Mathliyu 27

Mji Ku Mwantə Yesu Akəma Bilatus

(Mar 15:1; Luk 23:1-2; Yah 18:28-32)

1Sakatə vir kura, antə shanga pristayeri na ol'ola, kəga mji na ol'ola ata kəra mji, ku hara sauri ata kəra Yesu abbər ka da tsi ni. 2Antə da mbwahə ni, ka təra ka tsa, ka ra hamta ni aka gwamna Bilatus.

Mtər Yahuda

(Kəth Apos 1:18-19)

3Sakatə Yahuda, mdə na ɓəli Yesu ni, wuta abbər mdə ku thlamta shariyar mta aka Yesu, antə tsa nggatə mwavərkurari, ka ngka adzə pristayeri na ol'ola ka mji na ol'ola, ka jaktə hamta ala ɗa kwabar adzərfa na makkumari ni. #Kəth Apos 1:18-19 4Antə tsa pəla ala ɗa, “I ku hara biku tə I ɓəli mdə na ɓɗakkarkara ka mdə tsi ni ni!”

Amma da pəla, “Antə mə ri? Su aɗi na damitə yeru wa, ndagə bwar nga!” 5Antə Yahuda pumta kwaba ni akwa mbwar vəngkər səli, ka ləɓəla, ka mwari ka mbwamta kərni.

6Antə pristayeri na ol'ol ni fatə kwaba ni ka pəla, “Aɗi kalkal ka mdə pwi kwaba ngəni akwa vəi pwi kwaba na akwa mbwar vəngkər səli wa, təng tə tsa ku ndzi kwabar mamshi ni.” 7Antə da hara sauri ata kər, ka mastə bəbalər mdər hən tughum laga ka kwaba ni, ka vəi ni kamnyar harəmta mətəpiyayeri akwa. 8Antə mda ana kəga vəi ngəni abbər, “Bəbal ar Mamshi” har ba ashina.

9Apani antə mdə ku nghyaɓəla su tə naɓi Irmiya pəla abbər, “Da kətə kwabar adzərfa makkumari ni, kwaba tə mjir Israila kələngkər ka mdə ntəmta ata kərari, 10ka mastə bəbalər mdər hən tughum kəgari, apatə Mthlaku ku tsawa ali.”

Bilatus Ku Yu Yesu

(Mar 15:2-5; Luk 23:3-5; Yah 18:33-38)

11Sakatə Yesu ku thləthlata akəma gwamna, antə gwamna ni yu ni ka pəla, “Ga an kuthlir mjir Yahudi ni ya?”

Antə Yesu pəla alari, “Ga ku pəla apani.” 12Amma sakatə pristayeri na ol'ola ka mji damwa na ol'ola, yu ni ata kəra suayeri tə da burkatə ni ata kər ni, tsa aɗi hamta amsa wa.

13Antə Bilatus pəla alari, “Ga aɗi nggatə suayeri tə da akwa pəla ata kəra gə nəng?”

14Amma Yesu aɗi hamta alari amsa wala duku ata kər wa, antə su ni ku ndatə gwamna ka duna.

Mji Ku Thlamta Shariyar Mta Ata Kəra Yesu

(Mar 15:6-15; Luk 23:13-25; Yah 18:39—19:16)

15Tsuwa ku ndzi sur hara gwamna akwa kəlara sakar Kucalər Fəlɓəla Kəi, ka tsa psi ala ɗa mdə pal akwa pərsəna, mdə tə da an carɓəla. 16Akwa saka ndaga, da ka mdə laga mulmulari akwa pərsəna ni ka thləmari Barabbas. 17Apani sakatə mji ku tsaptədzi, antə Bilatus pəla, “Wa antə giri akwa bara ka mdə psi ala giri ri, Barabbas, nənga Yesu tə mda ana kəga ni Kristi nə ri?” 18Kamnyar tsa ku sənda ata bəbal abbər səlka an vu tə mjir Yahudi hamta Yesu ni.

19Tsuwa sakatə Bilatus tsu andzəndzi ata kujarar shariya, antə mwalankiɗa thlenta alari ndər abbər, “Kəɓəla tsiya ga akwa wujirər mdə ngəni kula biku ni! Kamnyar kurər vir na ashina, I ku ɗar bwani ka duna ata kərari akwa suni.”

20Amma pristayeri na ol'ola kəga mji damwa na ol'ola, ku kurtə ndəkərta hangkala mji abbər ka mdə psi ala ɗa Barabbas, ka mdə tsi Yesu. 21Antə gwamna ni jaktə yuwa abbər, “Wa antə giri ata bara ka mdə psi ala giri akwa nca ɗa suɗə nə ri?”

