Mamuhay nang may Lakas at Tapang!Halimbawa

"Ang Diyos ang lumapit sa Iyo!"

Ang buhay na walang hanggan ay isang pangako na bunga ng pagparito ng Diyos sa atin at hindi ang sangkatauhan ang nagsumikap na hanapin ang Diyos.

Mula sa simula ng panahon, minahal na ng Diyos ang bawat isa sa atin ng walang pasubali at walang hanggang pag-ibig. Ang Kanyang orihinal na hangarin ay ang magkaroon ng matibay at masiglang relasyon sa bawat isa sa atin. Gayunpaman, nang sinuway nina Adan at Eva ang Diyos sa Hardin, lumikha ang kanilang kasalanan ng isang hadlang sa pagitan natin at ng Diyos. Nahiwalay tayo sa Kanya nang walang hanggan.

Sa halip na hayaan tayong manatiling hiwalay sa Kanya, nagtakda ang Diyos ng isang perpektong plano para sa pagpapanumbalik-isang bunsod ng Kanyang walang hanggang pag-ibig at awa sa atin. Ang layunin ng Kanyang plano ay upang lubusang ibalik kahit ang pinakamatalik na mga aspeto ng Kanyang relasyon sa sangkatauhan tulad ng umiiral bago pa nagkasala sina Adan at Eva.

Mahigit 2,000 taon na ang nakalilipas, ipinadala ng Diyos ang Kanyang Anak sa mundo para alisin ang hadlang na sanhi ng kasalanan, at ibigay ang kaligtasan para sa lahat.

“Sapagkat gayon na lamang ang pag-ibig ng Diyos sa sangkatauhan, kaya't ibinigay niya ang kanyang kaisa-isang Anak, upang ang sinumang sumampalataya sa kanya ay hindi mapahamak, kundi magkaroon ng buhay na walang hanggan. Isinugo ng Diyos ang kanyang Anak, hindi upang hatulan ng parusa ang sanlibutan, kundi upang iligtas ito sa pamamagitan niya.” Juan 3:16-17

Sa pamamagitan ng Kanyang kamatayan at muling pagkabuhay, binayaran ni Jesus nang buo ang parusa ng ating mga kasalanan, at tinanggal Niya ang hadlang sa pagitan natin at ng Diyos. Ang kapatawaran na ito ay nakahanda para sa lahat ng nakahandang tumanggap sa Kanya bilang kanilang Tagapagligtas.

Ngunit ito ay simula lamang. Bago tinapos ni Jesus ang Kanyang oras sa mundo upang bumalik sa Kanyang Ama sa Langit, inilarawan Niya sa Kanyang mga alagad ang isa pang mahalagang elemento ng mas malawak na plano ng Diyos na ganap na ibalik ang sangkatauhan sa Kaniyang Sarili:

“Sa bahay (Langit) ng aking Ama ay maraming silid. Kung hindi ito totoo, sasabihin ko ba sa inyong pupunta ako roon upang ipaghanda ko kayo ng inyong matitirhan?   At kapag naipaghanda ko na kayo ng matitirhan, ako'y babalik at isasama ko kayo upang kayo'y makapiling ko kung saan ako naroroon.” Juan 14:2-3

Hindi lamang ipinadala ng Diyos si Jesus upang alisin ang hadlang ng kasalanan, ngunit isang araw sa hinaharap, si Jesus ay babalik upang dalhin ang lahat ng mananampalataya sa "tahanan" upang makasama Siya magpakailanman.