Matthew 12
12
Jew Yamùk Wàlàkkattok Weyu Yepulu
(Mark 2.23-28; Luke 6.1-5)
1Màlà yattai Jesus utàppù màlà kùyali yekkwa kùlottawà Jew yamùk Wàlàkkattok Weyu yattai. Ya'lon kon wapàkkassak wechippù màlà. Màlàpàk tok wessa'molùkappù kùyali pàika pàk molopai inapùppù tok uya. 2Sàlà yensak tùuya'nokon yau, Pharisee yamùk uya Jesus pàk, “Masa yenkà, ina yenupatok yawàlà pùla màlà sàlà kupù aya'lon kon uya wechi, Jew yamùk Wàlàkkattok Weyu yattai!” teppù. 3Jesus uya tok maimu yeikuppù, “David nùkupùppù lùppù ken na' ta'lon kon pokonpe tùwapàkkassak kon yau yennàinan pen amyamlo? 4Iitàppù Katù yùwùk tak, molopai Katù yemyak itùsak lùppù pùlomù pusak napùppù ya ta'lon kon pokonpe, law yawàlà pùla, Katù yùwùk tau neken tùwe'wotokomasan kussak ina'nàinan pe tùse,” teppù Jesus uya. 5“Wapùla yene ken na' uchi auya'nokon pùn Law yau, Jew yamùk Wàlàkkattok weyu kaichalà paatele yamùk uya Jew yamùk Wàlàkkattok weyu ikkwàppàtùppù, tùse àli pe tok wechi pùn? 6Tekamayaik àpàkù'nokon, talà man eke lùiwa màlà Katù yùwùk yentaino. 7Katù Maimu màlà, ‘Kamo ipottàtoppe itùsak iche pùla wessaik, tùse usentupantok iche wessaik,’ tawon. Sàlà uya yà'là te ittu auya'nokon yau, kappon yamùk àli ton pen yàulàmà auya'nokon pen sàlà eppaino. 8Masapùla Katù Mumu mùkkàlà Jew yamùk Wàlàkkattok yattai yepulu,” teppù Jesus uya.
Kàyik Iwaipùtasak Itemyatù
(Mark 3.1-6; Luke 6.6-11)
9Jesus uya màlà pata nàmàppù molopai iitàppù tok wepilittok itak tak. 10Kàyik wechippù màlà molo iwaipùtasak itemyatù. Molo kappon yamùk wechippù màlà àli pe Jesus winàkàik eselupapai nokon. Màlàpàk tok uya Jesus yekamappoppù, “Ina yenupatok yawàlà pùla ken na' iwechi màlà Jew yamùk Wàlàkkattok yattai ipittàn yau?” tukaik. 11Jesus uya yeikuppù, “Yà'là pe ken iwechi àtonpa kon wechi tewin kalinilu yesappe molopai iwepukasak i'nawon non yakasak yak Jew yamùk Wàlàkkattok Weyu yattai yau? Yachi ken na' auya'nokon molopai imokka auya'nokon pen? 12Kappon nen mùkkàlà kalinilu yentaino! Màlàpàk uchi, kùyenupatok kon màlà kùku'nài'nokon ànù'là pùikattàtoppe Jew yamùk Wàlàkkattok Weyu yattai,” tukaik. 13Màlàyau nen uchi kàyik pàk, “Eyemyatù yenkakà,” teppù ya. Temyatù yenkappù ya molopai itemyatù uchipittàppù wakù pe ilatoi kasa. 14Pharisee yamùk utàppù màlà molopai tok uselupappù yà'là kasa là Jesus wàtok tùuya'nokon pàk.
Katù Nanùmùppù Itapyoto
15Ittu tùuya pàk yau, Jesus utàppù màlà pata yapai, molopai tukkan kon kappon yamùk utàppù ya'là. Tamù'nawàlà e'netton ipittàppù ya. 16Molopai “Tùse Ànù'là pàk kùyekamatàu,” teppù ya tok pàk. 17Sàlà kupùppù ya màlà Katù Maimu yekamanài Isaiah uselupappù, màlà kasa iwechi màlà tukaik, kasa.
