LÚU 14
14
Jísu i seebɛ h̃íỹɛndopo yiláá mbáloni
1Júsuai ti Lɛ́ɛ́lɛmbo Ngála Fɛli Fólo yiláá má, Júsuai sítii taa ɣɛ́ ti w̃a Falósiai ti tá yiláá í ɣɛ́i ngáá nuu wála, i Jísu lolíni ngi vɛ́lɛi la ngáá tí laaỹɛ́ ỹanda yílaa. Kɛ́ nungái sítii pa ti ɣɛ́i na, ti ɣɛ́i taa Jísu ya sɔ́bɛ ngáá pangɔ́. 2Siỹɛndópo yiláá pá i ɣɛi lói Jísu gakála fe fé séébɛi i mba. 3Kɛ Jísu i Falósiaitii mɔɔningá ɛ́ɣɛ kaamɔítiini Ngala sávai hááw̃a, i ɣɛ ti w̃a, “Aa lɔ́ pele w̃a savaí h̃u ngáá nuu í nuu wálo Ndɛɛlɛmbó Ngála Fɛli Fóloi w̃á baa aa pele w̃a?”
4Kɛ́ ti tá fíli taá bɔɔlɔ́ni. Jísu va i siỹɛndópoi ná hóuni í mbaló í bé mba ná í li. 5Kɛ Jísu i mɔɔ ti w̃ɔ́ɔ́ninga, i ɣɛ ti w̃a, “Na ndoú ɔɔ nika ɔ́ɔ́ ɣɛ́ wú tá yáa, í víli njɛlowá wu Ndɛɛlɛmbó Ngála Fɛli Fóloi w̃a, maa w̃ɔ́i ɛi kulá ná ngamá?” 6Kɛ́ faa fíli aa ɣɛi ti la tɔɔ́ nde.
Kalambongí kɔwɔ́ato ngu nga njeí wa ɛ́ɣɛ faa bɔ́wɔi
7Ná Jísu í ngátɔni mba ngáá kɛ nungáitii ti ɣɛ́i héi ngufema ỹándaitii, faanɛ́ɛ́ngi sí lɔ í séini tí yɛ. 8I ɣɛi ti w̃a, “Ná nuu áá í lóli nyah̃á wɔlí kúú w̃a, yaa héi ngufema ỹánda bɔwɔ́ yɛ. Sífaa nuí sí tɔvengɔ́ áá ɣɛ́ la í wá, tɛingaa taá ɣɛ́ tolíni laá bɛ́lɛ. 9Ná ná áá ɣɛ́, sota kɛɛɣɛí áá ɣɛ́ wú héi h̃u félengɔ lolíni, aa va i ɣɛ í w̃á, ‘Mu mbálai, í bɔ́kpɔngi hé siỹɛndópoi sí yaá.’ Kɛ yáa vá i wúfengɔ aa ɣɛ náa lá ngáá yí héi ngufema lála ỹándai. 10Kɛ́ ná nuu áá ɣɛ́ í lolíni ỹánda, héi ngufema lála ỹándai, kɛinɔɔ́ na maa w̃ɔ́i aa vá, áá ɣɛ í w̃á, ‘Mu mbálai gula míl̃anda, yí lɛ́ seiw̃áa vándai.’ Kɛ ngufema vá mil̃á áá ɣɛ́ héni í yɛ́ í mbála hotángaitii kpɛ́lɛɛ ngaah̃ú. 11Sífaa nuí fíli áá bɔ́wɔ haa lɛ́nga Ngalá ngáá ngu nga njéi, kɛ́ nuí áá bɔ́wɔ wu nganjéi Ngalá ngáá ngu mbúyoɣe.”
12Kɛ Jísu i ɣɛa siỹɛndópoi sí w̃a í ɣɛ́i tolíni, “Ná yáá mɛɛni wála yilí ngáá yí nungáá lolí ma, yaa í mbálangaitii tolí ná, yaa í ndéɣeaitii tolí na, yaa í létɔaitii tolí na kɛlaa í mbála batɛ́ yélaitii wú kovíi h̃ú wáá tiyéni. Ná yáa ná ɣɛ, tɛingaa tiyá bɛ́lɛ taa í lóli tá w̃a aáva í háa bɔwɔí h̃uulóóngɔ aa ɣɛ ngáá ná. 13Kɛ́ ná yáá mɛɛni wála yilí ngáá yí nungáá lolí ma, nyaani yélaitii tolí, yí nɔɔnɔ yélaitii tolí, yí mɛŋɛl̃ɛ́ yélaitii tolí ɛ́ɣɛ mbole yeláitiini. 14Aáva aa ɣɛ ngáá faa vánda í háaw̃a. Kíya bɛ́lɛ tɛi hómbo tɔɔ́ suulóo, suu áá lóo í w̃á ná sítii ti ngáá telembo mbélaa Ngalá ngaah̃ú taa yóóɣe sái h̃u.”
