Markus 6
6
Mya kwo Yesu a Nazarat
(Matta 13.53-58; Luka 4.16-30)
1Yesu a ɗaka hangɨn a mɨnə vɨrasən Nazarat tən kat ka lagbe dan. 2A fərə piyatɨ da Yawude, nda pɨrə vɨnə kəndəshe darən a tiya kəndəshe a vor vɨnəngɨn, ɓwaare hananang dɨ vor myee dɨ kɨl ləməgyee nda dɨ boyo a ɗa ndəle kɨr-kɨr.
Təna ɗiyəsə, “A ndo haa nda lee ləməgyee kat? Nda ɗa ya nda lee wule shee kat? Ɓə səkushipe nda dɨ ɗa mgban wonə vən gətɨngɨn? 3Aa sɨnə nze da nzə-gbalshe mya leyə gana? Aa nze da Maryamu nə a? Mwaafengɨn mgban kat a yə Yakubu ka Yusufu ka Yawuda ka Siman aa tənə mya leetɨrən gana? Mwaafengɨn i mandye mgban, aa tənə kam gana?” Səngɨn nə ɗa təna ɓə ushi Yesu, tənaa nggutən ka fukatə.
4Yesu a luwa a sarən, “Diyalə mya mbadən səɗə atɨ, ‘A vɨrata kpale nə ɓəmbə taa fukati kan, nagi a waka myee dan, ka vor hwodan.’ ” 5Yesu aa ɗa i shikoshopyi twayi a vɨrasən, ji-ootə ɓyeləng ɓəmbə nda gwadərən a parən ka tɨfəngɨn təna piyagə ootə. 6Le a ɓwan kɨr-kɨr ka wule ɗongə mwadiyale darən!
Yesu a lyen lagbe dan bəw a mbiɗi-kpe
(Matta 10.5-15; Luka 9.1-6)
Dɨ hangɨn Yesu a woyo i vɨre som-som ta kənə ɓwaare le da Həmɨnpwa. 7Nda wa lagbe dan, tən bəw a mbiɗi-kpe, təna paya a hakan. Nda takarən a lyentɨrən kpe-kpe, nda vərən gətə a nə pɨle ji-dwatə. 8Nda lama kaarən a sarən atɨ, “Na hwun ɓa dɨm omotɨngɨn, ɓe hwunaa nggur asə gə omotə a nə tɨfe, nagi sɨzɨmti, nagi zambɨramə,#6.8 Gbɨra omotə. nagi taa a vor pititə,#6.8 Gbɨra taa. nggurəm gaaratə ɓəmbə. 9Dəməm hwanyi omotə, ɓe hwunaa por sɨɓwete hwun ɓa nggəddərən. 10Nagi a ndo hwoɗi hwuna pɨrə, nzamə vor hwoɗingɨn baa fəra hwun ɓa ɗaka vɨratɨngɨn də. 11Mye kanaa lurəwnə a haa hwuna zə də, myaa kɨl la hwuna zəkan, hwun kana ɓa ɗaka hangɨn a dɨmə, kpəwomgə bɨr-bɨrə mbwayingəwnə. Angɨn ɓa bɨlərən atɨ ɓashitɨ da Həmɨnpwa shi nəngrən.”
12Təna dɨmə a muɗə ta hiwa ɓwaare ta sarən atɨ a təna por-njiya ka səhase darən. 13Təna dɨmdə pɨle ji-dwatə gə sɨtɨ ɓwaare, təna puk maare a nə ji-ootə a dɨmərən də ootə.
Mya bəng nə Yohana nzə-ɗa batisɨmatə
(Matta 14.1-12; Luka 9.7-9)
14Hiridus hama Galili a kɨl lə shee kat Yesu a dɨ ɗa gəkɨlə kwakɨ Yesu a ngguro a mbəgə hee kat. Imi ta sa atɨ, “Yohana nzə-ɗa batisɨmatə nə maggə taane ka myentə, səngɨn ɗɨki nda ɗɨm gətɨ ɗa səkushipe.”
15Imi a sa atɨ, “Iliya nə mɨna.”
Imi mgban a sa atɨ, “Sɨnə hiɗə dɨ vor kpalyee kaaɗəng nda ɓə mɨna.”
16Ite Hiridus a kɨl ləməgingɨn, nda sa atɨ, “Yohana a na ɗɨkə təna bənggə nəngɨn sɨnə mɨna ka myenta?”
