Популярні біблійні вірші з युहना 14

Поділитись

लौ ङा आल्‌तोक्‌हाङः नीङ्‌कायः स्‍याङ्ओ ल्‍हुङ् बयःनेःनाङ्‌स। ङाइ बयःओ स्‍याङ्ओ ल्‍हुङ्‌पाय् अरु ल्‍हाव्‍ह्‌दैबाङ्‌कोः मुओलम्इ बयःसा खाय्‌नीली। लौ ल्‍हुङ् र्‍याङःमामाःत रैमामाःत मुन दा।

“लौ ओउः ल्‍याम्‌पाय् ङा लेःआः। दोङ् स्‍यान्ओमा जीङः दोःताक्‌सामा ङा लेःआः ङ। ङाइ आःताः आलःमाःतो सुइमा ङाकोः आपाकःताङ् आल्‌सा दोःइली।

“लौ ताःताः ल्‍हुङ् र्‍याङःताःनल। परमेस्‍वर्‌कायः ङ्‌हाम्‌तेःनानी ङाकायःमा ङ्‌हाम्‌नाङ्‌स दा।

ओउःपाय् ङाकोः आपाइ ल्‍होक्‌सा खेःओ दोङ् ग्‍वालामः लेःआः। ओउःइ सबै कुरा स्‍यान्‌तेःनै फेरी ङाइ तोओ कुरापाय् सबै ल्‍हुङ्‌हाङः गीलताक्‌तेःनै।

लौ ङाइ तोओ कुरा ग्‍याती जाङ्‌ह्ओलम्इ ङाकायः राप्‌नाःताङः। फेरी ङाकायः राप्ओलम्इ ङाकोः आपाइ राप्‌नाःथास ङाइमा राप्‌नाङःसु। ओउःमयःकःहाङः ङा लयः छ्यानःती थालाङ् दाह्‌नाङः” त दाय्‍ह्‌ती येसुइ ओउःकुस् वाह्ओमयःकायः तोआकान्।

ओहाङःसै ङाइ आपाकः तेती तोनाङः ओउःइ नीङ्‌कायः अरु लव्‍ह्‌ती जाङ्‌ह्‌सा साथी बयःतेःनै। ओउःपाय् ओउः दोङ् कुरा छ्यान्‍ह्ओ ग्‍वालामः लेःआः नीङ्‌कुस् गलकायःमा मुलेःनाः। अरु ल्‍हाव्‍ह्‌दैबाङ्‌हाङः मुओ ङाकायः ङ्‌हाम्‌मालो मान्‍तालम् ओउः ग्‍वालामः दोःइली। ओउःकायः ओउः मान्‍तालम्‌खेइ च्‍यवःमानीली तय्‍ह्‌मानीली ओउःत झ्‍यान्‍ते दोःमाइली। ओउःपाय् नीङ्‌कःगन ब्राङ्‌तोलेः मुनाः ओउःत झ्‍यान्‍ते नीङ्‌खेइ ओउःकायः तय्‍ह्‌तेःनानी।

फेरी दोह्‌लोकायः ङाकोः मय्‍ङ् पेह्‌ती नीङ्इ तेती तोतेःचानाङ्‌स ओउःलेः ङाइ जाङ्‌ह्‌नेःनाङ्‌स ओउःत हायःती ङाकोः आपाकायः ङाइ ताङ्‌ह्‌ताक्‌नाङः। लौ उया दोह्‌कायःलोतेः ङाकोः मय्‍ङ् पेह्‌ती तेती तोचानाङ्‌स ओउःलेः ङाइ जाङ्‌ह्‌नेःनाङ्‌स बा।

नीङ्इ ङाकायः राप्‌तेःनानाङ्‌स त खेःया ङाइ तोओ कुरा ग्‍याती जाङ्‌ह्‌नु दा।

ङाकोः आपाकोः कीम्‌हाङः नाःतो याक्‌सा थाव्‌लम् दोःलेःनाः। नीङ्‌कायःपाय् थाव् नाःल त खेःया ङाइ तोचेःनाङ्‌स खेःतो बा।

लौ नीङ्‌कायः थेङा ङाइ थाव् जाङ्‌ह्‌ती गम्‌लाङ् आल्‌नाङः। आल्आक्‌तीको ङा नीङ्‌कायः रोम्‌लाङ् फेरी द्यान्‍ह्‌ती वाङ्‌नाङः। रोम्आक्‌तीको ङा गाःताङ् मुचाङः नीङ्‌मा ओहाङः मुसा दोःतेःनै।

“अ प्रभुय नाङ् आल्‌सा खेःओहाङः ङीइ तय्‍ह्‌ङुसुलु गत हायःती ओहाङःकोः ल्‍याम् तय्‍ह्‌सा खाय्‌चाङःसु र” त दाय्‍ह्‌ती थोमा दाय्‍ह्आ।