San Juan 14

Te Jesuse ja' sbelal ta banti ay te Tatile

1Te Jesús la yal:

—Ma me xawac' woclajuc te awo'tanique. Ch'uunaic te Diose, soc ch'uunawonic uuc te jo'one. 2Ta sna te Jtate, ay bayal ta jtsal ta bay ya x'ainexe. Te manchuc jichuque, ma ba la calbeyex te jichuque. Ya xba jchajbanbeyex awawilic tey a. 3Teme boone soc teme chajbaj awawilic cu'une, ya xcha'talon xan. Ya xtal quiq'uex bael tey a te banti ya xc'oone, tey me ya xc'oex a te ja'exe. 4Ana'ojic te banti ya xboone soc ana'ojic te bee —xi' te Jesuse.

5La yal te Tomase:

—Cajwal, ma jna'tic te banti ya xbaate. ¿Bit'il c'an jna'tic te bee? —xi'.

6Jesús la yalbey:

—Jo'on te beone, te smelelilone, soc te cuxlejalone. Jtul ma'yuc mach'a ya xtal ta stojol Jtat, jo'on nax ta jwenta.#Mt 11.27; Jn 1.18; 6.46; Hch 4.12. 7Teme ana'ojbonic jbae, ja' ana'ojbeyic sba uuc te Jtate. Ta ora bael to ana'ojbeyiquix sba soc awilojiquix —xi' te Jesuse.

8La yal te Felipe:

—Cajwal, ac'botic quiltic te Jtatique. Jich me ya xlaj co'tantic —xi'.

9Jesús la yalbey:

—Felipe, bayalix c'aal te joinejexe. ¿Ma to bal x'ana'bon jba? Te mach'a yilojonixe, ja' yilojix uuc te Jtate. ¿Bistuc te jich la awale: “Ac'botic quiltic te Tatile”, te xaate? 10¿Yu'un bal ma xc'ot ta awo'tan te jun ayon soc te Jtate? Ma jo'ocon jc'op jtuquel te bila ya calbeyexe. Te Jtat te jun ayon soque, ja' ya spas stuquel te yat'ele. 11C'otuc ta awo'tanic te ayon ta stojol te Jtate; te Jtate ay ta jtojol uuc. O teme ma spas awaiyique, ja' me xach'uunonic yu'un te at'eliletic ya jpase. 12Jamal ya calbeyex, te mach'a ya xch'uunone, te at'eliletic ya jpase, jich me at'eliletic ya spas uuc. Soc c'ax me jich ya spas stuquel, melel ya xboon ta bay te Jtate. 13Spisil te bila ya ac'anbeyic te Tatil ta jwenta, ya me jpasbeyex. Jich me ya x'ac'ot ta ilel yutsilal te Tatile ta swenta te Snich'ane. 14Te bila ya ac'anic ta jwentae, ya me jpasbeyex.#Mt 7.7-11; Lc 11.9-13; Jn 15.7,16; 16.23-24; 1 Jn 3.21-22.

Jesús la yal bit'il ya sticun tel te Ch'ul Espiritue

15“Soc teme c'uxon ta awo'tanique, ya me ach'uunbonic spisil te jmandale. 16Ya me jc'anbey te Jtate te ya sticunbeyex tel yan Joinwanej te ya sjoinex spisil ora stuquele, 17ja' bi, ja' te Espíritu te ya yac' ta na'el te smelelil c'ope. Jich yu'un te mach'atic ayic ta swenta te balumilale, ma xju' ya yic' ta yo'tanic, yu'un ma chicanuc ya yilic soc ma sna'beyic sba. Yan te ja'exe ya ana'beyic sba, yu'un ya sjoinex soc ya me x'ain ta awo'tanic spisil ora. 18Ma ba ya xjilex ta me'bal cu'un. Ya xtal joinex. 19Jteb sc'an xch'ayon ta sitic te mach'atic ayic ta balumilale. Yan te ja'exe, ya to awilon xan atuquelic. Melel cuxulon te jo'one, jich me ya xcuxinex uuc te ja'exe. 20Te bi c'aalil te ya xc'ot ta pasele, ya me ana'ic te ayon ta stojol te Jtate, soc te ja'exe, ayex ta jtojol, soc ayon ta atojolic uuc. 21Te mach'a yich'ojbon te jmandale, soc teme ya xch'uune, ja' me te mach'a c'uxon ta yo'tane. Te mach'a c'ux ya yaiyon ta yo'tane, c'ux me ya x'aiyot yu'un uuc te Jtate. C'ux me ya caiy ta co'tan uuc, soc ya me cac' sna'bonic jba ta lec —xi' te Jesuse.

22Te Judas (ma ja'uc te Iscariotee) la sjojc'obey:

—Cajwal, ¿bit'il ay a te ya awac' aba ta ilel ta jtojoltic te ma ja'uc ya awac' aba ta ilel ta stojol te mach'atic ayic ta balumilale? —xi'.

23La yal te Jesuse:

—Te mach'a c'uxon ta yo'tane, ya xch'uunbon te jc'ope soc c'ux ya x'aiyot yu'un te Jtate. Soc ya me xtal join spisil ora soc te Jtate. 24Te mach'a ma c'uxucon ta yo'tane, ma xch'uunbon te jc'ope. Te c'op yacalex ta yaiyel stojole ma cu'unuc, ja' yu'un te Jtat te la sticunon tele.

25“La me calbeyex awaiyic spisil in to te bit'il ayon to ta awolilique. 26Te Jmuc'tesej-q'uinal awu'unique, ja' te Ch'ul Espíritu te ya sticunbeyex tel ta jwenta te Jtate. Ja' me ya yac'beyex anopic spisil stuquel, soc ja' me ya yac'beyex ana'ic stojol ta spisil te bi la calixe.

27“Ya cac'beyex jilel lamal q'uinal. Ja' ya cac'beyex jilel te lamal q'uinal cu'une. Ma pajaluc soc te bit'il ya yac' te balumilale. Ma me xawac' woclajuc awo'tanic soc ma me xiw awo'tanic. 28Awaiyojiquix stojol cu'un te ya xboone soc te ya xtal joinex xane. Teme c'uxon ta awo'tanic ta melele, bujts'najemix awo'tanic te jichuque, melel la calix te ya xboon ta bay te Jtate, yu'un ja' cajal cu'un stuquel. 29Neel me la calbeyex jilel, swenta yu'un jich me ya ach'uunic te c'alal jich ya xc'ot ta pasele.

30“Ma spasix te bayal bi ya calbeyex xane, melel jtalelix te ajwalil yu'un in balumilal to. Ma'yuc bi xju' yu'un te ya spasbon ta jtojole. 31Swenta yu'un ya me sna'ic te mach'atic ayic ta balumilal te c'ux ta co'tan te Jtate, ya jpas te bila yalojbon ta mandale. Jajch'anic, ya xbootiquix —xi' te Jesuse.

Kasalukuyang Napili:

San Juan 14: TZOXCH

Haylayt

Ibahagi

Kopyahin