ኻወርየታኒዙ ሰቭ 10
10
ፈወነ 10
ቢጥሮስ ቈርነሊወስ ትጐ ጭጝሽ ፊረጘ
1ቂሳርየ የነው ኻግሪል፦ ‹ኢጣሊቅየት ክፍለ ጠውር› ይሽተው ሰራዊቲል ቈርነሊወስ የነው ላው ላዝ ኻልቀ እጅር ዊኑ። 2ጘጝ እጅርድ እጝቅ ጝበተሰቪጅቅ እደረት ኣምልከው መንፈሳዊ እጅር ዊኑ፤ እቅዝ ጭቕጘ ማፅውተው፣ ቈሽም ዊትርቅ እደረ ትጐ ፃልየው እጅር ዊኑ።
3ላው ግርየ ፃይጨ ሰት ኣጠይዝ እደረት መላክ ጝጐ ተር፦ «ቈርነሊወስወ!» የው ጭጛንድ እትለዝ ቓሉ። 4ጘጝም ዳጝግፅ ትክ የው ቓላ፦ «ኣደረወ! ውረይ» ዩ። መላክድም፦ «ክፀለውቲዝመ ክምፅዋቲዝ እደረት በዊል ኻስቭሽ ኣርግኩ። 5ነንም እዮቢ ትጐ እቅ እፃቕር ቢጥሮስ ይሽተው ስሙንት ነስሽ። 6ጘጝ ቀርቭር ፈቀው ባኽር ደዪይዙ ስሙንት ጝን ኣቭንወ ጐይኩ፤ ክት ፃቭተ ጥውሸውድቅ ጘጝ ድቍጡ» ዩ። 7ቈርነሊወስም ጝት ዊግሰው መላክድ ፊረጘ ጝኣሽከራኒስ ሊጘይዝመ ጝጭስ ኣምንሽተቍ ዊተድሪስ እደረት ጐውተው ላውድ ጭጙ። 8ጛጭስም ኣቐው ዊገድቅ እጝቅትቅ ድቍ በር እዮቢ ትጐ እፃቑ።
9እድ እፃሸቍ እቅድም ጝኣምርሲዝ ኻትመየትል ችጝጥጘ ጕጘጘ ዋልጠ ሰት ኣጠ ኣቓንድ ቢጥሮስ ፃልይጠ ዲቭሪል ክብዩ። 10ኣይንድም ግድርዳንስቅ ዀነው ሚ በኑ። ጝምዘትም ኣስልሻ ሲጝቀ እትለ ቓሉ። 11ሲመይም ቢት ላው ገርደነ ኣልቨ ተከው እረቈ ሲዘት ማይዘኒዝቅ ፃይሽ ዝቨይዝጐ ጊማንድ ቓሉ። 12ጘጝ ኣልቨይልም ሲዘ ልኵጣንዝ ፃጘቍ ቲተቲተቍ እንሰስድ፣ ዝቨዝቨ ዊትርሽጛ ፃጘቍዝመ ሲመይቱ ቢረቍ ዚልቅድቅ ዊን። 13ኣይንድም፦ «ቢጥሮስ! ጕ እንዛት ዝውራ ዃይ» የው ድመ ጝጐ ተሩ። 14ቢጥሮስም፦ «ኣደረወ! እኒንትስ ፃቨቅም፤ ያን ቅዱስ ኣየው ርኵስ ኣቐው ስየ ዅም ኣርቐቅ» ዩ። 15እድየን ድመድ ግን ሊጘት ጝጐ ተር፦ «እደረ ንፅዅ ፃቨውድየንት ክት እርኵስ ይተ ጥውሻውም» ዩ። 16እነያ ሸውን ደግምግመት ግረ እድየን ገርደነ ኣልቨ ተከው እረቈድ ሲመይ ትጐ ፊስሽቱ።