Faanɛ́ɛ́ngi kɔwɔ́ato kuu wála wúyandai wa
(Máfiyu 22:1-10)
15Sítii ti ɣɛ́i héini táa Jísuni mɛɛní ỹɛmái ná ti tá yílaa í ngoí sí ỹɛ́nini, kɛ i ɣɛa Jísu w̃a, “Aa lɔ ngáá faa vánda nuí sí hááw̃a áá vá mɛɛní ỹɛmá kooh̃unɛ́ɛ́ lááỹɛ mbomái Ngalángi w̃ásandai h̃u.”
16Kɛ Jísu i faanɛ́ɛ́ngi sí héinga, i ɣɛ ta, “Siỹɛndópo yiláá tɔ́ í ɣɛ́i na, i ɣɛi áá mɛɛni wála ɣɛ kíli batɛ́ kooh̃unɛ́ɛ́ lááỹɛ mbo fááw̃a aáva i woo vílini nuu bíh̃iw̃aa yelé ngáá ti vá na. 17Ná mɛɛníí ná ỹɛ táingi í folóni ma, i ngi bɔ́ilopoi ta yiláá tɔ́veni sítiini ngelé í ɣɛ́i woo vílini ti yelé ngáá í ndé ti w̃a, i ɣɛ ta, ‘A váa náá, mɛɛníí kpɛ́lɛɛ kɛ kíli batɛngɔ́ɔ́ lé náa.’ 18Kɛ́ ti yilá ngíla kpɛ́lɛɛ tí pɛlɛní wooh̃úgulama. Hésendaa w̃ɔí i ɣɛi ta, ‘Ngí kpáála yaánga nɔ́ɔ h̃íí féyaa, kɛ ngí li ngí tɔ, faalɔ, nde í káámɔɔ w̃a ngáá í hakɛ́to mbɛ́ kái.’ 19Féle kélei bɛ́lɛ nɔ́ i ɣɛ ta, ‘Ngí nika púúngɔ yaánga nɔ́ɔ h̃íí féyaa, aáva nyá lɔ́ náa pele h̃u ngáá ngí lí ngí tí hɔ́bɛ, faalɔ, nde í káámɔɔ w̃a ngáá í hakɛ́to mbɛ́ kái.’ 20Ti háwa kélei bɛ́lɛ i ɣɛ ta, ‘Ngí ní héi ỹah̃ái wɔlínga nɔ́ɔ h̃íi féyaa, faalɔ, ngɛ́i vá.’
