Mathliyu 16

Mji Ku Bara Seɗa Akəla Yesu

(Mar 8:11-13; Luk 12:54-56)

1Antə mjir Farisi ka mjir Saddukiya laga ku si adzə Yesu ka da ngkərtə ni. Antə da kiɗə ni abbər ka tsa ncanta ala ɗa seɗa laga akwar amtazi na ata ndatə mda. #Mat 12:38; Luk 11:16 2Amma tsa pəla ala ɗa, “Ma sakatə pci akwa təri, tə giri ku wutə vəi na amtazi ni hara mamza, giri ana pəla, ‘Yauwa, viri ata kur lapiya ɗəpa.’ 3Tsuwa ɗəɗəpa ma giri ku wutə kutahyel mamza ka zhimaru, giri ana pəla, ‘Yimi ata hara ashina.’ Giri ana səndə lakur ngkərɓəla su na ata sə hara atar wul kutahyel, amma giri amzhi ngkərɓəla seɗar zamanayeri wa. 4Mjir zaman ngəni an mji na ɗimi ka kula jirkur. Da akwa bara seɗa, amma mda aɗi ata hamta ala ɗa seɗa wa, tar seɗar Jona.” Antə tsa ku zhar ɗa ka təra. #Mat 12:39; Luk 11:29

Sur Thlipər Mjir Farisi Ka Mjir Saddukiya

(Mar 8:14-21)

5Sakatə mjirthlipərni ku ləɓəla aɓəla bwanda manda ni, antə da wuta abbər da ku fwari ta kətə buradi. 6Antə Yesu pəla ala ɗa, “Ka giri hara hangkal, ka giri ngga ngga yistər mjir Farisi ka mjir Saddukiya ni.” #Luk 12:1

7Antə da gari akwa daɓwa ɗa abbər, “Kamnyar tə mburu aɗi səntə buradi wa ni ya.”

8Amma Yesu ku səndə su tə da akwa pəlari, antə tsa pəla, “Ai mji kula hamta jiri! Kamnyar mi tə giri akwa gari akwa daɓwa giri abbər giri aɗi ka buradi wa ri? 9Ba sakani giri aɗi nggaɓəla wa ya? Giri amzhi ɗangtə laku tə I ndlantə mji dəpu ntəfu ka kər buradi ntəfu daci ni wa ya? Tsuwa thlambəl yiɗau antə giri nghyantə ka na ɓushirəmtadzi nə ri? #Mat 14:17-21 10Wala tsuwa sakatə I ndlantə mji dəpu nfwar ka kər buradi murfə ni, thlambəl yiɗau antə giri nghyantə ka na ɓushirəmtadzi nə ri? #Mat 15:34-38 11Kamnyar mi tə giri amzhi nggaɓəla abbər I aɗi akwa gari ala giri ata kəra buradi wa nə ri? I pəla ka giri hara hangkal ka yistər mjir Farisi ka mjir Saddukiya.”

12Sakanda antə mjirthlipərni nggaɓəla abbər tsa aɗi akwa tsaktə ɗa ata kəra yist tə mda ana pu akwa buradi wa, amma tsa akwa tsaktə ɗa ata kəra surthlipər mjir Farisi ka mjir Saddukiya.

Su Tə Bitrəs Pəla Ata Kəra Yesu

(Mar 8:27-30; Luk 9:18-21)

13Sakatə Yesu ku si akwa tsəɗi Kaisariya Fəlippi, antə tsa yu mjirthlipərni abbər, “Mji ana pəla abbər Wa an Ɓzər Mdə nə ri?”

14Antə da pəla, “Mji laga ana pəla abbər ga an Yahwana na mdər hara Baptizma, mji laga ana pəla Iliya, mji laga tsuwa ana pəla Irmiya, wala pal akwa nca naɓiyayeri ni.” #Mat 14:1-2; Mar 6:14-15; Luk 9:7-8

15Antə tsa pəla ala ɗa, “Amma ar giri, giri ana pəla I an wa ri?”

16Antə Siman Bitrəs shinau ka pəla, “Ga an Kristi, Ɓzər Hyel na ka mpika.”#Yah 6:68-69

17Antə Yesu shinau alari ka pəla, “Gə ka barka, Siman ɓzər Yahwana! Kamnyar aɗi mda an ngkər ala gə su ngəni wa, amma Təddarna na amtazi. 18Tsuwa I akwa pəla ala ga, ga an Bitrəs, tsuwa ata pela ngəni antə I ata nci ikələziyarna, natə mta amzhi nggyariyari wa. 19Tsuwa I ata hamta ala gə tsəkuramayeri ar kuthlikur na amtazi.”

“Antə kəlara su tə ga ku mbwi akwa duniya ni, ata ndzi mbwimbwiyari amtazi, tsuwa kəlara su tə ga ku mpəli akwa duniya, ata ndzi mpəlimpəliyari amtazi.” #Mat 18:18; Yah 20:23

20Antə Yesu tsaktə mjirthlipərni ka duna abbər da aɗiya pəla aka wama abbər tsa an Kristi wa.

Yesu Ku Ngkər Su Ata Kəra Mtərni

(Mar 8:31—9:1; Luk 9:22-27)

21Təng akwa saka nda antə Yesu baɗitə ncanta aka mjirthlipərni abbər, dwali ka tsa mwari ahar Urushalima, ka tsa ɗar bwaniyir suayeri zumzum hang akwa tsiya mji na ol'ola, kəga pristayeri na ol'ola ka maləmayeri ar thlipə tsawur Musa, har ka mdə tsi ni, ka tsa thlata akwa vir na makərkur.

22Antə Bitrəs ndəkərəmta ni ata tenga ka baɗitə mpa alari akwa pəla, “Ka Hyel ngkata, Mthlaku! Su ngəni aɗi ata wutə ngə hun wa.”

23Amma Yesu shinardzi ka pəla alari, “Tərardzi kazhar ra, Shatan ragai! Ga an sur tsamta səl ali. Kamnyar ga akwa dzama apa mda, ga aɗi akwa dzama apa Hyel wa.”

24Sakanda antə Yesu pəla aka mjirthlipərni, “Kəlara mdə na ata bara nu ra, tar ka tsa nggəlar kərni, ka tsa kətə udzəm kadləkadla arni, ka tsa nu ra. #Mat 10:38; Luk 14:27 25Kamnyar kəlara mdə na ata bara mbantə mpikari, mpikari ata sha. Amma kəlara mdə na ata hir shamta mpikari kamnyar na, tsa ata wutə mpika. #Mat 10:39; Luk 17:33; Yah 12:25 26Kamnyar man ampaniyari ri, ma mda ata ndzi mthlakər shanga duniya ni, amma tsa ata ni ka mpikari? Wala tsuwa man tə mda ata mzhi paltari ka mpikari ri? 27Kamnyar Ɓzər Mda ata sə si ka mjirthlentərhyel akwa darajar Təddarni, ka tsa ntəmta aka waskəi kalkal ka su tə tsa hara. 28I akwa pəla ala giri jirkur, mji laga aɗi athləthlata azi na aɗi ata mtə kambəla da wutə Ɓzər Mda akwa si akwa kuthlikurərni wa.”

Seçili Olanlar:

Mathliyu 16: KNB

Vurgu

Paylaş

Kopyala