Mateo 14
14
Be Bhui Yohanɛsɛ Enikpɛ Nɛ Kɛtɔkpu
1Nɛ kibe lɛ gɛ Heroɖesɛ kɛtɔkpum gɛganɛ elete nɛ enu Yesui dɔ, 2klɛ etsre yɛ bagɛ bee di yɛ ɔkɔ nɛ asɛ, “Yohanɛsɛ Enikpɛ nɛ naa, alɔ edenɔ bekpum! Klɛ so pɛ ebui yiyinɔanɔ kemia nɛ di ka wa kɛxwɛ nɛ yɛ mɛ.”
3Ɔtsɔ̃ nɛɛ Heroɖesɛ eti vu Yohanɛsɛ anya kpɛ vu akpɛ Heroɖiasɛ, yadzya Filipo yɛedzini nɛ so, 4alasɛ Yohanɛsɛ aganɔ yɛ ɔshã kpɛ asɛ: “Ɔshã ɔdɛ kɔ kidzo sɛ tɛ ɔpɛɛ adzɛ alɛlɛ.” 5Heroɖesɛ atrɔ sɛ tɛ eyi Yohanɛsɛ, pɔ eesi banɔ nɛ fu, alasɛ ba mɔ Yohanɛsɛ ansɛ atɔnu.
6Nɛ Heroɖesɛ kɛmɔwi nɛa bha Heroɖiasɛ yɛeyiadzɛ nɛ ebe yu kivu gɛ kɛnyɛna Heroɖesɛ idzyi, 7gɛ kɛkɔ sɛ akatabu asɛ kɛdɔnyɛdɔ gɛ adzɛnuvɔɛ nɛ ebe bisi, yɛ Heroɖesɛ aba bhɛtɛ lɛ akɔ yɛ. 8Nɛ adzɛnuvɔɛ nɛ yeni nɛ tɛpɛpɛ nu, aɖɔ asɛ, “Bhui Yohanɛsɛ Enikpɛ nɛ tɔkpu ɔtrɔ kɛtɛa bha kɔ mɛ nɛ ɔkɛ̃.” 9Kibui nɛ trɔ ekusi nɛa bha, pɔ nɛ yɛ batabu nɛ nu nɛ yɛ befu gli nɛ amɛ so, akɔ asɛ ba bhɛtɛ ansɛ gɛ adzɛnuvɔɛ nɛ ebisi, 10klɛ akɔ sɛ be bhui Yohanɛsɛ tɔkpu nɛ buvu. 11Ba yɛkɔ kɛtɔkpu nɛ atrɔ kɛtɛa bha amɛna, klɛ ba yɛkɔ akɔ anuvɔ, klɛ yɛ evunɔɛ lɛ avɛnɔ yɛeni. 12Yohanɛsɛ badɔkpasɛ na ba yɛkɔ yɛ etsitsi nɛ ada vubɔ. Ɔkɛlɛ ba shɛ avɛ ede tsre Yesu.
Yesu Anyunɔ Banɔ Akpã Teti
13Gɛ Yesu enu kɛgɛ ba kɛlɛ mɛ, ekoeyi nɛ ɔkɛlɛ aza keniabha opupu mɛ avɛ okpukpukɔ. Gɛ be nu kibui nɛɛ, banɔɛza na ga butsrukpɔ aza yɛe de edenɔ ɛma nɛ mɛ. 14Kibe lɛ gɛ Yesu ezhi aba kesukpa pɛ amɔ banɔɛza, be ku yɛ eshutukubui klɛ ebeke balɛ banya.
15Gɛ owulago nɛ ɔɔna, badɔkpasɛ na ba yɛ ɔbha klɛ ba ɖɔ asɛ, “Okpukpukɔ nɔɔ, klɛ keli tsyɛ fli bele. Kpɛ banɔɛza nɛɛ dzo, sɛ tɛ ba vɛ ɛmabhli nɛ mɛ tɛ be de dzi kɛŋɛŋa tili akɔ shu.”
16Yesu ebui lɛ nu asɛ, “Kɛ ka za sɛ ba shɛ. Wɔnɔ nɔ pɛɛ kɛdɔ tili ɔkɔa lɛ tɛ ba ŋa.”
17Be bui lɛ nu asɛ, “Gbɛgbɛvu ɛgbaa titi anɛ keni mɛ adzya tabha ko ala lɛ bulɔ ahwɛ nɛ ɔkɛ̃.”