17ቢጥሮስም፦ «እን እትለይዝ ጝትርጕምድ ወረጘ ኣጢ?» ያ ጝኻሳቪዝ ጨጝቅሻ ሲጝቀ ቈርነሊወስ እፃቐቍ እቅድዛይ ስሙንት ጝንድ ዋቕርጛ ተርጝ ሚረይል ችብር። 18ጝታድመድም ኣጕስ ሽጝ፦ «ቢጥሮስ ይሽተው ስሙን የነው ኣቭን እጅር እንል እኩመ?» ይጝ ዋቕር። 19ቢጥሮስም እድ ቓለው እትለድየንት ጕያ ማላ ሲጝቀ መንፈስ ቅዱስ፦ «እንወ ሻቘ እቅ ክት ደምዝጘኵ። 20ጕ ጊምር ዲምቅጭ፤ እን እቅድዛት እፃቐርድ ያን የጝ፤ ኣቓንስቅም ጣርጥሪጝቀ ጛጅቅ ፊጥ» ዩ። 21ቢጥሮስም ጊም፦ «ክትን ደምዝርነው እጅርድ ያን የጝ፤ ክታተትርነዊዝ ምላሰንድ ወረጘ የጝ?» ዩ። 22እቅድም፦ «ይን ተርነውድ ቈርነሊወስ የነው ላዝ ኻልቀ እጅሪስ እፃሽን የጝ፤ ጘጝ እጅርድ ፃድቅ፣ መንፈሳዊ፣ ቈሽም ኣይዅዳነ ኽዝቭድም ጭቕጘ ኪብርዝጘው እጅር የጝ። ክት ጝጝኒል ጭጝስ ክት ይረውድየንትቅ ወሽጠ ማጥን ቅዱስ መላክ ጝጭስ ድቁ» ይ። 23ቢጥሮስም እቅድዛት ለምር ኣቒ ጝኒል ድው ኣቭኑዙ።
ጛምርሲዝም ጕ ጛጅቅ ፊሩ፤ እዮቢ ፅበቍ ምመናኒስም ላው ላው እቅ ጝጅቅ ላው ኣቕጝ ፊር። 24ጛምርሲዝም ቂሳርየ ችጝ፤ ቈርነሊወስም ጝዚምዳኒዝመ ጝፃምጢዝቅ ኣኽቭ ጐይ ሊሚዳ ዊኑ። 25ቢጥሮስም ጝግል ችጛንድ ቈርነሊወስ ለምር ጝልኲል ሊቭ ሲግዱ። 26ቢጥሮስ ግን፦ «ያንም ክጘ እጅር የጝ፤ በጭ ጕ» የው ጒሱ። 27ቢጥሮስም ጝት ዊግሳ ኣቒ ጥዋንድ ንቕፀቍ እቅ ኣኽቭሽጝ ዊን። 28ኣይንድም እነይ ዊግቱ፦ «ኣይዅዳነው እጅር ላየ ዊግን ጅቅ ዲምቅሽጠም ኣነ ተቫቭርሸጠ ይናኽግድ ፊቅዳየጘ ክታቕም ኣርቕርነውድ የጝ፤ ዊገድ ግን ያን ኣውማውትቅ፦ ‹ርኵስ› ዊንም፦ ‹ቅዱስ ኣየው› ያይቀጘ እደረ ቓሊስኩ። 29ኣቓንስቅም ክትን ጭጝርናንድ ውርቅ ኣወላውሊጝቀ ክታጐ ተጡን፤ ነስየ ውር ማጥን ጭጝርነጘ ኣርቕጨ በነኵን» ዩ።
30ቈርነሊወስም እንት ዩ፦ «ንጭ ሲዘ ግርቅ ልክ እኝቸን ፃይጨ ሰትሸንስ ይጝን ኣቕ ፀለውት ፃቫ ሲጝቀ ድጝግት ፃረው ብርቕርቕ የው ኣልቨ ሲረው ላው እጅር ተር ይበዊል ችብሩ። 31እንት የውም ዊግቱ፦ ‹ቈርነሊወስወ! እደረ ክፀለውትድ ወሽኩ፤ ድኺዝ ይውረው ክምፅዋትድም ለምርኩ። 32ነንም እዮቢ ትጐ እቅ እፃቕር ቢጥሮስ ይሽተው ስሙንት ጭጝሽ፤ ነን ጘጝ ባኽር ደዪል ፅበው ስሙን የነው ቀርቭር ፈቀተ እጅሪዝ ጝኒል ኣቭንወ ጐይኩ› ዩ። 33ያንም በውዝ ክጐ እቅ እፃቑን፤ ክትም ተረነውድ ቀሰው ፃቭሩ፤ ነስየ እደረ ይናጭስ ዊግተ ማጥን ኣዘውድየንትቅ ወሽነ ማጥን ይን እጝቅቅ እደረት በዊል ኣኽቭሽንኵኑን» ዩ።
