ኻወርየታኒዙ ሰቭ 9
9
ፈወነ 9
ሳውል ክርስቶስት ኣምነጘ
(ኻወ. 22፡6-16፤ 26፡12-18)
1ሳውል ግን ነኳን ኣሽ ኣደረት ምመናንድዛት ቍውጠ ፊክራ፣ ነንም ካኽነጣነ ኻልቀይል ፊሩ። 2ኣደረት ጒደነድ ቲክነቍ ግልቍም ኣጝነ እቍን ጝጊስ ችጝሽ፣ እፅቋ እየሩሳልየም ትጐ ነስጠ በን ደማስቈ ፅበቍ ምኵራቫኒዝ ደብዳቢ ፃፍጠ ማጥን ካኽነጣነ ኻልቀድየንት ጨዉ። 3ፊራም ደማስቈ ትጐ ችጝጠ ጓንድ፣ ድጝግት ጝጅልወይል ሲመይስ ብርኻን ምርቑ። 4ጘጝም ዝቨይል ሊቩ፤ ኣይንድም፦ «ሳውል! ሳውል! ውር ቃጥ የጝ ይት ሲድስረውድ?» የው ድመ ወሹ። 5ሳውልም፦ «ኣደረወ! ክት ኣው የጝ?» ዩ። ጘጝም፦ «ያን ክት ሲድስረው እየሱስ የጝ፤ ሰለይዙ ጫፍድ ደድር ችብትራን ክቕምስ ወስጡዋ!» ዩ። 6ጘጝም ዲንቅሻ፣ ጐውትዝም ቈጥቈጥ ያ፦ «ኣደረወ! ነን ውር ፃቫንስ በንረኵ?» ዩ። ኣደረም፦ «ጕር ኻትመይል ጢ፤ ክት ፃቭተ ጥውሸውድየንትቅ ጝጊስ ድቍጥቍ» ዩ።
7ሳውል ጅቅ ፃጛ ዊነቍ እቅድ ግን፣ ድመድ ውሽጛ ኣውማውትቅ ቓሊየቍም። ኣቓንስቅም ዊግተነውቅ ብጛንስቅ ድደይዝጘ ኣቕጝ ችብር። 8ሳውልም ሊቨው ስፍረይስ ጕ ጝልጣንድ ብዛንድ ውረውረም ቓለነው ቸልየው፤ ኣቓንስቅም ጝናንድ ፃይጝ ቃውጛ ደማስቈ ኻትመይል ችጝዝ። 9ሻቘ ግርቅም ውረውረቅ ዂጝቀ ዝዪይጝቀ ኻርቭ ሳብጡ።
10ደማስቈስም ኻናንየ የነው ላው ኣደረት ክንደተ ዊኑ፤ ኣደረም፦ «ኻናንየ!» የው ጭጙ፤ ጘጝም፦ «ኣደረወ! እንወ እኩና!» ዩ። 11ኣደረም፦ «ጕ፤ ‹ጭቅ የው› ይሽተው ጒደነይዝ ፃቭር ይዅዳ የነው እጅሪዝ ጝኒል ሳውል ይሽተው ላው ጠርሲስቱ እጅር ደምዝ፤ ጘጝ ጝግል ኣቕ ፃልያ ጐይኩ። 12ቈሽም ኻናንየ የነው እጅር ጘጝ ፅበው ስፍረይል ተር ጝናንድ ጝዲጊል እቝራንድ ጝልጣንድ ቢትጥጘት እትለዝ ቓልኩ» ዩ። 13ኻናንየም፦ «ኣደረወ! እን እጅርድ እየሩሳልየም ፅበቍ ክቅዱሳኒል ውር ቝጠ ቘጨ ችጝዘጘ ንቕፀቍ እቂስ ወጭኩን። 14ነንም ኣሽ ክሽድ ጭጘቍድዛትቅ እፁጠ ማጥን ካኽነጣነ ኻልቅጢስ ስልጣን ለምር የጝ እንል ተረውድ» ዩ። 15ኣደረም፦ «ዝም ይር ፊጥ፤ እን እጅርድ ኣኽዛቫኒዝመ ንጕሳኒዝ፣ ቈሽም እስራየልት ኽዝቪዝ በዊልቅ ይሽድ መውርጠ ማጥን ይቕምስ ማርፅኩን። 16ያንም ይሽዝ ዋቐ ሚከረ ለምርጠጘ ቓሊስጭር» ዩ።
