Markus 7
7
Sa dɨ takɨma ɓwaara
(Matta 15.1-20)
1A fərə i Farise ka imi dɨ vor ji-lee kəndə ɓashita Musa a dɨma dɨ vor Urshelima, təna shi haka Yesu a peyə a takadən. 2Təna puk diingrən a naa imi dɨ vor lagbe da Yesu dɨ zɨmshe tənaa suɓwa tyefingrən ɓətɨ Yawude a dɨ ɗa a kwale darən. 3Gəkɨlə tən Yawude kat ka Farise təna dɨ suɓwa tyefingrən a mbəə təna ɓə zɨmshe a kwale darən. Sɨnə sa təna ɗyegənə haka mi kpan-kpanye darən. 4A kwale darən, tən kana mɨna dɨ lumotə, təna dɨ suɓwagə sɨsərən a mbəə kat təna ɓə zɨmshe. Sə mgban ka shee hananang 'ye təna dɨ ɗa sɨzɨmtə kaarən ɓətɨ kpee haɓye, ka dwe haɓye, ka dwe ɗa ɗiye.
5Farisengɨn ka ji-lee kəndə ɓashitɨngɨn darən a ɗiyə Yesu atɨ, “Mɨnə ɗa lagbe dəw aawa koɗə kwale da mi kpanye, ɓətɨ yə sɨnggəm, hɨnggərən təna dɨ zɨmshe tənaawa suɓwa tyefingrən?”
6Yesu a luwa a sarən atɨ, “Diyalə kpale Ishaya a boyə nəngəwnə atɨ, taa diyalə kəwnə hwun ji-kwakpeyə. Naya nda doro,
“ ‘Minə a dɨ ndukodi
ka kwaamɨngrən ɓəmbə,
shezə vor hubosərən ndə ɓong-ɓong ke.
7Təna dɨ kale-gbəətə a nə ɓaa,
shee gɨrahaa ɓwaare
a tusa nə təna dɨ kəndən,
ɓətɨ gɨrahangɨn
dɨ haka Həmɨnpwa nda dɨma.’#7.7 Naasə: Ishaya 29.13.
8Hwuna ɗongdə ɓashita Musa a ɗakarə a shea nggur kwale da ɓwaare a kangə kan.”
9Nda mɨna sarən atɨ, “Hwunə ka kuta, a hwuna dɨ nggur gɨraha da Həmɨnpwa a mɨndə a gyenge gə hwuna ɗɨm humwatə a koɗə kwale dəwnə! 10Gə Musa a sa atɨ, ‘Hye ndukodə baagu ka nuwogu.’ Sə mgban, ‘Ma boyə baagən ka nuwogən lə hase, a mya ɓɨl mangɨn.’#7.10 Naasə: Dɨmatə 21.17; Livitikus 20.9. 11Hɨnggəwnə, hwuna sa atɨ, ma ushi baagən ka nuwogən, sa ndi ɓa nda və yə sɨnggən gə nda gwadərən, mye kəpdə shingɨn kat hɨnggə Həmɨnpwa nə. 12Gə-angɨn hwunaa yə ɗaka mangɨn nda gwadə yə baagən ka nuwogən. 13Sə mgban hwuna ɗongdə le da Həmɨnpwa, a nggur kwale dəwnə a kangə kan gə ɓwaare a koɗən. I shi nee də furi-furi sə hwuna dɨ ɗa.”
14Yesu a mɨna waga ɓwaare a paya dərən a hakan, nda sarən atɨ, “Samdə kwakingəwnə kɨləm kat. 15Sa kat pɨri dɨ kwaamɨ ɓwaara, aa dɨ gəədən nda gə takɨm. Sa dɨ dɨma dɨ kwaamɨ ɓwaara nə dɨ gəədən takɨm.”#7.15 I dorshi kada 16 a sa atɨ, “Ma ka kwaki kɨl le, maa nda saa kwakingɨn a kɨlə.”
