Mathliyu 26

Mji Na Ol'ola Ku Pəli Mnya Ata Kəra Yesu

(Mar 14:1-2; Luk 22:1-2; Yah 11:45-53)

1Sakatə Yesu ku kuri ndərayeri ngəni shang, antə tsa pəla aka mjirthlipərni, 2“Giri ku sənda abbər mbil vir suɗa ka vir Kucalər Fəlɓəla Kəi ni hara, tə mda ata sə hamta Ɓzər Mda ka mdə kukwamta ni.”

3Antə pristayeri na ol'ola ka mji na ol'ola ata kəra mji tsaptədzi akwa kəyir prist na ola na ka thləmari Kayafas. 4Antə da hara sauri abbər ka mdə nggwar ngkəi Yesu ka mdə tsi ni. 5Amma da pəla, “Aɗi akwa sakar susəm ni wa, kamnyar ta mji laga asə ti bwari.”

Mwala Laga Ku Kəkərta Kəra Yesu Ka Mal Ahar Bethlani

(Mar 14:3-9; Luk 7:37-38; Yah 12:1-8)

6Sakatə Yesu ahar Bethlani aviyar Siman na ɗar ndzi ka shilkər kəsəm dza, 7antə mwala laga ku si adzə ni ka kwalɓa laga raka tə mdə nam ka pela oniks, nghyinghyari ka mal shiwura na msəra, tə masari mwavər. Antə tsa pungkər mal ni ata kəra Yesu sakatə tsa andzəndzi akwa vəi səm susəma. #Luk 7:37-38 8Amma sakatə mjirthlipərni wutə su ngəni, təng ɗəffa ɗa ɓza, tə da pəla, “Kamnyar mi tə mda ata gyalntə su apani ri? 9Kamnyar mda ata mzhi ɗələmta mal ngəni ka kwaba hang, ka mdə na aka mjir bwani!”

10Amma Yesu ku nggatə su tə da akwa pəlari ni, antə tsa pəla ala ɗa, “Kamnyar mi tə giri akwa damitə mwala ngəni ri? Ai su na ɓɗak laga antə tsa hara ali. 11Kamnyar giri ka mjir bwani adzə giri tədəku, amma aɗi tədəku antə giri ata wutə ra adzə giri wa. 12Mal ngəni tə tsa puta ata dzi ni, tsa hara kamnyar ka tsa ɗəmhə ra kamnyar hara. 13I akwa pəla ala giri jirkur, akwa kəlara vəi akwa duniya ngəni tə mdə ku ngkər labar ngəni msəra ni, mda ata dingngga ngkər su tə tsa hara ni kamnyar ɗangtə ni.”

Yahuda Ku Kələngkər Ka Tsa Ɓəli Yesu

(Mar 14:10-11; Luk 22:3-6)

14Antə pal akwa nca mjirthlipər Yesu na kumnya suɗa na ka thləmari Yahuda Iskariyoti ni, ku mwari adzə pristayeri na ol'ola, 15ka pəla, “Man tə giri ata ni ri, ma I hamta ala giri Yesu?” Antə da jikaɓəla liya adzərfa makkumari, ka hamta alari. 16Tsu ata sakanda antə Yahuda Iskariyoti baɗitə bara lakur ɓəli Yesu ala ɗa.

Yesu Ku Səm Susəmər Kucalər Fəlɓəla Kəi Kəga Mjirthlipərni

(Mar 14:12-21; Luk 22:7-14,21-23; Yah 13:21-30)

17Akwa vir na ntangkəma ar Kucalər Buradi Na Kula Yist, antə mjirthlipər Yesu si adzə ni, ka pəla, “Ama antə ga ata bara ka yeru ɗəmha ala gə vəi tə ga ata səm susəmər Kucalər Fəlɓəla Kəi nə ri?”

18Antə tsa pəla, “Mwar giri, akwa kuta di, adzə mdə laga, ka giri pəla alari, ‘Maləm pəla sakarni ku hara kudzəha, antə tsa ata hara Kucalər Fəlɓəla Kəi ni ata kəma duku kəga mjirthlipərni aharngkiri.’ ”

19Antə mjirthlipərni ku hara tsu apatə tsa pəla ala ɗa. Da mwari ka ɗəmhə susəmər Kucalər Fəlɓəla Kəi ni.