Antə da pəla, “Barabbas!”

22Antə Bilatus pəla ala ɗa, “To, man tə giri ata bara kəi hara aka Yesu tə mda ana kəga ni Kristi nə ri?”

Antə shanga ɗa pəla, “Kukwamta ni!”

23Antə Bilatus pəla, “Kamnyar mə ri? Man ɗimikur tə tsa hara ri?” Amma mji ni haptə kuraku ka duna ka pəla, “Ka mdə kukwamta ni!”

24Sakatə Bilatus wuta abbər su aɗi tə tsa amzhi harari kəra wa, tsuwa mji ni akwa bara ti bwari, antə tsa kətsə yimi ka kəcimta tsiyari kəgari akəma dlamar mji, akwa pəla, “Arna mnyi aɗi akwa tsi mdə ngəni wa! Hara giri ka kər giri!”

25Antə shanga mji ni shinau ka pəla, “Ka mamshirni ndzi ata kəra yeru kəga maɗa' yeru!”

26Antə Bilatus psi ala ɗa Barabbas. Aghəla tə tsa vu ka mdə ɓu Yesu ka kwandeng, antə tsa hamta ni ka da ra kukwamta ni.

Sojayeri Ku Hara Kyartəkur Aka Yesu

(Mar 15:16-20; Yah 19:2-3)

27Antə sojayeri ar gwamna ni kətə Yesu ka mwantə ni akwa bəbalər ɓukcir gwamna ni, ka tsaptə shanga sojayeri ni akəmari. 28Antə da fəi ləptərni ka hadza alari ləptu na ola mamza. 29Antə da namtə dzakwar kuthlikur ka mtəhəra, ka tsangkər alari, ka vu zwal akwa tsi mazəmari. Antə da zuzuri akəmari ka hara kyartəkur alari, akwa pəla, “Ka far ngə fəi, kuthlir mjir Yahudi!” 30Antə da tifəngkər alari mtili, ka kətə zwal ni ka tsa ni akwa kərari kəgari. 31Sakatə da ku kuri hara kyartəkur alari, antə da fəi ləptu lipəla nda, ka jaktə hadza alari ləptərni, ka təra ka tsa, kamnyar ka da ra kukwamta ni.

Mji Ku Kukwamta Yesu

(Mar 15:21-32; Luk 23:26-43; Yah 19:17-27)

32Sakatə da ləɓəla, antə da kəɓa ka mdər Sayirin laga na ka thləmari Siman. Antə da vu ni dwali ka tsa kəl udzəm kadləkadla ar Yesu ni. 33Sakatə da mzhitə vəi laga tə mda ana kəga abbər Golgothla, natə karapwari an “Vəi Kugwar Kər”, 34antə da hamta alari yimər anap gwargwarari ka su laga ɗəɗahu. Amma sakatə tsa ku ɗari, antə tsa nggəlar sari.

35Sakatə da ku kukwamta ni, antə da ndəkəi ləptayeri arni atar ndzəh kuriya. 36Aghəla nda antə da ndzəndzi anda akwa sək kərari. 37Antə da rəbutə biku tə mdə burkatə ni ata kər ni, abbər “NGƏNI AN YESU, KUTHLIR MJIR YAHUDI”, ka vəi abwa kərari. 38Tsuwa mjir thla laku aɗi suɗa tə mdə kukwamta ɗa adzə ni, pal abwa mazəmari ka pal abwa matsəkarari.

39Antə mji na akwa təramta adzə ɗa akwa kədaɓ kəra ɗa, ka mnya ɗimi alari, 40akwa pəla, “Gə na ata mzhi huzamta mbwar vəngkər səli ka jaktə hənta akwa kuta vir makər, mbantə kər ngə ja! Ma ga an Ɓzər Hyel, səghəi ata udzəm kadləkadla ni!” #Mat 26:61; Yah 2:19

41Tsu apani tsuwa antə pristayeri na ol'ola, ka maləmayeri ar thlipə tsawur Musa, kəga mji damwa na ol'ola, ku hara kyartəkur alari, akwa pəla, 42“Tsa ku mbantə mji laga, amma tsa amzhi mbantə kərni wa! Nənga aɗi tsa an kuthlir mjir Israila ni wa ri? Ma tsa, to ka tsa səghəi ata udzəm kadləkadlə ni kulini, antə mburu ata hamta jiri alari. 43Tsa ku mbərsa ka Hyel. Ndzi ka Hyel ni mbantə ni ja kulini, ma tsa ata hir ni jiri. Kamnyar tsa pəla, ‘I Ɓzər Hyel.’ ”

44Antə mjir thla laku tə mdə kukwamta ɗa ata vəi duku ka tsa ni tsuwa, mnya ɗimi alari.

