Ɉaan 7
7
Jesus kaayɔwɔɠaa di hvo laa na
1Yili pulu, Jesus ə kɛi hiɛ Galile lɔi hu, hvo kɛ bɔ hvə hiɛ tii Ɉude lɔi hu. Mąąhɔlɔɓo, Ɉuifəɠaa di kɛi gwɛli baa mɛ̨nį ɓa. 2Ɉuifəɠaa di wɔ hɛlii a ɉəɠə kələ hɛli, mąą kpua kɛa kɛ. 3Jesus kaayɔwɔɠaa di mo mą diɛ mą: «'Həɠə ɓɛ ə́ li Ɉude lɔi hu pələ. Ya ɓə a gɛ mɛ̨nįɠaai ə́ kaa gɛi, ə́ wɔ kalan nɛai diɛ kpɛli di gaa. 4Mɛ̨nįi nu kaa bɔ nuą di gɔlɔn, hva noo yɛ gɛ. Yɛ bələi ə́ kaa mɛ̨nįɠaai ŋɛ̨i kɛi la, 'kulɔ ponoŋą nu kəlee di ə́ kaa.»
5Yaan, kaayɔwɔɠaa di hvo kpɔ kɛi laa na. 6Jesus ə di woo pulu pənə yɛ diɛ: «Nwɔ́ yələ hvo ni həli li, kɛlaa yələ kəlee lɔ ɓaa a ka wɛi. 7Ka wɛli hva pɛli kpɛɛi yɛnɛ̨ɛ̨ ɓa, kɛlaa nwɛ́i, nwɛ́li a kpɛɛi mą, mąąhɔlɔɓo, gáá ɉɔn doo pono ŋą. 8'Ka li ka wɛi ka ɉɛli pu, kɛlaa nwɛ́i, və́ lii, mąąhɔlɔɓo, nwɔ́ yələ hvo nii həli li.»
9Yii kɛa ə mo tii diɛ, ə lɛɛ Galile lɔi hu.
Jesus ə li ɉəɠə kələ hɛli ɓa
10Lii kɛa Jesus kaayɔwɔɠaa də li lə ɉɛli ɓa, yaa kpɛli ə həɠə yɛ li, kɛlaa, ə li noo pələi. 11Di kɛɛ ɉɛli ɓa, Ɉuifəɠaa di kɛi Jesus kwɛli, diɛ kɛ mą: «Ə̨́i, gaa kani mį?»
12Nu tamąą di kɛi Jesus mąą mɛ̨nį ɓo di kee lɔwai; daɠaa di kɛi kɛ diɛ: «Nu lɛlɛɛ li.» Dakpɛliɠaa diɛ kɛ: «Lɛɛ li, Gaa nuą nwun ɉu lan ɉi.» 13Kɛlaa, nu ta lɔpee hvo kɛi Jesus mąą mɛ̨nį ɓo a pono ŋą, mąąhɔlɔɓo, di kɛi ɲɔ̨w Ɉuifəɠaa diɛ.
14Di kɛ kɛa ɉɛli hamąi, Jesus ə li Yálá hvɛli pɛlɛ mu, yɛ nuą mąąkwɛli. 15Ɉuifəɠaa kwəi ə pili diɛ, diɛ kɛ di kee ɓa: «Nui ŋɛ̨i ə Ɉɛɓɛ́ kɔ́lɔn bələ kɛ ləi, yai hvo lakwəli kɛ li?»
16Jesus ə di woo pulu pənə yɛ diɛ: «Galan ŋɛ̨i gáá gɛi, hvə həɠəi li ɲą́ą́ ɲei; kɛlaa ə həɠə nui dɔ́ɔ́ ɲei. 17Nui hvaa Yálá liiɓa kɛ mɛ̨nį ɓa, a gbaɠala kaa akɛ mɛ̨nįi ŋɛ̨i gáá mo, ə həɠə Yálá pɔ, awala kɛ tii, gbɔ́wɔ́ woo li. 18Nui a gbɔwɔ woo ɓo, a gbɔwɔ nwɔ mąąwiɛ kwɛli. Kɛlaa, nui a dímun nwɔ mąąwiɛ kwɛli, tɛ̨ą ɓomun, hva wɛa túwɔ́ ɓo. 19Kɛlɛi Moisə ɓə dɔ́n ɉɛɓɛ́ tɛɛ ka pɔ ee? Yaan, ka tɔ̨nɔ̨ kpɛli hvə túwɔ́i yɛ pələi dɔ́n tii mąą liɛwoo kaa la. Lə mɛ̨nį ɓa ka káá bɔ kɛ báá?»
