JOHAN 3
3
Isua benai Nikodemasbe
1Chunage Pharisai’mpeu hangkat pe ji Nikodemasbe, Judame gu pemuitewpeu bam lei. 2Aipaupeu ze tingmuî ne Isua dage wang lu ze, pechu, “Rabbi, nang â Hera dagene wangbe Geteiliapeu lei be anui chî lei; nang mâ-ningdaulakbe tâ ramme tewbe ze mî de tewchi lak lei, pe dage Hera bam makchai aî,” kacheu de lei. 3Zai Isua ne pechu kak ze, “Pelingsing, pelingsing ze ningchu I rang lei, mige de lungkeurechi dai makchai â, Hera gu heguangram pa ngaulak lei,” acheu bei de lei. 4Dadege Nikodemasbe ne pechu, “Ziemmena gechîng chaine ’ndaigum ze pechu lungkeu dai ra lau? Pe pui gu henarak ge lua pakenabe gut lu ze lungkeuchi duî mei?” kacheu de lei. 5Isua ne kak ze, “Pelingsing, pelingsing ze ningchu I rang lei, mi-mige de hemi benai Herui gene lungkeu dai makchai â, Hera gu heguangram pa gut lak lei. 6Chi hemeipum gene lungkeube â hemei lei, zai Herui gene lungkeube ze â herui lei. 7‘Ningnui (kehu ’mbene) lungkeurechi dai himchang ra lei,’ ze ningchu I kacheube ze ’nningdaulak se lau. 8Tingkai â pa ne guinei-neibe ge gui lei, zai chipau kuâ nang ne seu lei, kane chize ’ndai’nggene wang mei zai ’ndai’ngge tat mei be nang chî mak lei; chigum ze mi-mige Herui gene lungkeume leine dage du chigum bam de lei,” ze kacheu de lei. 9Nikodemasbe ne pechu, “’Ndaigum ze aize changchi ra lau,” ze kacheu de lei. 10Isua ne pechu kak ze, “Nang Israelme gu geteiliapeu chang lu aize nang chî mak kerei mei? 11Pelingsing pelingsing ne ningchu I rang lei, anui gechîbe ze anui â sa lei. Zai anui ngaulube ze sakkitew lei; kane anui sakkitewgaibe ze ningnui ne ’nchâ mak lei. 12I ne kedeirei gu mâ-mâ ramme ranglia bei ze ningnui ne ’nnum’mmi mak tizai â I ne tinggîm gu mâ-mâ ramme ranglia bei sedu ’ndaigum ningnui ’nnumtew ra lau? 13Ziemmena tinggîm gene wangkeupeu runne zangno, mî de tinggîm ge chube kau ga lei. 14Zai hênamkang ge Mosabe ne henêu teigetuachu ze da gai gum ze, ziemmena Na je du teichu ze da gai himchang gu lei, 15chidezai mi-mige pa ge ’nnumka’mmime leine ring le ra hangge zeu,” ze acheu bei de lei. 16Hera ne kedeirei je hung-desangdibe ziegene pe Na-nekune hangkatgapbampeu pa ne pei gai lei, mi-mige de pechu ’nnumka’mmibe kau â ga ra mak lei, kane ringbetunmakbe ngau gu lei. 17Kedeirei je tew’ngkui ra hang Hera ne pe Na je kedeirei ge lang gai mak lei, kane pa gezene kedeirei je tew’nring gai ra lang gai lei. 18Pa ge ’nnumka’mmibe kau je â tew’ngkui gai me lei; mige ’nnum’mmimakbe kau je â kenû ge tew’ngkui gai ’nde lei, Hera Na hangkatgap bambepeu ji ge pa ’nnum’mmimaktaibe ziegeneu. 19Zai tew’ngkuigairabe ze â aize de lei, kedeirei ge kebabe wangkeu bei ze, ziemmename ne kebabe je sua kemuîbe je hungdibe zeu, penui tatew ramme siabe ziegeneu. 20Mi-mige de kesiabe tâ tewbe kau â kebabe je ngaugailak lei, zai kebabe ge wang mak lei, makchai â, pe tâ ramme ralia gai bu daseu. 21Kane pelingtewbe kau â kebabe ge wang lei, chidezai pe tatew leine ze Hera ge pa tew lei be ngau’nchichiak le ra hangge zeu.
Isua benai Johanbe
22Aipau chângge â Isua benai pe gu kenieme ze Judiaram ’mbe tat ti de lei; chige penui dage pa ’nnai ze baptistew ze bam lei. 23Zai Johanbe du Salim taihia, Aenon ge baptistew bam lei, chige hedui kie dadegeu; zai ziemmename wang ze penui je baptistew gai bei de lei. 24Johanbe je kebangki ge kai mak kerei dadegeu.
25Zai Johanbe gu kenieme benai Juda’mpeu hangkat kakge huika’nchibe sie tedeu ge samtube bam de lei. 26Dadege penui Johanbe dage wang lu pechu, “Rabbi, Jordan giam ge ning dage bambepeu, pechu nang ne sakkitewgaipeu ze aige baptistew ze lamui lei, zai ziemmename leine pe dage zuamie ze la lei,” ze kacheu de lei. 27Johanbe ne kak ze, “Mî de mâ de ngaulak lei, tinggîm ’mbene pechu peigai’ndibe runne zangnêu. 28I â Krista mak lei, kane pe suage achu â lang’ntua gai lei, zai I sabe ze ningnui zene sakki kam de lei. 29Meibepui je lubepeu ze â henâukupeu ze de lei; Henâukupeu-meripeu, chi sap lu ze pe kuâ seubampeu ze henâukupeu kuâ ge pe suiyi-desang ze bam de lei; chipauziegene ai a suiyibe ze chuna â ’nsang de lei, ze kacheu de lei. 30Pa â pungbi-bi himchang gu lei, kane I â ’nsînbi-bi himchang gu lei,” ze kacheu de lei.
Tinggîm gene Wangkeupeu
31Kehu ’mbene wangkeupeu â ’nteumena peireige bam lei; kedeirei gene patpeu â kedeirei gu chang lei, zai kedeirei gu ze pa sa lei; kehu ’mbene wangkeupeu â ’nteumena peireige bam lei. 32Pa ne ngaulube benai seulube ze pa sakkitew lei. Leusede pa sakkitewgaibe ze mî de ’nchâ mak lei; 33pa sakkitewgaibe ze ka’nchâbe kau â, Hera â gesang lei be chigaihâ lei. 34Hera ne langgaibeipeu â Hera gu sam ramme sa lei, pa ne periâ ’ndeutit lu ze Herui pei mak daseu; 35chi Bepeu ne pe Na je hung lei, zai mâgetaleine pe ba ge pei kam gai ’nde lei. 36Pe Na ge ’nnumka’mmibe kau â, keringbe betunmakbe pe dage bam lei; chi pe Na kuâpheumakbe kau â, keringbe ngau ra mak lei, kane Hera lumpum pe peireige bam bam lei.
Seçili Olanlar:
JOHAN 3: ZEMEBSI
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
