मत्ति 23
23
यहुदि धारमिक नियम इःॽखुबाजिनुङ फरिसिजि येसुमि चेतावनि
(मरकुस १२:३८-३९; लुका ११:४३,४६; २०:४५-४६)
1मोबा येसुडे़ॽ मोबेॽ सुम्बॽआ बेॽलो याॽमिजिनुङ खोमि चोङ्साजि इडोॽ लुसुजि, 2“खाक्सानुमे, धारमिक नियम इःॽखुबाजिनुङ फरिसिजिडे़ॽ यहुदि धारमिक नियम इःॽमे अधिकार चुप्मिटुजे। 3मोडोगे़ॽ माहाजिडे़ॽ लुबॽआ खा खेप्सानुमे, तर खोजिडे़ॽ ले़टिडोॽ चाहिँ ए़ले़टानुमे, इन्ढोङ्होङ खोजिडे़ॽ हाइखाजि सिक्छेगो पिन्डुजे, तर खोजिटाङ्बे़ॽ चाहिँ मोडोॽ ले़टुजिने। 4खोजिडे़ॽ रिहा खिमा छॽइहा कोक याॽमिजि खिमेन्डुजे। तर खोजिटाङ्बे़ॽ चाहिँ इक्को हुकखे़ॽवासिडे़ॽसो के़गुजिने। 5तर खोजिडे़ॽ चोप योम्बोक हाइखा याॽमिजि खाङ्मेॽमामिरेॽनोॽ ले़न्डुजे। इन्ढोङ्होङ अक्खाजिडे़ॽ बेॽहा बेॽहा जन्तरडोॽहा टोङ्नुङ हुकनुङ तुरुवाबेॽ हिइन्डुजे, मोबा टाङ्बा धरमि खाङ्मुमामि चाङ्माहा चेॽपेॽ किएन्हा फुरका टिन्डुजे। 6माहाजि भत्तेरबेॽ आदर योॽइम्मेनुङ यहुदि सुम्ढाम खिमबेॽ एप्पाजि पेन्ढामबेॽ पेम्मा मिङ्इम्मे। 7हाटाराजि वाइमाबेॽ याॽमिजिडे़ॽ खोजि आदरनुङ सेवा मुबॽआ, मोबा गुरु लुबॽआ नेन्जोन्डुजे।
8 “तर हे़निङ असे़ॽसो ‘गुरुज्यु’ मे़लुमिरो, इन्ढोङ्होङ हे़निङ्गो सानुङ्उजिगोरे। हे़निङ्मि गुरुगो इगो मक्खाम्डेमबेॽ इक्कोरेॽनोॽ टुये। 9हे़निङे़ॽ इगो मक्खाम्डेमबेॽ असासो आत्मिक पाबा ए़ॽलुमे, हे़निङ्मि इक्कोरेॽ पाबा टुये, खो थाङ्सिरिॽटु पेङ्इये। 10हे़निङ असे़ॽसो ‘मायोङ्बा’ मे़लुमिरो, इन्ढोङ्होङ हे़निङ्मि इक्कोरेॽ मायोङ्बा टुये, खो खिरिस्ट ले़ये। 11हे़निङ्जिबेॽ असा चोप्पाङ एप्पा ले़ये, मोसे़ॽ चोपमि सेवा ले़ःॽमा खे़ये। 12असा खोमटाङ्बा एप्पा लिमा मिङ्इये, मो ए़डेम्मा लिये, असे़ॽ टाङ्बा ए़डेम्मा टोङ्इन्डुए, खो बेॽए लिये।
माङे़ॽमा बिरोधबाङ होसियार
(मरकुस १२:४०; लुका ११:३९-४२,४४,५२; २०:४७)
13 “हे़निङ इनामा, हे़निङ धारमिक नियम इःॽखुबानुङ फरिसिजि! कप्टिजि, इन्ढोङ्होङ हे़निङे़ॽ याॽमिजिमि पोम्बेॽ थाङ्सिरिमि राम्डेम से़ॽइन्डानुमे। हे़निङ्टाङ्बासो पे़खडानिङ्ने, हाइखाजिसो पे़खे़ॽमेॽटानुम्ने।
14 [“हे़निङ इनामा, धारमिक नियम इःॽखुबानुङ फरिसिजि! इन्ढोङ्होङ, कप्टिजि। हे़निङ राङ्मिॽमाजिमि खिम बेबहार ङाप्इन्डानुमे, हागोसो किएम्मा पारथना ले़ःॽमा मिङ्इन्डानिङे। मोडोगे़ॽ हे़निङे़ॽ हाइखाजिबाङ बेॽलो दन्डा चुप्मिन्डानुमे।] # २३:१४ इगो खा चोप्पाङ याक्लोए मुल बाइबलबेॽ माॽआये