17Gə Hiridus nə kanənəngɨn ɗɨki atɨ a mya kɨt Yohana a ɗɨkə gbərəwe a gbən. Hiridus a ɗaasə gəkɨlə le da Hirodiya metɨ jibiyəngɨn Filibus ite nda luwo a nza kaarə. 18Yohana a dɨ boyə Hiridus le anəsə-anəsə atɨ, “Ɓashita Musa aa və humwatə hye luu metɨ jibiyanga a nza kaarə meti.” 19Hirodiya a dɨ bəə muunəngɨn gəkɨlə ləməgyee nda dɨ boyo. Gə ləngɨn ngga dɨ mwo atɨ ngga ɓɨl Yohana, nggaa ɓə lee ɗate nggi ɓa ɗa. 20Gəkɨlə Hiridus a dɨ gəə kala Yohana, nda dɨ gontən, ndaa mwo atɨ asə a gən, gəkɨlə ɓə leyə atɨ Yohana ma femə ɗəmɗəmə. Hiridus nee dɨ mwo kɨl kormi Yohana anəsə, nagi a nə sate atɨ le a dɨ ɓwan ka ləməgingɨn.
21Fəre hiɗə, Hirodiya a ɗɨm humwatə ɓa ɗa Yohana se, gə kote dɨ bəə munəngɨn. A sɨlangsətɨ mwasa həmɨn Hiridus, nda ɗa sɨzɨmtə a waga ɓwaare, wule mi kpan-kpanyee a vor njiya dan, wule gyane ka kasalye ka həmyee a vor njiya Galili. 22Ite njita Hirodiya a pɨra, ngga wuro, hanɨngə Hiridus kat ka omyee paya.
Həmɨn Hiridus a gbə a sa njitə atɨ, “Ɗiyi lə sa kat hye dɨ mwo hɨn ɓa vu.” 23Nda gbə a sarə atɨ, “Nagi mɨnə hye nyishi hɨn ɓa vu səngɨn, nagi nda njiya de nə, hɨn ɓa takan kpe a vu gbɨle.”
24Njitɨngɨn a dɨmə a dɨ pa nuwogərə a ɗiyərə le atɨ, “Ɓə mɨnə hɨn ɓa nyisa?”
Nuwogərə a sarə atɨ, “Boyən nda vu nə Yohana nzə-ɗa batisɨmatə.”
25Njitə a mɨnə haka həmɨn tan-tan a san atɨ, “Hɨnə dɨ mwi atɨ hye vi nə Yohana a nə papitɨnə ɓəgəng.”
26Ite həmɨn a kɨl ləngɨn, nda ɗa yedi-kɨttə kɨr-kɨr, shezə taa itɨ ɗati ndi ɓa ɗa, gə ɓə bwe le nzadən mbəə a humwa omyee nza, ndaa mwo atɨ nda mɨna ka beesən a kwo njitə le. 27A hangɨn nda lyen hiɗə dɨ vor ji-fwahumwatə dan tan-tan atɨ a nda wudə a bangagə nə Yohana a shikan. Mangɨn a muɗə mgban a dɨ banga nə Yohana dɨ vor gbərəwe, 28a shikan a nə papitə. Nda və njitɨngɨn, njitə a muɗə ka nəngɨn a dɨ və nuwogərə. 29Ite lagbe da Yohana ɓe kɨl ləngɨn, təna shi a nggur kada sɨsən a dɨ ɗɨkə.
Yesu a zɨmdə morye haru bəw laka tuf
(Matta 14.13-21; Luka 9.10-17; Yohana 6.1-14)
30Ite kpe-lagbe da Yesu a mɨna dɨ hiwatə, təna paya a hakan a boyən lə shee kat təna ɗa. 31Ɓwaare a maɗa ta shi haka Yesu ka lagbe dan anəsə, imi dɨ nee muɗi, imi dɨ nee shi, angɨn a ɗɨkə Yesu kat ka lagbe dan aa ɗɨm humwaa zɨmshe. Gə ləngɨn nda sarən atɨ, “Mya muɗəmə a haa som a haa taa ɓwaare də, gə mya kwa piyam ɓyeləng.”
32Təna pɨrə koombotə a lyembərə a muɗə a haa som gə təna tawagə ɓwaare. 33Kat ka angɨn, imi hananang dɨ vɨre som-som 'ye naa mutsərən a leyə atɨ tənə, mingɨn a gyeɓə a pɨrgərən a humwa ka mbwayingrən baa a tɨlgə Yesu ka lagbe dan a hangɨn. 34Ite Yesu a janga gə koombotə, nda naa təkə-təkətɨ ɓwaare, ləngrən a orən gəkɨlə tənə ɓətɨ mbagee taa majinə kaarən. Gə ləngɨn nda tiya kəntə kənərən shee hananang a hangɨn.
