ኻወርየታኒዙ ሰቭ 8
8
ፈወነ 8
ምመናንድ ሲድሽጘጘ
1ኣይንድም እየሩሳልየም ዊነቍ ምመናኒል ኽየው ስድት ተሩ፤ ኻወርየታንድ ጭቝ እዳጛንድ ላጥድ እጝቅቅ ይዅዳስመ ሰማርየስታግልቅ ቢትንሽ። 2መንፈሳዊያን ኣቐቍ እቅም እስጢፋነውስት ዲቭ፤ ኽየው ሊዝም ሊዝ። 3ሳውል ግን ምመናንድዛት ድስጠ ከምሽ ጉ፤ ጝንዝ ጝን ጥዋ እውነ ግልወድየንትቅ ጒዛ ወኽኒ ጝንል ድዋ ዊኑ።#ኻወ. 22፡4-5፤ 26፡9-11።
ወንጌል ሰማርየ ጥወጘ
4ሲድሽሸቍ ምመናንድም ችጘው ብጣይልቅ እደረት ቃልድ ሲቭክ። 5ፊልበውስም ሰማርየት ኻትመይል ፊር ክርስቶስት ሲቭኩ። 6ንቕፀው ኽዝቭም ፊልበውስ ዊግተው ዊገድ ወሻንድ፣ ጘጝ ፃቫ ዊነቍ ታምራንድም ቓላንድ፣ እጝቅቅ ላው እዘን ኣቕ ኣስክስ ወሹ። 7ርኵሳን መንፈሳንድም ጝታድመድ ኣጕስ ሽጝ ቓፅጛ ንቕፀቍ እቂስ ፍጛ ዊን፤ ንቕፀቍ ለውሻሻንዝመ ኻካዛንዝም ቓድጛ ዊን። 8ኣቓንስቅም ጚ ኻትመየንትል ኽየው ዲስተ ኣቑ።
ሲሙን ይሽተው ጠⶖቋይ እጅርድ
9ዊገድ ግን እንዝ ሚቅ ኣስማት ፃቫ ሰማርየት ኽዝቭድቅ ጊርምሳ ዊነው ሲሙን የነው ላው እጅር ዊኑ፤ ጘጝም፦ «ያን ኽየር የጝ» ያ ዊግታ ዊኑ። 10ኽየው እጥንድቅም እጝቅ፦ «እን እጅርድ ኽየው እደረት ኻይልድ የጝ» ያ ጝት ወሻ ዊኑ። 11እክሰው ግርየም ጥቈለዝ ጊርምሳንስቅ ኣንክርሻ ቲክና ዊኑ። 12ዊገድ ግን ፊልበውስ እደረት ምጝግስትዝመ እየሱስ ክርስቶስት ሽዝ ኣምነነውዝ ሲቭከውድየንት ወሽጛንድ ግልቍድም እቍንድም ኣምንጝ ጣምቅሽ። 13ጝቕም ሲሙንም ኣምን ጣምቅሹ፤ ፊልበውስ ጅቅም ተቫቭርሽጠ ኪርሙ፤ ጘጝ ፃቨቍ ዲንቅሰቍ ታምራኒዝመ ምልክታኒዝም ቓላ ጭቕጘ ጊርምሹ።
14እየሩሳልየም ዊነቍ ኻወርየታንድም ሰማርየት እቅድ እደረት ቃልድ ለምርጘጘ ወሽጛንድ ቢጥሮስስመ ይዃንስስ ጝታጐ እፃቕ። 15ጛይም ጝግል ችጛንድ መንፈስ ቅዱስት ለምርጥጘ ማጥን ሰማርየት እቂዝ ፃልይ። 16ምላሰንድም ሰማርየት እቅድ እየሱስት ሽዝ ጣምቅሽጝ ዊንጚ መንፈስ ቅዱስ ገነ ጛጊስ ላው እጅርል እኳ ጊሚየውም ዊኑ። 17እንዝ ማጥን ቢጥሮስስመ ይዃንስስ ጝታናንጣንድዛት ጛታዲጊል እቝር፤ ጛይም ኣይንድ መንፈስ ቅዱስት ለምር።
18ሲሙንም ኻወርየታንድ ጝታናንጣንድ ጛታዲጊል እቝርጘቍ እቅድቅ መንፈስ ቅዱስት ለምርጛንድ ቓል ጛጭስ ቍርሻን ፃይ ተር፦ 19«ይናንድ ጝዲጊል እቝረው እጅርድየንቅ መንፈስ ቅዱስት ለምርጠ ማጥን ይጭስም እኒን ስልጣንድ ነቅጥን» ዩ። 20ቢጥሮስ ግን፦ «እደረት ይውትድየንት ጊንዝቭዝ ጅቭተ በንርኵሩ፤ ኣቓንስቅም ክኪንዝቭድ ክቕም ጅቅ ድዝነ። 21ክእዘንድ እደረት በዊል ጭቅየውም ኣየው፤ ኣቓንስቅም ክት እን ዊገይስ እድል ፊንተ እጅረርም። 22ነንም እን ክጭቕቲስ ኣኑሽር ንስኻ ጢ፤ ምናልቫች ክእዘኒዝ ኻስቭረውድየንት ይቅር ይጡ ኣቕሽ እደረት ጨው። 23ምላሰንድም ማረው ቅንየዝ እቻቕር ኣመፂዙ ሰንሰለትዝ እፁሽረጘ ቓለኵን» ዩ። 24ሲሙንም፦ «እን ዊግትረዊስቅ ሚንትርነ ይግል ችጛየጘ ክታቕም ይማጥን ኣደረት ጨውጥን» ዩ።
