Juwawu 19

Yesu ohotongiwa ira apiwe

Matewuji 27:15-31; Markuji 15:6-20; Lukaji 23:13-25

1Vevale Pilatu oharuma anyakondo ira kadowe kamuwaxule Yesu. 2Evale anyakondwale koholuwaga kara ya minga, aliwa muhela vamuru vaye. Kagamanle, aliwa tukula bata ya usalru wapama wa kore ya musuzu wa bwanda, aliwa muwariha.#19:2 aliwa tukula bata ya usalru wapama wa kore ya musuzu wa bwanda, aliwa muwariha: Malambo a mundulrimu amwene kowaretcha kapa na kara yatonyiheda ira: <<Mutula gu mwene.>> Voira Yesu kamutonga na mwasa okala mwene wa aJudewu, anyakondwale kamuwarihile Yesu kapa na kara ya minga muwari mompeta. 3Eto kozaga vali liye vale, kampetaga keraga: <<Mwene wa aJudewu oye! Oye!>> Aliwa nvahaga makofi. 4Noira eno, Pilatu ohokumelaga unde akoka, liye awandela anamwindji ale ira: <<Kavuruwanani! Miyo nnomuzana wa nyo mulombwanole para mukayena ibaribari ira miyo kadinfwannyena mulandu ofuna muirelana yabure.>> 5Agairile enne, Yesu ohokuma mmba mule, agawarihiwe kara ya minga vamuru vaye. Eto kagamuwarihile kapa yokwima ya usalru wapama wa kore ya musuzu wa bwanda. Evale Pilatu ohowonga eraga: <<Kaing'anani, mutwinyu ula!>> 6Evale andimuwa a anamakuta na agwarda a Nyumba ya Yehova kagamuonne Yesu, kohokuwa keraga: <<Kamukomeleni vamuradini! Kamukomeleni vamuradini!>> Evale Pilatu ohowongaga eraga: <<Mutukuleni, mudowe mwamukomele nyoka, mwasiwa miyo kadinfwannyena yabure yofwanela ira akomeliwe.>> 7AJudewu ale kohowakula keraga: <<Hiyo nihikana nlamulo nihu. Mbwenye zela nlamulo nihu, nnawonga ira liye akwe mwasiwa unawonga ira: <Miyo dili Mwana Mulugu.> >> 8Pilatu agavwile mazu oira: <<Liye unawonga ira: <Miyo dili Mwana Mulugu.> >>, ova wanna liye wohosimbwagave dowa sogolro.

9Pilatu ohokumaga vali anamwindji vale liye welela palasiyoni waye. Agavolowile nimburo notonga nakoka nene ohonfuka Yesu ira: <<Weyo uli wa uvi?>> Mbwenye Yesu kamuwakunleve yengo. 10Evale Pilatu ohowongaga na Yesu ira: <<Weyo kunadiwakula yengo? Kodi weyo kunonne ira miyo dihikana utongi ofuna ukutchana, owu hehi, utongi ofuna ira weyo ukomeliwe vamuradini?>> 11Yesu omuwakulaga Pilatu ira: <<Nyo kamunna utongi ofuna dipiha miyo mwahavahiwe na Mulugu. Nona ale kadivahedile mmandani mwenyu kohokana yotega ilukulu kwaranya yotega yenyu.>>#19:11 ale kadivahedile mmandani mwenyu kohokana yotega ilukulu kwaranya yotega yenyu: Mazwala anafwanyeya muwari mwa Juwawu bahi. Ananiwandela ira Pilatu ohokana yotega muwari momutonga Yesu ira apiwe eto aJudewu kanvahedile Yesu mmandani mwa Pilatu kohokana yotega ilukulu kwaranya tega wa Pilatu. 12Jagaireyile enne Pilatu ofuna ira amukutche Yesu. Mbwenye aJudewu ale kokuwaga keraga: <<Nyo mwamukutcha mutuyo, muiziwe ira Sezare kahi nfwinyu. Mwasiwa mutu uli watene unafuna jovikunga ira akale mwene, wenno gu mwidani wa Sezare.>>

