Matthew 13
13
Umà Pànnài Pantomù
(Mark 4.1-9; Luke 8.4-8)
1Màlà wei yattai là Jesus uya tapùi nàmàppù molopai iitàppù palau yena pona. Molo iweleutappù kappon yamùk yenupatoppe tùuya. 2Tukke kulu kappon yamùk iwepilichak kon wechippù màlà. Màlàpàk iwenukuppù kanau yak molopai chichiupe iwechippù yau, kappon yamùk wechi satippe tuna yena polo tùse. 3Panton yamùk yapulàppù ya màlà tukke tok yelupa tùuya yau.
“Tùwàppànsen wechippù màlà molo iitàsak tùnpàmà pànse. 4Tùnpàmà soloka ya tùse, tùulon kon wessolokappù asantawà, molopai tolon yamùk uyàpùppù inapùppù tok uya. 5Tùulon kon wessolokappù tàk pon malalon nùkkwà non pona. Kùyali yenappà wenutappù màlà asse'ne, masapùla non wechi i'nau pùla pàk. 6Tùwepakkasak yau wei uya echikili ton kùyali yekkwa yeke'napankappù màlà, molopai i'nak iikalatasak pùla iwechi yau iwaipùtappù. 7Tùulon kon wessolokappù àlittak, màlà usemokkappù kùyali yek pokonpe molopai yeulankappù ya. 8Tùse tùulon kon wessolokappù wakù non yak. Iwattappù molopai iwepetappù. Tùulon kon wechippù 100 pe itepelu, tùulon kon 60 pe molopai tùulon kon 30 pe. 9Yetatàk kon uchi tùpana ke ewechi kon yau!” teppù Jesus uya.
Panton Yekamatok Ipàkànsau
(Mark 4.10-12; Luke 8.9-10)
10Màlàyau Jesus ya'lon kon uyàpùppù ipyak molopai tok uya yekamappoppù, “Yà'là pe ken iwechi pàk panton yapulànài àmàlà kappon yamùk yelupa auya yau?” tukaik. 11“Tùttusen pen Itepulu pe we'nàtok epùn po ittutok tùsak man apyakù'nokon. Tùse mùkyamlo piyak pùla,” tukaik Jesus uya tok maimu yeikuppù. 12“Masapùla kappon yà'là là yesak lepa màlà eke peiwa, eke peiwa nen uchi itesak pe tùwechi yentai itesak pe iwettoppe. Tùse mùkkàlà yà'là pùla nai'nùk winàpai malalon itesappe iwettok mokka màlà. 13Sàlà kasaichi iwechi pàk panton yapulànài Iulà tok yelupa uya yau, masapùla
‘Tok uya là yene, tùse tok uya yene pùla iwechi, molopai tok uya là yeta tùse tok uya yeta pùla molopai tok uya iitu pùla.’ 14Katù Maimu yenpoikanài Isaiah uselupappù màlà kasa iwechi màlà tukaik kasa,
‘Yeta là auya'nokon màlà tàwàlà, tùse ittu auya'nokon pen. Yene là auya'nokon màlà tàwàlà, tùse yene auya'nokon pen. 15Masapùla pùsamlo kappon yamùk yewan wenasak sa'man pe man, tok pana uya yeta pùla molopai tenu kon yakkosak tok uya. Màlà kasa pùla iwechi yau tenu kon ke tok uya yene eppaino, tùpana kon ke tok uya yeta, tok uya ittu tewan kon ke eppaino, molopai tok welattàsak yau, tok ipittà uya.’ tawon,” {Isa 6.9} teppù Jesus uya. 16“Amyamlo nen, wakù pe messatàik! Eyenu kon nenyan molopai apana kon netayan. 17Ailon kulu sàlà, tukkan kon Katù Maimu yenpoikannan molopai wakù ton kappon yamùk wechippù menyatài'nùk enenpai, tùse tok uya yeneppù pen. Molopai metayatài'nùk enetapai tùse tok uya yetappù pen,” teppù Jesus uya.
Jesus Uya Tùwàppànsen Pantomù Yekama
(Mark 4.13-20; Luke 8.11-15)
18“Masaichi yetatàk kon molopai tùwàpànsen pantomù nekama pàk esenupatàk kon. 19Mùkyamlo itepulu pe we'nàtok yekale yetannan, tùse ittunnan pen wechi màlà tùpànsen kùyali yenappà iwessolokasak lùppù asantak kasa. Ene Makui tùuyàssen molopai ipànsak lùppù tok yewan yau mokkanài. 20Tùpànsen iwepukasak lùppù tàk pon non pona, mùkyamlo Katù Maimu yetannan molopai yanùnnàinan tùutauchinpaik asse'ne yeta tùuya'nokon pe. 21Tùse i'nak tok yak itekale wewomù pen, màlàyau tachin pe tok uko'mamù pen. Ittuntok molopai ponichimantok uyàssak wakù itekale pàkànsau yau, asse'ne tok we'nonka màlà. 22Tùpànsen iwepukasak lùppù àlittak màlà mùkyamlo Katù Maimu yetannan. Tùse utaimelupantok sàlà motau wema'nàtok pàk molopai mamin kuttok wakùli wannà pe màlà Katù Maimu yeulankanài. Molopai tok wepeta pen. 23Molopai ipànsak lùppù wakù non yak mùkyamlo Katù Maimu yetannan molopai ittunnan, tùwepetasan mùkyamlo tùulon kon 100 pe là, tùulon kon 60 pe, molopai tùulon kon 30 pe là,” teppù Jesus uya tok pàk.