18Asɛ, “Nɔ yɛkɔa lɛ ɔmɛna mɛ nɛ ɔkɛ̃.” 19Klɛ akɔ sɛ banɔ nɛ be zhi aza kesi nɛ tɛwa nɛa bha. Gɛ ayɛkɔ gbɛgbɛvu ɛgba titi anɛ keni mɛ adzya tabha klɛ ebu amɛ akpɛ owũsise, ehu ahwɛ klɛ edzyini gbɛgbɛvu nɛ mɛ. Ɔkɛlɛ ayɛkɔ kpɛ ahwɛ kɔ badɔkpasɛ, klɛ badɔkpasɛ nɛ tsyɛ ayɛkɔ akɔ banɔɛza. 20Balɛ petee ba ŋa klɛ be xui, klɛ badɔkpasɛ nɛ atɔkɛ kesukpayɛ wiliwili nɛ ashuɛ lɔfɔntabha. 21Banɔ nɛ gɛ ba ŋa kɛdɔ nɛ kiwii lɛ nɛ ana ansɛ banɔnyɛ akpã teti, badzɛ nɛ bunuvɔɛ ma zɛ lɛ mɛ.
Yesu Aga Kenia Bha
22Nɛ kibe mazimazi mɛ Yesu akɔ sɛ badɔkpasɛ nɛ be ku kenia bha opupu tɛ be putɔ akɔɛ avɛ keni nɛa pɛ bhla, tɛ yɛ akpɛ banɔɛza nɛ dzo. 23Gɛ akpɛ balɛ dzo beke, yɛnahwɛ ashɛ̃ ewu avɛ butu tuli shu sɛ tɛ ede kulukpaya. Gɛ owulago nɛ ɔna, yɛ terikpo agɔ nɛ ɔkɛlɛ, 24pɔ keniabha opupu nɛ ɔtɛ vɛ odzidzekɔɛ bɔɛ nɛ ogbigbe nɛ shu, buni giglebe nɛ tɛ tiɔ lɛ alasɛ kɛlɛɛ nɛ fu ɔlɛ.
25Nɛ olizatɔ eɖɔ tɛlɛ̃ mɛ Yesu ekoeyi ága nɛ keni nɛa bha atɔnɔa lɛ. 26Kibe lɛ gɛ yɛ badɔkɛpasɛ nɛ amɔɛ gɛ aaga keni nɛa bha, kifu kua lɛ tsutsɔmɔ tsɔmɔ. Ba ɖɔ asɛ, “Ekpu.” klɛ ba kpɛ ogugu nɛ kifum.
27Pɔ Yesu etsre balɛ zia asɛ, “Nɔ kpɛ te! Mɛ nɔɔ mɔ. No ti si fu.”
28Petro ebui lɛ nu asɛ, “Apalete, onu wɔ, tsre mɛ ɔsɛ ɛba wɔ bha nɛ keni nɛa bha.”
29Yesu asɛ, “Gaba.”
Ɔkɛlɛ Petro ezhi ekoeyi nɛ opupu nɛ mɛ, aga keni nɛa bha atɔnɔ Yesu aavɛ. 30Pɔ gɛ amɔ kɛlɛɛ, kifu ku yɛ, klɛ akpa buni nɛ mɛ zhiku, akpɛ ogugu asɛ, “Apalete, bu mɛ!”
31Ɔkɛlɛ nɛ ko, Yesu ebu ɔhwɛ klɛ anyɛna yɛ. Aɖɔ asɛ, “Wɔ tɛyɛyɛkɛŋa bhli anɔ, kide so pɛ ɔdɛ yɛkɛ ɔŋa!”
32Klɛ gɛ be wueku opupu nɛ mɛ, kɛlɛɛ nɛ zukɔ lɔ. 33Ɔkɛlɛ bagɛ ba kpasɛ opupu nɛ mɛ na kpɛ atɔkpuesi kɔ yɛ, aaɖɔ sɛ, “Kɛgbɛagba wɔ onu Kpaya yɛ Eyi.”
34Kibe lɛ gɛ ba tsɔkɛ, ba da dzrɔ nɛ Genesarɛtɛ. 35Klɛ gɛ banɔ nɛ ɔklɛ nɛ ba kpɛ yɛ kɛxawũ sɛ Yesu, ba kpɛ odu asɛsɛ ɛma nɛ gɛ kana kibe lɛ nɛm petee. Banɔ ba yɛkɔ balɛ banyɛnya nɛ petee amɛna yɛ 36klɛ ba kɔ yɛ tɔkpu asɛ akɔ banyɛnya nɛ be hunɔ yɛ awidzidze nɛ tɔ tite, klɛ bagɛ be hunɔ yɛ nɛ petee balɛ banya nɛ beke.
Seçili Olanlar:
Mateo 14: tcd
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© Ghana Institute of Linguistics, Literacy and Bible Translation
