LUKA 23
23
Isua je Pilatbe suage teiwangbe
(Mat 27.1,2,11-14; Mrk 15.1-5; Jhn 18.28-38)
1Dadege â baudime ’nteumena chu lu ze, Pilatbe tailam pechu nguawang de lei. 2Zai Isua peireige penui ne kesia’ndam gai ze, penui ne, “Aipaupeu ne anui ram ze tewkeleu, zai Kaisarbe dage ’mpuâ pei ra nam lei, pa ze Krista Heguang de lei ze pa ne acheu zeu,” ze acheu bei de lei. 3Dadege Pilatbe ne pechu ’nneu ze, “Nang Judame Wangpeu de mei?” ze kacheu lei. Dadege pa ne kak ze, “Nang ne aigum ze sa gai ’nde lei,” ze kacheu de lei.
4Dadege Pilatbe ne tingkugechîngme benai baudime je, “Aipaupeu peireige ka’ngkuibe mâ de I ngaupat me lei,” acheu bei de lei. 5Kane penui ne gechugetie ze, “Judiaram bak leine ge pa ziemmena ramme leine je pa ne tewkeleu’nrui ze mâ-geteilia ze Galili gene aipau bâm riâ chang de lei,” ze penui laîkai ze sa de lei.
Isua je Herodbe dage Langgaibe
6Zai Pilatbe aize seu lu dege, aipaupeu ze Galili’mpeu mei be ze pa ka’nneu de lei. 7Dadege pa ze Herodbe samrambe kangge bambe kau lei be pa chî lu dege, Herodbe dage pechu lang gai bei de lei, chi chipau ting ge Jerusalem ge bampeu zeu. 8Herodbe Isua je ngau lu dege, pe suiyi-desang di de lei; pa ne pe rasam seulube ziegene pechu pa ngau gai nei ze acheutie bam dadegeu, zai pa ne mâge â ka’nchetbe tewgaibe ngau gai ra pa kaheguî lei. 9Dadege pa ne sam misongga pechu ka’nneu de lei; kane pa ne pechu mâ de kak mak tai lei. 10Zai tingkugechîngme benai leisirawme chige sap lu ze ’nchi-chine pe peireige kesia’ndam gai de lei. 11Zai Herodbe benai pe gu sipaime ne Isua je ngau’nna ze teihenuitew de lei; zai pechu paî pengêudibe bâ gai lu, Pilatbe dage lang gai dai bei de lei. 12Zai chipau mai sing gene Pilatbe benai Herodbe kat-kat je penai kang chang di de lei. Chipau suage â penai kakge desiesia ze bam lei.
Isua je Tewchat ra Samramgaibe
(Mat 27.15-26; Mrk 15.6-15; Jhn 18.39—19.16)
13Dadege Pilatbe ne tingkugechîngme, besuitewme zai baudime ze kûwang’ndui lu, 14penui je, “Miramme je tewkeleu ka’nsuipeu je gum ze ningnui ne aipaupeu je a dage nguawang gai de lei; zai ningnui sua sing gene I pechu mâ-mâ kedî gai dege, pie le lau, ningnui ne pe peireige kesiachaugaibe ze pa ne kemaube hang I mâ de ngaupat me lei; 15Herodbe ne du chigum ze mâ de ngaupat mak ze, pa ne pechu anui dage lang gai kadai de lei. Pie le lau, pa tâtewgai’ndibe gene chaikezeirabe hang mâ de ga lei; 16chidaze pechu I ne lak kai lu, ’mpat kai gu lei,” ze kacheu de lei. 17Chunage hengî mai ge hangkat je pa ne penui dage lang gai mak kuaklakbe bam lei
18Zai penui ’nteumena muikattew ze ’nrung ze, “Aipaupeu je tew’ngga nan ze anui hangge Barabbabe je ’mpat kai be lau,” kacheu de lei— 19(Barabbabe je â namdi ge mâge â tewkeleubeibe benai kegîbe tâ tewbeibe ziegene kebangki ge kai lei.) 20Pilatbe ne Isua je ’mpat kai nei ze penui dage luakat salia gai kadai lei; 21kane penui ne ’nrung ze, “Pechu gia gai zu lau, gia gai zu lau!” kacheu de lei. 22Zai pakechumbe luage â, pa ne penui je, “’Ndaitew ze lau, kesiabe ’ndaikau pa tew gai lau? Pa chaikezei ra hangge pe peireige mâ de ka’ngkuibe I ngau me lei; chidaze pechu I lak kai lu ze ’mpat kai gu lei,” kacheu de lei. 23Kane penui ne gechugetie ze pechu heling ge gia gai ra hang penui ’nrung ze kie de lei. Zai penui kuâ ne puiting di de lei. 24Dadege â Pilatbe ne penui gekiebe luigum ze samram gai bei de lei. 25Tewkakeleube benai kegîbe ziegene kebangki ge kaibeipeu, penui luneipeu je â pa ne penui dage ’mpat kai bei de lei; kane Isua je â penui ne nei-neibe tew ra hang pei gai bei de lei.
