JOHAN 2
2
Kana ge Kahegiabe
1Zai pakechumbe mai ge Galiliram, Kana ge kahegiabe bam lei, zai Isua pui du chige bam lei; 2Isua benai pe gu kenieme je kahegiabe ge wang ra kû gai bei de lei. 3Wain ’ngga di dege Isua pui ne pechu, “Penui dage wain ga de lei,” acheu bei de lei. 4Dadege Isua ne pechu, “A pui gau, nang a hangge châu ze lau? A ting wangchang merei lei,” kacheu de lei. 5Pe pui ne tâka’ngguame je, “Ningnui je pa ne kerang-rangbe tew zu lau,” acheu bei de lei. 6Chunage chige Judame gu huika’nchibe-râtewbe hanggene tingchubung seruk ze dung bam lei, chi bung kat ge hedui hit haî kat riâ gut lu lei. 7Isua ne penui je, “Mâ-bung ramme ge heduiruîpui gai lau,” acheu bei de lei. Dadege chiramme ge penui ne ruîpui’nsamrap kai bei de lei. 8Pa ne penui je, “Chuna â gêsa tuakpat lu, luube-bâm ge besuitewpeu dage teimie be lau,” acheu bei de lei. Dadege penui ne chiramme tei lu de lei. 9Chuna â hedui ze wain midibe luube-bâm ge besuitewpeu ’ndâu gai lu (ka’ngguame heduituakme chî lu bam sedu) pa â ’ndaigene chize wang mei be chî mak ze henâukupeu je kû lu 10pechu, “Ziemmename leine ne keraîbe ge wain keyibe ka’nggua lei; zai ziemmename saklei di dezaine chi wain peran-gabe pei lei; kane nang â chuna riâ wain keyibe kaikuachang de lei,” ze kacheu de lei. 11Ai pe gu ka’nchetbe ramme ruage raîlangbe ze Isua ne Galili Kana gene tew gai ze, pa pe ngêudibe teilia gai de lei; dadege pe gu kenieme pechu ’nnum’mmi di de lei.
12Aipau châng dege pa Kaperna-um ’mbe pe pui zai pe kiname zai pe gu kenieme je ngua lu tat ti de lei; zai chige beting keduîne penui bam gai de lei.
Isua Kellumki ’mbe Tatbe
(Mat 21.12,13; Mrk 11.15-17; Luk 19.45,46)
13Judame gu tat’ntuahengi ze na di de lei, dadege Isua Jerusalem ’mbe hang di de lei. 14Kellumki lungge penui ne helîkahedetbe ge, getumsei ramme, zai meli ramme, zai depeine ramme, zai rangkânghiakme ramme je ngaudau de lei. 15Dadege â heria ne lakkegitrabe hang tew lu kellumki gene penui ’nteumename je meli benai getumsei ramme dage nguakumpat kam ’ndi de lei; zai pa ne rangkânghiakme gu rangkângpum ramme suktua ze penui gu leisi-kaira ramme chuikautuarang gai wak bei de lei. 16Dadege pa ne depeine zuame je, “Airamme teitat ne lau; a peu ki ze ningnui ne helîkahedetbeki hang tew gai ra mak lei,” ze kacheu de lei. 17Pe gu kenieme ne, “Ning ki hangge ’nningkahekuîbe zene achu tew’ngga gai gu lei,” ze acheu rawgaibe ze ’nningdau di de lei. 18Dadege chi Judame ne pechu, “Aipau tâ tewbe ze anui je teilia ra ning dage ’ndaikau gu ka’nchetbe la lau?” ze kacheu de lei. 19Isua ne penui je kak ze, “Aipau kellumki ze tew’nsia gai be lau, hezie kechumne lung gene I ne chize teichu gai gu lei,” kacheu de lei. 20Dadege Judame ne, “Aipau kellumki ze kum hedai ze seruk tew gai lei, zai hezie kechumne lung gene nang ne aize tewchu gai ra mei?” kacheu de lei. 21Kane pa â pe pum gu kellumki rasam sa lei. 22Chipauziegene kechaibe gene pechu kuakchugaibeibe châng dege, pa ne aize sagaibeibe sam ze pe gu kenieme ’nningdau di de lei; zai rawgai’ndibe sam ramme benai Isua ne sagai’ndibe sam ze penui ’nnum’mmi di de lei.
Isua ne Ziemmena Kebambe Tak Chibe
23Jerusalem ge tat’ntuahengi ting pa bambe ting ge mâ-ningdaulakbe tâ ramme pa tewgaibe penui ngau lu dege, misonggame ne pe ji je ’nnum’mmi di de lei; 24kane Isua â penui je pe lung gesang ne ’nnumtew mak lei, 25’nteumena je pa chilube ziegene zai ziemmename ruagene mi-mige ne sakki tewgaihâ ra ’nnangmakbe ziegeneu; ziemmena lung ge ’ndaikau bam mei be ze pa â chi dadegeu.
Seçili Olanlar:
JOHAN 2: ZEMEBSI
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