ቢጥሮስ ቈርነሊወስታት ክንሰጘ
34ቢጥሮስም እንት ያ ዊግትጠ ኪርሙ፦ «እማንም እደረ እጅርስ እጅር ቲዘ ቲዛየጘ ኣድሉዋየጘም ገነ ነን ኣርቑን።#ዘዳ. 10፡17። 35ኣውማው ኻግርዙ እጅርቅም ኣቕሽ እደረት ጐውተው፣ ጝት ዲስ ሸውድየንትቅም ፃቨው ኣቐውዝየ እደረ እን እጅርድየንት ለምረው የጝ። 36እደረ ዲግተይዙ ወንጌልድየንት ይናእጝቅት ኣደረ እየሱስ ክርስቶስስ ፃቭ እስራየላኒዝ እፃቑ። 37ይዃንስ ክንሰው ጥምቅቲዝ ግረ ገሊለስ ኪርም ይዅዳ ኻግሪል ኣሽ ኣቐው ዊገድቅ ክታቕም ኣርቕርነኵ። 38እደረ ናዝሪትቱ እየሱስት መንፈስ ቅዱስዝ ቀቫቑ፤ ኻይልም ይዉ፤ እደረ ጝቕምም ጝጅቅ ዊናንስቅ ቀሰው ሰቭ ሰራሻ፣ ዲቪሎስስ ቅምሸቍድቅ ቓዛ፣ እስራየላኒዝቍ ኻግራኒልቅ ጅልዉው። 39ይዅዳት ገጠሪዝመ እየሩሳልየም ኻትመይዝቅ ጘጝ ሰራሸው ዊገይዝቅ ይን ሚዝረጫን የጝ፤ ጝትም ቃነል ሲቅልጝ ቍዉ። 40ዊገድ ግን እደረ ጝት ሸወትረ ግርየይዝ ክርጘይስ ጕይስ እትልዙ። 41እትለውድም እጝቅዝቅ ኣዪጝቀ፣ ክርጘይስ ጐት ግረ ጝጅቅ ኣቕን ዅነቅ ዝይነቅ፣ ጝሚዝረጫንም ኣነቅ ይናጭስ የጝ፤ እደረ ይናት እንዝ ማጥን ማርፅ ዊኑ። 42ጘጝ ርዅየዝ ፅበቊዝመ ክረቍዝቅ ፊርድጠ ማጥን እደረ ዊስነጘ ክንስናንስመ ሚዝርድናንስ ማጥን ጝቕም ይናት ኣዝኩ። 43ጝዝ ኣምነውድቅ ጝሽⶔዝ ጝኽጥያቲስ ይቅርተ ችጝጠጘ ኒቪያታንድቅ ሚዝርድጝኩ።»
ቈርነሊወስታግል መንፈስ ቅዱስ ጊመጘ
44ቢጥሮስ ገነ እኒንት ዊግታ ሲጝቀ ቃልድ ወሸቍ እቂልቅ መንፈስ ቅዱስ ጊሙ። 45ቢጥሮስ ጅቅ ተርጝ ዊነቍ እየሱስት ኣምነቍ ኣይዅዳንድም እደረ ኣኽዛቫኒዝ መንፈስ ቅዱስት ይወጘ ቓልጛንድ ጊርምሽ። 46እኒንት ኣርቕጘውድም ኣኽዛቫንድ መንፈስ ቅዱስ ይወቍ ላጥ ቈⶖቍጥዝ ዊግትጛንድ ወሽጛንስቅ የጝ። 47ቢጥሮስም ኣይንድ፦ «ይን መንፈስ ቅዱስት ለምርነጘ እንዛይ እቅድም ለምርጘውዝየ ኣው የጝ ጛት ኣቝዝ ጣምቅሻይጘጘ ኪልክልጠ ቸለውድ?» ዩ። 48እንዝ ማጥን፦ «እየሱስ ክርስቶስት ሽዝ ጣምቅጭጥን» የው ኣዙ፤ ጛይም እንዝ ግረ ጛጅቅ ሳብጠ ማጥን ጨው።
Kasalukuyang Napili:
ኻወርየታኒዙ ሰቭ 10: ኽምጣኣኪ
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in