20Sakatə tahaku ku hara, antə Yesu kəga mjirthlipərni na kumnya suɗə ni, ndzəndzi kamnyar səm susəma. 21Sakatə da akwa səm susəm ni, antə Yesu pəla ala ɗa, “I akwa pəla ala giri jirkur, pal akwa nca giri ata sə ɓəli ra.”

22Antə ɗəffa mjirthlipərni ku ɓzi ka duna, tə da baɗitə yu ni duku duku akwa pəla, “I iya, Mthlaku?”

23Antə Yesu shinau ka pəla, “Mdə tə yeru ata səma akwa kwatam duku ka tsa, tsa an ata ɓəli ra ni. 24Ɓzər Mda ata mta tsu apatə mdə ku rəbuta ata kərari akwa kakaɗər Hyel. Amma ata ndzi sur kətadza aka mdə na ata ɓəli Ɓzər Mdə ni! Ata ndzi alari kuji mda aɗi ya ni wa.”

25Antə Yahuda, na ata sə ɓəli ni ni pəla, “I iya, Maləm?” Antə Yesu pəla alari, “Gə ma ga ku pəla.”

Yesu Ku Səm Susəmər Tahaku Kəga Mjirthlipərni

(Mar 14:22-26; Luk 22:14-20; 1 Kor 11:23-25)

26Sakatə da akwa səm susəm ni, antə Yesu kətə buradi, ka usar Hyel ata kər, ka ɓəgəlwa buradi ni, ka hamta aka mjirthlipərni, ka pəla, “Dlu giri, ka giri səma, ngəni an dzi.”

27Antə tsa kətə kwapə na ka yimər anap ni, ka usar Hyel ata kər, ka hamta ala ɗa, akwa pəla, “Sa giri akwa, shanga giri. 28Kamnyar ngəni an mamshirna na kamnyar nghyaɓəla alkawal, mamshi na ku pumtadzi kamnyar mji hang, kamnyar tifəmta bikayeri arɗa. 29Kamnyar I akwa pəla ala giri, I aɗi ata jaktə sa yimər yar nfu ngəni kəra wa, tar vir tə I ata sə sa na bilənari kəga giri akwa Kuthlikur Təddarna.”

30Sakatə Yesu ka mjirthlipərni ku hara ha laga, antə da ləɓəla ka mwari akwa Gar Zaitun.

Bitrəs Ata Sə Kampikər Səndə Yesu Ka Makər

(Mar 14:27-31; Luk 22:31-34; Yah 13:36-38)

31Antə Yesu pəla ala ɗa, “Ashina aviri shanga giri ata sə hwi kazhar ra, kamnyar su na ata wutə ra. Kamnyar mdə ku rəbuta akwa kakaɗu abbər,

“ ‘I ata sə tsa mdər ɓəla,

antə təmayeri na akwa ciɓə ni ata titiləmtadzi.’ ”

32 “Amma aghəla tə mdə ku thlentə ra ka mpika, I ata mwari akwa tsəɗi Galili akəmata giri.” #Mat 28:16

33Amma Bitrəs pəla aka Yesu, “Wala ma shanga ɗa ata sə hwi kazhar nga kamnyar su na ata wutə nga, arna I aɗi ata təra kazhar nga cap wa!”

34Antə Yesu pəla aka Bitrəs, “Jiri, I akwa pəla ala ga abbər tsu ashina aviri, akwabə fugəm atuwa ga ata sə kampiku ka makər abbər ga aɗi səndə ra wa.”

35Antə Bitrəs pəla alari, “Wala ma I an ata mta ata kəma duku ka ga, I aɗi ata kampikər ngə cap wa.” Tsuwa apani antə shanga mjirthlipərni ku pəla.

Yesu Ku Hara Adduwa Akwa Gethsemani

(Mar 14:32-42; Luk 22:39-46)

36Antə Yesu ku mwari kəga mjirthlipərni ata vəi laga tə mda ana pəla Gethsemani, watau vəi ntsar malər yar zaitun. Antə tsa pəla ala ɗa, “Ndzəndzi giri azi, arna I ata mwari anda kəi hara adduwa.” 37Antə tsa fatə Bitrəs ka maɗa' Zabadi suɗa Yakub ka Yahwana, tə da təra ata kəma duku ka tsa. Antə ɗəffari baɗitə ɓza, tə tsa ləkwa damitədzi ka duna. 38Antə tsa pəla ala ɗa, “Ɗəffi ɓzəɓzari ka duna, har apa ka ɗəffi ləɓəla. Ndzəndzi giri azi, ka giri səka ata kəma duku ka iya.”