20Nu kpului tii kəlee di nwoo pulu pənə, diɛ mą: «Ɲį́nɛ̨n gaa ə́ pulu! Gbɛɛ ɓə gaa bɔ ə ə́ paa?»
21Jesus yɛ diɛ: «Mɛ̨nį taanɔ̨n gbən nɔ ɓə ŋą́ą́ gɛ, yili ka tii aa ka kwəi pili kaa. 22Moisə ɓə kɛ́nɛ̨ mɛ̨nį laa ka nwuɔ̨, kɛlaa, ya hvəə gɔwɔ tɔɔ; ka kalapɔlɔni ɓə gɔwɔ tɔɔ. Ɛlɛɛ, kaa kɛ́nɛ̨ hee a hvįįtɔɔ yələ. 23Yii da nu hee kɛ́nɛ̨ ɓa a hvįįtɔɔ yələ, hva Moisə nwɔ tɔ́n həɠə mą, lə mɛ̨nį ɓa ŋą́ą́ nu ɓalo a hvįįtɔɔ yələ ka kpuluun a ɲą́ą́? 24Ka hvo kiti tee lɔ mɛ̨i pɛlɛ, kɛlaa, ka kiti tee a ɉaŋąą.»
Akɛti, Jesus kaa a Nwun mąąɓomun?
25Ɉerusalɛmə nuą taɠaa di kɛi kɛ diɛ: «Kɛlɛi nui di kaa gwɛli baa mɛ̨nį ya ɓəi? 26Lolo ka ŋɛ̨i tɔɔni nu kpulu hu ɓɛ, yɛ pələ ɓo nuą diɛ, ɛlɛɛ, di hvo hvaai bɔ hvo kɛ ku nwun nąnįnąą daa gɔlɔn diɛ Nwun mąąɓomun ni-o? 27Yaan, Nwun mąąɓomun a pa pai, nu ta hvo pai ɉəɠə taa kɔ́lɔn ɉii. Kɛlaa nui ŋɛ̨i nwɛi, daai ə həɠə ɉu ku nąą kɔ́lɔn.»
28Jesus kɛɛ nuą mąąkwɛlii Yálá hvɛli pɛlɛ mu, ə mo kpɔ a nwoo kɛnɛ̨ yɛ diɛ: «Ka gɔ́lɔ́n! Ɓɛi ŋį́ həɠə laa, ka nąą kɔ́lɔn a neelee. Və́ pa li gbɔ́wɔ́ ɓa. Nui ŋɛ̨i dɔ́ɔ́ gaa a tɛ̨ą. Kɛlaa, ka hvo gɔlɔn. 29Nwɛ́i ŋį́ gɔlɔn, mąąhɔlɔɓo, ŋą həɠə bɔɔli, ɛlɛɛ, ya ɓə dɔ́ɔ́.»
30Nuą di kɛ bɔ di ɉon, kɛlaa, nu tɔ̨nɔ̨ kpɛli hvo ɲee pələ mą, mąąhɔlɔɓo, ɉon ɲələ hvo nii kɛ ɉəli li. 31Nu kpului tii lɔwai, nu tamąą di laa Jesus la, diɛ kɛ diɛ: «Ɓɛlɔwai nwun mąąɓomun a pa pai, gaa mɔ̨ɔ̨ pai kpalo mɛ̨nį kɛi ə tɛɛ ɉulɔnui ɓa?»
Di holahiɠaa tɔɔ diɛ pa Jesus hon ɉii
32Nuą tii lɛɛ Jesus laa ɓoi a loo mɛ̨nį di kee lɔwai, Farisiɛ̨ɠaa di mɛ̨n. Haláá laa həli nuą kpɛa-kpɛa da Farisiɛ̨ɠaa di holahiɠaa tɔɔ, ɉon. 33Jesus yɛ diɛ: «Gu kaani wolo ɓo ɓɛ, gɛ́ kɛa pa lii nui dɔ́ɔ́ bɔ. 34Ka káá pai gwɛ́lii, kɛlaa, ka hvo pai gáái, mąąhɔlɔɓo, ɓɛi gáá pai kɛi laa ka hva pɛli pai laa.»
35Ə həɠə ɲələ ɓa, Ɉuifəɠaa di kɛi kɛ diɛ kɛ di kee ɓa: «Mįnɛ̨ ɓə gaa pai lííla yai ku hvo pai gaai? Akɛti, Ɉuifəɠaa ŋɛ̨i di taɠa-taɠa hį́i takpɛliɠaa lɔwai nąą pələ ɓə mɔ̨ɔ̨ gaa pai lííla, yɛ ɉį́i takpɛliɠaa tii kalan? 36Nwooɠaa ŋɛ̨i ə mo yɛ kɛ mą: Ka gaa gwɛ́lii ka hvə pai gáái da ɓɛi gáá la ka hva pɛli pai laa, yili mukulaa ɓaa lə?»
