Ɉaan 6
6
Jesus ə nu waa lɔɔli kɔ̨nɔ̨n gɛ
(Matie 14.13-21; Markə 6.30-44; Lukə 9.10-17)
1Mɛ̨nįɠaa tii kəlee tɛɛ pulu, Jesus ə li Galile gboloyá pulu pələ, yai da kɛ mą Tiberiadə. 2Nu kpulu kɛnɛ̨ hvilɛn ŋąąi kɛ bulu mąąhɔlɔɓo, ə kɛi kpalo mɛ̨nįɠaa kɛ yɛ ɲɔ̨n gɛ nuą ɓalo. 3Jesus ə tɛ yee kpukpu ta ɓa ə hee laa, da nwɔ kalan nɛai. 4Ɉuifəɠaa di wɔ hɛlii da kɛ mą pakə mąą kpua kɛa kɛ. 5Jesus ə nwun muhəɠə, ə nu kpulu kɛnɛ̨ kaa diɛ pa bɔ. Ə mo Filipə ɓa yɛ mą: «Mįnɛ̨ ɓə gwa pɛli nu kpulu kɛnɛ̨i ŋɛ̨i kɔ̨nɔ̨n ɉɔlɔɓoi laa?» 6Ə kɛi mo lɔ tii, ə gɛ, ə Filipə hukɔɔn. Kɛlaa, yii dɛ mąąnɛ̨ɛ̨ kɛ ə gɛ, yaa kpinįi ə kɛ gɔlɔn.
7Filipə ə Jesus woo pulu pənə, yɛ mą: «Ə mą kɛ gwaa waa nwun hveelɛ lɛɠɛ ya, gu ɉu tee a bɛlɛɛ-pɛlɛɛ, nuą ŋɛ̨i kəlee di hva kpɛli ɉɔlɔɓo.»
8Jesus nwɔ kalan non dɔ̨nɔ̨, Andre, yai kɛ a Simɔn Piɛrə nəɠə, ə mo Jesus ɓa, yɛ mą: 9«Lɛɠɛ kpinįn nɔɔli kaa ɓɛ hulɔnon da yəi, da hɔ̨nwɔ̨lee hveelɛ. Kɛlaa, yili a kɛ kpɔ a lə nu kpului ŋɛ̨i ɓa?»
10Jesus yɛ mą: «'Ka mo nuą kəlee di hee. Ɓɛi tii di kɛ laa, kala tiliin ə kɛ laa.»
Nu kəlee di hee. Da pɛli kɛ kɛi a hinąą waa lɔɔli.
11Jesus ə nɛɠɛɠaa tii həɠə, ə Yálá hɛɠɛɛɓo, ə ŋąąkwɛlɛ nu kəlee diɛ. Pələ lɔ ɓə ə gɛ la a ɉɔ̨nwɔ̨lee, ə ɲąąkwɛlɛ diɛ, nu kəlee di ɉɔlɔɓo yɛ pələi di kɛ la bɔ. 12Yii kɛa nu kəlee di pilɛ, Jesus ə mo nwɔ kalan nɛai diɛ, yɛ diɛ: «Ka nɛɠɛ kpuɔɠaa kəlee; yɛɠɛ; dɔ̨nɔ̨ kpɛli hvo lɛɛ tooni.»
13Di gbuɔ kəlee yɛɠɛ, ə kpɔlɔ pow kɔ́w hveelɛ laa hvɛɛ.
14Nuą tii di wɛi, mɛ̨nįi tii Jesus ə gɛ, nąą kaai di mo, di kɛi kɛ diɛ: Nui ŋɛ̨i kaa kpɔ a Yálá nwɔ kwəi mɛ̨nį hukulɔ mun gbɔ-kpɔɔ, yai pai yɛnɛ̨ɛ̨ nwun mąąɓoi.
15Kɛlaa, yii kɛa Jesus ə gbaɠala kaa yɛ, nuą diɛ di ɉee a tɔɔmun, ə kulɔ di lɔwai, ə li dɔ̨nɔ̨ kɛɛnąą yee tonna.
Jesus ə hiɛ ya ŋą
(Matie 14.22-33; Markə 6.45-52)
16Yələ wilii həliɛɛ, nwɔ kalan nɛai di yɛɛ gboloyá kwɛlɛ. 17Di tɛ kələn da hu, diɛ ɲá teen Kafarnaumə daai pələ. Kpini ə kɛi kɛa pɛlɛ, Jesus hvo ni kɛ həli li diɛ. 18Hvaŋą kɛnɛ̨ ə kɛi tɛɛ yɛ ɲa kɛ takpa-takpa. 19Galan nɛa mąą kwɛa kɛa kɛ gbukpu ɓa a kələn dɔ̨nɔ̨ ɲɔ̨nwɔ̨mą. Ɓɛlɔwai di Jesus kaa la yɛ hiɛ ɲa ŋą, yɛ lɛɠɛ diɛ, di ɲɔ̨w kpɔ kɛnɛ̨. 20Kɛlaa, Jesus yɛ diɛ: «'Ka hvo ɲɔw! Ɲą́ą́ li.»
