प्रेरित 12
12
हेरोद राजाइ मन्डलिक् उप्रै कर्ल अत्याचार
1उ समइमा हेरोद राजाइ मन्डलिक् बिस्वासि दाजु-भाइलकलाइ पक्रिबानाइ उखर्ह्वाक् उप्रै अत्याचार कर्बाक् सुरु कर्लक्। 2ओहिं यहुन्नाक् दाजेक याकुबलाइ तलवारेसौ मार्बा लागालक्। 3यि कामे यहुदिलक् खुसि भेल देखिबानाइ ओहिं झन् सुरिहिन् पत्रुसलाइ आको पक्रलकुन्। उ घट्ना खमिर नहिंमिसाल पिठा खाबाक् पाबनक् समइमा भेल रैल्हकुन्। 4हेरोदे पत्रुसलाइ पक्रिबानाइ झेलखारै हाल्लकुन्, आउँ ओछि रुङ्लाहार सिपाहिलकलाइ चार-चार जेनाक् टोलि बानाहिन् जिम्मा देहिन् धर्लाहा। तसौ छुट्कारा दिनक् पाबनक्पाछु पत्रुसलाइ यहुदिलकक् आगारि आन्बाक्नि हेरोदक् बिचार रैल्हकुन्।#प्रस्थान १२:१-२७ 5यरङ् करिहिन् पत्रुस झेलखारै थुन्लटाकै, मन्डलिक् मानुसलके ओक्राक् लागि लागातार परमेस्वरक्सङ्हिं पाराथ्ना कर्तिहि रैल्हुहुन्।
पत्रुस झेलखारक्भटे निस्कल
6तसौ हेरोदे पत्रुसलाइ मानुसलकक् आगारि आन्बाक् आघुल्कोक् रातै पत्रुस दुइजेना सिपाहिलकक् माझै सुत्ल रैल्हक्। पत्रुसलाइ दुइगोटा फालामक् साङ्लाइसम् बाँर्ल्ह धर्लिहिंक्, आउँ झेलखारक् दिहाँरै सिपाहिलक् रुङिहिन् बस्ल रैल्हुहुन्। 7तसौ ओछि पर्भुक् एक्टा स्वर्गोदुत टुभ्लुक्क देख्वार पोर्लोक्, आउँ कोठाइ उँजत चम्कलकुन्। स्वर्गोदुते पत्रुसलाइ कोखाहाइ बइठ्याइबानाइ “छिटो उठ्” बाजिहिन् जागालकुन्। आउँ पत्रुसक् हाथै बाँर्ल्ह साङ्लालक् फुस्किबानाइ झर्लकुन्। 8तसौ स्वर्गोदुते पत्रुसलाइ बोल्लोकुन्, “पागि कसिबानाइ जुत्ता पेहेर।” तसौ ओहिं उहेरङे कर्लक्। आउँ स्वर्गोदुते ओक्रालाइ बोल्लोकुन्, “पछउरि होरिबानाइ मोरा पाछ्-पाछु आउ।” 9तसौ पत्रुस स्वर्गोदुतक् पाछ्-पाछु जाइबानाइ झेलखारक्भटे बाहार निस्किहिन् स्वर्गोदुते कर्ल यि काम साँच्चिय हो बाजिबानाइ ओक्रालाइ थाहाय नहिंरैल्हकुन्। ओहिं ता दर्सन देख्तिहि रहम्ना ना बाजिहिन् ठान्ल्हक्। 10उखर्ह्वा पैल्हो आउँ दोस्रो रुङ्लाहार टोलिलकक् आगारिहि सहरक् फालामक् मुल-दिहाँरै पुग्लुहुन्। तसौ उ दिहाँर आफ्नि मने उद्रिजाइलकुन् आउँ उखर्ह्वा बाहार निस्कलुहुन्, आउँ एक्टा खौलाक् पैंदा भेहिन् जाइलुहुन्, उहेटाकै स्वर्गोदुते पत्रुसलाइ छारिबानाइ जाइलकुन्।
11तसौके पे पत्रुसक् चेत खुल्लकुन्, तसौ ओहिं बाज्लक्, “असौ मोरानि साँच्चिय थाहा भेओगे, कि पर्भुइ आफ्निक् स्वर्गोदुत पाठाइबानाइ हेरोद राजाक् हाथक्भटे आउँ यहुदिलके मोरानि जेहे कर्बा चाहाथ् उ जम्मा कामक्भटे छुट्कारा देओगे।”
12यरङ् कहिन् ओहिं थाहा पाइनेसौ, मर्कुस बाज्ल यहुन्नाक् माँयक मरियमक् घरै उ जाइलक्। ओछि थुप्रोय मानुसलक् जउर भेइबानाइ पाराथ्ना कर्तिहि रैल्हुहुन्। 13पत्रुसे बाहारक्भटे दिहाँर ढक्ढक्यालक्, तसौ रोदा नाउँ भेल एकजेना चक्र्याहाइनि दिहाँर उँद्रबा आइलक्। 14पत्रुसक् बोलि चिन्हिंबानाइ उ खुसि भेहिन् दिहाँरे नहिं उद्रिबानाइ भिट्रक्पटि दग्रटे जाइलक् आउँ ओहिं बोल्लाहा, “पत्रुस दिहाँरै आहिन् ठड्ध्याल रहैस्।” 15तर उखर्ह्वाइ ओक्रानि बोल्लिहिंक्, “तुँइ बौलाल ना किस् हाँ।” तर ओहिं बाज्लक्, “होय, साँच्चिहिंक् पत्रुसे आइल रहैस् बोलो,” बाजिहिन् जिग्रि कर्लक्। तसौ उखर्ह्वाइ बोल्लिहिंक्, “उ ता ओक्राक् हेरचाहा कर्लाहार स्वर्गोदुत भेका।”
