LUKA 24
24
Ringchukadaibe
(Mat 28.1-10; Mrk 16.1-8; Jhn 20.1-10)
1Kane ’ntakkak gu tingnaimikpui raîlangbe mai hechuasûn dege mâ-perîmyibe penui kedâgailube ze tei lu heraw ’mbe tat ti de lei. 2Zai tingchukâng ze heraw gene kelatpat’ndibe penui ngau lei, 3kane heraw lungge penui gut dege, kechaipum ze penui ngau mak lei. 4Zai aipau hangge penui duângga lage, pie le lau, mige hangna paî hâ-pelingbe bâ lu, penui taige sap bam lei; 5dadege penui hing di ze, penui ju kedei ’mbe ’ngkumkeu gai dege penai ne penui je, “’Ndaitew ze keringpeu je kechaime ruage ningnui peu lau? 6Galili ge pa bambe ting ge ningnui dage pa saliabe tak chî le lau, 7chi ziemmena Na je hemuime ba ge pei gai himchang gu, zai heling ge gia gai gu, zai pakechumbe mai ge chu gu lei, kacheube zeu,” ze kacheu de lei. 8Dadege pe sam ramme penui ’nningdau di de lei, 9zai heraw gene wang dai lu ze penui hangkereu-ze-katme benai miramme ’nteumena dage aipau sam leine ranglia bei de lei. 10Chunage chi ’mpuimi ramme, apostolme bau dage aize peigaime bau ze Mari-Magdalinle zai Joannale, zai Jakobbe pui Marile zai chi ’mpuimi kêdame bau penui dage bamme bam de lei; 11kane aipau sam ramme ze penui â mêruang sam gumbe hang ’nning gai lu ze, ’mpuimi ramme je penui ’nnum’mmi mak tai lei. 12Kane Peterbe â zuachu lu, heraw ’mbe paktat ti de lei; zai keikeu ze pa pie gai dege, linenpaî ramme runne bambe pa ngau lei; dadege mâ-mâ wangchangbe ramme ge pa ’nningdaulak ze pe ki lam’mbe wang di de lei.
Emmaus Keloa ’mbe tatbe
(Mrk 16.12,13)
13Chipau mai gîm ge penui ruage hangna Jerusalem gene mail sena riâ gumbe ge bambe Emmaus kacheube keloa ’mbe tatbe ge, 14ai mâ-mâ wangchangbe rasam ramme kat-kat dage penai dam bam de lei. 15Penai hedeu dam ze samhekî lage, Isua sing ne penai tailam wang’nna lu, penai je nguakangkattew-tat ti de lei. 16Kane pechu peize chî mak ra hang penai mik tewkeli ’ndi lei. 17Zai pa ne penai je, “Ningnai tatbe luage, ’ndaikau-kau dam ze kahekî lau?” ze kacheu de lei. Dadege penai ma hâmrei gai di ze sapmang gai di de lei. 18Penai ruage hangkat Kleopasbe kacheupeu ne pechu kak ze, “Henaiting ge Jerusalem ge mâ-mâ wangchangbe rasam ramme chî mak ze chige ’ngkiâmiebe kau ning runne mei se lau?” kacheu de lei. 19Dadege pa ne penai je, “’Ndaikau ramme lau?” kacheu de lei. Dadege penai ne pechu, “Ziemmename ’nteumena masuage benai Hera masuage pe tatew benai pe sam ge reziechi ze bambepeu, Nazareth’mpeu Isua kemeu’mpeu rasam, 20zai anui gu tingkugechîngme benai samramme ne pechu chai ra hang chau’ngkui gai ra, zai pechu giachat kai ra peipatkaibeibe rasam zeu. 21Kane anui â pa ze Israel je ripatrapeu hangge kaheguî de lei. Eu lei, zai aigene bepeirei kêdabe ze â, nemai geze pakechumbe mai chang gu de lei, mâ-wangchangbe zeu. 22Zai chi runne mak ze anui ruage ’mpuimi ramme hanggesame ne anui je tewmang gai bei de lei. Hechuasûn gene penui heraw ge bamkuâ lu ze 23penui â pe pum ngau mak tai lei; dadege angelme, pa â ring la lei ze kacheume bau luî liabe ’nsangdu penui â ngau lu de lei ze penui wang kadai de lei. 24Anui ruage bamme hanggesame â heraw ’mbe tat ti de lei, zai ’mpuimi ramme ne rangbe luî ze ngaudau de lei; kane pechu â penui ngau mak lei, kacheube rasam ramme ze de lei,” ze acheu bei de lei.
