aMatiyu 9

aYeso sak aner akak a tá we̱ tá te atser

(aMar 2.1-12; aLuk 5.17-26)

1Ayong aYeso no̱ kaye̱e̱r kukpara ashi nong a tú ku bun nuwo̱p wu. 2Áner akak tu ku be̱e̱n aner akak kuro̱m tá we̱ abas azining ni ike̱ng kameneng. Nizen iya aYeso tá di kuno̱o̱k katsak ba, yong a fe̱ be aner kuro̱k'e ye, “Igon'i, tu daam baꞌ, a ma ka re̱ng rine̱n wan.”

3Be kufok anong áner kubo̱so̱p itsi ákak fe̱ kaye̱e̱r aye̱ ba ye, “Aner na zhe̱e̱sh Adakunom.”

4aYeso tá ren kuto̱ro̱ng ba, iyong a fe̱ be ba ye, “Akye̱ sak yin nye yin amaan kuto̱ro̱ng anong kaye̱e̱r aye̱ yin e̱? 5Inyaka ro̱ ne i nar e̱? A ta fe̱ be aner ye, ‘A ma ka re̱ng rine̱n wan,’ ka ‘Dorok ta tseng’ e̱? 6Amma mi shim yin ta ren yin ye, Igon Anerawe be kukyem a tanin re̱ng rine̱n kaye̱e̱r kazatse,” iyong a fe̱ be aner aya a tá we̱ abas azining ame ye, “Dorok tá sok ike̱re̱ kameneng wan ta be kari.” 7Ayong aner ame dorok, a tá be kari. 8Nizen iya ánerawe ame tá di anong, inyim tú ro̱ ba iyong á kerek Adakunom aya a tá no̱o̱k ánerawe kukyem kuri kuyong.

Kuyis aMatiyu

(aMar 2.13-17; aLuk 5.27-32)

9aYeso tá ya kasho̱o̱n be kutseng ne a di afe kushashang itso̱m iben akak a tú ku yis ye aMatiyu, a se nusonong naro̱ itomong wu. aYeso fe̱ be wu ye, “Ni kuus,” iyong a dorok nong a tú ku kuus.

10Nizen aYeso ta se be iya naya nasa aMatiyu'me, áfe kushashang itso̱m iben whe̱re̱ ne áfe rine̱n be̱s ne á ya mak be wu ne alimazhiri wu. 11Áner aFarisi akak tá di anong iyong a rip álimazhiri'me ye, “Akye̱ sak áner kubo̱so̱p yin yas be áfe kushashang itsom iben ne áfe rine̱n e̱?”

12aYeso tá fa fok anong ne a fe̱ ye, “Aya a ta nye atser tse̱r abok baꞌ, afe iro̱k tse̱r. 13Tseng yin se tse̱r yin ike̱ng iya rife̱ Adakunom na tin fe̱ natoon'e: ‘Mi nar kushim ku tonong kuro̱ riye̱ be tana nye asidaka.’ Kamok mi be̱ ta yis aya a ta di ye ba se gye̱r nasho̱o̱n Adakunom baꞌ, mi be̱ ta yis áfe rine̱n.”

Kurip natoon kunye azumi

(aMar 2.18-22; aLuk 5.33-39)

14Ayong álimazhiri aYohana be̱ nong á ta rip aYeso ye, “Akye̱ sak yir be áner aFarisi man ne i nye yir azumi, amma álimazhiri wan nye baꞌ e̱?”

15aYeso fe̱ be ba ye, “Áferime̱ aner aya a ta sok abining afas ta nye riye̱ riwe kum ne ba rusek be aner aya a tá nye kuwe̱ne̱ng'e a? Izen saase ife á tana sok aner a tana ku rosom kuwe̱ne̱ng'e nasho̱o̱n ba, nizen iyong ne ba ta nye azumi.

16“Ko akak ta basak kures be itan'e ifas iya i ta furuk baꞌ, kamok itan'e ta bun i wuruk kaye̱e̱r kures'e ne ribong'e nibarang. 17A korok ashi anap afas kaye̱e̱r ariding kukpa kuzen baꞌ, ke a nye anong ariding'e tà sarak ne ashi anap'e #9.17: Ashi Anap: fa: Akanang Ike̱re̱ Ikak, kaye̱e̱r nafarap'e nakak. nyosong. Ariding'e ta beseng. A korok ashi anap afas na ariding kukpa kufas, be anong ne cice̱r tà sor gye̱r.”