Ɉɛli hvóló kpəli
37Ɉɛli hvóló kpəli, ɓə kɛ a volói tii ɓə kɛ mąą mɛ̨nį nwąnąą; Jesus ə haŋą ə tɔɔ nu kpului tii kəlee ɲɛ̨i ɓa, yɛ diɛ: «Nui kpələ wɛli kaa mą, ə pa bɔ́ ə gbələ. 38Nui a laa ná yɛ bələi Yálá laawoo ə mo la a kɛ a yɛnɛ̨ɛ̨ hva kpɛɛ yalee nwun gulɔi.»
39Nuąi da laa Jesus la Yálá nwɔ Kilii da ɉɔlɔɓo, mąą mɛ̨nį ka tii ə kɛi ɉanwon ɉɔɔ diɛ. Gilii ti hvo nii kɛ pa li nąąlɔwai, mąąhɔlɔɓo, Jesus mąąɲįnɛ̨n hvo nii kɛ too li pono ŋą.
Nu kpulu ə mɛla ɓo Jesus mąą mɛ̨nį ɓa
40Nu kpului tii kɛi Jesus woo mɛ̨n, daɠaa di kɛi kɛ diɛ: «Nui ŋɛ̨i kaa kpɔ a Yálá kwəi mɛ̨nį hukulɔ mun neelee.»
41Daɠaa diɛ kɛ diɛ: «Nwun mąąɓomun Yálá ə naakwɛlan mo ya ɓaa a ɉulɔnui ŋɛ̨i.»
Kɛlaa, daɠaa di kɛi kɛ mą: «Nwun naaɓomun Yálá ə naakwɛlan mo, a pɛli kulɔi Galile lɔi hu? 42Yaan, Yálá laawoo hɛɓɛ́ ə mo, yɛ mą: Nwun mąąɓomun Yálá ə naakwɛlan mo, gaa pai kulɔi Davidə huwu hu, yɛ həɠə Bɛtleɛmə Davidə pɔ taai.»
43Bələ ɓə woo taɠa ə too la nuą lɔwai. 44Nu taɠaa di kɛ bɔ di ɉon, kɛlaa, nu ta hvo ɲee pɛlɛ mą.
Ɉuifə nwun nąnįnąą di wɔɔ kili walawala
45Ɉolahiɠaa di pənə di li, ɉaláá laa həli nuą da Farisiɛ̨ɠaa pɔ. Yiliɠaai diɛ diɛ: «Lə ɓə kɛ yai, ka hvo ɉon ni ka hvo paa la?»
46Ɉolahiɠaa diɛ diɛ: «Ku hvo ta nu ta kaa li yɛ hvaa yɛ ɉulɔnui tii.»
47Farisiɛ̨ɠaa diɛ gɔ́kulááɠaa diɛ: «Akɛti, kaa hvaa mąą ə ka ɓowo kaa kpɛli? 48Galanɉonŋąą a wala kɛ tii Farisiɛ̨ɠaa lɔwai, nu tɔ̨nɔ̨ kpɛli aa mɔ̨ɔ̨ laa na? 49A tɛ̨ą, nu kpului ŋɛ̨i nɛ̨ŋɛ̨n naai, di hvo dɔ́n ɉɛɓɛ́ kɔ́lɔn.»
50Nikodɛmə tii pa a yələ ta Jesus pɔ kpinįi, ə kɛ a Farisiɛ̨ ta, yɛ ɓɛlaa diɛ: 51«Gu wɔ tɔ́n a mɔ̨ɔ̨ pɛli nu ta kiti teei, yii di hvo nwoo mɛ̨n ni, di hvo ɉɔn gaa.»
52Mɛlaa diɛ mą: «Yɛ́ kpɛli, Galilemun mąą a yɛ́? Yɛ́ kpinįi ya kɛ Yálá laawoo hɛɓɛ́ ɓoi, ə́ gɔlɔn kpɔ yɛ́ diɛ, Yálá kwəi mɛ̨nį hukulɔ mun hva pɛli kulɔi Galile lɔi hu.»
53Yili pulu, di taɠa, nu kəlee yɛ li ɲei bɛlɛ́ laaləi.
Seçili Olanlar:
Ɉaan 7: BKPDCG
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
