Juwawu 20
20
Venya wa Yesu mokwani
Matewuji 28:1-10; Markuji 16:1-8; Lukaji 24:1-12
1Siku noroma na sumana na mabebehene, unde wahanatche pama, Mariya nkuda Madala ohodowa masiye wakoyiwe Yesu ule. Agafiyile wewule, ohoonaga nibwe neno nafungilena atu ulango ule, nagakumihiwewo. 2Evale ohotamanga, liye fiya wewo wafwanyeya Simawu Peduru na namamuhara Yesu mmohiwa wenno Yesu amuziveliwa liye. Agaafwannye, ohowonga eraga: <<Masiye ule Nabwiya kohomutukulawo. Eto umudowilena atu kaniiziwilewo!>> 3Evale Peduru na namamuhara Yesu mmohiwa ule kagawandeliwe, kohodowaga masiye ule. 4Ambinlene kadowaga, kohoromaga tamanga. Mbwenye katamangagave enne, namamuhara Yesu mmohiwa ule ohomukwaranya Simawu Peduru, liye kala murandji fiya masiye ule. 5Liye agafiyile, ohopatamelaga munifukweni mule, liye aona malensori ale, mbwenye kabaranyede volowamo. 6Evale mulombwana Simawu Peduru agafiyile, ohovolowa mohododoma, liye aona malensori ale. 7Eto ohoonaga lensori neno nali muruni wa Yesu nagali nokundanyiwa nene, nagali vewa vene. 8Vogomiheda namamuhara mmohiwa ali murandji fiya ule, na liyene ohovolowa masiye ule, liye ona. Nomala ona, ohororomela. 9Tchoira kahanaone venya wa Yesu ule, kali kahanaonelremo jejo jalrembiwe mMazuni ira Namatikeliwa unoza avenye mokwani. 10Evale anamamuharaye ambinlene ale kohovenyaga, aliwa welelaga vande.
Yesu ohomutwanyuwela Mariya nkuda Madala
Matewuji 28:9-10; Markuji 16:9-11
11Mariya nkuda Madala ohalaga, liye nlaga unde wa masiye ule. Evale anlagave enne againg'anne muwari mule, 12ohaonaga angelro ambinli kawarile jotchenave, kagagaratile vevo vali maningo a Yesu, mungelro mmohi aligi mendoni, mmohiwa aligi muruni. 13Evale angelro ale kohonfuka keraga: <<Weyo unanlela nni?>> Evale Mariya ohawakulaga eraga: <<Miyo nnamunlela Nabwiya waga. Kohomutukulamo eto kadiiziwile umudowilena atu!>>
14Mariya agawongile enne, ohorungunuwaga liye ing'ana unduli waye. Agarungunuwile, ohomuona Yesu agaimenle, mbwenye Mariya kawandile muiziwa. 15Evale Yesu ohonfuka ira: <<Muhiyana we, unanlela nni? Kodi unanvenda ani?>> Evale Mariya esaga anfuka enne ali namalima wa mmundani mule, liye wakula ira: <<Akala gu nyenne umutukunlemo mudiwandele vimuhiyile nyo, miyo nnodowa damutukulewo.>>
16Evale Yesu ohomuitanaga eraga: <<Mariya!>> Evale Mariya agavwile itana, ohorungunuwa, liye rumela na iwongelo ya iEberewu ira: <<Raboni!>> (Tapulela ira Namafundjiha.) 17[Mariya ohovenda jomuhinda.] Mbwenye Yesu ohomuhiyihaga eraga: <<Kudihinde, mwasiwa kannagwele wa Babaga. Mbwenye udowe wagumane na abalaga anamadiharaga, waawandele ira tchineneva nnogwela wa Babaga eto wenno mmohive uli Baba wenyu eto Mulugu waga na Mulugu wenyu.>>
18Evale Mariya nkuda Madala ule ohodowa awandela anamamuhara Yesu ira: <<Miyo dihimuona Nabwiya!>> Eto ohawandelamo jatene jawongile Yesu.
Yesu ohakumelela anamamuharaye
Matewuji 28:16-20; Markuji 16:14-18; Lukaji 24:36-49
19Siku nimohive nenne na dimingu#20:19 dimingu owu hehi siku noroma na sumana. navennyege Yesu, unde wagadibile, anamamuhara Yesu kagagumanne mmba, misuwo dagali dofunga dene na mwasa oaova aJudewu, morurumutcha Yesu ohakumelelaga vari vewa, liye ira: <<Murendele akale na nyo!>> 20Awongagave enne, ohaonihaga mandaye na ikukuru yenno yamulatile atu. Mwa enne anamamuharaye ale kohagalalaga valukulu na mwasa omuona Nabwiya.