25Dadege pa ne penai je, “Hei kemieme, zai kemeume ne sam rangliabe leine ze ’nnum’mmi keluamakme! 26Airamme Krista ne hereulie ze pe gu pengêudibe ge zuagutrabe ze ’nnangsingdibe kau mak mei?” ze kacheu de lei. 27Zai Mosabe gu leisi gene chu ze kemeume gu leisi leine ge pa singbe deu ge rawgaibe sam ramme pa ne penai je sakeli gai bei de lei.
28Chidadege â penai tatrabe keloa ze penai tat’nnawang di de lei. Pa â tat’ndeurabe luigum bam lei, 29kane penai ne pechu gang ze “Anai dage bam le lau, chuna â hegî de da, zai tingnaimik du kêu de daseu,” acheu bei de lei. Dadege penai dage pa rêu ra gut ti de lei. 30Penai dage pa mâ-teu ra ’ntaukeu gai dege tingku ze pa ne tei lu ’nnam gai lu, zai tiapâng lu penai je pei bei de lei. 31Dadege penai mik latpat kai bei ze penai pechu chî di de lei; dadege penai kengaube gene pa â ga gai di de lei. 32Penai kat-kat je, “’Mpuiki ge anai je pa ka’mpaube luage rawgaibe sam ramme pa ne anai je teiliabe luage anai lung tewtâu-desang bam de mak ti lau?” ze kacheu de lei. 33Zai chipau luage penai zuachu lu, Jerusalem ’mbe helatwang dai di de lei; zai hangkereu-ze-katme benai penui dage bamme wang’ndui ze laleube penai ngau de lei, 34“Heguang â chu dai di sing de lei, zai pa ne Simonbe je lia de lei,” ze kacheume bau zeu. 35Dadege penai ne ’mpuîki ge tâwangchangbe benai tingku tiapângbe gene pechu penai chîlube rasam salia de lei.
Pe gu kenieme je Isua Pechu Liâbe
(Mat 28.16-20; Mrk 16.14-18; Jhn 20.19-23; Tât 1.6-8)
36Zai penui acheu sa lage, penui ruage Isua sing ne sapkailia de lei.
37Kane penui lung-rîn di ze penui hing di de lei, penui â herui je ngau de lei ze ’nning gai lei. 38Dadege pa ne penui je, “’Ndaitew ze ningnui lung kahereu lau, zai ’ndaitew ze ningnui lung ge ’nningkategeibe ramme pat lau? 39Ni, a ba kena benai a pî kena pie le lau, chize I singbe de lei; achu deîtau ze pie le lau; ningnui ne achu bechie benai pera bambe hang ngaugaibe gum ze â herui â bechie benai pera bam sua me lei,” ze acheu bei de lei. 40(Zai aize pa ne sa gai lu dege, pe ba kena zai pe pî kena ze penui je teilia bei de lei.) 41Zai penui suiyi’nteu nan ze penui ’nnum’mmi mak ze ’nningdaulak ze bambe kakge, pa ne penui je, “Aige mâ-teurabe zat ningnui dage la mei?” acheu bei de lei. 42Penui ne hekâdum dâng kat rûlube pechu pei bei de lei, 43zai chize pa ne tei lu penui suagene teu ’ndi lei.
44Dadege pa ne penui je, “Mosabe gu hingde ge zai kemeume gu leisikuak ge zai getoabe leisikuak ge a rasam rawgai’ndibe leine tewpui sing gai gu lei,” kacheube ze I ningnui dage bambe ting ge ningnui dage I ne sagai’ndibe sam ramme de lei. 45Chidadege rawgai’ndibe sam ramme chî ra pa ne penui lung lat kai lu ze, 46penui je, “Krista ne hereulie gu zai pakechumbe mai ge kechaibe gene chu gu lei, 47zai Jerusalem gene putchu ze, heramzatme leine dage helungkahelibe benai hemui kelunbe rasam ze pe ji gene pau gai kam gu lei. 48Ningnui ne airamme gu sakki de lei. 49Zai pie le lau, a peu gu samhatkaibe ze I ne ningnui dage lang gai lei; kane kehu ’mbene ningnui je tâtewchibe ze paî gum bâ gai mak tâne namdi ge ningnui kuâ bam lau,” ze kacheu de lei.
Isua je Tinggîm ’mbe Teichudibe
(Mrk 16.19,20; Tât 1.9-11)
50Chidadege â Bethani keloa riâ pa ne penui je nguapatchang gai lu ze pe ba kena huachu lu pa ne penui je ’nnam gai de lei. 51Pa ne penui je ’nnamgaibe luage penui dagene pa rimnatat ti de lei. 52Dadege penui suiyi-desang ze Jerusalem ’mbe helatwang dai di de lei, 53zai kellumki ge Hera je toa ze bam bam de lei.
Seçili Olanlar:
LUKA 24: ZEMEBSI
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