39Antə tsa ləkəma raka ka zuzuri ka kəmari ata di, ka hara adduwa abbər, “Təddarna, ma ahara, kələmta ali kwapər bwani ngəni bu. Wala apani aɗi abbər ka gə hara su tə I akwa barari ni wa, amma su tə gə hira.”

40Antə tsa ngka adzə mjirthlipərni na makər ni ka wutə ɗa akwa heni. Antə tsa pəla aka Bitrəs, “Azha giri amzhi ndzi ata wula ata kəma duku ka iya wala ar awur pal wa ya? 41Ka giri səka, ka hara adduwa ta giri asə ləkwa ngkərtədzi. Jiri, ɗəffa giri akwa barari, amma dza giri mtathlaku.”

42Antə Yesu jaktə mwari akwa vəi hara adduwa ni, ka hara adduwa akwa pəla, “Təddarna, ma kwapər bwani ngəni aɗi ata kələmtadzi wa, ma ku ndzi dwali kəi sa, to ka tsa ndzi apatə gə hira.” 43Antə tsa jaktə ngka adzə ɗa, ka wutə ɗa akwa heni, kamnyar da akwa ngga heni ka duna.

44Antə Yesu jaktə zhar ɗa, ka təra mwari akwa vəi hara adduwa na makərkurari, akwa pəla ndərayeri tə tsa pəla nda. 45Antə tsa jaktə si adzə mjirthlipərni ni ka pəla ala ɗa, “Har ba kulini giri tsu akwa heni ka ghərəmtaghəra ya? Kulini saka ku hara tə mda ata hamta Ɓzər Mda aka mjir biku. 46Thlatə giri, ka mburu təra. Kamnyar mdə na ata ɓəli ra ni ku si kulini!”

Mji Ku Ngkəi Yesu

(Mar 14:43-50; Luk 22:47-53; Yah 18:3-12)

47Sakatə Yesu tsu akwa gari ni, antə Yahuda si, tsa na pal akwa nca mjirthlipərni na kumnya suɗə ni. Tsa si ka dlamar mji hang, na ka katsakarayeri kəga zwalayeri akwa tsiya ɗa, tsuwa pristayeri na ol'ola kəga mji na ol'olər mji an thlentə ɗa. 48Tsuwa mdə na ata ɓəli ni ni ku hamta ala ɗa seɗa laga, abbər, “Mdə tə I ku vədza mnyi alari, an tsa, antə ngkəi gir ni!” 49Təkəma mwarər Yahuda adzə Yesu antə Yahuda pəla, “Alangguburo Maləm!” Antə tsa vədzə mnyari aka Yesu.

50Antə Yesu pəla alari, “Pazhi, ləkəma ka su na səntə nga!” Antə da si ka ngkəi Yesu, ka kəsi ni. 51Antə pal akwa nca mji na adzə Yesu ni, ntsuɓəla katsakarərni, ka nthlə mafar prist na ol ni kəgari, ka nthləmta thləmari. 52Antə Yesu pəla alari, “Jaktə hau katsakarər ngə ni akwa kəyari, kamnyar shanga mji na ana kəl katsakar, katsakar an ata tsi ɗa. 53Nənga giri akwa dzama abbər I amzhi kiɗə kəra Təddarna, ka tsa thlenta ali mjirthlentərhyel kulikulini na təramta dlamar sojayeri kumnya suɗə wa ri? 54Amma ma I hara apani, apa madi tə naɓikur tə mdə rəbuta akwa kakaɗər Hyel ni ata nghyaɓəladzi, abbər ka su hara apani nə ri?”

55Sakanda antə Yesu pəla aka dlamar mji ni abbər, “Giri səɓəla ka katsakarayeri kəga zwalayeri kamnyar ngka ra, apa dlu I mdər thla laku ya? Tədəku viri I akwa mbwar vəngkər səli akwa thlipa, giri aɗi ngkəi ra wa. #Luk 19:47; 21:37 56Amma shanga suayeri ngəni hara, kamnyar ka su tə naɓiyayeri rəbuta akwa kakaɗayeri ni nghyaɓəladzi.”

Sakanda antə shanga mjirthlipərni təra kazhar ni ka hwi.