21Di kɛ bɔ ə tɛ kɛ gələn ɉu, kɛlaa, ə kɛ kpɔlɔɔ tii, gələn aa gbɛa həli gbukpu ɓa ɓɛi di kɛ li laa.
Nu kpulu ə kɛi Jesus kwɛli
22Mąą yələ laa ɓoɔɔ, nu kpulu kɛnɛ̨i tii lɛɛ ɲa pulu ɓɛli pələ, di gɔlɔn diɛ kələn dɔ̨nɔ̨ lɔ ɓə lɛɛ laa; Jesus yaan da nwɔ kalan nɛai di hvo kɛ lɛɛ li di kee pɔ di hvo ɲá teen gələn yii tii hu. Galan nɛa diɛ tɔ̨nɔ̨ lɔ ɓə li. 23Yaan, kələn da kpɛliɠaa di həɠə Tiberiadə daai pələ, di pa, di həli ɓɛi Jesus ə Yálá hɛɠɛɛɓo laa kɔ̨nɔ̨n mąą nuą diɛ mįi. 24Ɓɛlɔwai nu kpului tii kəlee di gaa la diɛ, Jesus da nwɔ kalan nɛai di hvo laa di lɔwai, di kəlee di tɛ gələnŋąąi tii hu, diɛ li Kafarnaumə daai Jesus kwɛlii.
Jesus kaa a nu ɓalo kɔ̨nɔ̨n
25Yii kɛa di Jesus kaa ɲa pulu pələ, diɛ mą: «Mąąkwɛli kɛmun, mįnɛ̨ lɔwai ɓə ə́ paa la ɓɛ?»
26Jesus yɛ diɛ: «A tɛ̨ą kpɔ-kpɔ gáá moi kaa, gbalo mɛ̨nįɠaai ŋɛ̨i ŋį́ gɛ, ŋąą kaa mɛ̨nį hvəə ka káá gwɛ́li la. Kɛlaa, ka káá gwɛ́li, mąąhɔlɔɓo, kaa kɔ̨nɔ̨n mįi kaa pilɛ. 27Kɔ̨nɔ̨n ɲii a kalai, ka hvo kóló kɛ lɔ yili mąą mɛ̨nį ɓa, kɛlaa, kɔ̨nɔ̨n a yɛnɛ̨ɛ̨ hva kpɛɛ tɛɛ nu pɔ, ka yili mąą kóló ɓo. Nu Lon a pɛli ə yili tɛɛ ka pɔ. Mąąhɔlɔɓo, Ną́n Yálá aa mɛ̨nį kəlee nwɔ heeɓolaa tɛɛ bɔ.»
28Nuą tii di Jesus mąąnikɛ, diɛ mą: «Lə mɛ̨nį ɓə kwa pɛli ku gɛ, yii a Yálá lii hon?»
29Jesus ə di woo pulu pənə yɛ diɛ: «Yii Yálá ka gwɛli ka yei, ya ɓaa, nui ŋɛ̨i ə dɔɔ, ka laa na.»
30Diɛ nwɔ̨nɔ̨ mą, diɛ mą: «Kpalo mɛ̨nį lə kɛɛ ɓə ə́ kaa pai gɛi, ku laa ə́ la? Ə́ kɛ tíi ɓaa a lə? 31Ku kalapɔlɔni di mane mįi nɔi pun ɉu, yɛ bələi bɛ̨ɛ̨i la, ə kɔ̨nɔ̨n dɛɛ di pɔ di mįi yɛ həɠə pələ.»
32Jesus ə di woo pulu pənə, yɛ diɛ: «A tɛ̨ą kpɔ-kpɔ gáá moi kaa, Moisə hvo kɔ̨nɔ̨n dɛɛ ka pɔ yɛ həɠə yələi. Kɛlaa, Ną́n Yálá ɓə a dɛɛ ka pɔ. 33Mąąhɔlɔɓo, gɔ̨nɔ̨n Yálá a dɛɛ nu pɔ, ya ɓaa yii həɠə yələi ə pa yɛnɛ̨ɛ̨, əgɛ, ə yɛnɛ̨ɛ̨ hva kpɛɛ tɛɛ nuą pɔ.»
34Nąąlɔwai nuą tii diɛ mą: «Ku nąmu, kɛ lɔ gɔ̨nɔ̨n yili tɛɛi ku pɔ a yələ kəlee.»