Angas aZharus be abining akak naso̱k tá tas

(aMar 5.21-43; aLuk 8.40-56)

18aYeso tá ru fe̱ anong, ako̱k kasho̱o̱n kutu aduwa akak be̱, a tá be̱ tiguum nasho̱o̱n aYeso ne a fe̱ be wu ye, “Angas'i ku kyo̱o̱rna'me. Be̱ tin sak kubo̱k ni wu nong a tà te atser.” 19aYeso dorok mak be álimazhiri wu nong a ta tseng.

20Nama anong, abining akak, naso̱k tá teng aye̱ kuso̱k be afa be̱ nabas kama aYeso nong a tá ra kanu kukpiin aYeso'me. 21Abining ame to̱ riye̱ wu ye, “Ke mi ra kukpiin wu tsek, mi tà te atser.”

22aYeso tá fa kirik a tú ku di, yong a fe̱ be wu ye, “Sang wan tu daam baꞌ, angas, kuno̱o̱k katsak wan n sak wan n te atser.” Ne abining'e wor a te atser nizen iyong.

23Nizen aYeso tá no̱ nasa ako̱k kasho̱o̱n ame, a di áfe kute̱p asharuwa ne ánerawe be riwo̱ng. 24Ne a fe̱ be ba ye, “Tseng yin, kanamang'e n ku baꞌ. A se be ida.” Ayong á tu mas. 25Nama a tá tun rigwo̱m ame nufang, ne a no̱ kaye̱e̱r kutu'me, a tá sok kubo̱k kanamang'e, ne ka dorok. 26Itak na tseng koake̱ kaye̱e̱r kaben'e.

aYeso sak akpato̱o̱n be agbanu ákak tá te atser

27aYeso tá fa won azong, iyong ákpato̱o̱n afa san ku kukuus ne á tang kuto̱ ne á ku yis ye, “Igon aDauda, ro̱ riye̱ yir!”

28Nizen aYeso tá no̱ kaye̱e̱r kasa kakak, ákpato̱o̱n afa ame be̱ nufu, yong a tú ku rip ba ye, “Yin ti no̱o̱k yin katsak ye, mi ta kyem i ka sak yin ta te yin atser a?”

Ayong ba fe̱ ye, “Ei, Atekasa!”

29Ayong aYeso ra anyisi ba ne a fe̱ ye, “Won i tu se anong, kyo̱ndi yin ti no̱o̱k yin katsak.” 30Anyisi ba wor a karak. aYeso tu kpam ba ye, “Sang á tu tak akak baꞌ.” 31Amma á ban a wuruk nong a tá tsang á taas itak kaye̱e̱r kaben'e cice̱r ingya.

32Nizen ba ta sen wuruk, áner akak be̱e̱n aner akak a tá be amaan nabik nufe aYeso, i tú ku roon kufe̱ kanu. 33A ta fa tun amaan nabik'e, aner a tá tsang a nye agbanu ame fe̱ kanu. Ánerawe whe̱re̱ te zhing ne á fe̱ ye, “Yir kun di yir ike̱ng ikak ana niben Isarela baꞌ.”

34Amma áner aFarisi fe̱ ye, “Be kukyem agwo̱m ítseng'e ne a ti turung nabik'e.”

Áfe itomong'e gop baꞌ

35Nama anong aYeso tsang tseng na agbang iwo̱p ne izhizhe̱k'e cice̱r, ne a nye awazi kaye̱e̱r atu aduwa ba. Ne a ku taas ba Rife̱ Ritek natoon rigwo̱m Adakunom ne a sak áfe iro̱k ze̱r ze̱r te atser. 36Nizen aYeso tá di ánerawe whe̱re̱, a ro̱ riye̱ ba, kamok á se nudaam, á be akak a tana ka tobok ba baꞌ. Á se kyo̱ndi itsamang dar afek. 37Ayong a fe̱ be álimazhiri wu ye, “Ishamang kuse dide̱ng, amma áfe itomong'e se hiir. 38Kamok anong nye yin aduwa nong atek riko̱'me tin barang áfe a tana ku nye itomong ishamang'e.”

Seçili Olanlar:

aMatiyu 9: izrNT

Vurgu

Paylaş

Kopyala