यूहन्ना 12

यीशु पायापोर ईत्र

(मत्ती 26:6-13; मरकुस 14:3-9)

1यीशु फसहान सहा दिह पूर्वी बैथानीयामाय आवा जांबी लाजरस एतो, ज्याह यीशु मुरील मायरीन जीवतालू किरील हि. 2ताहारी तास तान केरता जेवण तियार किरील; एने मार्था सेवा केरतीन एती, एने लाजरस तान मायरीन एक एतो जो तान केरता जेवण करण्या केरता बोहील एतो. 3तेवी मरियम लेट माखान अर्धा हेर मोंगो सुगंधीत तेल लीन यीशुन पायापोर टाकीन, एने आपणो लेट्याकेरिन तान पाया नुसेल; एने सुगंधीत तेलाकेरिन घेर सुगंधीत एय गीया. 4पुण तान चेला फायरीन यहूदा इस्कर्योत नावान एक चेलो जो ताह देरावनेपूर आपण्यू एतो, केणेंन लागिल. 5“ज्यो सुगंधीत तेल तीन होव रुपये माय पाकील गारीबांह का आपायेल गीयो नाहं?” 6तान हि वात जानकेरता केदाली नाहं कि चिंता एती पुण जानकेरता तो चोर एतो, एने, तान आहने तान थेयली रेथे एती एने तामाय जे काही टाकील जातेह ते काडीन लेतेन एतो. 7यीशु केयेल, “ताह रेणेदेन ताह मारो पुरणे जाला दिहान केरता रेहू द्या. 8काहाकाय गरीब तर तुमरो हेरी कायम रेणे पुण मी तुमरो हेरी कायम रेहू नाहं.”

लाजरान विरुद्ध चाल

9ताहेरया यहूदी मटली गर्दीह मालूम एय गीयो कि तो तिथ हि, ते नाहं केवळ यीशुन कारण से आवा पुण ज्ञान केरता कि लाजराला देखू, ज्याह तास मुरील ताम जीवतालो किरील एता. 10तेवी मुख्य याजकान वजेसे लाजरस ला मारणे केरता होमच्यो तियार किरील. 11काहाकाय कि तान कारण से जादा यहूदी निकलीन गीया एने यीशु उपेर विश्वास किरील.

यरूशलेममा विजय-प्रवेश

(मत्ती 21:1-11; मरकुस 11:1-11; लूका 19:28-40)

12दिहीरा एक दिह जादा माणहान जे पूर्वी आवा एता हे होमलील एता कि यरूशलेम माय आविह हि. 13तां खजुरान झाडान डालखा लीन, एने ताह मिलने निकेलना, एने आयेडने लागिल, “होसांन्ना! धन्य इस्राएलान राजो, जो प्रभु नाव से आविह.” 14ताहेरया यीशुह गेदळीन शिघरू जुडना; तर तो तान उपेर बोहीन गीयो; जोहलो लेखील हि, 15हे सियोनान सोरी, बिऊ मां; देखू, तारो राजा गेदडान पिला पोर बोहील आविह हि. 16तान चेलो हि वात पेल्ला समजील नाहं, पुण ताहेरया यीशुन महिमा प्रगट एय गीयो तर ताह इआवीह कि हि वात तान विषय माय लिखील एती एने माणहान तान हेरी ज्योच प्रकारचा व्यवहार किरील एतो. 17तेवी गेर्दी च्या ता माणहान गवाही आपील, जे ता टायीमा तान हेरी एता तास लाजरला माहाण मायरीन हादाडळीन मोरील मायरीन जीवतालू किरील. 18ज्योच कारणाने माणहान ताह भेट आपणे केरता आवा एता कारण तास होमलील एता कि तान आश्चर्य कर्म देखाडील. 19तेवी फरीसीन आपसामाय केयेल, “फूस तर केरू कि तुमरो फायरीन कायीच नाहं एहू शकणार देखू, जग तान पासाण चालतो हि.”

यूनानी माणहान यीशुह होद्णो

20जां माणहे तीवारामाय उपासना केरणे केरता आवील एता न्या मायरीन काही यूनानी एता 21तास गलीलामाय ता बेथसदान रेणारे फिलीप्पुस आहने आवीन तान आहने विनंती केरील, “महाराज; आमु यीशुह भेट आपणेन ईच्छा हि.” 22फिलीप्पुस आवीन आंद्रियास ला केयेल, तेव्ही आंद्रियास एने फिलीप्पुस ने आवीन यीशुह केयेल. 23ज्ञान उपेरीन यीशु केयेल, “ती टाइम आवीन गीयी हि, कि माणहान सोरान महिमा ओहलो” 24मी तुमूह खेरो खेरो किथे कि ताहेरया ताहुकवोर गोवान दाणा जोमनि पोर मेलीन मोरीन नाहं जात तो एखालो रेणे; पुण ताहेरया मोरीन जाथू, तेवी जादा फोल आपथु. 25जो आपणो जीवाह प्रिय माणने, तो ताह गोमाडी आपथु; एने जो ओवतो जगामाय आपणो जीवाह नाहहाजो होमजथी तो अनंत जीवनान केरीन तान होमाल केरूह. 26केध्दीह कूण मारी सेवा केरूह, तर मारो पासाण आवो; एने जांबी मी हि, ताआ मारो दास पुण रेंय केध्दीह कूण मारी सेवा केरूह, तान आबोक तान आदर केरूह.

