मत्ति 24
24
मन्दिर नासि लिये खानुङ्नोॽ खेः आङ्मे याकसो तारिक्पुॽइये
(मरकुस १३:१-१३; लुका २१:५-१९)
1मोबाङ ए़क्साङ येसु मन्दिरबाङ खे़ॽमे़ॽनिङ्सिमाबेॽ खोमि चोङ्साजि नुरोॽ मन्दिर खाङ्मेॽसिॽ खोमि के़क्पेॽ लेस्सामि। 2तर येसुडे़ॽ चोङ्साजि लुसुजि, “हे़निङे़ॽ इघा चोप खाङ्मे़ॽनिङ्सिन्डानुमे, ने़ॽनेन्डे ? चइबानोॽ के़ॽ हे़निङ लुनिम्ने़, इघा इक्को रुङ्गोॽवासोक्पेॽ हाइको रुङ्गोॽवासो एन्निहा, चोप योबेन्डुजे।”
3इॽछोॽ ए़क्साङ येसु जैतुन टोक्टोक्माबेॽ पेम्मे़ॽनिङ्सिमाबेॽ चोङ्साजिडे़ॽ खुस्रिङ्मु लेन्नुङ सिप्सुजि, “कानिङ लुबेॽमाना, हे़ने़ॽ लुबॽआ खा इन्डोक्पेॽ लिये गुरु ? मोबा फेरि हे़न लेम्माबेॽनुङ मोबा इगो मक्खाम्डेम रुक्खे़ॽमे बेलामि चिङ्गा इमाङ लिये ?”
4मोबा येसुडे़ॽ खोजि लुसुजि, “होसियार ले़टानिङे, असे़ॽसो हे़निङ मे़रेम्जाहेमिरो। 5इन्ढोङ्होङ बेॽलो याॽमिजि के़ए़ निङ्बेॽ ‘कानोॽ खिरिस्ट ले़ङे’ लुनुङ लेङ्इम्मे, मो खाडे़ॽ बेॽलो याॽमिजि बिस्वासबाङ फोःॽसेन्डुजे।
6 “हे़निङे़ॽ हाम्बेॽको हाम्बेॽ ङेः लिबॽआनुङ लिये लुमे खा खेम्इन्डानुमे। मोडोक्पेॽ हे़निङ ए़क्किसिडानिङे, इन्ढोङ्होङ इघागो लिमानोॽ खे़हा, तर इडोॽ लिमाबेॽनोॽ मक्खाम्डेम रुक्खे़ॽनिबा। 7जाति जातिजिमि रुम्बेॽ ङेः लियेनुङ इक्को राज्यमि बिरोधबेॽ हाइके राज्य पेःडिघे़ये, हाम्बेॽको हाम्बेॽ सकआङ्सानुङ रुॽमि लेङ्इहा। 8तर इघा चोप खागो खेःमि याक तरिक्पॽआरेॽनोॽ ले़ये।
9 “मोबा माहाजिडे़ॽ हे़निङ खेः आङ्मेॽमामि जिम्मा पिम्मेनुङ हे़निङ सेॽनेम्मे, काबेॽ बिस्वास ले़ःॽपॽआसे़ॽ चोप जातिजिडे़ॽ हे़निङ सिॽचाम्मे।
10 “मो बेलाबेॽ बेॽलो याॽमिजिडे़ॽ बिस्वास लेप्पेन्डुजे, इक्कोसे़ॽ हाइको धोका पिन्डुजेनुङ सिःक्चोन्डुजे। 11बेॽलो रेम्सिङ अगमबक्ताजि लेन्नुङ बेॽलो याॽमिजि बिस्वासबाङ फाङ्सेन्डुजे।
12 “याॽमिजिमि निवा इॽठुप दुस्ट खा बेॽलो लिबॽआसे़ॽ याॽमिजिमि रुम्बेॽ नम्नम येम्घे़ये। 13तर ए़क्साङ्ठोक बिस्वासबेॽ पेङ्हेघुबाजि चाहिँ हिङ्डोक्इम्मे। 14मोबा राज्यमि इगो सुसमाचार मक्खाम्डेमबेॽहा चोप जातिजिमि लागि साक्छि लिरो लुनुङ परचार लिये, मोबा ए़क्साङ मक्खाम्डेम नास लिमे याक लेङ्इये।
किस्सिमारोहा बेलामि खा
(मरकुस १३:१४-२३; लुका २१:२०-२४)
15 “मोडोगे़ॽ इन्डोक्पेॽ हे़निङे़ॽ दानिएल अगमबक्ताडे़ॽ लुबॽआडोॽ ‘मन्दिर होङ्सिॽयु नासि ले़ःॽखुबा चिक्चिमिॽमारोमा थोक’ #
