यूहन्ना 11

लाजरसान मोत

1मरियम एने तीन बोणिक मार्थान तान गावाम बैथानी माय लाजर नावान एक माणुह दुखाऱ्यो एतो. 2जी तीच मरियम एती जिने प्रभु पुर ईत्र टाकीन तान पायांना आपणो लेट्याकेरिन नुसेल एता, जिनुच बाहाक लाजर बिमार एतो. 3केरीन: तान बोणिक ने केयीन मुकलेल, “हे प्रभु देखू, ज्यापूर तू प्रिय करने, तो दुखारया एतो.” 4हे कोलाक यीशु कियील, “हा बिमारी मोरने नाहं, पुण बोगवानान महिमासाठी हि, कि ताउगेरीन बोगवानान सोरान महिमा एय.”

5यीशु मार्था एने तान बोणिक एने लाजर ज्यापूर यीशु प्रिय केरतालु एतो. 6तेभी पुण ताहेरया तान होमलील तो दुखारया हि, तो ज्या जागापूर एतो, ताहारी दुय दिह उंजू थोबीन गीयो. 7ज्याबाद माय तान चेलाह कियील, “आवो आपु पोशा यहूदात जाहू.” 8चेला ताह कियील, “हे गुरुजी, एव्ही तेभी यहूदी तारपोर दिगुड देतीहू हि, तेभी तू ताच जाथू” 9यीशु उत्तर आपील, “काय दिहान बारा तास एता नाहं? जर कूण दिहामाय चालूह तर तो ठोकर खाण्यू नाहं, काहाकाय आवो जगान प्रकाश दिखेह. 10जर कूण पुण राती चालन्यू तर तो ठोकर खाहोव काहाकाय तामाय प्रकाश नाहं.” 11तान ज्याह वातू, केदाह ज्यान बादमाय ता केहू लागिल, “आमारो लाजर हेरी हुवीन गीयो हि, पुण मी ताह जागे केरणे जात हि.” 12तेवी चेला ताह कियील, “हे प्रभुजी जर तो हुवीन गीयो हि तर हाजो एय जाहू.” 13यीशुन तर तान मोरणेन बारामाय कियील, पुण ते समजील कि तान हुवणेबाराम कियील हि. 14तेवी यीशु ताह हेल्लीच पुण केयीन आपील, लाजरस मोरीन गीयो हि, 15एने मी तुममुळे आनंदित हि मी ताहारी नाह एतो ज्याह तुमूह विश्वास केरू. पुण ऐवी आवो आमु तान आहने जाहू. 16तेवी थोमा ने जो दिदुमुस कियेल जाथू, आपणो तारी हे-या वाला चेलाह कियील, “आवो, आमु पुण ह्याच्या बरोबर मोरणेन चाला.”

यीशुच पुनरुस्थान एने जीवन

17ताहारी पोचनेपोर यीशुह मालूम एय गीयो कि लाजराला माहणाम मेलीन चार दिह एय गीयो हि. 18बैथानी यरूशलेमा आहने दुय मिल अंतरापूर हि. 19जादा यहूदी मार्था एने मरियम जागे आपणो बायाकने मोरनापोर ताह सांत्वना आपणे केरता आवा एता. 20ताहेरया मार्था ने यीशुन आवणेन माहिती मिलने पुरीन ती ताह मिलने गीयी, पुण मरियम घेरामुज बोहीन रेणी. 21मार्था ने यीशुह कियील, हे प्रभु जर तू न्या रेणू येतो तर मारो बाहाक मोरीज गीयू नसते. 22पुण ऐवी पुण मी सोमजीतेवी कि जे काही तू बोगवाना फायरीन मांगुह बोगवान तुवाह आपण्यू. 23यीशु ताह कियील, “तारो बाहाक पोशा जीवतालू उठी” 24मार्था ने तीह कियील मी सोमजीतेवी कि शेवटेस दिहामाय पुनरुस्थान टाइम तो जीवतालू उठी. 25यीशु ताह केदा पुनरुस्थान एने जीवन मीच हि; जो कूण मारपुर विश्वास मेली तो मोरण्यू तेभी पुण जीवतालू उठी. 26एने जो कूण जीवतालू हि एने मारपुर विश्वास मेली तो अनंत काळापर्यंत मोरण्यू नाहं काय तू आवो वातुपोर विश्वास केरूह? 27तो ताह कियील, हा, हे प्रभु मी विश्वास केरूह कि बोगवानान सोरो जो मसीह जगामाय आवूह एतो तो तूच हि.