35Jesus yɛ diɛ: «Ɲą́ą́ ɓə a yɛnɛ̨ɛ̨ hva kpɛɛ kɔ̨nɔ̨n, nui a mįi, pulu hva kɛa ɉon. Nui a laa na, kpələ wɛli hva nwɔ̨nɔ̨ ɉon. 36Kɛlaa, ŋą́ą́ mo kaa, kaa gáá, ə mą kɛ tii, ka hvo laai ná. 37Nuą lɔpee Ną́n a di tɛɛ bɔ́, di kaa pai pai bɔ́. Vá lənə dɔ̨nɔ̨ kpɛli ɓa. 38Mąąhɔlɔɓo, Və́ həɠə li yələi və́ pa nííɓa kɛ mɛ̨nį ɓa, kɛlaa nui dɔ́ɔ́ niiɓa kɛ mɛ̨nį ɓə. 39Yaan, nui dɔ́ɔ́ niiɓa ɓaa: nuą ə di tɛɛ bɔ́ dɔ̨nɔ̨ kpɛli nwun na hvo pili. Kɛlaa, Ŋą́ gəlee nwun a yɛnɛ̨ɛ̨ ɲąąkpɛɛ yələ. 40Ną́n dɔ́ɔ́ niiɓa ɓaa, nui lɔpee a ɲɛ̨i tɔɔ Non ma, ə laa na, mąą nu a yɛnɛ̨ɛ̨i kpɛɛ hvo mą ɉɔlɔɓo. Ɛlɛɛ, gáá pai nwun ɉii a yɛnɛ̨ɛ̨ ŋąąkpɛɛ yələ.»
41Ə həɠə ɲələ ɓa, Ɉuifəɠaa líí ə holi bɔ, mąąhɔlɔɓo, aa kɛ diɛ: «Ɲą́ą́ ɓə gáá a Yálá-taa kɔ̨nɔ̨n.»
42Yili pulu diɛ di kee ɓa: kɛlɛi Ɉosɛfə lon məi; gu nee kɔ́lɔn gu nąn gɔlɔn! A həɠə pələ kɛ ləi yɛ kɛ diɛ: «Ŋą́ həɠə Yálá-taa?»
43Jesus ə mo diɛ yɛ diɛ: «Ka kpəla mą́ą́hɛatoɔ ɓa ka kee lɔwai. 44Nui lɔpee ta hva pɛli pai bɔ́ akɛ Ną́n dɔ́ɔ́ hvo nii muhəɠə li. Ɛlɛɛ, ɲą́ą́n gáá pai nwun ɉi a yɛnɛ̨ɛ̨ ŋąąkpɛɛ yələ. 45Yálá kwəi mɛ̨nį hukulɔ nuą di bɛ̨ɛ̨ diɛ mą: ‹Yálá ɓə pai di kilaa pono.› Nui pai ną́n nwoo mąn ɉi, ə ɲąą kaa, ə ɲee hee mu, a pa bɔ́. 46Nu ta hvo ta ną́n kaa li, hvo kəli lɔ nui həɠə Yálá-taa, ya ɓə gaa. 47A tɛ̨ą kpɔ-kpɔ gáá moi kaa, nui a laa ná, a yɛnɛ̨ɛ̨ yii hva kpɛɛ ɉɔlɔɓo. 48Ɲą́ą́ ɓə gáá a yɛnɛ̨ɛ̨ hva kpɛɛ kɔ̨nɔ̨n. 49Ka kalapɔlɔni di manə mįi nɔi pun ɉu, di haa. 50Kɛlaa, gɔ̨nɔ̨n həɠə yələi, nui a mįi, hva haa. 51Ɲą́ą́ ɓə gáá a kɔ̨nɔ̨n vúlu mąą, yai həɠə yələi. Nui a da mįi, a yɛnɛ̨ɛ̨ hva kpɛɛ hɔlɔɓo. Yaan, gɔ̨nɔ̨n ŋį́ dɛɛ nuą pɔ ya ɓaa a gbį́nį́, yai ŋį́ gwɛlɛ yɛnɛ̨ɛ̨ nuą ɓola mɛ̨nį ɓa.»
52Nwoo tii ɓoɔ pulu, Ɉuifəɠaa kəlee lii ə kələn di kwəi, diɛ kɛ mą: «Nui ŋɛ̨i a pɛli ɉuwɔ tɛɛ pələ kɛi ləi ku pɔ kuɔ mįi?»