Àlitta Pantomù
24Jesus uya tok pàk tùulon panton yekamappù màlà. “Itepulu pe we'nàtok epùn po wechi màlà wakù kùyali yenappà pànnàippù tù'mà yau kàyik kasa. 25Tewinnà ewalupàttau, kappon yamùk we'nùnsak tùse, iteyaton uyàpùppù molopai àlitta pàmàppù ya àlichi walai yek kùlottawà molopai iitàppù. 26Kùyali yek wattappù molopai iwepeta yattai nen uchi, àlitta wattappù nàlà. 27Kàyik yapyoto yamùk uyàpùppù màlà ipyak molopai ipàk, ‘Ina yepulu, wakù ku kùyali yenappà mùpàntai à'mà yau tà, i'nailàpai ken àlitta uyàssak màlà?’ ” teppù. 28“ ‘Eyaton uya ikussak màlà,’ tukaik yeikuppù ya. ‘Àlitta kalapàsse na' ina utà iche messan?’ tukaik tok uya yekamappoppù. 29‘Kane, masapùla àlitta pilipù auya'nokon tùse kùyali yek yamùk kalapàtù auya'nokon, màlà yamùk pokonpe. 30Tàwà kùyali yek molopai àlitta tukaik là nattai tamùkke kùyali pilipù ponalà. Molopai nen uchi kùyali pili'nàinan pàk, àlitta ikalapàttàk kon wapiya molopai mùmùttàpàttàik tamonke'ne yenu'ma kon pa apok yak. Molopai nen uchi kùyali mùpilittàik molopai itùwùk tak mùnonkatàik,’te uya sàlà ” teppù ya.
Mustard Yenappà Pantomù
(Mark 4.30-32; Luke 13.18-19)
31-32Jesus uya tok pàk tùulon panton yekamappù, “Katù wettok itepulu pe wechi màlà mustard yenappà kappon nalà molopai tù'mà yau inpàmà kasa. Elekkwà kulu tamù'nawolon kùyali yenappà ma'lan, tùse iwattasak yau eke pe kùyali yek yamùk umà yawon kon yentai tùwenasen, màlàyau tolon yamùk tùuyàssan molopai tùpon kon ka'nàinan ipanta yamùk pàk,” tukaik.
Pùlomù Yapuluwetanù'nài Pantomù
(Luke 13.20-21)
33Tùulon tu'ma panton yekamappù ya, “ Itepulu pe we'nàtok epùn po wechi màlà apuluwetanù'nài nossan nùtùlù eke pùlomù yak yoi'matoppe ya tamù'nawàlà iwapuluweta ponalà kasa,” tukaik.
Jesus uya Panton yamùk Yapulàtok
(Mark 4.33-34)
34Jesus uya panton yamùk yekamappù màlà tamù'nawàlà sàlà yamùk yekama tùuya tukkan kon kappon yamùk pàk yau, panton tekamaik pùla lùkkwà là iichelupappù pen. 35Sàlà kupùppù ya màlà Katù Maimu yenpoikannan uselupappù kasa, “Panton yapulà uya màlà tok yelupa uya yau. Màlà yamùk ittusak kon pen, non konekappù motapai yekama uya màlà,” tawon {PSA 78.2.}
Jesus Uya Àlitta Pantomù Nekama Yekama
36Màlàyau Jesus uya tukkan kon kappon yamùk nàmàppù molopai iitàppù tapùi tak. Ya'lon kon uyàpùppù ipyak molopai ipàk, “Ina pàk yekamakà yà'là yekama àlitta umà yawon pantomù uya,” teppù tok uya. 37Jesus uya yeikuppù, Kàyik wakù kùyali yenappà pànnài mùkkàlà Kàyik Mumu. 38Umà màlà wolù. Wakù tùpànsen kùyali yenappà mùkyamlo kappon yamùk itepulu pe iwettok ton. Àlitta mùkyamlo kappon yamùk Ene Makui ponalok kon. 39Molopai eyaton àlitta pànnàippù mùkkàlà Tepùlù. Pili'nàtok yattai màlà, pata weyu wenukattok, molopai pili'nàinan mùkyamlo inchelù yamùk,” tukaik. 40“Àlitta pilichak molopai ipottà apok yau, kasa làma iwechi màlà pata weyu wenukattok yau. 41Kàyik Mumu uya tùyinchelùyi yamùk yeunoko màlà, molopai tok uya itepulu pe iwettok yapai tamù'nawolon kon kappon yamùk wemakuimatoppe tok ku'nài nan pilipù màlà, molopai tamù'nawolon kon àli ku'nài nan. 42Molopai nen uchi tok uya tok yenu'ma màlà apok yak. Molo tok kalawù màlà tùyà kon kàlàlài'ma tok uya. 43Màlàyau nen uchi ikasa tùwessan ulenpamù màlà akkwa pe wei kasa tùkàipùnù kon wettok Itepulu pe patassek yau. Masaichi yetatàk kon, tùpana kon ke ewechi kon yau!” tukaik.