17Ite Yesu a ɗaka ɓwaare a pɨrə hwoɗye, lagbe dan a ɗiyən le a nə lə səɗa nda boyo. 18Nda sarən, “Hwun taa lelə kəwna? Hwunaa leyə atɨ sa dɨ pɨrə kwaamɨ ɓwaara aa dɨ gəədən takɨm? 19Gəkɨlə sa dɨ pɨrə kwaamɨ ɓwaara, aa dɨ pɨrə hubosən, dɨ yedingɨn sɨzɨmtə a dɨ pɨrə təna ɓə dɨmə, ma kana zə beetɨ-haa.” (Ka ləməgingɨn 'ye Yesu a boyo nda sa atɨ, ɓwaara ɓa mba zɨmtə a zɨm nagi ndawula sɨzɨmti.)
20Yesu a pɨrə humwa ka byele a sarən atɨ, “Sa dɨ dɨma dɨ hubo ɓwaara nə dɨ takɨmdən. 21Gəkɨlə dɨ hubo ɓwaara shinə yang a dɨ dɨma: Ɗyangalə hase, ka sharawne, ka hɨrtə, ka ɓɨl we, ka bəə morye kat ka ɨl mandye. 22Ka omshe, ka kwo-nəha, ka vwakaha, ka gbər mandye, ka jiwne, ka kɨɗa kwake, ka ndukodə ne ka dɨɗəwne. 23Shi hashingɨn kat a dɨ dɨma dɨ hubo ɓwaara, shingɨn nə 'ye dɨ takɨma ɓwaara.”
Mwadiyale da mete aa Yawudati
(Matta 15.21-28)
24Yesu a ɗaka hangɨn a muɗə ji-vɨree takadə Taya. Nda pɨrə i hwoɗi ndaa mwo atɨ ɓwaare a leyə atɨ sɨne a hangɨn, kat ka angɨn ndaa mba ɓotə ɓodə nəngɨn ɓwaare a kwa leyə. 25-26Itɨ meti nə də mya mwasatɨrə a njiya Siriya, nggi Helinati kote ka njite ka nzə-dwatə a sɨsə. Də ɗəng ite ngga kɨlə atɨ Yesu pɨra a hangɨn, ngga shi asɨ fukə humwasən a nyisən atɨ maa nda dɨmdə nzə-dwate a sɨtɨ njisə.
27Yesu a sarə, “Ndɨka je a zɨmshe a kwamətə a hyaɓa a mbəə kat, gəkɨlə aa kana mya nggur sɨzɨmta je a ɗongə sakye.”
28Ngga luwa a san atɨ, “Həmɨmiye, hɨn leyə shezə kat ka angɨn sakye mgban a duwa ɗəm mosəryi sɨzɨmta je 'ye kəji njiya.”
29Yesu a sarə, “Gəkɨlə la hye luwa a boyo, zə wudə, nzə-dwatɨngɨn dɨmgə sɨtɨ njisa.” 30Ngga muɗə hwoɗye, a pa njisə a haa bətə nzə-dwatɨngɨn dɨmgə sɨsə.
Yesu a gwadə gbingaa ka tyeɓəltɨ jiime
31Yesu a ɗaka ji-vɨree takadə Taya a muɗə a koɗə dɨ vor vɨra Sidon a jengə a muɗə dɨ kwaka gərə Galili a zə dɨ basa Dikapolis. 32Mya shikan ka ama gbingə, jiiməngɨn a tyeɓələ ndaawa mba byele. Ɓwaare a nyisə Yesu atɨ maa nda pa mangɨn gə nda piyagə ootɨngɨn.
33Yesu a kɨttən təna dɨmgə vor ɓwaare kan, nda nzobdə gyelingɨn a kwaki mangɨn, nda təfdə nawye a pa jiimə mangɨn. 34Yesu a maddə nəngɨn a pwa a luwa pitə a san ka kwaame darən atɨ, “Effata!” Naarə ləngɨn nə, “Wuni.” 35A hangɨn tee gbyel, kwaki mangɨn a wonə, jiiməngɨn a tyeɓəli a para, nda tiya byele pepe.
36Yesu a fyel-kwakingrən atɨ ɓe tənaa boyə ama ləngɨn. Tənaa gbə kwaamɨngrən, kat ka angɨn ləngɨn a fɨlə a mbəgə hee kat. 37Ɓwaare a ndələ kɨr-kɨr, tən ta sa atɨ, “Nagi ndo sə nda ɗa, səngɨn nee pepe. Baa nda wana kwaki gbinge, myee jeemingrən a tyeɓələ mgban nda para baa tən ta mba byele.”
Kasalukuyang Napili:
Markus 7: bcy
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
