Mateo 15
15
Bubhubhui Nɛ Bu Mabhui Mabhui
1Ɔkɛlɛ Farisianɛ anɛ ɛshãdɔkasɛ nɛ de Yerusalɛm aba tɔnɔ Yesu klɛ le bisi asɛ, 2“Kide so pɛ wɔ badɔkpasɛ nɛ xũ na ta bhɛtɛ atrɔ beshishe anɛ kepiegu nɛa bha? Be tee plu ahwɛ flogo pɛ baa ŋa kɛdɔ!”
3Yesu ebui lɛ nu asɛ, “Klɛ kide so pɛ nɔɔ ta Kpaya ɛshã nɛe si akpɛ wɔnɔ kepiegu nɛ so? 4Alasɛ Kpaya ɖɔ asɛ, ‘Kpɛ kɛtɔkpuesi ɔkɔ wɔaka nɛ weni’ klɛ ‘Anɔnyanɔ gɛ aba ɖɔ kibui akpɛ yɛaka ɔdɔgɔsɛ yɛeni edzyenɔ sɛ be yi yɛ.’ 5Pɔ ɔɔɖɔ sɛ onu gɛ anɔ teli aɖɔ tsre yɛaka ɔdɔgɔsɛ yɛeni sɛ, ‘Tɛpɛplɛnɔ kanyakaɛ di gɛ ɔbɔ mɔ denɔ mɛ ɔkɔ nɛ nu kɛdɔ kukɔ gɛ ba bhɛtɛ kɔ Kpaya,’ 6ganɛ sɛ ayɛkɔ ‘akpɛ yɛaka nɛabha’ nɔ. Ki nu sɛ nɔ oxule Kpaya kibui akpɛ wɔnɔ kepiegu nɛ so. 7Wɔnɔ betroni! Yezaya kɛbui dzyɔ gɛ amɔɖɔ nɛ wɔnɔ shu asɛ:
8“ ‘Banɔa na kpɛm nɛa bha nɛ balɛ inugbu,
pɔ balɛ idzyi nɛ alɛ odzidzekɔ nɛ mɛ shu.
9Baa kpɛ kɛtɔkpuesi akɔm nɛ kɛlɛɛ mɛ,
balɛ kɛdɔkɛkasɛ nɛ nu ɛshã gɛ banɔa kasɛ.’ ”
10Yesu ekulu banɔɛza nɛ amɛna yɛ ɔbha klɛ aɖɔ asɛ, “Nɔ ta batɔ tɛ no nuibuiesi. 11Kɛdɔnɔ nɛ gɛ kɛ ga onugbu mɛ tsoku anɔ mɛ ‘ki ti tutru yɛ,’ pɔ kɛ gɛ ga anɔ onugbu mɛ koeyi kɛlɛ kɔ sɛ ‘etutru.’ ”
12Ɔkɛlɛ yɛ badɔkpasɛ nɛ aba yɛ ɔbha klɛ be bisi asɛ, “No nyi sɛ gɛ Farisianɛ nɛ enu kibui nɛ kɛ lɔɛ titi nɛ balɛ shu xãa?”
13Ebui lɛ nu asɛ, “Osi kanyaka gɛ mɛ owũsise Aka nɛ edi dzu ba ba nyɛna ɔlɛ ehe akpa nɛ igu. 14Shɛnahwɛ balɛ shu; be nu awɔ̃hũpuelete gɛ agbanɔ anɔ. Onu gɛ awɔ̃hũpuelete agbanɔ awɔ̃hũpuelete, balɛ petee ba ba tɛ wɔlɛ eku ozi mɛ.”
15Petro asɛ, “Bu kɛkpalɛ nɛesi kɔ lɔ.”
16Yesu ebisi balɛ asɛ, “Nɔ kɔ lɛ mũguũ ana?” 17“Nɔ tɔɔ mɔ sɛ kɛdɔnyɛdɔ gɛ tsoku onugbu mɛ kɛɛ vɛ ɛyam pɛ kɛ daa koeyi nɛ ishu nɛ mɛ? 18Pɔ ebui nɛ gɛ aaga onugbu mɛ ekoeyi le de idzyi nɛ mɛ, klɛ alɛ ‘tutru’ anɔ. 19Alasɛ idzyi nɛ mɛ atɔkpum kpã, gɛ enu anɔyiyi, aglɔbui, azhuzhɔlɛbui, buzi, otro ebuimɔɖɔ, anɔshuzizi ede. 20Ebuia nɛ ala bhɛtɛ anɔ pɛ ‘etuturu’, pɔ kɛdɔ ŋɛŋa nɛ ahwɛ maplumaplu atɛ bhɛtɛ anɔ pɛ ‘etuturu.’ ”
Kananaɛtɛ Dzi Tɛyɛyɛkɛŋa
21Gɛ ba shɛ nɛ ɔkɛlɛ, Yesu ekoeyi avɛ Taɛre anɛ Sidɔnɛ kɛdɔ nɛ mɛ. 22Kananaɛtɛ dzi teli gɛ ede kibé lɛ nɛ aba yɛ ɔkɔ, nɛ iyuyo asɛ, “Apalete, Daviti yɛ Eyi, di mɛ eshutukubui! Mɛ eyiadzɛ aatɔ tsutsɔmɔ tsɔmɔ nɛ ɔfufɔɛkpã gɛ otsri yɛa bha nɛ mɛ.”