दानिएल ९:२७; ११:३१; १२:११ पबित्रा ठाउँबेॽ खाङ्डोइन्डानुमे। (इगो खा नेॽखुबाडे़ॽ लेसुमिरो) 16मोडोक्पेॽ यहुदियाबेॽ टुघुबाजि सुम्लाखालाम चिःॽखे़ॽमिरो। 17कौसिबेॽ टुघुबाजि टाङ्बामि कोक्नाम लासिॽ खिमहोङ्सिॽयु ए़ॽउङ्मिरो। 18रोपाबेॽ टुघुबाजि टाङ्बामि ओप्ताङ लासिॽ खिमबेॽ ए़ॽखे़ॽमिरो। 19पापुरायो! उक्खाइसुम्माजिनुङ डुडु हिङ्मेॽखु पस्ताङ्माजि मो याक इन्डोक बिजोक लिम्मे। 20तर हिउदोबेॽ अथबा नाजामे यिडे़ॽ हे़निङे़ॽ चिःॽमा मे़न्सिॽलो लुनुङ पारथना ले़टानिङे। 21इन्ढोङ्होङ मोडोक्पेॽ लेङ्इये बेॽए खेःगो, आयुरो इगो मक्खाम्डेमबेॽ मे़लिडिॽ, फेरि ए़क्साङ इन्डोक्पेॽसो लिनिबा। 22माहा खेः आङ्मे याक चुक्लो मे़न्टोङ्बॽआहोङ असासो मे़हिक्सामि, तर से़म्बॽआजिमि लागि माहा याक चुक्लो टोङ्बेये।
23 “मोडोक्पेॽ याॽमिजिडे़ॽ हे़निङ ‘खाक्सानुमे, खिरिस्ट इगोबेॽ टुये, मोबेॽ टुये’ लुमिहोङ बिस्वास ए़ले़टानुमे। 24इन्ढोङ्होङ मे़ॽनोक्हा खिरिस्टजि मोबा रेम्सिङ अगमबक्ताजि लेङ्इम्मे, माहाजिडे़ॽ बेॽहा बेॽहा चिङ्गानुङ खरिहा योम्बोक खाङ्मुनुङ निवाहाङ्डे़ॽ से़म्बॽआ बिस्वासिजिसो रेम्इन्डुजे।
25 “मिॽयुक्सानुमे, इगो खा आयुनोॽ हे़निङ इःॽपेनिम्ने़। 26माहाजिडे़ॽ हे़निङ ‘खिरिस्ट रे़क्रे़क्मा ठाउँबेॽ टुये’ लुमिहोङ हे़निङ मोबेॽ ए़क्खडानिङे। मोबा ‘खाक्सानुमे, खिरिस्टगो कोठा होङ्सिॽयु टुये’ लुमिहोङ्सो बिस्वास ए़ले़टानुमे। 27इन्ढोङ्होङ नमसेल्लेॽवा नम्गे़तलाम्बाङ उसाहोङ नमथालाम उज्यालो लिडिडोक्नोॽ याॽमिमि पसा लेम्माबेॽ लिये। 28किम्बया सिनु टुढामबेॽ हौराम्बाजि सुम्इम्मे।
याॽमिमि पसा खाङ्मुये याक
(मरकुस १३:२४-२७; लुका २१:२५-२८)
29 “माहा खेःमि याक रुक्खे़ॽमासोरोक, नम सेन्जुगुप लियेनुङ लाडे़ॽ उज्यालो पिनिबा, मोबा साङ्गेजि नान्द्रुङ्माबाङ हेॽइम्मे, नान्द्रुङ्माबेॽहा सक्ति योङ्इम्मे।
30 “मोबा ए़क्साङ याॽमिमि पसा लेङ्इये खामि चिङ्गा नान्द्रुङ्माबेॽ खाङ्मुये। मोबा मक्खाम्डेमबेॽहा चोप जातिजि बिलौना इम्मेनुङ माहाजिडे़ॽ याॽमिमि पसा नान्द्रुङ्माबाङ खिम्मिॽवाबेॽ बेॽए सक्तिनुङ महिमानुङ उङ्मे़ॽनिङ्सिबॽआ खाङ्डोक्इन्डुजे। 31खोसे़ॽ खोमि थाङ्सिरिदुतजि तुराहिमि सेम्लानुङ सोरि पाङ्इन्डुजे। मोबा माहाजिडे़ॽ मक्खाम्डेमनुङ नान्द्रुङ्मामि चोप ठाउँबाङ खोसे़ॽ से़म्बॽआजि सुम्इन्डुजे।
वेॽलाभुमि डाङ्बाङ खा चिम्मा
(मरकुस १३:२८-३१; लुका २१:२९-३३)
32 “वेॽलाभुमि डाङ्बाङ खा चिनानुमे। इन्डोकपेॽ मोमि हक्काम्बाबेॽ चोङ ङोःॽवा के़ॽए़हा, मोबा हुरुॽवा याम लेङ्इटा लुनुङ हे़निङे़ॽ लेन्डानुमे।
33 “मोडोक्नोॽ हे़निङे़ॽसो के़ॽ लुबॽआ इघा चोप खा लिबॽआ खाङ्डोक्इन्डानुमे, मोबा खो राम्डेमबेॽनोॽ लेम्बेटे़ लुनुङ लेसानुमे। 34चइबानोॽ, के़ॽ हे़निङ लुबॽआ इघा चोप खा पुरा मे़लिसेॽलो इगो पुस्ता रुक्खे़ॽनिबा। 35थाङ्सिरिनुङ मक्खाक्डेम नासि लिघे़ये, तर के़ॽ लुबॽआ बचन नासि लिघे़ॽनिबा।