18“Pùsàlàichi mùkkàlà uyapyoto unanùmùppù. U'nùn kulu mùkkàlà, utauchinpatok ipàk. Uyakkwalù tùlù uya màlà ipona. Molopai ittuntok uya yekama ya màlà tamù'nawolon kon pàk Jew yamùk pen pàk,” tawon. 19“Ichàulàma wapùla iwentaime là pen màlà. Ànù'là uya imaimu yeta pen màlà asantau. 20Ichei'mesak pàlàu ikkwàtù ya pen màlà, molopai mala lùkkwà tùuyassen lanpu yà'nùpù ya pen. Màlà kasa iwechi màlà iwalai wekkuttoppe. 21Molopai tamù'nawolon kon kappon yamùk Jew yamùk pen uya enpen tùwettok kon tùlù màlà iteseppàk,” tawon.
Jesus Molopai Beelzebul
(Mark 3.20-30; Luke 11.14-23)
22Màlàyau kappon yamùk uya kàyik nepùppù Jesus piyak. Enpùla iwechippù molopai ichelupa pùla, masapùla àli akkwalù wechippù yau. Jesus uya kàyik ipittàppù màlà, ichelupatoppe molopai pata yentoppe ya. 23Tamù'nawàlà kappon yamùk usenumenkasak wechippù màlà, Jesus nùkupùppù pàk. “David mumu làichi pùsàlà?” tukaik tok usekamappoppù. 24Sàlà yetasak tùuya'nokon yau Pharisee yamùk uya yeikuppù, “Àli akkwalù yamùk yenpakkanài mùkkàlà masapùla tok yepulu Beelzebul uya màlà kuttoppe tùuya meluntà ke tùlepa pàk neken,” tukaik. 25Jesus uya tok usenumenkatok ittuppù màlà molopai tok pàk, “Yà'là yekkwa là pata yau tùwemassan kappon yamùk, wepantakasak tùwepanta'matok kon pe, wemattok tachin pe pùla iwechi màlà. Molopai eke pata wapùla tapùi tawon kon wepantakasak tùwepanta'ma tok kon pe wemapù tamùkke pen màlà. 26Settan uya Settan yenpakka yau, iwepantakasak màlà. Yà'là kasa ken itepulu pe iwettok wechi meluntà pe. 27Àli akkwalù yamùk yenpakka uya, Beelzebul meluntàlù yai yau. Ànùk winà nen ken aya'lon kon tok yenpakkannan? Màlàyau mùkyamlo wechi màlà suwa messaik tawonnan pe àpàk! 28Tùse Katù Yakkwalù yai àli akkwalù yamùk yenpakka Usya yau, Katù wettok Itepulu pe uyàssak man apyakù'nokon.
29“Ànù'là wewontok meluntà kàyik yùwùk tùkkwàsse itemamin yamùk yase pùla iwechi màlà, tùse meluntà kàyik yaulonpàssak neken tùuya wapiya yau. Màlà yattai làkku itùwùk tawon pàk ilapuma ya màlà.
30“Ànù'là uponaloppe pùla nai'nùk mùkkàlà uyeya'nomanài. Ànù'là upùikattànài pen ipilipù pàk mùkkàlà ita'nù'nài. 31Màlàpàk tekamayaik àpàkù'nokon. Kappon yamùk makuyi pàk usentuppan màlà molopai yà'là yekkwa là àli pe tok uselupatok pàk. Tùse ànù'là àli pe ichelupasak lùppù Wakù Akkwalù winàkàik pàk usentuppan pen màlà. 32Ànù'là Kàyik Mumu winàkàik tùuselupasen pàk usentuppan màlà. Tùse ànù'là Wakù Akkwalù winàkàik tùuselupasen pàk usentuppan pen màlà, sàlà pe wapùla tàwàlà là,” teppù Jesus uya.
Yei Molopai Itepelu
(Luke 6.43-45)
33“Wakù meluntà yei yesappe ewechi kon màlà wakù itepelu yepolo kon pa. Italumayippù yei yesappe ewechi kon yau àli itepelu yepolo auya'nokon màlà, masapùla yei màlà tùttusen itepelu winà. 34Àkài yamùk, atta ken uchi wakù pe euselupa kon àli pe echii'ma'nokon? Masapùla ewan yawon yekamanài màlà mùta. 35Wakù kappon mùkkàlà wakù ton ne'nài wakù tewan yawon yapai molopai àli kappon mùkkàlà àli ton ne'nài àli tewan yawon yapai,” teppù Jesus uya.