25ቢጥሮስስመ ይዃንስስም እደረት ቃልድ ሚዝርድጝ ቐናዝጝም ድቍጘት ግረ ንቕፀቍ ሰማርየት ኻግራኒልቅ ወንጌል ሲቭክጛ እየሩሳልየም ዋጥር።
ፊልበውስ የጥብየቱ ጀንደረቨ እጅሪዝ ወንጌል ሲቭከጘ
26ኣደረት መላክም ፊልበውስት፦ «ጕር እየሩሳልየምስ ደቩቭዝጐቱ ፃቭር ጋዘ ትጐ ጊምዘው በራኸይዙ ጒደነይዝ ፊጥ» ዩ። 27ጘጝም ጕ ፊሩ። ጒደነይስም ላው ኽንደክየ የነይ የጥብየት ንግስትት ባለሟል፣ ጝርጊንዝቪልቅም ይምሸው ኣዘተ ጀንደረቨ እጅር ችጙ፤ ጘጝ እጅርድየን እየሩሳልየም ሲግድጠ ፊር ዊኑ። 28እየሩሳልየምስም ዋጥራንድ ጝሰረገለይል ጐይ ነቭይ ይሳያስት መፃፍድ እንቭቫ ዊኑ።
29ኣይንድ መንፈስ ቅዱስ ፊልበውስት፦ «ፊጥ እኒን ሰረገለይል ኣልትር ዲምቅጭ» ዩ። 30ፊልበውስም ውጢ ሰረገለይል ኣልት ዲምቅሽ በር፦ «እኒን ኣንቭቭረው መፃፊዙ ጝትርጕምድየንት ኣርቕረኵመ?» ዩ። 31ጀንደረቨድም፦ «ኣስርድዘው እጅር ችጚጝቀ ኣወሽ ኣርቕጨ?» ዩ፤ ፊልበውስትም፦ «ለው እንል ሰረገለይል ክብይር ጐይ» የው ጨዉ። 32ጀንደረቨድ ኣንቭቫ ዊነው መፃፊዙ ቃልድም እንት የውድ ዊኑ፦
«ዝውጥነ ሸመነው ቢገይዝጘ ሸምሹ፤
ጝፅቭቀድ ቀቭጛንድ ዝም የው ቃፉሪዝጘ፣
ጘጝም ጝምቸድ ብዚየውም።
33ተዋርድሹ፤ ጭቅ የው ፍርድም ችጚየውም፤
ጝርዅየድ ዝቨቲስ እክልስጝኵ፤
ኣቓንስቅም ጝዚረዝቍዝ ዊግትጠ ቸለውም እጀው።»#እሳ. 53፡7-8።
34ጀንደረቨድም ፊልበውስት፦ «ነቭይድ እኒንት ዊግተውድ ኣውት ማጥን የጝ? ጝቕምት ማጥንመ ዊንስ ላየ እጅርዝ ማጥን የጝ? ኣለቀይ ድቍ» ዩ። 35ፊልበውስም ኣይንድ ዊግትጠ ኪርሙ፤ ጘጝ መፃፊዙ ቃሊስ ኪርም፣ እየሱስት ማጥን ወንጌልድ ሲቭኩ። 36ፃጛም ኣቝ ፃየው ስፍረል ችጝ፤ ጀንደረቨድም፦ «እንወ እንል ኣቝ እኩ፤ እደስለ ጣምቅጫይቀጘ ይት ኪልክለው ዊገድ ወረጘ የጝ?» ዩ። 37ፊልበውስም፦ «ክፍፅም እዘኒዝ ኣምንደውዝየ ጣምቅሸነው ቸልደኵ» ዩ፤ ጘጝም፦ «እየሱስ ክርስቶስ እደረት ዅር ኣቐጘ ኣምነኵን» ዩ። 38ሰረገለድየንትም ችብርጠ ማጥን ኣዙ፤ ጝታቪልም ኣቕጝ፣ ኣቚል ጊም፤ ፊልበውስም ጀንደረቨድየንት ጣምቁ። 39ኣቚስም ፍጛንድ መንፈስ ቅዱስ ፊልበውስት ናጥቅ ፊሱ፤ ጀንደረቨድየንም ጝዝለ ሊጘት ቓሊየውም፤ ኣቕሽም ኽየው ዲስተዝ ጝጒደነድ ፊሩ። 40ፊልበውስ ግን ኣዛጠውንስ ችጝሹ፤ ቂሳርየ ችጝጢስቅም ጅልዋ ኻትምጢዝቅ ወንጌልድየንት ሲቭካ ዊኑ።
Kasalukuyang Napili:
ኻወርየታኒዙ ሰቭ 8: ኽምጣኣኪ
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in