युहन्ना 3

ईशू और निकूदिमुस

1एक निकूदिमुस नांओं मणछ त यहूदी मुखिय और सह आसा त फरीसी। 2सह आअ राची ईशू सेटा और तेऊ बोलअ, “हे गूरू, हाम्हां का आसा थोघ कि तूह आसा परमेशरै हाम्हां लै गूरू छ़ाडअ द। ज़ुंण नछ़ैण च़मत्कार तूह करा, ईंयां करा एसा गल्ला प्रगट कि ताह संघै आसा परमेशर।”

3ईशू दैनअ तेऊ लै ज़बाब, “हुंह खोज़ा ताखा का सत्त, ज़ै कोई नऊंअ ज़ल्म नांईं लए, सह निं परमेशरो राज़ भाल़ी सकदअ।”

4निकूदिमुसै बोलअ ईशू लै, “ज़ै कुंण मणछ प्रोढअ गअ हई, ता सह तेखअ नऊंअ ज़ल्म किहअ करै सका लई? तेऊ कै आपणीं आम्में पेटै भी लागणअ डेऊणअ?”

5ईशू दैनअ तेऊ लै ज़बाब, “हुंह खोज़ा ताखा सत्त, ज़ुंण मणछ पाणीं और आत्मां करै ज़ल्म नां लए, सह निं परमेशरे राज़ा दी डेऊई सकदअ। 6इहअ करै कि ज़ुंण देही का निखल़अ सह आसा देही, और ज़ुंण पबित्र आत्मां का ज़ल्मअ, सह आसा आत्मां। 7रहैन निं हऐ कि मंऐं किज़ै बोलअ, कि ताह लागणअ ‘नऊंअ ज़ल्म लणअ ज़रूरी।’ 8बागरी ज़ेथ बाखा डेऊणअ च़ाहा तेथ बाखा डेओआ, ताखा शुणिआं तेते सिधी छ़ेल़। पर ताखा निं थोघ कि सह किधा का एछा और सह किधा लै डेओआ? एसा गल्ला निं समझ़ाऊई सकदै कि मणछ पबित्र आत्मां करै किहअ करै लआ ज़ल्म।” (सैणें ज्ञैन 11:5)

9निकूदिमुसै ज़बाब दैनअ, “ईंयां गल्ला किहअ करै सका हई?”

10इहअ शूणीं करै दैनअ ईशू तेऊ लै ज़बाब, “इस्राएली लोगो बडअ गूरू हई करै बी तूह इना गल्ला निं समझ़दअ? 11हुंह खोज़ा ताखा सत्त, ज़ेतो हाम्हां का थोघ हआ और ज़ुंण गल्ला हाम्हैं आपणीं आछी हआ भाल़ी दी हाम्हैं बोला तिन्नां ई गल्ला, पर तम्हैं निं म्हारी गवाही तज़ी बी मंदै आथी। 12ज़ेभै मंऐं तम्हां का एऊ संसारे गल्ला खोज़ी, तम्हैं निं तिन्नां गल्लो विश्वास करदै! ज़ै हुंह तम्हां का स्वर्गे गल्ला खोज़ूं, तै तम्हां किहअ करै करनअ विश्वास? 13मुंह मणछे शोहरू का सुआई निं उझै स्वर्गा लै कोहै उखल़अ और नां मुखा सुआई होर कोहै स्वर्गा का पृथूई दी होथअ। (युहन्ना 6:38)

14 “खास्सी साला पैहलै ज़िहअ परमेशरे गूर मुसा मिसर देशे गुलामीं का छ़ुटणैं बाद बणैं पितल़ा करै बणांईं दी दानअ उछ़टै दी च़की और ज़ुंणी तैहा दानुईं बाखा लै उझै भाल़अ तिंयां सोभ बच़ै। ठीक तिहअ ई च़कणअ हुंह मणछो शोहरू बी उछ़टै दी। (युहन्ना 8:28) 15ताकि ज़ुंण बी उझै भाल़े और विश्वास करे तेऊ भेटणीं सदा रहणैं आल़ी ज़िन्दगी।

16 “किल्हैकि परमेशरै की सारै संसारा संघै एही झ़ूरी कि तेऊ दैनअ आपणअ कलौतअ शोहरू बल़ीदान हणां लै ताकि ज़ुंण बी तेऊ दी विश्वास करे सह निं लोल़ी मूंअ, पर तेऊ लोल़ी सदा रहणैं आल़ी ज़िन्दगी भेटी। 17परमेशरै निं आपणअ शोहरू संसारे मणछा लै सज़ा दैंदअ छ़ाडी, पर सह छ़ाडअ एते तैणीं कि संसारे सोभी मणछा तेऊ करै उद्धार भेटे। 18ज़ुंण तेऊ दी विश्वास करा तेऊ निं सज़ा भेटणीं। पर ज़ुंण तेऊ दी विश्वास नांईं करा, तेऊ लै गअ इहअ करै दोश लागी कि तेऊ निं परमेशरे कलौतै शोहरू दी विश्वास किअ। (युहन्ना 5:10)

