MATTHEW 8
8
Khunthi khe ham ri ba
(Mk. 1.40-45; Lk. 5.12-16)
1Jisu hading ni phrang akhaiba jang gabang subung boni yaohon rikpha ba. 2Odehe, subung saosi khunthi jayaba boniha phai hi thi ba, Gabra, ning nangjao khade, ang khe ragao ri phu du, thi hi bo khlim ba.
3Jisu yao phlao hi bo khe remhi thi ba, Ang nangjao du dou. Boha ning bo khunthi jayaba ragao lang la kha. 4Odehe, Jisu boni ha thiba, ‘Saosi niha bo thiya mane khlai hi girik lah. Thikhabo, Jonthaima niha thang hi phnu lah. Moses ne rimane khlai hi saikhoyaba buthu khe yaopha lah. Bede thikhade, subung buthu hamsisi mithi phuma ne.’
Saosi subedar ni lonma
(Lk. 7.1-10)
5Odehe, bo Kapernaum ha hapsing ba. Boha siphaiya rjasi ni hoja saosi boniha phaihi thiba, 6Gabra, ani ansa adur jahi noh ha yam ha thuhi gabang sajao hi dong, thihi boniha khainsu ba.
7Jisu thiphin ba, Ang phaihi bokhe ham ri nang.
8Siphaiya rjasi ni hoja thiphin ba, O Gabra, ani noh bising ha ning phai mane ang gathaya dou; grao se ning thi lah, ani ansa ham lang la nang. 9Ang bo malai ni hukhum ha se dong ba, ani bakhla ha siphaiyarao dong. Saosi subung khe, Ning thang lah, ang thikha de, bo thang la re; malai khebo, phai thihi ang thikha de, bo phai re. Ani leng niha bo, ebo khe dang, thihi ang thikha de, bo dang re, thi hi bo grao thiphin ba.
10Jisu ebo grao buthu khe khnaba jang hamsi ning gmang hi bo jang rikphayarao niha bo thi ba, Gibi jang ang nisi khe thidu, Israelrao ni bising habo elei lonma raoyaba khe ang nuya kho. 11Ang nisi khe thi du, sainja sain jroba ni phrang gabang subung phai hi, Abraham, Isak ar Jakob niha phai hi, sorgo raji ha kham nang; 12Thikhabo, raji ni basathu de raji andar ha rik hon jao hi dong nang. Oraha de hathai waihi grahi dongma se, ode bo thi ba. 13Odehe, Jisu siphaiya rjasi ni hoja niha thi ba, Thang la ga, ning lonba lai ning nini basao ha sophai thing. Odehe, ansa de bo bubli ha ning ham lang la kha.
Peter ni busuma khe ham ri ba
(Mk. 1.29-34; Lk. 4.38-41)
14Jisu Peter ni noh ha phaiba ha, boni busuma limhi thuyam ha thuhi dongba khe bo nu kha. 15Odebani, boni yao khe remba jang boni limthai de ham lang la kha, ode, bo baija hi bo khe naiso-nuso la kha.
16Odehe, sainbli japhaiba ha, gabang subung sgain madai gajaoyarao khe Jisu niha bonsi labu hi phai ba. Odehe, grao jang bo sgain madai buthu khe rik hunhi limyarao khrip khebo bo ham riba: 17Gorasali Isai jar thi langyaba grao gibi ja mane khlai hi elei japhu ba, Jini raoyayaba khe jar sao ha lahi, jini gilim gasa buthu khe hor la kha, thiyaba gibi ja phai kha.
Jisu ni rikphayasa
(Lk. 9.57-62)
18Jisu boni sersi giding subung bangba khe nuhi kharnai ojang nar ha thang mane khlai hi bo sani ba. 19Odehe, dara slingriyaba saosi boni ha phai hi boni ha, Slingriyaba, ning braha thang du, ning jang baosi ang bo thang pha ma, ode bo thiba.
20Jisu boni ha thiphin ba, Mosrong nibo longkhor dong, daonibo bithip dong; thikhabo Marsi ni Basa ni bokhro deng mani hathan giri.
21Boha slingriyarao ni bising ha subung gibin phai hi thi ba, Gabra, sagang ha ani bupha khe phipda mane khlai hi ang khe haiha lah.
22Thikhabo, bo boni ha thiphin ba, Ang jang rikpha lah, subung githi khe bonsi ni subung githi ning phip la thing.
Dithon khe johi magain ri ba
(Mk. 4.35-41; Lk. 8.22-25)
23Odehe, Jisu rung ha ga ba, jar ni yaohon rikphayaraobo bo jang rikpha ba. 24Srap khlai hi wari ha baryungma hamsi ning raohi sip ba. Odebani, dithon jang rung gilikdi gilikdi ja ba; bo de thuhi dong ba. 25Odehe, bo jang rikphayarao boni ha thang hi bo khe masa hi thiba, Gabra, jing khe sogo lah, jing jam thar ma ja kha, thihi bonsi thi ba.
26Jisu bonsi khe thi ba, O lonma bangyayarao, snadi jabani nisi khin ba? Odehe, bo baija hi, bar jang wari khe bo jo ba, ode phirik phirik thao lang ba.
27Subung buthu hamsi ning gmang ba, Ebo subung la snadi ni subung? Bar jang wari sosibo boni grao khe mani du lao? thi hi bonsi thi ba.
Sgainjik gajaoyaba khe ham ri ba
(Mk. 5.1-20; Lk. 8.26-39)
28Odehe, wari ni ojang nar ha Gadarin raji ha bo sohiba ha sgainjik gajaoyaba subung gini mangkhlong ni phrang baigo buhi goron ba, bonsi elei hamya du, bo lama ha saosi bo thang phuya. 29Odehe, bonsi jirikkhao hi thi ba, O Madai ni basa, ning jing khe snadi khusi nangjao ba? Jing khe dukhu ri mane khlai hi bubli ni sagang ha ning phai ba?
30Boha, ora ni phrang khaisa thangdao hi hono buthu gabang dong ba. 31Odehe, sgain madai buthu thi ba, Ning jing khe rik khlai ma thikha de, hono buthu ni bising ha jing khe haiha lah, thihi bonsi boniha khainsu ba.
32Boha, bonsi khe thi ba, Thang la ga. Odebani bonsi baigo hi, hono buthu ni bising ha bonsi hap ba. Ode, hono buthu khrip brub brub khai khlai lang hi, wari ha galaising hi bonsi dih ha thih thar kha.
33Odehe, hono khrangyarao khailang hi nogor ha bonsi thang hi, sgain madai jang gajaoyarao ni basao ha sophaiyaba buthu khebo, khrip bonsi sainthi kha. 34Odehe, noleisi jang Jisu khe goron mani khlai hi bonsi baigo bu ba. Odehe, bo khe bonsi buba jang bonsi ni raji ni phrang baigo mane khlai hi bonsi bo khe khainsu ba.
Поточний вибір:
MATTHEW 8: DIMASBSI
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