15 “हे़निङ इनामा, धारमिक नियम इःॽखुबाजिनुङ फरिसि कप्टिजि! इन्ढोङ्होङ हे़निङ इक्को याॽमि हे़निङ्लाम लाःप्मामि लागि मक्खाम्डेमनुङ टोम्लिॽवा वाइसेन्डानुमे, मो हे़निङ्लाम लेङ्येबाङ मो याॽमि हे़निङ्बाङ्सो चुरोॽ खेःलोक खे़ॽमारोमा लिन्डानिङे।
16 “हे़निङ इनामाहा, मिक मे़ए़खुबा डायोङ्बाजि, हे़निङ कान्डनिङे, ‘असे़ॽसो मन्दिर के़क्नुङ किरिया हे़क्माबेॽ इमाङ्सो लिनिबा, तर मन्दिरमि सुना के़क्नुङ किरिया हे़क्माबेॽ मो किरिया खोबेॽनोॽ टेआप्मिये लुनुङ इःन्डानुमे।’ 17हे़निङ टेवाक्नुङ मिक्सुरुम्बाजि, हाम्बे चाहिँ बेॽएम्मा ले़ये ? सुनाडे, सुना पबित्रा टोङ्खुबा मन्दिरडे ? 18‘हे़निङे़ॽ बेदिमि निङ्बेॽ किरिया हे़क्माबेॽ इमाङ्सो लिनिबा, तर मोसोक्पेॽ चेॽटिबॽआ भेटि के़क्नुङ किरिया हे़क्पॽआ किरियाडे़ॽ हिःॽइये इःन्डानुमे।’ 19होउ मिक्सुरुम्बाजि, भेटि बेॽएम्माडे, भेटि चोखो टोङ्खुबा बेदि चाहिँ बेॽएम्मा ? 20मोडोगे़ॽ असे़ॽ थानामि निङ्बेॽ किरिया हे़ॽइन्डुए, मो थानासोक्पेॽ टुहा चोप थोकमि निङ्बेॽनोॽ किरिया हे़ॽइन्डुए। 21मन्दिरमि निङ्बेॽ किरिया हे़क्खुबाडे़ॽ, मो मन्दिरबेॽ पेङ्खुबामि निङ्बेॽसो किरिया हे़ॽइन्डुए। 22थाङ्सिरिमि निङ्बेॽ किरिया हे़क्खुबे़ॽ निवाहाङ पेन्ढामनुङ मोसोक्पेॽ पेङ्खुबामि निङ्बेॽ किरिया हे़ॽइन्डुए।
23 “हे़निङ इनामाहा, धारमिक नियम इःॽखुबानुङ फरिसि कप्टिजि! इन्ढोङ्होङ हे़निङ पुदिना, सोँपनुङ जिराडोॽहा थोकमि इक्पोङ भागामि इक्को भागा पिन्डानुमे, तर धारमिक नियमबेॽहा खा न्याय, नम्नावानुङ बिस्वासमि खा चाहिँ ले़ख्खो ले़टानुम्ने। हे़निङे़ॽ इक्पोङ्मि इक्को भागा पिमाहा इघा खानुङ सोरि न्याय, नम्नावानुङ बिस्वाससो ले़ःॽमा खडे़। 24होउ मिक्सुरुम्बा अगुवाजि, हे़निङे़ॽ ए़द्रेहा भुसुनाजिगो सेन्डानुमे, तर उटडोॽहा बेॽहा खा चाहिँ रिम्बेन्डानुमे।
25 “हे़निङ इनामाहा, धारमिक नियम इःॽखुबानुङ फरिसि कप्टिजि! इन्ढोङ्होङ हे़निङे़ॽ थालानुङ खोरियामि ए़ङ्गुवालाम चाहिँ वसोइन्डानुमे, तर होङ्सिॽयुलाम चाहिँ लोभिनुङ टाङ्बामि लागिरेॽ मिॽनुङ युङ्बॽआ थोक टुहा। 26होउ मिक्सुरुम्बा फरिसिजि, याक्लो खोरियानुङ थालामि होङ्सिॽयु वसोगानुमे, मोबा मोमि ए़ङ्गुवालामसो वासोगानुमे।
27 “हे़निङ इनामाहा, धारमिक नियम इःॽखुबानुङ फरिसि कप्टिजि! इन्ढोङ्होङ हे़निङ खेवा खाम टिबॽआ येःॽमाडोॽहा उथ्रिॽ ले़ःन्डानिङे, पाखे़ॽयु चाहिँ नुबा खाङ्मुहा, तर होङ्सिॽयु चाहिँ सिबॽआ याॽमिमि किम्घे़ॽपॽआ से़ॽकोॽवानुङ चोप असुद्ध थोकरेॽ टुहा। 28इडोक्नोॽ हे़निङ्सो याॽमिजिमि पोम्बेॽ चाहिँ धरमि खाङ्मुन्डानिङे, तर हे़निङ होङ्सिॽयु चाहिँ दुस्टनुङ कप्टि निवारेॽ खिन्डानिङे।