13Pilatu agavwile jowonga jejile, ohomukumiheda Yesu unde. Nomala, liye garati vampandoni vaye votonga. Nimburo neno naitaniwa Nimburo na Mabwe. Na iwongelo ya iEberewu nimburo neno naitaniwa Gabata. 14Jatene ejile jaireyile ifunaga fiya midiya, siku nasakanyeda atu jatene ira kadje Pwando ya Mavirelo. Evale Pilatu ohowonga na aJudewu eraga: <<Kaing'anani, mwene wenyu ula!>> 15Mbwenye aliwa kohoroma kuwa keraga: <<Apiwe! Apiwe! Kamukomeleni vamuradini!>> Vevale Pilatu ohafuka eraga: <<Nyo munafuna ira dimukomele mwene wenyu?>> Vevale andimuwa a anamakuta kohowongaga keraga: <<Hiyo kaninna mwene mmohiwa ahali Sezare.>> 16Noira eno, Pilatu ohavaheda Yesu mmandani mwewa ira kadowe kamukomele. Evale aliwa kohomutukulaga Yesu, aliwa mudowagana.

Komeliwa wa Yesu vamuradini

Matewuji 27:32-44; Markuji 15:21-32; Lukaji 23:26-43

17Evale aliwa kohomutukulihaga Yesu muradi, aliwa mudowagana nimburo neno naitaniwa Nigaragazu. Na iwongelo ya iEberewu nimburo nne nnaitaniwa Gologota. 18Vevale anyakondo ale kaganfiyilena Yesu Gologota ule, kohomukomela vamuradini. Ora imohive kamukomelaga Yesu, kohakomela eto alombwana ambinli. Mutu mmohi ikukuru ya wu, mutu mmohi ikukuru ya wu, Yesu liye kala vari.

19Pilatu ohotukula isi tabwa, liye lremba mazu oira: <<YESU WA NAZARETI, MWENE WA AJUDEWU.>> Liye dowa komeliha vazulu va muradi wa Yesu, muruni waye. 20Vevale aJudewu adjindji kohoileri mazwale mwasiwa nimburo nakomeliwe Yesu ali wandamelana sidadi. Eto malrembale kafwanyeya vatabwani ali olrembiwa na viwongelo taru, iEberewu, iLatino na iGerego. 21Mbwenye andimuwa a anamakuta kagaonne jolremba jile, kohodowaga wonga na Pilatu, aliwa ira: <<Kamulrembe ira: <Mwene wa aJudewu>, so mbwenye mulrembevo ira: <Mutula awonga ira: <<Miyo dili Mwene wa aJudewu.>> > >> 22Evale Pilatu ohawakula ira: <<Ilrembile miyo, dihimala lremba.>>

23Vevale anyakondo ale kagamanle mukomela Yesu, kohotukula jowara jaye, aliwa gana va anyakondo annayi. Nomala eno, yahanle ali kamiza. Mbwenye kamizele tchanna mogumaniha, yereve kala nguwo imohive kuma zulu ante mutchindo. 24Na mwasa wenne, anyakondo ale kohoroma wonga mmohi na nfwaye keraga: <<Kanikawuleni kamizela. Mbwenye nisakanyeni jogu ya ngari#19:24 jogu ya ngari: Nione rodape unafwanyeya Matewuji 27:35. ira nimuone mutu guvi unafuna ihalana.>> Jatene ejo johoireya ira jikwakwanele jejo jafwanyeya mMazuni zela Namatikeliwa ira: <<Aliwa kohogana jowara jaga. Nomala aliwa tukula kamizaga, sakanya jogu ya ngari.>> Eto jatene ejo ti jejo jerilena anyakondwale.

25Wandamelana vamuradini wa Yesu, vohokalaga ahiyana annayi kaimenlege evale. Mmohi ali Yesu mmaye, na Yesu mmaye mbalaye, na Mariya mwadi Kolopa, na Mariya nkuda Madala. 26Yesu agamuonne mmaye ule agali vevale na namamuharaye wenno asimbwetcha liye muziveliwa, ohomuwongana mmayele eraga: <<Kaing'ana, mwanawo gwenno.>> 27Eto evale Yesu ohowonga na namamuharaye asimbwetcha liye muziveliwa ule eraga: <<Kaing'ana, mmawo gwenno.>> Kuma siku nenne dowaga sogolro namamuhara ule ohomutukulaga Yesu mmayele, liye mudowagana vande vaye.

