aMatiyu 10

aYeso yis álimazhiri wu kuso̱k be afa

(aMar 3.13-19; aLuk 6.12-16)

1Ayong aYeso yis alimazhiri wu kuso̱k be afa ne a ku no̱o̱k ba kukyem ku niturung amaan nabik ne kukyem kusak afe iro̱k ze̱r ze̱r ta te atser.

2Áyu ne á nye ayerek ámanzo kuso̱k be afa'me. Afe ime̱se̱ng'e nye, aSiman aya a tú ku yis ye aBitrus ne aronyining wu Adarawus, ne aYakub igon aZabedi be aronyining wu aYohana, 3ne aFilibus be aBatalomi, ne aToma, be aMatiyu aya a tá shashang itso̱m iben, ne aYakub igon Alfiyus ne aTadiyus, 4be aSiman aya a tú ku yis ye aner a tá be rifuup kaben wu ne aYahuza Iskariyot aya a tá re̱p aYeso nama.

aYeso tom álimazhiri wu kuso̱k be afa

(aMar 6.7-13; aLuk 9.1-6)

5Aner kuso̱k be afa na aYeso tu tom ba ne a tá fe̱ ye, “Sang yin tu tseng yin nufe áner a tá nye aner aYahuda baꞌ, ka kaye̱e̱r kuwo̱p aner aSamariya kukak baꞌ. 6Tseng yin nufe itsamang Isarela iya i ta wei. 7Ke yin tseng yin, ku nye yin ba awazi ye, ‘Rigwo̱m kaza m be̱ bubarak!’ 8Sak yin áfe iro̱k tá te atser, ne i sak yin ikom tá dorok, ne i sak yin ákparo̱ng tá te zhe̱l, ne i turung yin amaan nabik. Yin se̱ yin warak, no̱o̱k yin warak. 9Sang yin tu be yin itso̱m kaye̱e̱r ishika yin baꞌ. 10Sang yin tu be yin ishika ka akpiin afa ka akpatak afa ka ishe̱n baꞌ. I se gye̱r aner a ta nye itomong ta ya kutsin wu.

11“Koakye kuwo̱p ne yin no̱ yin kugbang'e ka kuhiir'e ayi, tse̱r yin kasa aner atek nong ta sor yin azong ma izen iya ne yin tana dorok yin. 12Ke yin no̱ yin nasa'me ne yin nye yin ashou. 13Ke áfekasa'me se gye̱r, to̱, yin nye yin aduwa nong ritek Adakunom ta se natoon ba, amma ke áner'e se gye̱r baꞌ, to̱, sang á ta se̱ ritek Adakunom baꞌ. 14Koangan afe a ta ka shan yin ka a shan rife̱ yin baꞌ, to̱, ne i re̱ng yin iwur atak yin azong nuwo̱p kuyong ka nasa kayong nong ta tseng yin. 15Katsak'e ne mi ta ka tak yin, a tà nar kuro̱ riye̱ áner aSodom #10.15: aSodom: fa: Akanang Ike̱re̱ Ikak, kaye̱e̱r nafarap'e nakak. be áfe aGomora katuk amok be áner kuwo̱p kuyong. 16Mi sen ka tom yin kyo̱ndi itsamang kaye̱e̱r agabu katse, kamok anong be yin ritseng kyo̱ndi íwhen ne i se yin whiwhe̱ kyo̱ndi ábo̱p.

Risam ri ta saase

(aMar 13.9-13; aLuk 12.11-12; 21.12-19)

17“Sak yin riye̱ be ánerawe, kamok á ta tseng be yin naro̱ amok ne á ka whereng yin kaye̱e̱r atu aduwa ba. 18Kamok mi, á tà tseng be yin nasho̱o̱n ágwomna ne ágwo̱m kamok yin tu ku tak yin ba Rife̱ Ritek ne áya sang a ta nye aner aYahuda baꞌ. 19Ke á ta yising yin, sang yin tu daam yin be ike̱ng ife yin tana fe̱ yin ka ane̱ ne yin tà fe̱ yin baꞌ. Nizen iyong a tà ka no̱o̱k yin ike̱ng ife yin tana fe̱ yin. 20Kamok sang yin ne i fe̱ yin kanu baꞌ, Kabik Ada yin ne a fe̱ kaye̱e̱r yin.

21“Aronyining tà no̱o̱k aronyining wu nong a tà fe̱r ne atek igon no̱o̱k igon wu. Inoon tà shonong atek ba'me ma a tù ku fe̱s ba. 22Ánerawe cice̱r tà ka ranyin kamok mi, amma aner aya ne a nyeseng be agap ma nigang'e, a tà se̱ kashesh. 23Ke á ta tabak yin nuwo̱p kukak, to̱, ne yin teng yin ta be yin kaye̱e̱r kuwo̱p kukak. Katsak'e ne mi ta ka tak yin, nizham yin tà ra gang yin kugorok iwo̱p Isarela cice̱r Igon Anerawe ta tsang ka be̱.