36“Molopai sàlà tekamayaik àpàkù'nokon. Ittuntok Weyu yattai tamù'nawolon kon uya màlà àli pe tùttuse pùla tùuselupappù kon yekama. 37Masapùla amaimuppù kon yapulà màlà eyittutok kon pe, wakù pe ewechi yekamanài pe wapùla àli pe ewechi yekamanài pe,” teppù Jesus uya.
Jonah Pàk Iwekkussak Lùppù
(Mark 8.11-12; Luke 11.29-32)
38Màlàyau enupannan Law pàk tonpa yamùk molopai Pharisee yamùk tonpa uya, “Enupanài, eke ton tensan yekkwa ton pen kupù auya enenpai ina man,” teppù. 39“Àli ton molopai ailon ton pen mùkyamlo tùwekkussen yek pen kuttoppe yekamapponnan! Ikupù pen màlà tùse Katù Maimu yenpoikanài Jonah pàk neken iwekkussak lùppù yekama màlà” teppù Jesus uya. 40“ Jonah wechippù eke molok lotta yau àsolùwau wei molopai ewalupà, màlà kasa làma Kàyik Mumu wechi màlà i'nau non yau. 41Ittuntok Weyu yattai Nineveh pon kon wà'mùssakka màlà, molopai àli pe tok uselupa àpàkù'nokon, masapùla tùwelattàsak kon tùmakuyi kon winàpai pàk Jonah uya itekale yekama yau. Molopai, talà man ekeiwa Jonah yentaino! 42Ittuntok Weyu yattai Sheba pon Kuwin wà'mùssakka màlà molopai àli pe ichelupa màlà àpàkù'nokon, masapùla mei Solomon uya tùpukketù yai enupantok yetase tùutàsak pàk. Molopai, talà man ekeiwa Solomon yentaino!” teppù Jesus uya.
Àli Akkwalù Wennappotok
(Luke 11.24-26)
43“Tùwepakkasak kappon yapai yau, àli akkwalù utà màlà a'mun pata yawàlà tùwàlàkkapù patassek iwa pàk. Yepolo tùuya pùla iwechi yau, 44‘Uyùwùk tak wennapo màlà unnàmàppù tak,’ te ya. Tùwelepansak yau tùwùk yepolo ya itawon pùla, yakolokasak molopai wakù pe ikonekasak. 45Molopai ittà màlà, 7 pan kon tu'ma àli akkwalù yamùk nesse ta'là, àli ton kulu tentaino kon. Tok uyàpù màlà molopai tok wemapù molo. Màlàyau kappon wechi màlà àli pe kulu wapiya tùwechippù yentai. Sàlà kasaichi iwechi màlà sàlà yattai nokon àli ton kappon yamùk winàkàik,” teppù Jesus uya.
Jesus Yan Molopai Yakon Non
(Mark 3.31-35; Luke 8.19-21)
46Kappon yamùk yelupa pàk lùppù Jesus wechi tùse, ichan molopai yakonnon wechippù polopo satippe, enelupapai tùwechi kon pàk. 47Màlàpàk kappon yamùk tonpa uya Jesus pàk, “Masa yenkà, asan molopai ayakonsnon molo man polopo molopai eyelupapai tok man,” teppù. 48Jesus uya yeikuppù, “Ànùk mùkkàlà usan? Ànùk yan mùkyamlo uyakonnon?” tukaik. 49Màlàyau temyatù yenkappù ya ta'lon kon winàkàik. Molopai, “Masa yentàk kon, pùsamlo mùkyamlo usan molopai uyakon non! 50Masapùla Ukàipùnù wettok ikupù tùuya iche ku'nài mùkkàlà uyakon, uwàlichi, molopai usan,” teppù Jesus uya.
Seçili Olanlar:
Matthew 12: PNTR
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Patamuna New Testament Revised © United Bible Societies, 1973, 2019.