21Evale Yesu ohowongagave akoka na anamamuharaye ale eraga: <<Murendele akale na nyo! Na makalelo mamohive nnga Baba udirumile liye miyo eto na miyene nnourumani nyo.>> 22Agawongile eno, ohavuzela eraga: <<Watchelani Munemba Otchena.>> 23Eto ohowongagave eraga: <<Mutu wenne munankurumuwele nyo jotega jaye, mutuyo na ibaribari jotega jaye jinomala kurumuweliwa. Eto mutu wenne munamuhiyeve nyo eno na jotega jaye jene, na ibaribari mutuyo jotega jaye jinafwanyeyave na liye.>>#20:21-23 Na makalelo mamohive nnga Baba udirumile liye miyo eto na miyene nnourumani nyo. Ku wonga Yesu oharuma anamamuharaye ira kadowe kalaleye. Yesu agamanle aruma, liye ohavuzela eraga: Watchelani Munemba Otchena. Vuzela ule watonyiheda makalelo afuna za Munemba Otchena. Tchoira naileri Joira ja Anamarumiwa 2:2, nnofwanya ira siku nazilege Munemba Otchena, azilege na makalelo a nipevo. Zela mazu a Yesu oira: Mutu wenne munankurumuwele nyo jotega jaye, mutuyo na ibaribari jotega jaye jinomala kurumuweliwa, kahi ira Yesu ohavaha anamamuharaye utongi oalevelela atu jotega jiwa vamalroni va Mulugu. So mbwenye anamamuharaye muwari molaleya Muselu Wapama, ale karumenle muselu kalaleya atu, koholeveleliwa. Mbwenye ale kaharumenle muselu kalaleya anamamuharaye, tchaleveleliwa. Mbwenye kahi ira anamamuharaye vahanle atu, kawongetcha na atu ira: <<Jotega jenyu jihimala kurumuweliwa.>> So aliwa kalaleya ira: Nyo mwatene mutwaruwe, mubatiziwe na nzina na Yesu Kiristu. Mwaira eno, jotega jenyu jinokurumuweliwa. (Joira ja Anamarumiwa 2:38)
Yesu ohowongaga na Tome
24Fwanyeya ira siku nenne Yesu aakumelelaga liye anamamuharaye, namamuhara mmohi aitaniwa Tome, wenno eto aitaniwa Mwanasambini kaligivo. 25Liye agazile, anamamuhara afwaye kagamuwandenle ira: <<Hiyo nihimuona Nabwiya!>>, liye ohowakula eraga: <<Ira miyo diroromele ira Nabwiya uhuvenya mokwani, nnafuna liye azena ndanda naye, dione mwemo mwakomeliwe liye peregu, ditukule ibuno yaga dixolrihemo. Amala ditukule ndanda naga, dihinde ikukuru yenno yalatiwe liye na mwanango ira diwande roromela. Mbwenye ejo jahaireye, miyo kannaroromela.>>
26Vagamanle malambo matanu na mararu, anamamuhara Yesu kohogumana fendo imohiwa mmba emule. Fendo yenno mbwenye Tome ali vamohi na afwaye mmba mwemule. Evale Yesu ohakumelela mmba mule akoka milango dagali dofunga dene na kunya, liye ira: <<Murendele akale na nyo!>> 27Agairile eno Yesu ohomuwongana mulombwana Tome, liye ira: <<Kaza uing'ane mmandani mwaga mu, utukule ibuno yawo uze uvolotchihe mwakomenle atu peregu mu. Amala utukule ndanda nawo no, uzena uhinde ikukuru yalatiwe miyo na mwanango. Uhiye kayikela. Uroromele ira miyo dihivenya mokwani.>> 28Evale Tome ohowonga eraga: <<Nabwiya waga, Mulugu waga!>> 29Evale Yesu ohowonga na Tome ira: <<Kodi weyo udiroromenle mwasiwa uhudiona? Orelihiwa ba atu anno kadiroromenle kahadionneve!>>
Jionihedo ja Yesu jilrembiwele ira mutu avwa awande muroromela Yesu
30Yesu ohoirana jionihedo jidjindji jimohi jiwa vamentoni va anamamuharaye jejo jahalrembiwe mulivuruni mu. 31Mbwenye jionihedo jilrembiwe ji, jilrembiwele ira mwavwa muwande roromela ira Yesu na ibaribari gu Kiristu, Mwana Mulugu ira mwamuroromela, mukayena ingumi mwa nzina naye.
Seçili Olanlar:
Juwawu 20: iLolo
Vurgu
Paylaş
Kopyala

Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2018 Visão Integral