17ኻናንየም እድ ኣዚተው ጝኒል ፊር ጥዉ፤ ጝናንድም ሳውልት ዲጊል እቝር፦ «ይዝን ሳውልወ! እንጐ ተትራ ጒደነይስ እትለው ኣደረ እየሱስ ክእልጣንድ ቢትጥጘ ማጥን፣ መንፈስ ቅዱስዝም እቻተ ማጥን ይት ክጐ እፃቕኩ» ዩ። 18ኣይንድም በውዝ ሳውልት እልጣኒስ ቓፍ ተከው ሚንትርነ ቓቪት ሊቩ፤ እንደ ገነም ቓለነው ቸሉ፤ ጘጝም ጕ ጣምቅሹ። 19እንዝ ግረ ኣረ ጣም በርታቑ፤ ደማስቈ ፅበቍ ምመናኒጅቅም ዊትቍ ግርቅ ሳብጡ።
ሳውል ደማስቈ ዊነጘ
20በውዝም እየሱስ እደረት ዅር ኣቐጘ ምኵራቫኒልቅ ሲቭከነው ኪርሙ። 21ወሸቍ እቅድም ጊርምሽጛ፦ «እን እጅርድ እየሩሳልየምስ እን ሽድ ጭጘቍድዛትቅ ሲድሳ ዊነው ኣየውቀ? ቈሽስ ጛት እፅቋ ካኽነጣነ ኻልቅጢል ፊስጠ ኣየውቀ እንጐ ተረውድ?» ይ። 22ሳውል ግን በርታቓ ፊሩ፤ ደማስቈ ፅበቍ ኣይዅዳኒዝም እየሱስ ጘጝ ክርስቶስ ኣቐጘ ኣስርድዛ ጝታምቸድ ዲቭሳ ዊኑ።
23እነያ ንቕፀቍ ግርቅ ዲቍጘት ግረ ኣይዅዳንድ ሳውልት ቁጥጘ ማኽርኽርሽ።#2ቈረ. 11፡32-33። 24ጘጝ ግን ጝታኻሰቭድ ኣርቕ ዊኑ፤ ጛይም ጝት ቁጥጘ ኻትመይዝ ሚረድ ኻር ጊርቅ ሊሚድጛ ዊን። 25ዊገድ ግን ጝክንደጥድ ኻሪዝ ቅርጫትዝ ፃቭጝ ግምቢዝ ሳ ጊምዝጝ በርስ።
26ሳውልም እየሩሳልየም ችጛንድ፣ ምመናኒጅቅ ዲቭልቅሽጠ ሚኵሩ፤ ጛይ ግን ክርስቶስት ኣምነጘ ኣምነነው ብጛንስቅ እጝቅቅ ጐውት። 27በርናቫስ ግን ፊስ ኻወርየታኒል ኣልሱ፤ ጒደነይስም ኣወሽ ኣደረት ቓለጘ፣ ኣደረም ጝጭስ ዊግተጘ፣ ቈሽም ደማስቈስ ኣወሽ እየሱስት ሽዝ ዲፍር ሲቭከጘ ጛጭስ ኣስርድዙ። 28ሳውልም ጛጅቅ ጐዩ፤ እየሩሳልየም ኻትመይልም ዋጥርጥራ ኣደረ እየሱስት ሽዝ ዲፍር ዊግታ ዊኑ። 29ግሪክስ ተረቍ ኣይዅዳኒጅቅቅ ዊግሻ ተከራክርሻ ዊኑ፤ ጛይ ግን ቁጥጘ በን። 30ምመናን ግን እኒንት ኣርቕጛንድ ቂሳርየ ትጐ ጊምዝጝ ጠርሲስ ትጐ በርስ።