16तर पत्रुसे सेहे दिहाँर ढक्ढक्यातिहि रैल्हक्। पाछु उखर्ह्वाइ दिहाँर उद्रिहिन् दिठाटे ओछि पत्रुसिहिलाइ देख्ते उखर्ह्वा छक्कय पोर्लुहुन्। 17तसौ पत्रुसे उखर्ह्वालाइ हाथक् इसाराइ चुपलाबा लागालाहा, आउँ पर्भुइ ओक्रानि झेलखारक्भटे कहने बाहार निस्काल बाजिहिन् जम्मा कहिन् उखर्ह्वालाइ जानालाहा। तसौ यि कहिन् याकुब#१२:१७ याकुब: यि याकुबसेहे येसुक् भायक रैल्हकुन्, जुन् यरुसलेम मन्डलिक् अगुवा रैल्हक्। आउँ ओर्को दाजु-भाइलकलाइ आको जानाबेहेरा बोलिहिन् ओछिसौ उ ओर्कोय ठाँओइ जाइहाल्लक्।
18तसौ बिहान पोर्नेसौ पत्रुसलाइ किस् भेल बाजिहिन् झेलखारै रुङ्लाहार सिपाहिलकक् बिचइ बर्के खैला-बैला भेलाहा। 19हेरोदे ओक्रालाइ खोज्बाक् हुकुम देलक्, तर कच्छुहु नहिं भेंटालिहिंक्, उहेसैर्हे झेलखारै रुङ्लाहार सिपाहिलकलाइ केरकार करिबानाइ उखर्ह्वानि ज्यानसाजाइ देबाक् हुकुम कर्लक्।
ओक्राक्पाछु हेरोदसेहे यरुसलेम छारिहिन् कैसरिया बाज्ल ठाँओइ जाइलक् आउँ ओच्छिहि बस्बा ठाल्लक्।
हेरोद राजाक् मरन
20उ समइमा हेरोद राजा टुरोस आउँ सिदोन सहरक् मानुसलकक्सङ्हिं सार्होय रिसाल रैल्हक्। उहेसैर्हे उ दोहोग्वा सहरक् मानुसलक् एके जुट भेइबानाइ हेरोद राजालाइ भेंट कर्बा पाउस् बाजिहिन् उखर्ह्वाइ राजाक् आफ्निक् काम कर्लाहार बलस्तस बाज्ल मानुसक्सङ्हिं मेलमिलापक् लागि कहिन्-काथा कर्बाक् माङ् कर्लुहुन्। किसाबुने सेब्भ्रोउ खाबाक्-पिबाक् थोकलक् ओक्रिहिंक् देसक्भटे उखर्ह्वाइ लेगाथ्।
21तसौ हेरोदे कहिन-काथा कर्बाक् तोक्लोय दिनै राजाक् पैर्हन पेहेरिबानाइ आफ्निक् सिंहासनै बस्लक्, आउँ यन्हिं बाजिहिन् मानुसलकक् आगारि भासन कर्लक्। 22तसौ मानुसलके बर्के सोरे चिच्याहिन् यन्हि बाज्लुहुन्, “यि ता मानुसक् बोलि बोइने, देउताक् बोलि हो।” 23तर हेरोदे परमेस्वरलाइ आदर नहिं कर्ल सिहिरे, ताट्काले पर्भुक् एक्टा स्वर्गोदुते ओक्रानि प्रहार कर्लकुन्, तसौ उ पोंक्च्याँक्-पोंक्च्याँक् पिल्वा फोरिबानाइ मोर्लोक्।
24तर परमेस्वरक् बचन फिंज्ते जाहिन् बिस्वासिलकक् सङ्ख्या बर्ह्टे जाइलकुन्।
25बारनाबास आउँ साउले आर्थिक सहयोग पुर्याबाक् काम सक्नेसौ यरुसलेमक्भटे एन्टिओखिया सहरै फर्कलुहुन्। उखर्ह्वाक्सङ्हिं मर्कुस बाज्ल यहुन्नालाइ आको लेहिन् आइलुहुन्।
Seçili Olanlar:
प्रेरित 12: DEWZ
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2024 (Active), Mother Tongue Translators Society and Wycliffe Bible Translators, Inc. All rights reserved.