19 “सज़ा दैणैंओ कारण आसा इहअ कि प्रैशअ आअ संसारा दी और मणछै की प्रैशै छ़ाडी न्हैरै संघै खास्सी झ़ूरी, और तिन्नें तै काम ई बूरै। 20किल्हैकि ज़ुंण बूरअ करा सह निं प्रैशै नेल़ एछदअ। सह डाहा प्रैशै संघै ज़ीद। इहअ निं हआ कि तेऊए कामों दोश लागे तेऊ दी। 21पर ज़ुंण सत्ता दी रहा, सह एछा प्रैशै नेल़, ताकि तेऊए काम प्रगट हई सके कि तिंयां आसा परमेशरे मरज़ी दी किऐ दै।”

ईशूए बारै युहन्ने गवाही

22तेखअ आऐ ईशू और तेऊए च़ेल्लै यहूदा लाक्कै; और सह लागअ तिन्नां संघै डुबकी दैंदअ।

23युहन्ना डुबकी दैणैं आल़अ बी दैआ त सामरी लाक्कै दी शालेम नगरी नेल़ एनोन नांओंए गराऊंए ज़ैगा जरदण नदी दी डुबकी। किल्हैकि तिधी त खास्सअ पाणीं और लोग लआ तै तिधी एछी करै डुबकी। 24तेभै तैणीं निं युहन्ना कैद खानै दी पाई त। 25तिधी पल़ी युहन्ने च़ेल्लै परमेशरा सेटा डेऊणा लै शुचै हणैं पिछ़ू यहूदी लोगा संघै हठ। 26तिन्नैं पुछ़अ युहन्ना सेटा एछी करै, “हे गूरू, ज़ुंण मणछ जरदण नदी पार ताह संघै त, ज़हा लै तंऐं इहअ बोलअ त कि अह आसा मसीहा। सह बी दैआ ऐबै डुबकी और सोभ एछा एऊ सेटा लै।”

27युहन्ना दैनअ तिन्नां लै ज़बाब, “ज़ेभै तैणीं मणछा लै स्वर्गा का नांईं दैए, ‘तेभै तैणीं निं तेऊ किछ़ै भेटी सकदअ।’ 28तम्हैं ता आप्पै आसा मेरै गवाह कि हुंह निं मसीहा आथी। पर हुंह आसा तेऊ आजू छ़ाडअ द। (युहन्ना 1:20; मलाकी 3:1)

29“ज़सरी लाल़ी आसा, सह आसा लाल़अ, पर ज़ुंण तेऊ लाल़ेओ साथी तेऊ संघै खल़अ आसा, सह शूणां तेऊए और तेऊए गल्ला शूणीं हआ खुश। ऐबै हुई मेरी बी अह खुशी पूरी। 30अह आसा ज़रूरी कि तेऊए लोल़ी बढोतरी हुई और हुंह लोल़ी घटअ।

31“ज़ुंण उझै का एछा सह आसा सोभी का महान, हाम्हैं आसा संसारे हाम्हैं करा संसारे गल्ला, पर सह आसा स्वर्गा का आअ द और सह आसा सोभी का महान। (युहन्ना 2:23) 32सह खोज़ा तिन्नां ई गल्ला ज़ुंण तेऊ भाल़अ और शूणअ, पर सोभ लोग निं तेऊए गल्ला मंदै। 33पर ज़ुंणी तेऊए गवाही मनी, सह लाआ एसा गल्ला दी मोहर कि परमेशर आसा शुचअ।

34“किल्हैकि ज़ुंण परमेशरै आसा छ़ाडअ द, सह खोज़ा परमेशरे गल्ला। किल्हैकि सह दैआ तेऊ लै पबित्र आत्मां भरपूर। 35बाप्पू करा आपणैं शोहरू संघै झ़ूरी और तेऊ दैनअ सोभी गल्लो हक तेऊ लै। 36ज़ुंण परमेशरे शोहरू दी विश्वास करे, तेऊ भेटणीं सदा रहणैं आल़ी ज़िन्दगी; पर ज़ुंण शोहरू नांईं मंदअ, सह निं तेसा ज़िन्दगी भाल़ी सकदअ, तेऊ लै भेटणीं परमेशरा का सज़ा।”

Seçili Olanlar:

युहन्ना 3: OSJNT

Vurgu

Paylaş

Kopyala