Mathliyu 25

Karapu Ata Kəra Maɗankwi Kuma

1 “Sakanda antə kuthlikur na amtazi ata sə ndzi apa maɗankwi kuma na fatə pitəlayeri arɗa ka ləɓəla kamnyar thlakəma sala mwala. #Luk 12:35 2Na ntəfu akwa nca ɗa caku caku, na ntəfu tsuwa ɗəɗu ɗəɗu. 3Kamnyar sakatə na caku caku ni fatə pitəlayeri arɗa, da aɗi kətsə mal ka kəsi damwa wa. 4Amma mji na ɗəɗu ɗəɗu ni ku kətsə mal ka kəsi akəla ɗa akwa kwalɓa. 5Sala mwala ni aɗi si taktar wa, antə shanga ɗa ku nggatə heni, ka heni.

6 “Amma sakatə kərathlər viri ku hara, antə da ku nggatə kuraku abbər, ‘Nggədza giri sala mwala ni ku si! Səɓəla giri, ka giri ra thla kəmari!’ 7Antə shanga maɗankwi ni ku thlatə ka namtə pitəlayeri arɗa. 8Antə na caku caku ni pəla aka na ɗəɗu ɗəɗu ni abbər, ‘Kətsə gir ala yeru malər giri ni bu, kamnyar pitəlar yeru akwa mta.’ 9Amma maɗankwi na ɗəɗu ɗəɗu ni shinau ka pəla, ‘Awa! Kamnyar nuhum aɗi sə mzhi yeru kəga giri wa. Kuji ka giri mwari ra mastə ar giri akwa vəi ɗəlari.’ 10Sakatə maɗankwi na caku caku ni ku təra mwari ra masə mal ni, antə sala mwala ni si. Antə maɗankwi na ɗəmhəɗəmhari ntəfu ni ku ləmbwa kəga sala mwala ni akwa vəi susəmər kəldzi ni, antə mdə ku hartə nyarmbwa.

11 “Aghəla nda tsuwa antə mambila maɗankwi ni ku si, akwa pəla, ‘Mdərkəi! Mdərkəi! Kəlar ala yeru nyarmbwa ni.’ #Luk 13:25 12Amma sala mwala ni shinau ka pəla, ‘I akwa pəla ala giri jirkur, I aɗi səndə giri wa.’ 13Ka giri ndzi ɗəmhəɗəmhari diya, kamnyar giri aɗi səndə virari wala sakar wa.

Karapu Ata Kəra Mjir Fəli Makər

(Luk 19:11-27)

14 “Kuthlikurər Hyel ata ndzi apa mdə laga na akwa bara lənggu, na kəga buɗayeri arni ka hamta ala ɗa gənarni. #Luk 19:11-27 15Aka mdə na duku tsa hamta alari thləvur adzərfa ntəfu, aka mdə na damwa tsa hamta thləvur adzərfa suɗa, ka aka mdə na duku tsuwa tsa hamta alari thləvur adzərfa pal, tsa hamta aka waskəi kalkal ka dunari. Antə tsa ku təra. 16Mdə na ku dlu thləvur adzərfa ntəfu ni ku təra təkəma kara fəli ka kwaba ni, har tə tsa wutə riɓar thləvur adzərfa ntəfu damwa. 17Tsu apani antə mdə na dlu thləvur adzərfa suɗə ni ku hara, ka wutə riɓar thləvur adzərfa suɗa damwa. 18Amma mdə na dlu thləvur adzərfa duku ni ku təra kara lamta ku, ka ɗuwar kwabar mthlakərni ni akwa.

19 “Aghəla tə ku fəi, antə mdərkəyir ɗa ni ku ngka, kamnyar ka da jikaɓəla su tə buɗayeri ni wuta ata kəra kwaba ni. 20Antə mdə na dlu thləvur adzərfa ntəfu ni, ku si akəma ka thləvur adzərfa ntəfu damwa, ka pəla, ‘Mdərkəi, thləvur adzərfa ntəfu antə gə hamta ali. Tsuwa nggədza riɓar thləvur adzərfa ntəfu damwa.’ 21Antə mdərkəyirni pəla alari, ‘Yauwa, ku hara ɓɗaku! Gə buɗa na pwa ka na ka jirkur! Ga ku ndzi ka jirkur ata kəra su na raka, antə I ata vətə nga ata kəra su na hangari! Asər ka mwa hara kucali ata kəma duku.’

22 “Antə tsa na dlu thləvur adzərfa suɗə ni tsuwa ku si akəma ka pəla, ‘Mdərkəi, thləvur adzərfa suɗa antə gə hamta ali. Tsuwa nggədza riɓar thləvur adzərfa suɗə damwa.’ 23Antə mdərkəyirni ni pəla alari, ‘Yauwa, ku hara ɓɗaku! Gə buɗa na pwa ka na ka jirkur. Ga ku ndzi ka jirkur ata kəra su na raka, antə I ata vətə nga ata kəra su na hangari! Asər ka mwa hara kucali ata kəma duku.’