यीशुन क्रुस पोर मोरणेन भविष्यवाणी

27“ऐवी मारो जीव व्याकुल हि ज्ञान केरता मी काय कियील?” हे पिता, माहु आवो वेल तारीन वोचाड? नाहं, कारण मी ज्योच कारणाने आवो वेल ताहुकवोर पोचुज हि. 28हे पित्या, आपणो नावान महिमा केर. तेवी इही आकाशवाणी एनी, “मी तान महिमा किरील हि, एने पासाणवूर केरूह.” 29तेवी माणहे उबरीन होंबलेह एता तान कियेल कि ढग आवाजकीर दिहरो केयेल, कूण एक स्वर्गदूत बोल्णु. 30ज्ञान उपेरीन यीशु केयेल, हा शब्द मारो केरता नाहं पुण तुमरो केरता आवा हि. 31ऐवी आवो जगान न्याय एता हि, ऐवी जगाच्या सरदारला काडीन टाकील जाह; 32एने मी केध्दीह पृथ्वीपोररीन उन्चोईनो जाहो, तर हि-यो माहुफाय खेचीन लेह. 33आपु कायताहा मरणाने मोरण्यू हे केणेन केरता तो इही बोल्णु. 34ज्ञान उपेरीन माणहान ताह केयेल, आमु व्यवस्था माय हि वात होमेल्नी हि कि मसीह कायम रेंय, ओवतो तू काय करने कि माणहान सोराह उपेर चेढाविल जाणू गर्जेन हि! हा माणहान सोरो कूण हि 35यीशु ताह केयेल, “प्रकाश ऐवी थोडच वेळा ताहवोर तुमरे माय हि जो ताहवोर प्रकाश तुमरो आहने हि तो ताहवोर चाला निकलीन जावू इही एहू नाहा कि आंधारो आवीन लेह; जो आंधाराम चलील तो तो नाहं सोमजणे का जाथी.” 36जो ताहवोर प्रकाश तुमरो हेरी हि, प्रकाशमान विश्वास केरू काहाकाय कि तुमूह प्रकाशन सोरा बोणो. हि वात केयीन यीशु निकलीन गीयो एने तापुररीन लिकाईन रेणू.

यहूदीयान अविश्वास मा दिट बोणीन रेणो.

37तान तान सुमोर ओलोक चिन्ह देखाडील, तेभी तास तापोर विश्वास किरील नाहं; 38तेभी यशाया भविष्यवक्ताचे वचन पुरोज एय जे ताह लिखील एता केयेल एता:

“हे प्रभु आमरा सुवार्तोन कूण विश्वास किरील हि? एने प्रभुन भूज कुणापोर प्रगट एनो हि?”

39ज्योच कारणाने ते विश्वास केरूह शकले नाहं, कारण यशायाने हे पुण केयेल हि:

40तान तान डोला आंधली, एने तान मोन केठीन केरीन आपील हि; केध्दीह इही नाहं एय कि ते डोलाकेरिन देखू, एने मोनाकेरिन सोमजुहू, एने फिरहू, एने मी ताह हजो केरुहू. 41यशायाने हि वात जानकेरता केदाली कि तान तान महिमा देखील, एने तान तान विषय माय वातू केरील. 42तेभी सरदार मायरीन जादा जाणाह तापोर विश्वास किरील, पुण फरीसीमच्या कारणाने प्रगटाम नाहं मानतला एता, केध्दीह इही होवो कि ते आराधनालय माय काडीन टाकील जाह: 43काहाकाय माणहान प्रशंसा ताह बोगवानान प्रशंसाह रीन हाजी प्रिय लागणे.

यीशुन वचन: न्याय ने आधार

44यीशु जोरेस कियील, “जो मारपुर विश्वास करने, तो मारपुर नाह पुण मार मोकलणारान उपेर विश्वास करने. 45एने जो माहु दिखेह तो माहु मोकेलनाराह दिखेल हि. 46मी जगान उजालो बोणावीन आवूह हि, काहाकाय का जो कूण मारपुर विश्वास करने तो अंधकारामाय रेहू नाहा. 47केध्दीह कूण मारी वात कोलाक पुण देखतालु नाहं, तर मी ताह दोषी ठेरावीन नाहं; कारण मी जगाह दोषी ठेरावण्याम केरता नाहं तर, पुण जगान उद्धार केरणेन केरता आवूह हि. 48जो माहु तुच्छ माणने एने मारी वात ग्रहण केरतीन नाहं ताह दोषी ठेरावणार तर एकुच हि: म्हणजे जे वचन मी केयेल हि, तोज पासाण दिहामाय ताह दोषी ठेरिनेल. 49कारण मी माफायरीन वातू कियील नाहं कि; पुण आबुक जाह माहु मोकलणार हि ताणुच माहु आज्ञा आपील हि कि कायकाय केहू एने कायकाय बोलहू? 50एने माहु मालूम हि कि तान आज्ञा अनंत जीवन हि जानकेरता मी जे काही बोलेहे, ते जोहलो आबुक माहु केयेल हि तोहोलोच बोलेहे.”

Seçili Olanlar:

यूहन्ना 12: NLXNT

Vurgu

Paylaş

Kopyala