21Kɛ bɔ́ilopoi ná i yangáimanga aáva sí kpɛ́lɛɛ í híyani í súú ɣɛ ngáá ngi núu walaí. Kɛ ngi núu walaí ná i luungá í ndé ngi bɔ́ilopoi ná w̃a, i ɣɛ ma, ‘Lí fála fala ngití walaitii nga ɛ́ɣɛ kovíítii su yí ndé nyaani yélaitii ma ɛ́ɣɛ nɔɔnɔ yelaítii ma ɛ́ɣɛ mbole yeláitii ma ɛ́ɣɛ mɛŋɛl̃ɛ́ yélaitii ma ngáá ti vá.’ 22Ná bɔ́ilopoi ná í yangáimani, kɛ i ɣɛa ngí núu walaí w̃a, ‘Kawalái, sí yí ndengɔ́ má ngí kɛngá, kɛ́ seiw̃áa bih̃íw̃aa lɔ nɛ́nɛ na nungáá taá na.’ 23Kɛ ngi núu walaí í ɣɛa ma, ‘Lí pele walá wálaitii ma ɛ́ɣɛ ndɔbɔ veléitii ma yí kpá nungáitii ma ngáá kule ti vá kɛinɔɔ́ ní vɛ́lɛi wuu laa í hé. 24Ngí nde í w̃á, sítiini ngí ɣɛ́ngɔ ɣɛi ti lolíni hése, ti tá yiláá kéle tɔ ɛi hitɛ ní ỹɛ́ɛni sí tá ya!’ ”
Jísu hitɛ poluí
(Máfiyu 10:37-38)
25Faŋa walá i ɣɛi Jísu volú táá lí, kɛ i voteá tí wa i ɣɛ ti w̃a. 26“Nuu fíli ɛ́i va ngéle ɔ́ɔ́ ɣɛ́ ngáá pólu w̃ɔ́ɔ́ kɛ léi maa w̃ɔ́i í gísiɣe ngi kɛ́ɛ́ɣɛni ngaa ngi njéé volú, ɛ́ɣɛ ngi ỹáh̃ani ngaa ngi léngaitii, ɛ́ɣɛ ngi ndéɣeni ngaa ngi ndíyangaitii ɛ́ɣɛ ngi héélaitii. Ná vólu, í gísiɣe bɔwɔ́ lɛɛh̃úi gele tɔ polú. Kɛ́ ná láá lé, ɛi ɣɛ ngáá pólu w̃ɔ́ɔ. 27Aáva nuí fíli ɛ́i ɣɛ́ w̃aahéi wóni ngáá ɔ́ɔ́ ha fááw̃a, ɔ́ɔ́ í hítɛ pólu, ɛi ɣɛ ngáá pólu w̃ɔ́ɔ.”
28Jísu í mɔ́ɔ ɣɛ ta, “Ná náa wú tá yílaa áá ɣɛ́ lói í pɛlɛ́ ló, maa w̃ɔ́i ɛi hei ɔ́ɔ́ ngakúla mba í tɔ ná wɔ́li naholó lɔ́ ngeyá ngáá áá kulaɣɛ pɛlɛ́i ná lo fááw̃a? 29Sífaa ná áá pɛlɛí hítɛ í baah̃áa ngukúla má, sítii kínɛi taá tɔ, taá ɣɛ́ taá ngɛlɛ́ gúla su. 30Taá ɣɛ taá ɣɛ́ ta, ‘Siỹɛndópoi sí í pɛlɛí londáá lɔkúla héingɔ, kɛ́ aa hombongɔ́ ɔ́ɔ́ ngukúla.’ ”
31Jísu í mɔ́ɔ́ ɣɛ ta, “Ná náa masa ngwála yiláá táa ɣɛ́ taa li kɔɔ wɔ́ma taá masa ngwála véka, ɛi hei hése ɔ́ɔ́ gisíya nga ngáá pangɔ́ ngáá ná wɔ́lii nuu tásu púúngɔitii tí ngeyá taá hómbo tí lápi ngáá masangí sí núu tasu puu félengɔi í ngeyá? 32Ná aáva áá ɣɛ́ kɔlɔ́ ngáá ɛi hombó, ti lowah̃u wooh̃ángɔ aa lo nɔ́ɔ p̃óu í nungáá lɔ́ve masa ngwála vékai ná yelé ngáá tí ndówah̃u batɛ́ wó. 33Ngimɔ́ɔ́ nɔ́ɔ jɔ́ í ná, wú tá fíli su, nuí ɛ́i ɣɛ́ gíkulai sí kpɛ́lɛɛ sú áá ɣɛ́ ngeyá, maa w̃ɔɔ́ ɛi ɣɛ ngáá pólu w̃ɔ́ɔ.”
Ngambala mba bóloi
(Máfiyu 5:13; Máa 9:50)
34Jísu í mɔ́ɔ ɣɛ ta, “Kpoloí lɔ ngáá ngangímba gɔ́li, kɛ́ ná ngi yéélei áá gúla mba, aa ɣelé kɛ náa áá mɔ́ɔ ɣɛ yéélei? 35Nga ngɛ́i mɔ́ɔ ɣɛ maa bóloi wa ngáá nuu ɔ́ɔ́ faa fíli kɛ́ la aáva taa pilí yáa. Nuí fíli faa ỹɛ́ni ngóli áá ɣɛ́ ngu mba, í fái sí yéɣe ngáá hɛmbɛ́ fíli.”
Seçili Olanlar:
LÚU 14: KNNT
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Bandi New Testament © Bible Society in Liberia, 2000