35Ite fəre nee dɨ gəə kaadə, lagbe dan a shi hakan a san, “Fəre nee dɨ mbɨri, hanə vor kaakə, taa hwoɗi də ka ɓwaare. 36Ndɨka hye boyə ɓwaare təna təkəsə a muɗə vɨre kur-kuryee ka hee kat ɓwaare a gə də, gə təna ɗər sɨzɨmtə a zɨmə.”
37Yesu a sarən atɨ, “Zə vəmərən sɨzɨmtə a ta zɨmə.”
Təna san atɨ, “Sa ɓa zɨmdə təkə-təkətɨ ɓwaare nə ɓa ɗa taa lyentɨ lyekətye fwa-fwat! Hinə ɓa ɗɨm wule taa ɓətɨ a, aɓə wudə a ɗara sɨzɨmtə kan asɨ vərən təna zɨma?”
38Yesu a ɗiyərən, “Nda goɓoryi buroditə ya hwuna gə kaarə? Wudəm, niyəm pee.”
Ite təna wudə a niya, təna mɨna sɨ san, “Buroditə nə tuf ka vaakye kpe.”
39Yesu a sarən atɨ a təna boyə ɓwaare təna nza tərəng-tərəng a nə kaakə ɓak-ɓake. 40Ɓwaare a nza mgban mgbɨm-mgbɨm, imi a gbəwo haru, imi mgban a gbəwo bəwtə tuf-tuf. 41Yesu a por goɓoryi buroditɨngɨn tuf ka vaakye kpe, nda maddə nəngɨn a pwa, nda ɗa Həmɨnpwa hiwtə ka usəkətə, nda taka buroditɨngɨn a və lagbe dan gə təna ɓyana ɓwaare. Sə mgban nda por vaakingɨn kpe a takarən a ɓyanarən kat. 42Ɓwaare kat a zɨmshe a hyaɓa. 43Təna pedə mosəryi buroditə ka vaakye mbiɗi a poro konye pas-pas bəw a mbiɗi-kpe. 44Myee zɨm shingɨn, morye kat ɓa ɗa haru bəw laka tuf.
Yesu a woyo nə haɓye
(Matta 14.22-36; Yohana 6.16-21)
45Aa ɓongə, Yesu a boyə lagbe dan atɨ a təna pɨrə koombotə a lyembərə a pɨrgən a humwa a lawuɗə vɨra Betesda, nda mbiɗi a bee gəkɨlə nda gə ɓwaare kwasatə təna təkəsə. 46Ite nda gərən kwasatə a mbəə, nda ɗakarən a nggɨrə nə mwe gə nda ɗa hiwtə.
47Ka harikatə lagbe dan lyembərə dɨmə vor haɓye a nə gərə Galili, sɨnə mbiɗi hiɗə a haa kpamtə a kwakatə. 48Nda niyə a naa lagbe dan ndə dɨ ɓwa ka lyembəre ndə dɨ tyenglənyi gə hawa dɨ tawa kaarən. Ka haa dung-dung, Yesu a dɨmə a zə hakarən ndi ta woyo nə haɓye. Nda woyo a ɗa ɓətɨ ndi ɓa pɨrgərən a muɗə a haa. 49Ite təna nan dɨ woyo nə haɓye, təna sa ndi kpiriti. Təna gəəshe, 50gəkɨlə təna nan kala a gərən kat. Gbyel a hangɨn nda boyərən le a sarən atɨ, “Mbam ɗəng! Hɨnə. Ɓe kala aa gəwnə!” 51Nda pɨrə hakarən a vor koombotə, hawa dɨ təwi kat a kangə a bə ɗəng. Lagbe dan a gə kiw ka sa təna nan, 52gə tənaa lee naarə zɨmte nda zɨmdə ɓwaare ka goɓoryi buroditə, kwa-hubosərən a takə.
53Koombotə ɓe kpasə, təna nggɨrə vor vɨraa Jenisarat a ɓwe koombotə a hangɨn. 54A hangɨn, aa ɓongə ite təna dɨmgə koombotə a dɨ nggɨrə haa kpamtə, ɓwaare a naa Yesu a leerən. 55Təna gyeɓə a pɨrə ji-vɨree a hangɨn a dɨ payadə ji-ootə a nə kəje, tən ta koɗən a hee kat təna kɨlə atɨ sɨne də. 56Nagi a ndo haa nda pɨrədə kat ka vɨre kur-kuryee, ka vɨre kpan-kpanye ka vor kaake, təna dɨ pukdə ji-ootə a heengɨn, kat ka vor lumotə. Tən ta nyisən atɨ nda ɗakarən təna pa nagi nda baapa rukute dan nə, myee mgban pan kat təna dɨ piyagə ootə darən.
Kasalukuyang Napili:
Markus 6: bcy
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