Kwa wa Yesu

Matewuji 27:45-56; Markuji 15:33-41; Lukaji 23:44-49

28Jagaireyile enne, Yesu ohoona ira jatene johomala. Mwa enne ira akwakwanelihede jejo jinafwanyeya mMazuni, ohowongaga, liye ira: <<Dihikana ntona.>> 29Valigi atu vale vohokalaga jaro mwazanlege vinyu ohokala pama nnga vinagere. Mwa enne kohobwinihaga ntondje#19:29 ntondje nnawongiwa va, na izugu anaitana esponja. muvinyuni mule, aliwa tukula, hela imirini ya yomela imohi inairiwa isopo, aliwa fiyiha ntondje nne mulomoni wa Yesu. 30Evale Yesu agang'wile vinyule ohoira: <<Jatene jihikwakwanela!>> Liye oramiheda murwaye vati, liye velela muzimu waye.

Munyakondo mmohi ohomulata Yesu vambaruni

31Siku neno ali siku nosakanyeda jatene ja sabado. Eto para aliwa, sabado wenne afuna akale sabado mundimuwa. Andimuwa a aJudewu kagaonne ira kohokala atu araru kakomeliwe, kohovenyaga dowa nvepa Pilatu ira: <<Nnouvepani mwaarume anyakondwinyu kadowe, kakotole mendo da aliba komeliwa ale ira kabaranye kwa ira anyakondwale kawande akumihavo vamuradini vale, siku na sabado nahanafiye.>> 32Vevale Pilatu oharumeliha. Mwa enne koharuma anyakondo, mobaranya aliwa roma kotola mendo da mulombwana oroma akomeliwe na Yesu ule. Nomala eno, aliwa kotola mendo da mulombwana mmohiwa ule. 33Mbwenye kagafiyile vali Yesu, kanfwannye agakwile, mwa enne mendo daye tchakotonle. 34Noira eno, munyakondo mmohi ohotukulaga mwanango, liye mulata Yesu ikukuru imohi ya mbaru. Vamulatile liye vohokuma sangiri na mahindje.

35Miyo maliba ona jatene eji jiireyaga, nnohidedela umboni eto dihiiziwa ira umboni waga gwa ibaribari. Eto dihiiziwa ira nnawonga ibaribari ira na nyenne muroromele. 36Tchoira jatene ejo johoireya ira jikwakwanelihede jejo jilrembiwe mMazuni ira: <<Nne nikuva naye nimohi kannakotoliwa.>>#Ezodu 12:46; Salmu 34:20 37MMazuni eto muhulrembiwa ira: <<Anoza kamuone mutu wenno kamulatile atu.>>#Zakariya 12:10; Jowandeliwa 1:7

Makoyiwelo a Yesu

Matewuji 27:57-61; Markuji 15:42-47; Lukaji 23:50-56

38Jagaireyile eno, mulombwana mmohi aitaniwa Joze wa sidadi ya Arimateya, ohodowa nvepa Pilatu ira adowe akumihevo vamuradini maningo a Yesu. Joze ali namamuhara wa Yesu. Mbwenye muhara uwa, liye amuhara mozembiheya mwasiwa aaova andimuwa a aJudewu. Evale Pilatu ohomurumeliha. Liye agarumelihiwe, ohodowa kumihavo vamuradini vale maningo a Yesu. 39Eto mulombwana Nikodemu wenno adowile wonga na Yesu ora ya mahiyu, na liyene ohodowa vamohi na Joze, agatukunle kilu 35 da jengo jonukela pama jinaitaniwa alowe na mira. 40Alombwana ambinli ale kohotukula maningo a Yesu, aliwa muhela jonukela jazilena atu jile, nomala aliwa mbulruwalri na malensori nnga mwemo mwalemelele aJudewu kasakanyedaga maningo a aliba kwa ira kadowe kaakoye.

41Wandamelana nimburo nakomeliwe Yesu, wohokala munda walimile atu mitengo dovaha na nifukwe nixa natimbile atu, wewo wali wahanakoyiwe mutu. 42Mwa enne na mwasa oira nali siku nosakanyeda jatene ja sabado wa aJudewu, aliwa kohodowa mukoya Yesu wewule mwasiwa masiyale kali vakwikwive na wakomeliwe liye ule.#19:42 na mwasa oira nali siku nosakanyeda jatene ja sabado wa aJudewu: AJudewu kamurometcha sabado ora ya tchiguwo siku nnaitana hiyo siku na ixanu. Moira Yesu ohopiwa siku na ixanu, aliba mukoya Yesu kafuna kabaranye ira mabasiwa kamale nzuwa nahanavire ira kakwakwanelihede nlamulo nahara atu zela ja sabado.

Seçili Olanlar:

Juwawu 19: iLolo

Vurgu

Paylaş

Kopyala