53Jesus ə mo diɛ yɛ diɛ: «A tɛ̨ą kpɔ-kpɔ gáá moi kaa, akɛ ka wala Nu Lon ɉuwɔ mįi, ɛlɛɛ, ka hvo ɲąmą kpələ, ka hva pɛli ɓaloi. 54Nui a ɉúwɔ mįi ə ŋą́mą kpələ, a yɛnɛ̨ɛ̨ hva kpɛɛ hɔlɔɓo. Ɛlɛɛ, ŋį́ nwun a yɛnɛ̨ɛ̨ ɲąąkpɛɛ yələ. 55Mąąhɔlɔɓo, ɉúwɔ kaa a kɔ̨nɔ̨n gbɔ-kpɔ, ɛlɛɛ, ŋą́mą ə ɓo a hɛn da kpələ. 56Nui a ɉúwɔ mįi, ə gbələ a ŋą́mą, ŋą kɛ mąą nu hu, ɛlɛɛ, yaan yɛ ɓo ɉú. 57Ną́n Yálá ŋɛ̨i dɔ́ɔ́ gaa a vulú, gáá yɛnɛ̨ɛ̨ kɛi ɉaalai. Yili ɓə gaa mą, nui a ɉúwɔ mįi, a kɛ a vulú ɲą́ą́ ɉaalai. 58Gɔ̨nɔ̨n ka kalapɔlɔni di mįi nɔi pun ɉu, di haa; kɛlaa, gɔ̨nɔ̨n ŋɛ̨i həɠə yələi nwɛi, nu a da mįi a yɛnɛ̨ɛ̨i kpɛɛ hvo mą hɔlɔɓo.» 59Bələ ɓə Jesus ə nuą mąąkwɛli la Yálá hvɛli pɛlɛ́ mu Kafarnaumə.
Yɛnɛ̨ɛ̨i kpɛɛ hvo mą
60Nwooɠaai tii mɛ̨n ŋąą pulu, Jesus nwɔ kalan nɛai damąą di mo di kee lɔwai diɛ: «Nwoo ŋɛ̨i walawalai, gbɛɛ ɓə a pɛli mą ɉon ɉii?»
61Kɛlaa, Jesus ə nwɔ kalan nɛai kiliŋąhiɛ pələ kaa yɛ diɛ «Akɛti, kaa kpɛli yili aa ka kwəi pili kaa? 62Akɛti, yələi ka Nu Lon kaa la, yɛ tɛ yələi ɓɛi ə həɠə laa, kaa gɛ ləi? 63Kili a nu kɛ a vulú, kɛlaa, nu hvo ɓaa hɛn da. Nwooɠaai ŋɛ̨i ŋį́ mo kaa ya ɓə gaa a Kili da yɛnɛ̨ɛ̨. 64Kɛlaa, nu taɠaa kaa ka lɔwai yiiɠaai di hvo laa li na. Mąąhɔlɔɓo, ə həɠə kpɔ gɔwɔ tɔɔi yələ ɓa, nuąi di hvo kɛi laa na, ɛlɛɛ, da nui kɛi pa nɔwɔtɔɔi, Jesus ə di kɔ́lɔn gɛ.»
65Jesus yɛ nwɔ̨nɔ̨ yɛ diɛ: «Yili ɓə gɛ, ŋį́ kɛ kaa: nu ta hva pɛli pai bɔ́ akɛ Ną́n hvə dəli li.»
66Ə həɠə ɲələ ɓa, Jesus nwɔ kalan nɛai damąą di lənə mą di həɠə bulu. 67Nąąlɔwai Jesus ə mo nu pow kɔ́w hveelɛ tii diɛ: «Kaa kpɛli ka káá bɔ ka ka pulu pənə?»
68Simɔn Piɛrə ə nwoo pulu pənə yɛ mą: «Ną́mu, gbɛɛ takpɛli ɓə kwa pɛli lii bɔ? Mąąhɔlɔɓo, nwooɠaai gaa ə́ la, da yɛnɛ̨ɛ̨ kpɛɛ hvo mą tɛɛ nu pɔ. 69Ku wɛi, kwaa laa na, kwaa gɔlɔn kuɔ ə́ kaa a Yálá nwɔ mąąhəɠɛɛ.»
70Jesus ə di woo pulu pənə yɛ diɛ: «Ka nu pow kɔ́w hveelɛ ŋɛ̨i, kɛlɛi ɲą́ą́ ɓə ka həɠə ɉu? Kɛlaa yaamun, nu tɔ̨nɔ̨ kaa ka lɔwai a nąnį.»
71Ɉudasə ŋɛ̨i kɛ a Simɔn Iskariɔtə mun lon, ya ka tii Jesus ə kɛi mąą mɛ̨nį ɓo. Mąąhɔlɔɓo, ya ɓə kɛ a nu pow kɔ́w hveelɛ tii dɔ̨nɔ̨, yii kɛi pa Jesus lɔwɔtɔɔi.
Seçili Olanlar:
Ɉaan 6: BKPDCG
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