आप्टिकमि दन्डा
(लुका ११:४७-५१)
29 “हे़निङ इनामाहा, धारमिक नियम इःॽखुबानुङ फरिसि कप्टिजि! इन्ढोङ्होङ हे़निङ अगमबक्ताजिमि येःॽमा चाॽइन्डानुमे, धरमि याॽमिजिमि येःॽमा चाॽइन्डानुमे, तर खोजिमि खा चाहिँ इन्डोक्पेॽसो खेप्सानुमने। 30मोबा लुन्डानुमे, ‘याक्लो कानिङ्मि टुबाजिडे़ॽ अगमबक्ताजि सेॽमाबेॽ कानिङ टुसिङ्माहोङ्गो खोजि मे़न्सेॽमेॽटुङ्मा होला।’ 31इडोॽ हे़निङ अगमबक्ताजि सेॽनेघुजिमि पसाजि लुमे खामि परमान हे़निङ्टाङ्बे़ॽ पिन्डानुमे। 32हे़निङ्मि टुबाजिडे़ॽ तरिक्पॽआ पापि योम्बोक हे़निङे़ॽ ले़ःॽसेडानुमे।
33 “होउ पुसे़ॽचि, सिक्चानुङ्मा पुसेॽमि पसाजि, हे़निङ खेःलोकमि दन्डाबाङ इन्डोॽ लेक्खे़न्डानिङे ? 34मोडोगे़ॽ नुरोॽ खेप्सानुमे, के़ॽ हे़निङ्मि रुम्बेॽ अगमबक्ताजि, चेन्दुबा याॽमिजि, धारमिक नियम इःॽखुबाजि पाङ्इनुङ्हाजि। माहाजिबेॽ इन्डोक जना हे़निङे़ॽ सेॽएन्डानुमे, इन्डोक जनाजि काप्सिङ्बेॽ किङ्नेन्डानुमे, इन्डोक जनाजि चाहिँ यहुदि सभा खिमबेॽ कोरराडे़ॽ साःप्इन्डानुमे, मोबा इन्डोक जना सहर सहरराजिहा याॽमिजि हे़निङे़ॽ चुङ्जान्डानुमे। 35मोडोगे़ॽ मक्खाम्डेमबेॽ सेॽनेबॽआ धरमि याॽमिजिबेॽ हाबिलमि हरिबाङ मन्दिरबेॽए भोग पिढाम बेदिमि रुम्बेॽ सेॽनेबॽआ बेरेक्याहमि पसा जकरियामि हरिठोकहा चोप आप्टिक हे़निङ्मि निन्डवाँबेॽनोॽ सिॽइहा। 36चइबानोॽ, के़ॽ हे़निङ लुनिम्ने़, इघा चोप बिरोङ्मि आप्टिक इगो पुस्ता सोक्पेॽ सिॽइहा।
येसुडे़ॽ यरुसलेम योप्पॽआ
(लुका १३:३४-३५)
37 “होउ यरुसलेमबेॽहा याॽमिजि, होउ यरुसलेमबेॽहा याॽमिजि, हे़निङे़ॽ अगमबक्ताजि सेॽनेन्डानुमेनुङ हे़निङ्बेॽ पाङ्बॽआजि रुङ्गोॽवाडे़ॽ ए़ॽनेन्डानुमे! वाब्रुॽमाडे़ॽ खोमि वाःप्साजि लाप्खे़ॽवाडे़ॽ कुप्टिडोक्नोॽ के़ॽ बेॽलोखेॽ हे़निङ्हा ओङे़कजि सुम्नुङ कुप्मा योगुङ, तर हे़निङे़ॽ मे़ङ्खे़प्सानुम। 38खाक्सानुमे, हे़निङ्मि खिम निङ्बेमारोमा ठाउँ लिये। 39इन्ढोङ्होङ के़ॽ हे़निङ लुनिम्ने़, इन्डोक्लो हे़निङे़ॽ ‘परमपरभुमि निङ्बेॽ लेङ्घुबा आसिसित ले़ये’ लुसानुम्ने मोडोक्लो हे़निङे़ॽ का खाङ्डोक्टानुम्ने।”
Kasalukuyang Napili:
मत्ति 23: YAMP
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2023, Wycliffe Bible Translators, Inc. and Nepal Bible Society
