MATIUS 8
8
Yesus kema'en tun de temuan olon babok de kembiak saben ite kemliakne
(Mrk. 1:40-45; Luk. 5:12-16)
1Sesudo Yesus tu'un kunei tebo, kembiak dau tun temotoa Si. 2Pado waktau'o tun de temuan olon babok de kembiak saben ite kemliakne teko ngen Si. Si sujud neak adep Yesus lajau madeak: Bak, amen Bak lok, Bak nam kema'en uku. Lajau sujud nyembeak Si, ngen madeak, “Tuhan, amen Tuhan lok, Tuhan nam kema'en uku.”
3Yesus, megong tun'o ngen madeak, “Uku lok, kaen ba!” Waktau'o kulo ka'enba tun'o kunei olonne'o. 4#Im. 14:1-32 Lajau Yesus madeak ngen si, “Ingetba! Jibeak ko melei namen hal yo ngen api bae. Tapi lalauba, ngen imem, ngen minoi Si maset ko, utuk bi ka'en. Sesudo'o mbin kurban de mriteak Musa utuk senreak ngen Tuhan. Kurban'o bakea tando jijai ngen tun dau bahwo ko sungguak bi ka'en!”
Yesus Kemaen suang pelayan pemipin tentra Roma
(Luk. 7:1-10)
5Tiko Yesus masuk kota Kapernaum, suang pemipin tentra Roma teko magea Si, ngen minoi tulung ngen-Si. 6“Bak,” nadeak pemipin tentra'o, “pelayanku bolon neak umeak. Si teguling pakuak neak penan tidua ngen kembiak derita.”
7Yesus madeak ngen si, “Uku bakea teko utuk kemaenne.”
8“Jibeak Bak,” madeak pemipin tentra'o, “Uku coa patut temimo Bak neak lem umeakku. Bak priteak bae. Be pelayanku'o ka'en. 9Uku temuan pemipin de dapet meriteak uku ngen ade kulo tentra-tentra de harus temotoa periteakku. Amen uku meluak saleak suang tentra'o, ‘Lalau!’, si kulo lalau. Uku madeak ngen de luyen, ‘Mi yo!’, si kulo teko; ngen amen uku mriteak pelayanku, ‘Neaba dio!’, si kulo meneanne.”
10Waktau Yesus temi'uk jano de nadeak pemipin tentra'o, Si kembiak heran. Lajau Si madeak ngen tun-tun de temotoa-Ne, “Luea biaso tun yo. Neak antaro tun Israel ati perneak Uku temau imen de klai yo! 11#Luk. 13:29 Sungguak dau tun de teko kunei ipe bae utuk pesta besamo Dunio Blau temuan Allah Abraham, Ishak ngen Yakub. 12#Mat. 22:13, 25:30; Luk. 13:28 Padahal tun-tun de seharusne ijai umat Allah'o bakea muang moi penan gelep neak luea. Neak di tobo'o bakea ngin doi ngen saro.” 13Lajau Yesus madeak ngen pemipin tentra'o, “Belekba, jano de ko pecayo, do bakea tetijai.”
Ngen waktau'o kulo Yesus kema'en pelayan tentra'o.
Yesus Kemaen dau tun
(Mrk. 1:29-34; Luk. 4:38-41)
14Yesus lalau moi umeak Petrus. Si kemliak setuang selawei Petrus dong teguling kerno demem. 15Yesus megong tangen selawei'o lajau si ka'en. Si kolongon ngen muloi semiap jano de Yesus perlu.
16Tiko waktau lok kelemen, tun-tun nembin ngen Yesus dau tun-tun de nasuk Iblis. Yesus musir roh-roh'o ngen kulo kema'en kute tun-tun de bolon ngen Firman-Ne. 17#Yes. 53:4 Yesus menea kutene'o utuk gemnep awei de nadeak Nebai Yesaya, bel'o, “Siba de musung derito ite ngen kemaen olon ite.”
Tun-tun de lok temotoa Yesus
(Luk. 9:57-62)
18Tiko Yesus kemliak dau tun kemliling-Ne, Si meluak penotoa-penotoa moi dipoa Daneu Galilea. 19Lajau suang gu'au agamo teko ngen-Si nadeak ngen, “Pak gu'au, uku lok temotoa ko, moi ipe bae!”
20Yesus jemawab, “Serigala temuan lubang ngen burung temuan sa'ang, tapi anok manusio coa temuan penan Si tidua.”
21Lajau suang penotoa de luyenne madeak, “Bak, nizin uku belek kileak utuk kemubua bakku.”
22Tapi Yesus jemawab, “Totoaba Uku, kunyauba tun-tun matei kemubua tun mateine dewek.”
Yesus ndan ibut badai
(Mrk. 4:35-41; Luk. 8:22-25)
23Yesus kenek moi lem biduk ngen penotoa-penotoa-Ne temotoa-Ne. 24Tekoba badai de kembiak lai neak daneu'o sehinggo biduk'o tenulok umbok. Pado waktau'o Yesus gidong tidua. 25Lajau tekoba penotoa-penotoa-Ne geminggut, “Bak! Tulungba! Ite celako!” tobo'o mekik.
26Getai udi saben, nadeak Yesus, “Udi de ku'ang pecayo ngen Uku!” Sesudo'o kelongonba Yesus temgur ibut ngen daneu. Lajau daneu jijai kembiak tenang.
27Penotoa-penotoa Yesus heran ngen. Tobo'o ngen madeak, “Luea biaso tun yo sehinggo ibut ngen umbok temotoa jano de neriteak-Ne!”
Yesus kema'en duai tun nasuk Iblis
(Mrk. 5:1-20; Luk. 8:26-39)
28Tiko Yesus sapei neak dipoa daneu, neak daerah tun Gadara, neak di duai tun nasuk Iblis teko ngen-Si. Keduai tun'o kembiak ganas, sapei-sapei coa gok do tun binai liwet dalen'o. 29Tobo'o keluea kunei guo-guo kubua menggang, “Anok Allah, jano de lok Ko menea ngen keme? Jano kolok semikso keme ayok waktaune?”
30Coa uak kunei di ade dau jauak gidong mesoa upan. 31Roh jahat'o kinoi ngen Yesus, “Amen Ko musir keme, meluakba keme kaliak moi lem jaueak-jaueak'o.”
32“Lalau!” nadeak Yesus. Roh jahat'o lajau kunei keduai tun lajau masuk moi lem jaueak. Jaueak-jaueak'o kulo mlilai ngen tejun kunei biding jurang moi lem daneu, lajau tenem.
33Penjago-penjago jaueak'o mlilai moi kota ngen cemrito kute de tejijai kulo tetang jano de tejijai ngen keduai tun de nasuk Iblis'o. 34Lajau kute tun neak kota'o lalau magea Yesus. Waktau tobo'o kemliak Yesus, tobo'o demsok supayo Si teminggea daerah tobo'o.
Seçili Olanlar:
MATIUS 8: REJ
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
@ LAI 2011 Indonesian Bible Society (Lembaga Alkitab Indonesia)
