MATIUS 7
7
Hal mutus tun luyen besaleak
(Luk. 6:37-38, 41-42)
1“Jibeakba mutus tun luyen besaleak, mako Allah kulo bakea mutus udi besaleak. 2#Mrk. 4:24 Kerno awei udi mutus tun luyen besaleak, Allah kulo bakea mutus udi besaleak. Allah bakea mukua udi awei udi mukua tun luyen. 3Getai udi kemliak debu kieu neak matai pasuak nu, tapi kieu neak lem matainu coa keten? 4Kero udi dapet madeak ngen pasuaknu, ‘Kunyauba uku kemluea debu kieu'o,’ kunei matainu, tapi ade kieu neak lem matainu dewek? 5Hoi tun munafik! Kemlueaba kileak kieu kunei matainu dewek, mako ko bakea kemliak ngen jelas, ngen dapet utuk kemluea debu kieu kunei matai pasuaknu.
6Jibeak udi melei barang de sucai ngen kuyuk kerno kuyuk'o bakea belek semrangnu jau'eak, kerno bakea melat mutiaro'o.”
Minoi, mesoa ngen kemtuk
(Luk. 11:9-13)
7“Minoiba, mako udi bakea temimo. Mesoaba mako udi bakea dapet. Kemtukba, mako bang bakea nukok utuknu. 8Kerno tun de minoi bakea temimo tun de mesoa bakea dapet: ngen tun de kemtuk, bang bakea nukok utukne. 9Jano ade neak antaro udi su'ang Bak, de melei butau ngen anokne, amen si minoi ruti? 10Ngen melei dung, amen si minoi kan? 11Amen udi de jahat, namen melei de baik ngen anok-anoknu. Jano igai Baknu neak surgo! Si bakea melei de baik ngen tobo'o de minoi ngen-Si.
12 #
Luk. 6:31
Meneaba ngen tun luyen awei udi kemlok tun luyen menea ngen ko. Do'oba isai kute ukum Musa ngen kiteb paro nebai.”
Bang de sepit
(Luk. 13:24)
13“Kerno bang ngen dalan moi nerako lai ngen dau tun liwetne. 14Tapi bang de sepit ngen dalen de saro mbin tun ngen idup ngen didik tun de temaune.”
Pun ngen bueakne
(Luk. 6:43-44)
15“Atei-ateiba ngen nebai-nebai palsu. Tobo'o teko ngen udi awei domba, tapi tobo'o sebeneane awei srigala de teko utuk semrang udi. 16Udi bakea kemnal kunei jano de tobo'o menea. Sakea tebok coa kemluea bueak anggur, sakea tebok coa manen bueak de senbut ara. 17Kunei pun de baik bueakne baik, pun de coa baik bueakne coa baik kulo. 18Coa mukin pun de baik, bueakne coa baik, pun de coa baik bueakne baik. 19#Mat. 3:10; Luk. 3:9 Tiep pun de bueakne coa baik tembang ngen nembem. 20#Mat. 12:33 Awei kulo nebai-nebai palsu. Udi bakea kemnal tobo'o kunei jano de tobo'o menea.”
Perbuatan, iso perkataan
(Luk. 13:25-27)
21“Coa kute tun de menggang ngen uku, ‘Tuhan, Tuhan’ jijai anggota umat Allah, tapi tun de kemerjo periteak Bapaku neak surgo, do'oba de jijai anggota umat Allah. 22Pado Bilai Kiamat dau tun de bakea menggang ngen Uku, ‘Tuhan, Tuhan, keme bi semapei pesen Allah lem gen-Nu. Keme kulo bi musir setan serto made dau mujizat lem gen-Nu. Kemerjo periteak Allah demi gen-Nu? Musir setan demi gen-Nu, ngen menea mujizat demi gen-Nu kulo?’ 23#Mzm. 6:9 Tapi uku bakea jemawab, ‘Uku coa perneak kemnal udi! Lalauba kunei yo, udi coa perneak kemerjo de periteak Allah!’ ”
Tun de pacok ngen de bodong mbangun umeak
(Luk. 6:47-49)
24“Jijai, tiep tun de temi'uk nadeak-Ku yo ngen kemerjone, si serai ngen tun de pacok, de temgok umeakne neak das butau. 25Waktau tu'un ujen, ngen tekoba banjir serto ibut lai temiup umeak'o, umeak'o coa ubuak kerno mbangun neak das butau.
26Tapi tiep tun de temi'uk nadeakku yo ngen coa kimerjone, si serai ngen tun bodong de temgok umeak neak das benei. 27Waktau tu'un ujen, serto ibut lai temiup umeak'o, umeak'o ubuak ngen usakne kembiak luea biaso!”
Kuaso Yesus
28 #
Mrk. 1:22; Luk. 4:32 Sesudo Yesus selesei ngajea, tun-tun de ade neak di kembiak heran, temi'uk isai ajaran. 29Kerno Si majea tobo'o ngen kuaso, coa awei gu'au-gu'au agamo tobo'o.
Seçili Olanlar:
MATIUS 7: REJ
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
@ LAI 2011 Indonesian Bible Society (Lembaga Alkitab Indonesia)