23Yesu adɛ ɖɔ kibuinyɛbui. Kɛlɛ so yɛ badɔkpasɛ nɛ ba tɔnɔ yɛ avɛ klɛ be de tsre yɛ asɛ, “Kpɛ adzɛ nɛ dzo, alasɛ ganɛ obo eze bi iyuyo alɛ lɔe de.”
24Yesu ebui lɛ nu etsre alɛ asɛ, “Izraɛl ibhoshi nɛ gɛ lɛla nɛ tite ɔkɔ la kpɛ mɛ.”
25Adzɛ nɛ alɔ ebe dzu ekuisiesi nɛ yɛ otugba. Klɛ aɖɔ asɛ, “Apalete, plɛnɔ mɛ!”
26Ebui lɛ nu asɛ, “Kɛ ma sɛ tɛ ba yɛkɔ bunuvɔɛ nɛ kɛŋɛŋa atɛɛ elu kɔ balɛ bukudzɔgɛ.”
27Adzɛ nɛ asɛ, “Ee, Apalete,” “pɔ bukudzɔgɛ nɛ tsyɛ tɔkɛ kiwiliwili nɛ gɛ wɔlɛ denɔ bulɛ apalete alɛ nɛ ɔkplɔ̃ nɛa bha nɛ xũ aŋa.”
28Ɔkɛlɛ Yesu bui lɛ nu asɛ, “Adzɛ, wɔ tɛyɛyɛkɛŋa gbla lɛ wɔahwɛ! Ba yɛkɛ wɔ tɛbibisi.” Klɛ adzɛ nɛ yɛyiadzɛ nɛ bunya nɛ gbla beke nɛ ɔɖɔ lɛlɛ nɛ mɛ.
Yesu Anyunɔ Banɔ Akpã Talɛ
29Yesu ashɛ̃ nɛ ɔkɛlɛ avɛ Galelia Aƒu nɛ shu. Ɔkɛlɛ ewu avɛ butu tuli shu klɛ ede dzi kesi si. 30Banɔɛza gbla tɔnɔ yɛ aba, banɔ gɛ bata ga, awɔ̃hũpu, akpata, imumu anɛ banɔ gelee bhlatɔ, klɛ ba yɛkɔ ebe lu yɛ butsrukpɔ nu; klɛ ebeke balɛ banya. 31Kɛ bhɛtɛ banɔ nɛ bi sɛ, ba mɔ imumu gɛ kpa kaɖɔ ɖɔ, ba bhɛtɛ akpatanɛ la dzyɔ, bagɛ ba taa ga na kpaa ga klɛ awɔ̃hũpu nɛ akpaa mɔ. Klɛ ba kpɛ Izraɛl Kpaya nɛa bha.
32Yesu ekulu yɛ badɔkpasɛ nɛ amɛna klɛ etsre alɛ asɛ, “Eshutukubui didi alɛ mɛ mɛ nɛ banɔa; ba tɛ za mɛ ɔbha ewi tata klɛ kɛdɔnyɛdɔ ma gɛ ba ba ŋa. Ɛdɛ pɛɛ sɛ tɛ ɛkpɛ balɛ dzo nɛ bubhɛ, odi bhi ba ba tɛ tsra nɛ dzo mɛ.”
33Yɛ badɔkpasɛ nɛ ebui lɛ nu asɛ, “Fakɔ lɔ ba denɔ gbɛgbɛvu kɔ banɔ kplumua nɛ okpukpu kɔɔ nɛ?”
34Yesu ebisi asɛ, “ɛgbaa tɛshɛ ɛlɛ lɛ wɔnɔ ahwɛ?”
Ba sɛ, “Tigene, anɛ kenimɛdzya bhli.”
35Etsre banɔɛza nɛ asɛ baza kesi. 36Ɔkɛlɛ ayɛkɔ ɛgbaa tigene anɛ kenimɛdzya bhli, klɛ gɛ ehu ahwɛ, aya ɛlɛmɛ klɛ ayɛkɔ akpɛ ahwɛ kɔ badɔkpasɛ, klɛ balɛ tsyɛ ayɛkɔ akpɛ ahwɛ kɔ banɔ. 37Balɛ petee ba ŋa klɛ be xui. Kɛlɛe de badɔkpasɛ nɛ ba tɔkɛ ewiliwili nɛ gɛ awɔlɛ ashuɔɛ tegene. 38Banɔ nɛ gɛ ba ŋa kɛdɔ na lɛ akpã talɛ, badzɛ nɛ bunuvɔ ba mɛɛlɛ mɛ. 39Gɛ Yesu akpɛ banɔɛza nɛ dzo beke, ede tsoku keniabha opupu nɛ mɛ klɛ ashɛ̃ avɛ Magadanɛ be.
Seçili Olanlar:
Mateo 15: tcd
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© Ghana Institute of Linguistics, Literacy and Bible Translation