Isua je Heling ge Giagaibe
(Mat 27.32-44; Mrk 15.21-32; Jhn 19.17-27)
26Zai penui pechu nguatatbe luage, Simonbe Kurini’mpeu heram gene wang ze, namdi ge gutbeipeu je nîm lu Isua chaige heling pua gai ra chize pechu tuâ gai bei de lei. 27Zai baudime benai ’mpuimi ramme pechu puîhapme pe chai suitat ti de lei. 28Kane Isua ne penui lam ’nreiwang lu penui je, “Jerusalem na ’mpuimi ramme gau, a hangge â hap bam se lau, kane ningnui name benai ningnui runne hang hap ze bam lau. 29Pie le lau, ‘Henagame, zai mâdau de ’mpungmakme zai mâdau de hena puatungmakme paurega gu lei,’ ze penui ne acheurabe ting wangzi gu de lei. 30Chidezai penui ne kedeiloa kehube ramme je, ‘Anui peireige dapchim gai lau,’ ze acheuchu gu de lei; zai peloa ramme je, ‘Anui je sungnam gai lau,’ acheu gu de lei. 31Hingbang ring ze bambe ting ge penui aigum dizaine, chi hingbang chaidibe ting dezai penui ’ndaigum bam ra lau?” ze kacheu de lei.
32Zai tâ-kesiabe kedibe tewme hangna je du pechu tewchat’mpam gai ra hang nguatat ti de lei. 33Zai timpeîkuak kacheube bâm ge penui chang dege, pechu penui ne gia gai bei de lei, zai tâ-kesiabe kedibe tewme hangna, pa hezat’mbia hangkat, zai heku’mbia hangkat zeu. 34Dadege Isua ne, “A peu gau, penui je lun gai be lau; penui ’ndaikau tew mei be penui chî mak daseu,” ze kacheu de lei. Zai penui pe paî ramme ’nzi ra hedachak te lei. 35Zai baudime chige sappierim bam lei; kane kanguame besuitewme ne pechu ’nrû ze, “Miramme je â pa ne tew’nring lu lei; pa Hera gu Krista, pa ne Kelânglupeu lei dizai â peize pe runne pechu tew’nring le lau!” kacheu de lei. 36Zai sipaime ne du pechu teihenuitew ze, hang lu, wain kehiabe pechu pei gai lu, 37acheu sa ze, “Nang Judame Wangpeu lei dizai â, ning runne ningchu tew’nringpat le lau!” kacheu de lei. 38Zai pe peireige, “Aipaupeu ze Judame Wangpeu lei,” kacheube gu samrit bam lei.
39Tâ-kesiatewme, keî’nchiegaibeime hangna ruage hangkat ne pechu sa’nsia ze, “Nang ze Krista mak ti lau? Ning runne ningchu du tew’nring lo zai anai je du tew’nring gai be lau!” ze kacheu de lei.
40Kane kêdapeu ne pechu acheu ’ngngiam ze, “Hera je nang hing mak mei, chau’ngkuigaibe gu hingde ’nzuâkambe ge nang bam lu zeu, 41anai je â sâ kezei lei, anai tâtewbe mî anai â ngau lei; kane aipaupeu â kemaube mâ de ngau me lei,” acheu bei de lei. 42Zai pa ne “Isua gau, nang ning gu heguangram ge gut dezai achu chî bam lau,” kacheu de lei. 43Dadege pa ne pechu, “Pelingsing ze ningchu I rang lei, nemai ge Paradais ge nang a dage bam gu lei,” kacheu de lei.
Isua Chaibe
(Mat 27.45-56; Mrk 15.33-41; Jhn 19.28-30)
44Zai tîngna ’nchetkak kereu ze kena gum dege, kedeirei pelane muîdibe ze ’nchetkak kechum riâ muîchang lei, 45tingnaimik muîgaidibe luage zeu; dadege kellumki gu lîmsungbe-paî ze tau na ripedaktat ti de lei. 46Dadege Isua pe rankai ’nrung ze, “A peu gau, ning ba ge a herui peipat kai lei!” ze kacheu de lei. Zai acheu sa gai lu pa pe chui lutud kai di de lei. 47Chunage chipau tâwangchangbe sipai haîmuiteipeu ne ngau lu dege, Hera je toa ze, “Aipaupeu â ka’nzeibe kau run lei!” ze kacheu de lei. 48Zai ’nteumena chize pie ra hang wangka’nduime leine ne chipau tâ wangchangbe ngau lu dege penui ga zûm ze helatwang dai di de lei. 49Zai peluî chime leine benai ’mpuimi ramme Galili gene pe chai ngua-suihangme du kedeu ’mbene sap lu ze chiramme ngau de lei.
Isua Pum Heraw ge Baigaibe
(Mat 27.57-61; Mrk 15.42-47; Jhn 19.38-42)
50Chunage Arimatheabe Judame gu namdi ge bampeu, pe ji Josepbe bam lei. Pa â samrambeki gu ziemmena keyipeu zai mâ-pelingtewpeu, 51penui ka’nningbe ge benai penui tâtewbe ge pe suîhezuâgaimakpeu de lei, zai pa â Hera gu heguangram hangge piekua bam lei. 52Zai aipaupeu ne Pilatbe dage tat ze Isua pum kie lu de lei. 53Dadege pa ne lukeu lu, linenpaî ne tapnam lu, tingchu tebunggailube heraw ziemmena mî ne de, zai mi je de baigaimakbe ge bai gai lei. 54Chipau mai ze Tâtewkakedâbe mai lei, zai ’ntakbambe mai chang ra na di de lei. 55Zai ’mpuimi ramme Galili ’mbene Isua je ngua-suiwangme Josepbe dage nguatat ti ze heraw ngau de lei, zai Isua pum ’njeigaibe tak ze penui ngau de lei; 56chidadege â penui wang dai lu, mâ-perîmyibe benai taudui ramme kedâ gai de lei. Besie luigum ze ’ntakbambe mai â penui reibam kam di de lei.
Seçili Olanlar:
LUKA 23: ZEMEBSI
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
