प्रेरित 11
11
पत्रुसे यरुसलेमक् मन्डलिमा बयान देल
1तसौ यहुदियाइ रैल्ह प्रेरितलक् आउँ पर्भुक्लाइ बिस्वास कर्लाहार दाजु-भाइलके ओछि रैल्हाहार कुन्हुँ-कुन्हुँ अर्जाति मानुसलके आको परमेस्वरक् बचन सुइकार कर्ल बाजिहिन् सुन्लुहुन्। 2तसौ पत्रुस यरुसलेमै पुग्ल बेलाइ ओछि रैल्ह खतना कर्बाय पोर्लाहार बाज्लाहार बिस्वासिलके ओक्रानि यन्हिं बाजिहिन् दोस लागाबा ठाल्लिहिंक्, 3“तुँइ ता खतना नहिंभेल मानुसलकक्सङ्हिं किसा खाबाक्-पिबाक् काम करस्ला?” 4तसौ पत्रुसे जम्मा कहिन् एकेपरे उखर्ह्वालाइ सुनाबा ठाल्लाहा,
5“मुँइ योप्पा सहरै भेइटे पाराथ्ना कर्तिहि रैल्हम्, आउँ मुँइ यरङ् एक्टा दर्सन देख्लम्। तसौ स्वर्गोक्भटे एक्टा बर्के तन्नाक्परौ चारौ चोचाइ गर्थिहिन् टरक्पटि झर्तिहि रैल्ह किच्छु थोक् मुँइ देख्लम्, आउँ उ मोरे छेंउहिमा आइबानाइ अँर्लकुन्। 6तसौ मुँइ राम्रोइसौ दिठाटे ओछि ता पिर्थिबिमा भेल जम्मा थरिक् चारटाङ्याँ जन्तुलक्, सोइकोलाहार जिवा-जन्तुलक् आउँ आकासै उझ्रलाहार चरै-चुर्गुनिलक् देख्लम्। 7ओक्राक्पाछु मुँइ यन्हिं बाज्ल एक्टा आवाज सुन्लम्, ‘अ पत्रुस उठ्, आउँ मारिबानाइ खा।’ 8तर मुँइ बाज्लम् ‘बोइने पर्भु, किच्छु असुद्ध थोकलक् मोरा मुखै अज्झसम्म कख्नुहुँ नाहाँ पोर्लो।’ 9तसौ स्वर्गोक्भटे फेरि दोहोराइबानाइ उ आवाजे मोरानि यन्हिं बोल्लोक्, ‘परमेस्वरे सुद्ध ठहराल चिंजलाइ तुँइ असुद्ध बुन् ठान्।’ 10तिन बाजिसम्मयँ यहेरङे भेलकुन्, आउँ उ जम्मा थोकलक् फेरि स्वर्गोक्पटि लेगिजाइलकुन्। 11दिठाहो, उहे समइहिमा कैसरिया सहरक्भटे मोराठालाइ पाठाल तिनजेना मानुसलक् मुँइ बस्ल घरै आइपुग्लुहुन्। 12पबित्र आत्माइ मोरानि उ मानुसलकक्सङ्हिं अफ्ठ्यारो नहिंमानिहिने भेंटाबा जाबाक्नि देखालक्। आउँ उ छवउ जेना पर्भुक्लाइ बिस्वास कर्लाहार दाजु-भाइलकौ मोरेसङ्हिं हिंठ्लुहुन्, आउँ हामि जम्मायँ उ मानुसक् घरै जाहिन् पोस्लुहुँक्। 13तसौ कर्नेलियसे हाम्रानि जानालक्, एक्टा स्वर्गोदुत ओक्राक् घरै ठड्ध्याहिन् यन्हिं बाज्तिहि रैल्ह ओहिं देख्लक्, ‘योप्पा बाज्ल ठाँओइ कुन्हुँ मानुसलाइ पाठाइबानाइ पत्रुस बाज्ल सिमोनलाइ हाँख्राबा पाठाउ। 14ओहिं तोरालाइ परमेस्वरक् बचन सुनायस्ला, आउँ उहेभटेहि तुँइ आउँ तोरा जम्मायँ घर परिबारे मुक्ति पाहोला।’ 15जब मुँइ साराबा ठाल्लम्, तसौ जहरङ् करिहिन् पैल्हा हाम्राउप्रै पबित्र आत्मा आइल रैल्हक्, उहेरङ् करिहिने उखर्ह्वाक् उप्रै आको पबित्र आत्मा आइलक्। 16तसौ मुँइ पर्भुइ बाज्ल उ कहिनक्लाइ सम्झलम्, ‘यहुन्नाइ ता पानिसम् बप्तिस्मा देलक्, तर तोहोराखर्ह्वाक्सेहे पबित्र आत्माक्भटे बप्तिस्मा भेहेर्ला।’#प्रेरित १:५ 17पर्भु येसु खिरिस्टइ बिस्वास कर्लटाकै परमेस्वरे हाम्रालाइ जेहे बरदान देल धरैस्, उहे बरदान उहौखर्ह्वालाइ देल रहैस् भेने परमेस्वरलाइ रोक्बा पार्बाक् मुँइसेहे कुनजेना ते?”