24 “Antə mdə na dlu thləvur adzərfa duku ni tsuwa ku si akəma ka pəla, ‘Mdərkəi, I ku sənda abbər wujirər ngə mwavər, na ana thli su ata vəi tə ga aɗi thləka su ata wa, ka tsaptə su natə aɗi ga an titilar wa. 25Antə I thlivər ka təra ra ɗuwar thləvur adzərfar ngə ni akwa di. Antə nggədza sur nga.’

26 “Amma mdərkəyirni ni shinau alari ka pəla, ‘Gə buɗa na kəmanggar ka harwa!’ Azha ga ku sənda abbər, ‘I ana thli su ata vəi natə I aɗi thləka su ata wa, ka tsaptə su tə aɗi I an titilar wa ya? 27Ai sakani ga ata pwi ali kwaba ni akwa mbwar pwi kwaba, natə ma I ku ngka kəi wutə riɓa ata kər! 28Kulini dlutsə giri thləvur adzərfa na akəlari ni, ka giri na aka mdə na ka thləvur adzərfa kum ni. 29Kamnyar kəlara mdə na ka su, mda ata jakəngkər alari damwa, ka tsa ndzi kəgari hang. Amma mdə na aɗi ka su wa, to wala su na akəlari raka ni ma, mda ata dluɓəlari. #Mat 13:12; Mar 4:25; Luk 8:18 30Antə psəɓəla giri buɗa ngəni ɗimi ni akwa kuthlu, akwa vəi tə mji ata tuwa ka ɓɗə thlir.’ #Mat 8:12; 22:13; Luk 13:28

Shariya Na Akwa Tsikərari

31 “Ma sakatə Ɓzər Mda ata sə si akwa səliyirni, ka shanga mjirthlentərhyel adzə ni, sakanda antə tsa ata sə ndzəndzi ata kəra dəkəl kuthlikurərni na ka səli. #Mat 16:27; 19:28 32Antə mda ata sə tsaptə shanga mjir duniya akəmari, ka tsa ndəkəi ɗa ka bwa suɗa, tsu apatə mdər ɓəla ana ndəkɓəla təmayeri kazhar kwiyayeri.”

33 “Tsa ata pwi təmayeri ni abwa mazəmari ka pwi kwiyayeri ni abwa matsəkarari. 34Antə Kuthli ni ata pəla aka mji na abwa mazəmari ni, ‘Asər giri, giri tə Təddarna ku vədza ala giri barka, ka giri ləkwa kuthlikur na ku ɗəmhədzi kamnyar giri tsu akwa baɗitər duniya ni. 35Kamnyar sakatə I ka mi, giri ku ni susəma, sakatə I ka thləli, giri ku ni sur sa. Sakatə I mətəpi, giri ku dlu ra. 36Sakatə I dura, giri ku na ali sur hata, sakatə I nggawa, giri ku wul ra, sakatə I akwa pərsəna, giri ku si adzə ra.’

37 “Antə mji na hara su tə Hyel akwa barari ni ata shinau alari ka pəla, ‘Mthlaku, nawa antə yeru wutə nga ka mi, ka na gə susəma ri, wala ka thləli antə yeru na gə sur sa ri? 38Tsuwa nawa tə yeru wutə nga mətəpi, antə yeru dlu ngə ri, wala dura antə yeru ku na gə sur hatə ri? #Mat 8:12; 22:13; Luk 13:28 39Tsuwa nawa tə yeru wutə ngə nggawa, wala akwa pərsəna antə yeru si adzə ngə ri?’ 40Antə kuthli ni ata shinau ala ɗa ka pəla, ‘I akwa pəla ala giri jirkur, təng tə giri ku hara ngəni aka pal akwa nca maɗama'na na raka raka ni, giri ku hara ali.’

41 “Antə tsa ata pəla aka mji na abwa matsəkarari, ‘Tərar girdzi adzə ra, mji shiwushiwa, ka giri ləkwa u'u na akur wa natə mdə ɗəmhə aka Shatan kəga mjirthlentərni! 42Kamnyar sakatə I ka mi, giri aɗi ni susəm wa, sakatə I ka thləli, giri aɗi ni sur sa wa. 43Sakatə I mətəpi giri aɗi dlu ra wa, sakatə I dura, giri aɗi ni sur hatə wa, sakatə I nggawa, giri aɗi wul ra wa, tsuwa sakatə I akwa pərsəna giri aɗi si adzə ra wa.’

44 “Antə da ata sə shinau alari ka pəla, ‘Mthlaku, nawa tə yeru wutə ngə ka mi, wala ka thləli, wala mətəpi, wala dura, wala nggawa, wala akwa pərsəna, antə yeru aɗi dlar ngə wa ri?’ 45Antə kuthli ni ata shinau ala ɗa ka pəla, ‘I akwa pəla ala giri jirkur, təng tə giri aɗi dlar pal akwa nca na raka raka ni wa, giri aɗi dlar ra wa.’ 46Antə mda ata thlentə mji ngəni akwa bwani na akur wa, amma mji na pwa ata mwari akwa mpikə na akur wa.”

Seçili Olanlar:

Mathliyu 25: KNB

Vurgu

Paylaş

Kopyala