki, khouh ngaorai navei khoungao ali zhou deihi dzü sü there alia Noha nou sakhao pei hoyu nasü hapaloua zhukhaie dei sü the-a zhingao loue. 14Khouh ahai navei khoukha kainai zhousü dei teitei hai dzü there. 15Süthaisü Ramai nou Noha hisü paoe, 16“Ne, ne chapfü, ne nahpoutu maitao alia puletao vei chapfütao saloua tapalo. 17Neye koa sapalo hrikhaona hrülai - raohou, soukhaona ae pounou roua tayu khaona taosü sapalo, puletaoye panou toukoa tya kapaloua deiphao phou loure donou.” 18Südonou Noha nou puh koa puh nahpoututao, puh chapfü alia puh nahmaitao vei chapfü maitao sa-a paloure. 19Alia soukhaona hrülai, pounou taitayu hrikhaona hrülai, raohou hrülai, deiphi hinou lüa tayu hrikhaona hrülai, lahkuku meme soua sakhao hinou vakou tapaloue.
Noha nou Posheelayu
20Süthaisü Noha nou rathobuh ali souloua sheeyu soukhaona alia raohou tya che hinou alili poloua rathobuh hinou sütao teitei hai mei deia Ramai hi sheela peie. 21Posheelayu kaivei nahai Mapao nou süloua rukha-a lah puh hi haibüa paoe, “Mai vanou deiphao hai Enou chaa peipu khailai more, daiolouzü mai hai, nahle-a buki nou hashi tsücho pare, Enou souhayu büa hrikhaona hrülai hai souhapu laimoe. 22Deiphao hai nanou bukisa daothou-southouyu, chachiyu, teilü-teisai, kah-hou, hea-khei touyu hai panou bulai.”
Поточний вибір:
SHURAI 8: POUMBSI
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.