18तसौ उ कहिन् सुन्नेसौ उखर्ह्वा दापदिप्प भेलुहुन्, आउँ उखर्ह्वाइ यन्हिं बाज्तिहि परमेस्वरक् पर्सन्सा कर्लुहुन्, “अखसौ ता अर्जाति मानुसलकुहुलाइ आफ्नि-आफ्निक् पापलाइ मानिलेहिन् परमेस्वरमाहा आबाक् आउँ जिबन पाबाक्लाइ मौका देल धरेट्थ्ला खम्तिक्।”
एन्टिओखिया सहरक् मन्डलि
19स्तिफनसलाइ मारिहिन् पाछु पर्भु येसुलाइ बिस्वास कर्लाहारलकलाइ सतावट आइल सैर्हे धेरेजस्तो पाराहिन् जाइलुहुन्, आउँ कुन्हुँलकसेहे फोनिकेक् इलाकाइ पुग्लुहुन्, कुन्हुँसेहे साइप्रस टप्पु आउँ एन्टिओखिया सहरसम्मयँ पुग्लुहुन्। तसौ पैल्हा उखर्ह्वाइ यहुदिलकलाइ माटेन् परमेस्वरक् बचन सुनालाहा।#प्रेरित ८:१-४ 20तर उखर्ह्वामध्येमाहा कुन्हुँ-कुन्हुँसेहे साइप्रस आउँ कुरेनि बाज्ल सहरक्भटे आइल मानुसलक् रैल्हुहुन्। उखर्ह्वाइ एन्टिओखियाइ आइबानाइ गिरिकलकलाइ आको पर्भु येसुक् खुसिक् खभर सुनालुहुन्। 21पर्भुक् सक्ति उखर्ह्वाक्सङ्हिं रैल्ह सिहिरे थुप्रोय मानुसलके बिस्वास करिबानाइ पर्भुक्लाइ पछ्यालुहुन्।
22तसौ उ खभर यरुसलेमै रैल्ह मन्डलिमा पुग्लकुन्, आउँ उखर्ह्वाइ बारनाबासलाइ एन्टिओखियाइ बुझ्बा पाठालिहिंक्। 23ओछि पुग्नेसौ ओहिं उ मानुसलकलाइ परमेस्वरे दाया करिहिन् आसिक् देल देखिबानाइ एकदमे खुसि भेलक्। तसौ उखर्ह्वा जम्माहिंलाइ ओहिं पर्भुमा पुरा हिर्दायाइसौ बिस्वासि भेहिनें बसह बाजिहिन् हौसला देलाहा। 24किसाबुने बारनाबास पुराय रुपै पबित्र आत्माइ चालाल आउँ बिस्वासै बल्यो रैल्ह एक्टा राम्रो मानुस रैल्हक्, आउँ ओहिं कर्टे थुप्रोय मानुसलके पर्भुक्लाइ बिस्वास कर्लुहुन्।
25ओक्राक्पाछु बारनाबास साउललाइ खोज्बाक्नि टार्सस बाज्ल सहरक्पटि जाइलक्। 26तसौ ओछि साउललाइ भेंटानेसौ ओहिं एन्टिओखियाइ आन्लकुन्। आउँ ओच्छिहि दोहोजेना एक बर्ससम्मयँ मन्डलिक् मानुसलकक्सङ्हिं सङ्गति करिहिन् थुप्रोय मानुसलकलाइ सिच्छा देलाहा। एन्टिओखियाहिमा जम्माहिंसौ पैल्हा चेलालकलाइ खिरिस्टियन बाजिजाइलुहुन्।
27उहे समइमा कुन्हुँ-कुन्हुँ अगमबक्तालक् यरुसलेमक्भटे एन्टिओखियाइ आइलुहुन्। 28उखर्ह्वामध्येमा अगाबस नाउँ भेल एकजेना मानुस उठिबानाइ जम्मा सन्सारभोरिय#११:२८ जम्मा सन्सारभोरिय: सेब्भ्रोउ सन्सार बाज्ल रोमि साम्राज्जे हो, जुन् इस्राएलक् जिमिमा बाज्ल बुझेला। अलिकाल आबाठाल्ल रहेला बाजिहिन् पबित्र आत्माइ ओक्रालाइ देखाल भबिस्यइ भेबा आइलाहार कहिनलक् जानालाहा। (पाछु उ अलिकाल रोमि राजा क्लौडियसक् पालाइ आइलकुन्।)#प्रेरित २१:१० 29उहेसैर्हे एन्टिओखियाक् बिस्वासिलके यहुदियाइ रैल्ह बिस्वासि दाजु-भाइलकक् लागि आफ्नि देबा पार्ल जट्का सहयोग भेंटि उठाइहिन् पाठाबाक्नि बिचार कर्लुहुन्। 30यरङ् करिहिन् पैसा उठाहिन् उखर्ह्वाइ यरुसलेमक् मन्डलिक् एल्डरलकक् लागि बारनाबास आउँ साउलक् हाथै पाठाइदेलाहा।
Seçili Olanlar:
प्रेरित 11: DEWZ
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2024 (Active), Mother Tongue Translators Society and Wycliffe Bible Translators, Inc. All rights reserved.