24“Aner aya a ta sen bo̱so̱p ike̱ng kun nar aner aya a tú ku bo̱so̱p'e baꞌ, ka asam ta nar atekasa wu baꞌ. 25I ta se gye̱r aner a ta sen bo̱so̱p'e ta se kyo̱ndi aner a tu ku bo̱so̱p'e, ne asam te kyo̱ndi atekasa wu. Ke ba fe̱ be atekasa'me ye a nye aBazabul, #10.25: aBazabul: fa: Akanang Ike̱re̱ Ikak, kaye̱e̱r nafarap'e nakak. to̱, a ta fe̱ ane̱ be aner kasa wu e̱?

Aner aya a tana fok inyim wu

(aLuk 12.2-7)

26“Kamok anong sang yin tu fok yin inyim ba baꞌ. Ike̱ng ikak kuse nuwhe̱e̱n a tana won dar a karak baꞌ, ka iya i ta se nune̱re̱ng a tana won dar a tun na akanang baꞌ. 27Ike̱re̱ mi ta sen ka taas yin na awhi, fe̱ yin kanang. Ike̱re̱ a tá ka taas yin kyo̱o̱n nato, ngarak yin na agarang ta fe̱ yin kanang. 28Sang yin tu fok yin inyim áfe ku fe̱s ánerawe baꞌ, kamok á ta kyem a fe̱r kabik'e baꞌ. Fok yin inyim aner aya a tana kyem a te kabik be kuro̱m anerawe cei kaye̱e̱r kasa kuro̱ng ingya. 29Yin ren yin ye, a re̱p nanon nafa natoon itso̱m cie̱k aꞌa? Gip be anong, kazining kaye̱e̱r ba tà kpa kaben baꞌ, ma ke Ada yin shim. 30Anong ne nakuyo̱ng rice yin gip, an fa cei. 31Kamok anong sang yin tu fok yin inyim baꞌ; yin be yin kuyiik dide̱ng ne i nar yin nanon dide̱ng.

Tonong ye wan nye afe aKiristi nasho̱o̱n ánerawe

(aLuk 12.8-9)

32“Aner aya ne a fe̱ nasho̱o̱n ánerawe ye wu ti ren, mi tà ma fe̱ ye, sang mi tu ren gip nasho̱o̱n Ada mi afe a ta se kaye̱e̱r naza. 33Aner aya ne a fe̱ nasho̱o̱n ánerawe ye, wu ti ren baꞌ, mi tà ma fe̱ ye, sang mi tu ren baꞌ, nasho̱o̱n Ada mi a ta se kaye̱e̱r kaza.

aYeso be̱ be kusor caang nazatse baꞌ

(aLuk 12.51-53; 14.26-27)

34“Sang yin tu di yin ye mi be̱ be kusor caang kaye̱e̱r kazatse na baꞌ. Mi be̱ be kusor caang baꞌ, mi be̱ be itsom. 35Kamok mi be̱ nong

“ ‘ta sak igon tà rawu atek,

ne igon kabining'e rawu anyining

ne akugon rawu anyining akop wu.

36Áner kari wu ne á tà te ámudo̱n wu.’

37“Aner a ta shim atek ka anyining wu ayi ne a ni nar, ta kyem a ta te anaan baꞌ. Aner a ta shim igon ka angas wu ayi ne a ni nar ta kyem a ta te anaan baꞌ. 38Aner aya ne a sok kukon ku kutigak wu be rice wu nong a tin kuus baꞌ, a kyem a ta te anaan baꞌ. 39Aner aya a ta shim kutser wu, a tin wei mo, aner aya a ti wei nutser wu kamok mi a tà se̱.

Ishorong itomong koangan

(aMar 9.41)

40“Koangan afe a ta ka shan yin a ti shan mi. Koangan afe a tin shan a shan aner aya a tin tom. 41Koangan afe a shan aner kuzarap ye kamok wu ta nye aner kuzarap, a ta se̱ ishorong áner kuzarap. Aner aya ne a shan aner azhe̱l'e ye kamok a ta nye azhe̱l'e, a ta se̱ ishorong aner azhe̱l'e. 42Koangan ne a no̱o̱k azining kaye̱e̱r ayu a ta ru raar na ashi kuso̱ acaang kamok wu ta nye alimazhiri mi, won ta ka tak yin katsak'e, a tin wei nishorong wu baꞌ.”

Seçili Olanlar:

aMatiyu 10: izrNT

Vurgu

Paylaş

Kopyala