चङ्खो लिमे टुम्बेॽ सिक्छे
(मरकुस १३:३२-३७; लुका १७:२६-३०,३४-३६)
36 “तर मो याक, मो बेलामि टुम्बेॽ निवाहाङ पाबाबाङ हाइखा असे़ॽसो लेसुजिनिबा, ना थाङ्सिरिबेॽहा थाङ्सिरिदुतजिडे़ॽ लेन्डुजे, ना पसाडे़ॽ लेन्डुए। 37याॽमिमि पसा लेम्माबेॽसो नोआमि पालोबेॽ लिडिडोक्नोॽ लिये। 38मोडोक्पेॽ नोआ योङा जाहाजहोङ्सिॽयु पे़खे़ॽमे बेलाठोक याॽमिजि चामे़ॽसिडामि, उङ्मे़ॽसिडामि, फुङ्सया ले़ःॽमे़ॽनिङ्सिडामि। 39मोबा योङा परलया लेन्नुङ माहा याॽमिजि चोप मे़यिक्खे़ॽलो माहाजिडे़ॽ इमाङ्सो मे़लेसुजि। याॽमिमि पसा लेम्माबेॽसो मोडोक्नोॽ लिये। 40मोडोक्पेॽ सोङ्राबेॽ निप्पाङ योम्बोक ले़ःॽमे़ॽनिङ्सिमाबेॽ इक्को लाघे़ये, हाइको याःॽयाइये। 41निप्पाङ मेॽनामिॽचि लघे यिॽमे़ॽनिङ्सिबॽआजि, इक्को लाघे़ये, हाइको याःॽयाइये।
42 “मोडोगे़ॽ चङ्खो पेनानिङे, इन्ढोङ्होङ इन्डोक्पेॽ हे़निङ्मि परभु लेङ्इये, मो हे़निङे़ॽ लेसानुम्ने। 43तर इगो खा लेयुक्सानुमे, खिमदाङ्बाडे़ॽ खुसुबाङ सेन्डा इन्डोक्पेॽ लेङ्इये लुनुङ याक्लोनोॽ लेडोक्टुहोङ्गो, खो मे़इम्रेॽ टाङ्बामि खिम हुङ्साङ पेनाहोला, मोबा खुसुबाङ्डे़ॽ खोमि खिम मे़ङ्खुहेसु होला। 44मोडोगे़ॽ हे़निङ्सो सानिङ्नोॽ पोरोक्नुङ पेनानिङे, इन्ढोङ्होङ याॽमिमि पसा हे़निङे़ॽ मे़मिॽपॽआ बेलाबेॽ लेङ्इये।
बिस्वासिनुङ बेइमानि सेउतेजि
(लुका १२:४१-४८)
45 “बिस्वासनुङ्मानुङ चेन्दुबा सेउते लुबॽआ चाहिँ असाडे ? मो सेउते खोमि मायोङ्बाडे़ॽ टाङ्बामि खिमबेॽहा याॽमिजि ठिक बेलाबेॽ चामा पिसुरो लुनुङ युङ्इटुए। 46खोमि मायोङ्बा टेजामाबेॽ खोसे़ॽ मोडोक्नोॽ ले़टिङ्बॽआ चुप्टुहोङ, मो सेउतेडे़ॽ इनाम चुप्मिन्डुए। 47चइबानोॽ, के़ॽ हे़निङ लुनिम्ने़, मायोङ्बाडे़ॽ मो सेउते खोमि चोप याङ्सरावा खाङ्मे जिम्मा पिन्डुए। 48तर बेइमान सेउतेडे़ॽ ‘काङ्मि मायोङ्बा चान्डो लेन्निबा’ लुनुङ खोमि निवाबेॽ मिॽइन्डुए। 49मोबा हाइखा सेउतेजि मोःक्साङ सेक्खे़ॽखुबाजिनुङ चासिॽनुङ उङ्सिॽ पेम्बोगाहोङ, 50मो सेउतेडे़ॽ मे़मिॽपॽआ याकनुङ बेलाबेॽ खोमि मायोङ्बा लेङ्इये। 51मोबा मायोङ्बाडे़ॽ खो बेॽलो माङे़ॽमा दन्डा पिनुङ खो कप्टिजि टुढामबेॽ राप्एन्इन्डुए, मोबेॽ याॽमिजि हाःप्मिम्मेनुङ के़ङ इःक्साङ खेः आङ्इन्डुजे।”
Kasalukuyang Napili:
मत्ति 24: YAMP
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2023, Wycliffe Bible Translators, Inc. and Nepal Bible Society