यीशु रेडनो

28हे केयीन ती निकलीन गीयी एने आपणी बोणिक मरियम ला हादाडळीन तीह गुपचुप कियील कि, “स्वामी आवा हि एने तुवाह हादतेन हि.” 29हे होमेलताच ती चालूच उठीन तान आहने आवी. 30यीशु ऐवी गावाम पोचना नाहएतुपुन तान जागीपोर एतुता मार्था ने तान भेट लीईल एती. 31तेवी यहूदी तिहे-यो गिर एता, जे तीह सांत्वना आपतेन एता हे देखीन ती मरियम चालूच उठीन बाहेर गीयी हि ती माहणापोर रेडने जात हि ते तीन पासाण जाहू लागिल. 32ताहेरया मरियम ताहारी पोहचीलही जाहारी यीशु एतो तर ताह देखताज तान पायापोर पोडीन केहू लागिल, हे प्रभु जर तू न्या रेणू येतो, तर मारो बाहाक मोरणु नसते. 33ताहेरया यीशुन तीह एने यहूदियाह जे तिहे-यो आवा एता ताह रेडतालु देखील तेवी आत्मा माय दुखाम एने दुखी एनो. 34एने कियील, तुमूह ताह का मिलील हि? हे प्रभु आवीन देखीन ली. 35यीशु रेडील. 36तेवी यहूदी केणेंन लागिल, देखू, तो तां पोर कोलाक प्रिय केरतीन एतो. 37पुण तामायरीन काही जाणाह कियील, काय हा ज्यान आंधलान डोला उघाडील, हे पुण केरूह शकील नाहं कि हा माणुह मोरणु नसते.

लाजराह जीवाडणेन

38पोशा यीशु मोनाम जादा दुखी इयेल माहणापूर आवा ती एक गुफो एती एने तीपुर एक दिगुड मेलील एतो. 39यीशु कियील, “दिगुड बाजूमाय केरू” ता बोणिक मुरलीन मार्था ताह केणेंन लागिल, हे प्रभु, तामायरीन ऐवी दुर्गंधी आवी कारण ताह मारीन चार दिह एय गीया. 40यीशु ताह कियील, काय मी तुवाह कियील नाह इतू का, जर तू विश्वास किरही ते बोगवानान महिमा देखहि. 41तेवी तान ता देगडाह बाजूमाय किरील यीशु डोला उपेर केरीन कियील, हे आबुक, मी तारो धन्यवाद करने कि तू मारा होम्लीन लीईल हि. 42माहु मालूम एतो, कायम तू मारा होमलथू पुण जी गेर्दी आजुबाजू उभी हि तामाय मी हे कियील ज्यान मुळे कि ते विश्वास केरणे जुवी कि तू माहु मोकलील हि. 43हे केयीन तान मोठला शब्दान आयेड मारीन कियील, हे लाजर, निकलीन आव. 44जो मरण जूळनो एतो तो बुजील फाडकान आथ पाय बांदायेल निकलीन आवो एने तान मूय रूमालाकेरिन बाधील एता यीशु ताह कियील, ताह सोडीन दया एने जाहू दया.

यीशुन विरुद्ध चाल

(मत्ती 26:1-5; मरकुस 14:1,2; लूका 22:1,2)

45तेवी जे यहूदी मरियम जागे आवा एता एने तान हे काम देखीन तापोर तामायरीन केताहा विश्वास किरील. 46पुण तान मायरीन काही जन फरीसीन उगे जाइन यीशुन कामान माहिती आपील. 47ज्यापूर मुख्य याजक एने फरीसी ज्यान मोठली सभा हादील एने कियील, आमु काय केरतीन हि? हा माणुह तर जादाच चिन्हे देखाळतालु हि. 48जर आमु ताह ओहलाच सोडीन आपुह तर आखा तापोर विश्वास मेलीन लेहु एने रोमी आवीन आमरा जागापोर एने जाती दुयुपूर राज्य केरूह लेहु. 49तेवी तान मायरीन कायफा नावान एक व्यक्तीने जो ता वर्षाचा महायाजक एतो ताह कियील, तुवाह कायीच मालूम नाहं; 50एने हे पुण होमजाडणे नाहं कि तुमरीकेरता हे हाजो हि कि आमरा माणहा केरता एक माणुह मारणे एने आखीच जाती नष्ट एणेन मां. 51हि वात तान आपनेफायरीन कियील नाहं पुण ता वर्षाचा महायाजक ईयेन भविष्यवांनी केरील कि यीशु आवो जाती केरता मोरी. 52एने ता जातीन केरता नाहं तर तान केरता पुण कि बोगवानान वेराय माय एईल सोराह एक्ठाच केरीन आपण्यू. 53केरीन ता दिहेरूनच ते ता ताह मारीन टाकणेन प्रयत्न केरूह लागिल. 54तान वजसे यीशु ता टायमापुरीन यहूदामय प्रसिद्ध एय फिरील नाहं पुण तारीन जेंगलामाय वाला, आहनेन प्रांतात ईफ्राईम नावान नगरात निकलीन गीयो आपणो चेला हेऱ्यो ताच रेणेन लागिल. 55यहूदीयान फसह तिवार आहने एतो एने जादा माणुह तीवारान पेल्ला दिहारीन यरूशलेमत गीया कि स्वताह शुद्ध केरुहू. 56केरीन ते यीशुह एतो लागिल, एने मंदिरामाय उबरीयेल रेयीन आपसामाय केणेंन लागिल, “तुमूह काय विचार केरता काय तो तीवारामाय आवूह नाहं?” 57मुख्य याजक एने फरीसीन हि आज्ञा आपील मिलील कि जर कोणीही मालूम हि कि यीशु का हि, तर केणेन म्हणजे ते यीशुह देरावीन लेहु.

Seçili Olanlar:

यूहन्ना 11: NLXNT

Vurgu

Paylaş

Kopyala