Mtər Yesu

(Mar 15:33-41; Luk 23:44-49; Yah 19:28-30)

45Sakatə pci təpkər, antə kuthlu si ka hartə shanga tsəɗi ni, har ka mwanta aka saka makər. 46Apa saka makər antə Yesu haptə kuraku ka pəla, “Eloi, Eloi, lama sabakthlani?” Karapwari an, “Hyel arna, Hyel arna, kamnyar mi tə gə təra kazhar ra ri?”

47Sakatə mji laga na athləthlata anda nggatə kuraku, antə da pəla, “Tsa akwa kəga Iliya.” 48Təng təkəma pal akwa nca ɗa hwi ka ra kətə soso, ka hau akwa yimər anap na mumwasu, ka hata ata zwal, ka ha alari ka tsa sa.

49Amma mji laga pəla, “Ndzi ka mburu wutə nuhum Iliya ata si ka tsa mbantə ni.”

50Antə Yesu jaktə haptə kuraku ka duna, antə ɗəffari ləɓəla.

51Ata saka nda təng lapəli ar mbwar vəngkər səli ni ntaudzi ka bwa suɗa, baɗita amta har ka ləghəi, antə di ku kənggərantədzi, tə pelayeri ar gagəma ku ntəntamtadzi. 52Kulayeri tsuwa ku mbugərəmtadzi, antə mji hang na ɓɗakkarkara na mta, ku thlatə ka mpika, 53ka səɓəla akwa kulayeri. Aghəla tə Yesu ku thlata akwa mtəmta antə da ləkwa bərni na ɓɗakkarkara, ka ncantə kər ɗa aka mji hang.

54Sakatə olər sojayeri, ka mambila mjir sək kəra Yesu ni, wutə di kənggərantədzi, ka suayeri damwa na hara, antə da thlivər ka duna, ka pəla, “Jiri, ngəni an Ɓzər Hyel!”

55Tsuwa mwanki laga aɗi anda hang na thləthlatə catta akwa wul su na akwa hara. Da baɗitə nu Yesu təng ahar Galili, akwa wulwul ni. #Luk 8:2-3

56Akwa nca ɗa an Maryamu Magdalin, ka Maryamu mama' Yakub ka Yusuf, ka mama' maɗa' Zabadi.

Mdə Ku Harəmta Yesu

(Mar 15:42-47; Luk 23:50-56; Yah 19:38-42)

57Sakatə tahaku ku hara, antə mdər gəna laga ka thləmari Yusuf thlata ahar Arimathliya ka si, tsa ma tsa mdər nu Yesu. 58Antə tsa ku mwari adzə Bilatus ka kiɗə mshiyir Yesu. Antə Bilatus ku tsawa abbər ka mdə hamta alari. 59Antə Yusuf kətə mshiyir Yesu, ka pərtə ni akwa zhaɓər lilin na kəcəkəcari ɓɗaku, 60ka ra peri ni akwa kulər kərari laga bilən, tə tsa ntula ata pirakthlya. Antə tsa takəltə pela laga ola ka hartə mnya kul ni kəgari, ka təra. 61Tsuwa Maryamu Magdalin ka Maryamu na dukwari andzəndzi anda, awul kul ni.

Mjir Sək Kəra Kula

62Səɓəla ɗəpari, watau aghəla Vir Ɗəmhədzi, antə pristayeri na ol'ola kəga mjir Farisi tsaptədzi akəma Bilatus, 63ka pəla, “Zanuwa, yeru ku ɗangtə su tə mdər thlandər ngəni pəla, sakatə tsa tsu ka mpika, abbər, ‘Aghəla vir makər, I ata thlata.’ #Mat 16:21; 17:23; 20:19; Mar 8:31; 10:33-34; Luk 9:22; 18:31-33 64Antə vu ka mdə sək kəra kul ni ɓɗaku, har ka vədza aka vir na makərkur ni, ta mjirthlipərni asə mwari ka həltə mshiyirni, ka sə pəla aka mji abbər tsa ku thlata akwa mtəmta. Thlandər na akwa tsikərari ata sə ndzi ɗimi ta na ntangkəma ni.”

65Antə Bilatus pəla ala ɗa, “Giri ka sojayeri na ata mzhi səka. Antə mwar giri, ka giri wuta abbər giri ku ɓəlatə kul ni apatə giri amzha.”

66Antə da ku mwari, ka tsatə seɗar vu tsi ar kuthlikur ata pela ni, ka pwi sojayeri na ata sək kəra kul ni.

Seçili Olanlar:

Mathliyu 27: KNB

Vurgu

Paylaş

Kopyala