31ይዅዳታል፣ ገሊለታል፣ ሰማርየታልም ዊነቍ ምመናንድም ዲግተ ችጝጝ ዳኽነዝ ጐይ፤ ጣጝክርም፤ እደረትም ጐውትጛ መንፈስ ቅዱስዝም ዲብሽትጛ እግዘዝ ንቕፅጛ ፊር።
ቢጥሮስ ልደታል እየብየታል ወንጌል ሲቭከጘ
32ቢጥሮስም ኻግርዝ ኻግር ጅልዋንድ ልደ ፅበቍ ቅዱሳንድዛት ቈሽ ገቭስጠ ጊሙ። 33ጝጊስም ሰውጠ ምት ምሉ ፅውዝጅነ ኣቕ ኽሪ ፅበው ይንየ የነው ለውሻሽ እጅር ችጙ። 34ቢጥሮስም፦ «ይንየወ! እየሱስ ክርስቶስ ቓዝጡ፤ ጕር ክኣረትድ ወፃቕ» ዩ። ይንየም ኣይንድ ብድግ የው ጉ። 35ልዳስመ ሳረውነት እቅድቅ እኒንት ቓልጝ ኣደረ እየሱስት ኣምን።
36እየብየስም ጣቪተ ይሽትረይ ላይ ኣምንደይ እውነ ዊንች፤ ጝርሽዙ ትርጕምድ ዱርቀ#9፡36 ጣቪተ ኣረማይክ ቋቈይዝ ኣቓንድ ዱርቀ ቈሽ ግሪክ ቋቈይዝ የጝ፤ ጝትርጕምድም ማጠቈ የነት የጝ። የነት የጝ፤ እኝቸን እውነየን ዊትርቅ ቀሰው ሰቭ ሰራሽረይ፣ ምፅዋትም ማፅውትራ ፅብረይ ቀስረይ እጅር ዊንች። 37ጚይም ኣይንት ሳብጢዝ ክርች፤ እቅድም እርሸድ እቓስጝ ዲቭሪል ፍስጝ እቝር። 38ልደ እየብየስ ጣቀት ኣራንስቅ፣ ምመናንድም ቢጥሮስ ልደ ፅበጘ ወሽጛንድ ሊጘ እቅ እፃቕጝ፦ «ኣለቀይ ይናጐ ለው ቃዚ» ይጝ ጨው። 39ቢጥሮስም ጕ ጛጅቅ ፊሩ፤ ጝግል ችጛንድም እርሸድ ፅበው ዲቭሪል ክቢስ፤ ልጀጊርዳንድቅ ጝት ኪብጝ ሊዝጛ ዱርቀ ጛጅቅ ፅብራ ሰራሽረቍ ጥብቁዋኒዝመ ኣልቢዝዛት ቓሊስ።
40ቢጥሮስም እጝቅትቅ ቢዘይል ፊስ ጝግርቪዝ ግርቨቭሽ ፃልዩ። እርሸይዝጐም ኣልት የው፦ «ጣቪተ ጕ!» ዩ፤ ጚይም ጝርእልጣንድ ብዝች፤ ቢጥሮስትም ቓልድር በትር ጭቅ ይር ጕር ጐይች። 41ጘጝም ጝርናንድ ፃይ ጒስ ችብሱ፤ ልጀጊርዳኒዝመ ላጥ ቅዱሳንድዛትቅ ጭጝ ርዅየዝ ጝታጭስ ኣስረክቭዙ። 42እን ዊገድም እየብየ ኻግሪልቅ ኣርቕሽቱ፤ ንቕፀቍ እቅም ኣደረ እየሱስት ኣምን። 43ቢጥሮስም ላው ስሙን ይሽተው ቀርቭር ፈቀተ እጅርዝ ጝንል ኣቕ እክሰው ግርየ እየብየ ፅቡ።
Kasalukuyang Napili:
ኻወርየታኒዙ ሰቭ 9: ኽምጣኣኪ
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in