Yesu Akəma Mjir Majalisa

(Mar 14:53-65; Luk 22:54-55,63-71; Yah 18:13-14,19-24)

57Antə mji na ngkəi Yesu ni ku mwantə ni aka Kayafas, prist na ola, akwa vəi tə maləmayeri ar thlipə tsawur Musa, ka mji na ol'ola ku tsaptədzi. 58Amma ar Bitrəs tsa akwa nu ghəla ɗa ka daɓwa ɗa tauwa, har tə da ləvəyar prist na ol ni. Antə Bitrəs ləvəi ka ndzəndzi adzə mjir sək kəra kəi ni, kamnyar ka tsa wutə laku tə su ni akwa kura. 59Antə pristayeri na ol'ola ka shanga mjir majalisa ni ku kəɗar ka da wutə seɗayeri na ar thlandər ata kəra Yesu, kamnyar ka da tsi ni. 60Amma da aɗi wutə wala duku wa, wala tə mji hang ku hara seɗayeri ar thlandər ata kərari. Akwa tsikərari antə mji laga suɗə si akəma, 61ka pəla, “Mdə ngəni pəla nggwa tsa ka dunar huzamta mbwar vəngkər səli aka Hyel ni, ka tsa jaktə həntə ni akwa kuta vir makər.” #Yah 2:19

62Antə prist na ol ni thlatə ka pəla aka Yesu, “Ga aɗi ata hamta amsa wa ya?” 63Amma Yesu ku dləɓ səri. Antə prist na ol ni pəla alari, “I ku paktə nga ka Hyel na ka mpika, ka gə pəla ala yeru jirkur. Ga an Kristi na Ɓzər Hyel ni ya?”

64Antə Yesu pəla alari, “I, tsu apatə ga ku pəla. Amma I akwa pəla ala giri, akəmazi giri ata sə wutə Ɓzər Mda andzəndzi abwa mazəma Na ka Duna ta Shang, akwa si akwa dlambayeri amtazi!”

65Antə prist na ol ni thləthləhumta ləptərni, ka pəla, “Tsa ku rutə Hyel! Kamnyar mi tə mburu akwa bara seɗa damwa ri? Ai giri aɗi nggatə rutə tə tsa hara aka Hyel ni! 66Man tə giri wutə ri?” Antə da pəla, “Kalkal ka mdə tsi ni.”

67Antə da tiftə mtili ata kəmari ka dədəktə ni ka matəkuma ɗa, tə mji laga tsuwa tsa ni ka mandaɓa, 68akwa pəla, “Hara naɓikur ala yeru ja, ma ga an Kristi ni! Wan tsa ngə nə ri?”

Bitrəs Ku Kampikər Səndə Yesu

(Mar 14:66-72; Luk 22:56-62; Yah 18:15-18,25-27)

69Akwa saka ndaga Bitrəs andzəndzi aɓəla akwa bəbalər kutakəi ni, antə ngkwa laga na ana kəthlər akwa kutakəi ni si adzə ni, ka pəla, “Gə ma, ga ata vəi duku ka Yesu na mdər Galili ni.”

70Amma tsa kampiku akəma ɗa shang ka pəla, “I asəndə su tə ga akwa pəlari nə wa.” 71Aghəla nda antə tsa thlatə ka ləɓəla ka ra ndzəndzi akwa cam, antə ngkwa damwa na ana kəthlər akwa kutakəi ni wutə ni, ka pəla aka mji na athləthlata anda ni abbər, “Ai mdə ngəni ata vəi duku ka Yesu na mdər Nazareth ni!”

72Antə Bitrəs jaktə kampiku har ka kahyel abbər, “I asəndə mdə ngəni wa!”

73Aghəla nda raka antə mji na athləthlata anda ni si ka pəla aka Bitrəs abbər, “Jiri, gə ma ga akwa nca ɗa, kamnyar kyanggyara ga ku ncaɓəla nga!”

74Antə tsa baɗitə shuwumta kərni, akwa kahyel abbər, “I asəndə mdə ngəni wa!” Təkəma antə fugəm tuwa. 75Antə Bitrəs ɗangtə su tə Yesu pəla alari nda abbər, “Akwabə fugəm atuwa, ga ata nggəlar ra ka makər abbər ga aɗi səndə ra wa.” Antə Bitrəs ku ləɓəla ka tuwa ka duna.

Seçili Olanlar:

Mathliyu 26: KNB

Vurgu

Paylaş

Kopyala