Yonansak Mamin Yekale
44“Sàlà kasaichi Itepulu pe we'nàtok epùn po wechi màlà. Wakù mamin yonansak umà yau kasa. Kàyik uya là yepolo, màlàyau iwaputtà tu'ma ya. Tùutauchinpase kulu tùutàsen mùkkàlà tamù'nawolon itesappe tùwettok chilanmase, molopai nen uchi tùwennapposen molopai umà ye'manài,” teppù Jesus uya.
45“Molopai sàlà kasa nàlà itepulu pe we'nàtok epùn po wechi màlà. Mamin ye'manài uya wakù ton kulu pearl yamùk iwa kasa. 46Wakù pe kulu tùwessen molopai epekkek yeposak tùuya yau, tùutàsen mùkkàlà tamù'nawàlà itesappe tùwettok chilanmase molopai nen uchi pearl ye'manài,” teppù Jesus uya.
Punwe Pantomù
47“Molopai sàlà kasa nàlà itepulu pe we'nàtok epùn po wechi màlà. Punwe yenu'masak tuna kak, molopai ànùk yekkwa ton nà molok yamùk yachinài kasa. 48Iwanùssak yau, molok yachinnan mùkyamlo ipàlàkannan tuna yena pona molopai tùweleutasan molok yamùk menkase. Wakù ton tùnnan mùkyamlo iten yak molopai ene yamùk yenu'mannan mùkyamlo. 49Sàlà kasaichi iwechi màlà pata weyu wenukattok yattai. Inchelù yamùk utà màlà molopai àli ku'nàinan kappon yamùk menka tok uya wakù ton kùlottapai. 50Tok uya àli ku'nàinan yenu'ma màlà apok yak. Molo tok kalawù màlà molopai tùyà kon kàlàlài'ma tok uya,” teppù Jesus uya.
51“Sàlà yamùk ken na' mùttuyatàu?” tukaik Jesus uya ta'lon kon yekamappoppù. “Ewaik,” tukaik tok uya yeikuppù. 52Màlàpàk yeikuppù ya, “Sàlà uyaichi yekamasak màlà, tamù'nawolon kon Law pàk enupannan itepulu pe we'nàtok epùn po pàk wechi màlà tapùi yesak emennak ton molopai penalok kon mamin yamùk yenpakkayai'nùk ipilittok tùuya tapai tak kasa,” tukaik.
Jesus Nulunpasak Nazareth Po
(Mark 6.1-6; Luke 4.16-30)
53Sàlà yamùk panton yekama pàk tùwenukasak yau, Jesus uya màlà pata nàmàppù,. 54Molopai iwennappoppù màlà tùpata yak. Molo kappon yamùk yenupappù ya tok wepilittok itak tau, molopai mùkyamlo iichelupa yetannannùssan usenumenkasak wechippù màlà. “I'nailà pai ken uchi tùpukketù yepoloppù ya? Molopai yà'là yekkwa ken uchi màlà inkupù tùwekkussen yek ton pen?” tukaik tok usekamappoppù tùyiwalà'nokon. 55“Tapùi yamùnài mumu pen ken na' mùkkàlà? Mary pen ken na' mùkkàlà ichan yesek? Molopai James, Joseph, Simon, molopai Judas tawonnan pen ken na' uchi mùkyamlo yakon non? 56Tamù'nawàlà pùla ken na' uchi iwàlichi ton talà nemasan? I'nailàpai ken uchi sàlà yamùk yepoloppù ya?” tukaik tok usekamappopàtùppù. 57Màlàpàk tok uya inulunpappù. Jesus uya tok pàk, “Katù Maimu yenpoikanài mùkkàlà tùnamasen i'nailàlà tùse ipata po molopai itonpa yamùk kùlottau pùla,” teppù. 58Molopai tùwekkussen yek ton pen kupùppù ya pen màlà molo masapùla ailon te tok uya pùla iwechi pàk.
Seçili Olanlar:
Matthew 13: PNTR
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Patamuna New Testament Revised © United Bible Societies, 1973, 2019.
